08/05/2023
💌جرثومة المعدة 🍂
معتقدات كتيرة خطأ حولها ، و معلومات أخرى هي صحيحة لكن مبتورة بطريقة ممكن تؤدي لفهم خاطئ عنها ...
💌 أول معلومة أو عبارة منتشرة بخصوصها ( ما في شي اسمه جرثومة معدة و الجملة دي تحديدا بنسمعها حتى من الكودار الطبية أحيانا)
طيب بخصوص النقطة دي ، حيكون مفيد نعرف إن جرثومة المعدة أو الهيلكوباكتر بايلوري(H.pylori), هي بكتريا متعايشة في المعدة و موجودة بشكل طبيعي زيها زي كتير من البكتريا المتعايشة في أجسامنا و في الأحوال و الظروف الطبيعية لا يؤدي وجودها لأي أعراض مرضية ، بس في أحوال معينة ح نذكرها بتصبح بكتريا ضارة و تسبب اعراض مرضية قد تصل لحدوث تقرح معدي....
💌 تاني معلومة منتشرة و بنسمعها كتير(التشخيص بجرثومة المعدة كتر أو بقى موضة)
بكتريا أو جرثومة المعدة زي ما ذكرنا لا تسبب أعراض و مشاكل مرضية في الأحوال الطبيعية لأن ربنا ميز المعدة بمناعة طبيعية بتوازن نمو البكتريا و بتحد من تكاثرها و نشاطها بصورة تمنع تأثيرها بشكل سلبي و بالتالي بتمنع حدوث الأعراض المرضية
فاللي كتر في الحقيقة هو طبيعة التغذية و العادات الصحية الخاطئة اللي بتؤدي لخلل في المناعة الطبيعية داخل المعدة و بالتالي بيتسبب في حدوث الأعراض المرضية .
💌 تالت عبارة(اللي بتجيه جرثومة معدة ما بتخليه تاني) :-
العبارة دي جوابها من شقين :-
أولا :- زي ما ذكرنا العادات الغذائية و الصحية ليها الدور الأكبر في ظهور الأعراض المرضية ، و بالتالي الأشخاص اللي بتتكرر عندهم الأعراض المرضية غالبا عندهم أسباب بتضعف المناعة الطبيعية للمعدة و عليه يقدروا يتجنبوا تكرارها بعد العلاج بتجنب الأسباب اللي حنتكلم عنها في النقطة الأخيرة .
ثانيا :-فحص الجرثومة من الدم لا يكون دقيق خلال ٦ أشهر من الإصابة السابقة بالجرثومة ، بمعنى آخر فحص الدم الإيجابي بعد أخذ العلاج المناسب و تحسن الأعراض لا يعتمد خلال ال ٦ أشهر التالية لأنه بقيس الأجسام المضادة اللي خلقها الجسم للدفاع نتيجة للحالة المرضية و اللي حتكون موجودة بشكل طبيعي في الدم لمدة ٦ شهور بعد الشفاء من الإصابة، و في الحالة دي إذا شكينا بإن الإصابة لم تشفى أو اتكررت ح يكون من الأفضل إننا نشخصها بفحص التنفس ال urea breath test و لأنه غير متوفر في معظم المعامل الطبية عندما فممكن نفحصه عن طريق الفسحة stool for h.pylori Ag و اللي هو كمان فحص دقيق .
💌 النقطة الأخيرة و المهمة هي أسباب ضعف مناعة المعدة الطبيعية اللي بننصح المريض بتجنبها لتجنب الإصابة أو تكرارها :-
١/المناعة الطبيعية في الجسم عامة و في الجهاز الهضمي و المعدة بشكل أكثر تأثرا ، بتتأثر بالضغوط النفسية و الإنفعالات السالبة اللي بتؤدي لزيادة إفراز هرمون الكورتيزون في الدم و بالتالي إنخفاض و تأثر المناعة و بالأخص في مرضى متلازمة تهيج المصران .
٢/النظام الغذائي أو بمعنى تاني الوجبات الغذائية لازم نراعي فيها ثلاثة جوانب
أ-نوعية :-كثرة الأغذية الحامضة و الحاذقة و الحارة (spicy ) و الاغذية المحتوية على نسب عالية من الكافيين و النيكوتين زي الشاي و القهوة و السجائر و الأغذية المحتوية على مواد حافظة .
ب-زمن او مواعيد الواجبات :-تأخير و عدم انتظام الوجبات بيؤدي لعدم انتظام إفراز أحماض المعدة و بالتالي تأثر درجة حموضة المعدة الطبيعية اللي هو جزء من المناعة الطبيعية في المعدة.
ج- كمية الوجبات :- الشراهة أو غالبا تأخير مواعيد الوجبات بيؤدي غالبا للجوع الشديد و بالتالي تناول وجبة بكمية كبيرة و بالتالي عسر الهضم و الشبع أو فقدان الشهية لفترة زمنية أخرى طويلة مما يؤثر سلبا على عمل المعدة ، و لحل الإشكالية دي بننصح المريض بأخذ وجبات صغيرة متعددة خلال اليوم أو وجبات صغير ة بين الوجبات الرئيسية لتقليل الجوع وقت الوجبة و عليه تقليل كمية تناول الطعام خلالها .
❣ و طبعا علاجها بيتطلب أخذ مضادات حيوية و أدوية مضادة للحموضة و منظمة لإفراز الأحماض بتوصف عن طريق الطبيب المعالج .
بالنسبة للعلاج المساعد غير الدوائي فالوحيد اللي تم علميا إثبات نفعه هو الزنجبيل الطازج و قد تمت إضافته فعليا عن طريق بعض شركات الأدوية لعلاجات عسر الهضم و الغثيان و له تأثير مضاد لجرثومة المعدة و ينصح باستعماله بكميات مناسبة و معتدلة خصوصا في حالة الإصابة خلال فترة الحمل .
