21/07/2025
كسورية ❤️
مثلي مثل كل السوريين عمتابع أخر الأخبار وأنا بس عمحاول أفهم وأستوعب شو عميصير وما عمستوعب
اللي عميصير أكبر من طاقة تحمل أي سوري شريف
اللعنة الجغرافية اللي سوريا محطوطة فيها يمكن حضل تلاحقنا لنموت
بلدان كثيرة ما بتتمنى استقرارنا ولا بتتمنى ازدهارنا وعندها خوف كبير أنه تجربة الثورة تنجح
محاولة عمل فتنة طائفية أخر كم يوم مخيف
ناس أعدة ورا شاشات وبوستات وتعليقات أنا متأكدة انه ما بتشبهنا أبدا
غسيل أدمغة مخيف لمحاولة طمس حقيقة أنه سوريا واحدة وشعبها واحد ومحاولة تقسيمه بشكل غبي
اختيار الطائفة الدرزية ما كان محسوب أبدا أنه ممكن ينلعب على وحدة شعبنا من خلال طائفة تعتبر من النسيج الأساسي بالمجتمع السوري ومن أوائل الناس اللي آمنت بالثورة بوقت كل الأنظار كانت متجهة للساحل والعلويين بسبب محاولة اللعب على هاد الوتر من خمسين سنة بس اجت الضربة من مكان مو متخيلينه
يمكن كل شخص مننا عنده صديق او صديقة من السويداء وكنا نتفاخر بصداقتهم لعلمهم الغزير وسجيتهم وحبهم للفن كافة وطيبة قلبهم وحبهم للضيف
اللي هي تقريبا نفس سمات أغلب السوريين من طاقة المحبة والصدق والدفا
فجأة ظهر خاين من عندهم ومتأكدة انه ما بيمثلهم
وبينشر مليشيات غبية ل ذ ب ح أولادنا من الأمن العام والتمثيل ب ج ث ث هم
وفجأة منشوف على الطرف الآخر تجاوزات لا أخلاقية من بعض من أفراد الأمن العام وكأنه دائرة من العنف ما بتخلص
طيب تمثيل اللي عميصير بالجثث من الطرفين مين المسؤول عن تصديره للواجهة
ومين عميحاول يأجج الفتنة بين الطرفين
كل مذ ب ح ة عمتتصور وتنتشر فورا مع التفاخر وهاد شي غريب
نحنا بفتنة عظيمة وياخوفي يكون أشخاص مزروعة بس لبث الفتنة وتأجيج فك اللحمة الوطنية السورية
مشاهد غير واضحة وناس غريبة بتدعي انه هية من جهة معينة وهية عمتمارس ال ق ت ل و التنكيل بالبشر من غير ما نتأكد انههم فعلا من هذول الناس او هدول
الحكومة الحالية بأصعب أمتحان بتنحط في أي حكومة بالعالم
بوقت البلد منهكة على كل الأصعدة يعني عنجد حاطة حالي بدال
الرئيس والحكومة وبلا شعارات طنانة قلولنا شو ممكن يكون الحل
بوجود أداة حقيرة لتغيير الحقائق بثانية اللي هي السوشسال ميديا ومخ شعب تعود على التعميم ومرسخ بدماغه مخلفات أفكار صعب تتغير بسرعة
يعني بعض اخواتنا الدروز نقمو على الحكومة بسبب تجاوز بعض افراد الامن العام
وبعض الناس نقمو على اهل السويداء بسبب الهجري وميليشياته وانهم هنن سبب الفتنة
فكرة التعميم مخيفة
طيب
أن دخلت الحكومة بيكون في فيديوهات لتجاوز بعض افراد الأمن لبث الكره اتجاه حكومتنا الحالية والضغط عليها على الانسحاب وتكون سبب لقصف الشام
وان انسحبت مشان البلد ما تنقصف بيصير في تخوين من الحكومة انه تركت الناس تقتل بعضها
والحكومة محتاجة يكون في رقابة شديدة على كل الأرتال العسكرية اللي عتدخل السويداء ومع ذلك هية ما حتضمن حصول اخطاء فردية
وصحيح لا تقسم ومقسوم لا تاكل
اي شو الحل ؟؟؟
عنجد نحط حالنا مكان الحكومة شو الحل
شو الحل انه ما ننسى أنه نحنا دم سوري واحد
شو الحل أنه نعين حكومتنا الحالية اللي مستلمة بلد منهك و بحاجة لعشرات السنين لينظف من مخلفات الحرب والأفكار اللي زرعها النظام السابق فينا
واللي عمنشوفها بتصرفات الناس بالتعاطي مع هي الفتنة
مستكترين علينا نجاح البلد وانه نحاول نتنفس
لا بارك الله بكل شخص بيأجج الفتن وبيساعد أيدي خفية على تحطيم
أخر ذرة أمل أنه سوريا والسوريين يكونو بخير
عنجد هي أخر فرصة ئلنا للنجاة يا منعبرها سوا
يا حنروح على الجحيم سوا
كل الدم السوري حرام
كل السوريين الشرفاء بيستحقوا العيش بآمان وحرية
والمحاسبة يجب أن تكون فردية من الطرفين لا جماعية
وعميوجعني قلبي كل ما قول طرفين لأنا نحنا طرف واحد اسمه سوريا بس شكلهم عميحاولو يخلونا ننسى هاد الشي
