Demian Magdy physiotherapy (2026)

13/07/2022

حبايبا شباب ما فوق ال ٥٠ 😁
تعالوا نتكلم مع بعض النهاردة عن موضوع مهم جدا لأي حد سنه وصل ٤٥ سنة او اكثر او حتى لو لسة موصلش للسن دة ..
مبدأيا ٤٥ سنة دة معناه انك لسة شباب برضو ماتقلقش بس عاوزين نتفق مع بعض على كام حاجة لو عملناها هتفرق بشكل كبير جدا الوقت الجاي في صحتك الجسدية وهتجنبك امراض خطيرة زي الضغط والسكر اللي اي حد فوق الخمسين نسأله قبل اي حاجة يقول انا باخد دوا الضغط والسكر ..
⚠️مبدأيا لازم نفهم ان مرض الضغط و السكر (الثانوي) هما امراض ليها اسباب ..
وهما الناتج النهائي لتراكمات كتيرة جدا بقالها سنين الشخص بيعملها منها
⛔ الاكل بشكل خاطئ
⛔ قلة النشاط اليومي وانعدام الرياضة
⛔ زيادة عوامل الالتهاب والمواد المسببة للإلتهاب في الجسم
⛔ زيادة الضغوطات النفسية وقلة المرونة في التعامل معاها

عشان كدة الحل دايما بيكون في اننا نبتدي نعالج الأسباب المؤدية للنتيجة النهائية سواء كان سكر او ضغط ..

الحقيقة ان الابحاث اثبتت ان مرضي الضغط والسكر اللي بيتبعوا التعليمات اللي جاية دي بيفرق كتير في تحسن الحالة يعني في الضغط ممكن ينزل بمعدل ١٠ مم زئبق (١٠ درجات) ودة هيحسن نتيجة العلاج الدوائي وممكن يؤدي للاستغناء عنه ..

✅ 1. تقليل ملح الطعام الموجود في الاكل .. نشيل الملاحة من على السفرة ونقلل قدر الامكان الملح اللي بيتحط في الأكل اثناء الطبخ

✅ 2. نقلل السكر الموجود في : عدد ملاعق السكر في المشروبات .. الحلويات المليانة سكر .. النشويات الموجودة في الدقيق الابيض والمخبوزات

✅ 3. نقلل دخول المواد الحافظة جسمنا ودي موجودة في اغلب المعلبات اللي بتتباع في السوبر ماركت

✅ 4. نبعد بشكل كويس ومترتب عن الضغوط النفسية قدر الامكان ونتعلم ازاي نتعامل مع ضغوط الحياة بشكل مرن اكثر
✅ 5. نقلل استخدتم الدهون الضارة والزيوت المهدرجة زي الزيوت المجهولة المصدر و زيت النخيل ونستخدم مكانها دهون صحية زي زيت الزيتون وزيت بذرة اىكتان والسمنة البلدي
✅6. نحاول على قدر الامكان ندمج اي نشاط رياضي في يومنا مش شرط يكون سباحة ولا جري لكن ع الاقل نمشي ٣٠ دقيقة كل يوم ..
ودة هيفرق بشكل قوي جدا في الصحة العامة لينا كلنا ..
يارب تكونوا استفدتوا ودايما في أفضل حال 🙏

19/05/2022

تعالوا نكمل كلامنا عن موضوع الانزلاق الغضروفي ..
عرفنا قبل كدة يعني ايه غضروف ويعني ايه انزلاق غضروفي ودرجاته ممكن تقرا عنه هنا :
https://www.facebook.com/111173234718415/posts/133627002473038/

واتكلمنا كمان عن سبب مشهور من اسبابه وطريقة الوقاية منه وتجنب الاصابة هنا :
https://www.facebook.com/111173234718415/posts/158765363292535/

والنهاردة هنكمل كلام عن الاسباب وهناخد بعض المواقف الموجودة في يومنا وتجاهلها ممكن يؤدي للتعرض لدرجة من درجات الانزلاق الغضروفي .

🔴 عرفنا ان الغضروف نسيج ربنا خالقه ليه قدرة معينة لاستيعاب الضغط الموضوع عليه ، لو تجاوزناها سواء كان زيادة في الضغط (كم التحميل) او لو اتعرض لتحميل فترة طويلة (وقت التحميل) ممكن دة يسبب "فشل" في قدرة النسيج على تجنب الاصابة ..
ودة للأسف موجود في يومنا العادي بكزا شكل ، أشهرهم هو وضع الوقوف بانحناءة خفيفة مع شغل معين بالايدين ..
ودة للأسف وقفة اغلب ستات البيوت في المطبخ كل يوم ! سواء كان في تجهيز اكل او غسل الاواني ! في الحالتين في تحميل مباشر على غضاريف الرقبة .. وتحميل مباشر على الغضاريف القطنية ..

✅ عشان كدة لازم نتجنب مخاطر الوضع دة اللي ممكن متظهرش مرة واحدة او تبان بشكل الم خفيف بيظهر اكتر مع تكرار الوضع دة وبعدين يروح ، وبعدين لما بيزيد ممكن يضغط غلى عصب ويسمع في ايد او رجل او الاتنين .
ف اكيد مش هنسيب المطبخ وننام 😂
لكن نقدر نعمل أهم حاجتين :
1. نقلل (كم التحميل) ودة عن طريق اننا ناخد بالنا ماننحنيش براسنا او نصف جسمنا لقدام اثناء شغل المطبخ او البيت + نقلل وزن الحاجة اللي شغالين فيها او نوع الشغل دة ميكونش كله مرة واحدة

2. ودة الاهم اننا نقلل (وقت التحميل) على الغضروف ؛ ودة عن طريق حاجة بسيطة جدا وهي اننا نقسم وقت الشغل بحيث ميكونش طقة واحدة نعمل فيها كل حاجة ، ودايما باقول حاجة لأي حد مصاب : مش هتفرق ١٠ دقايق تأخير على الاكل او الشغل ، لكن هتفرق معاك سنين لو حافظت عليه
نشوف وقت الشغل لو هياخد ساعتين يبقي نقسم الساعتين دول وكل ١/٢ ساعة ناخد راحة نعملها بشكل نوم او قعدة او تمرين مخصوص لكل حالة ودرجتها بحيث نقلل الضغط على مكان الغضروف المصاب او اللي ممكن يتصاب .

تابعونا وهنتكلم اكتر عن طرق العلاج المرات الجاية
يومكم سعيد 🌿🌿

17/05/2022

رجعنا تاني ليكو بعد فترة والنهاردة هنكمل كلامنا عن اشهر شكوى منتشرة في البيوت وهي الانزلاق الغضروفي .
وعرفنا اد ايه دي مشكلة منتشرة في اغلب البيوت وخصوصا عند سيدات البيوت العظيمات من كتر الشغل والتحميل على منطقة الضهر والعمود الفقري ..
وعرفنا درجات وانواع الانزلاق الغضروفي في البوست اللي فات تقدروا تشوفوه من هنا:
https://www.facebook.com/111173234718415/posts/133627002473038/?sfnsn=scwspmo

والنهاردة هنكمل كلام بس هنركز على الاسباب وطرق الوقاية ..
🔴 من اكتر الاسباب اللي ممكن تعمل اصابة على مستوي الغضروف في الظروف العادية -اللي هي مفيش فيها حوادث تصادم او سقوط لا قدر الله- هي الحركات العنيفة اللي بيكون فيها وزن او حمل اكبر من استيعاب نسيج الغضروف على احتماله..
ودة بيكون موجود في حركة مشهورة اغلب الناس بتعملها وهي رفع حاجة تقيلة من الارض زي كيس تقيل / حلة اكل اكل تقيلة/ كرسي انتريه / سرير او انبوبة او اي حاجة ..
الخطأ هنا في طريقة الرفع ، وهي ان الشخص يوطي بضهره عشان يجيب الحاجة دي من الارض .. هنا التحميل بيكون مركز على منطقة الغضاريف القطنية وبيكون مضاعف عشان شايل وزن الجسم اللي من فوق + وزن الحاجة اللي هيجيبها الشخص !

✅ عشان كدة لازم نراعي ان التحميل ميكونش بشكل مباشر وعنيف على المنطقة دي ، ودة عن طريق اننا نتجنب الحركات اللي ممكن تبان سهلة دي ونعملها بشكل صح زي الصور وبداية الانحناء تكون من مفصل الركبة والحوض بدلا من الضهر .

تابعونا وهنكمل كلامنا عن المشكلة دي في البوستات الجاية .
يومكم سعيد 🌼🌿

03/03/2022

كل سنة وحضراتكم طيبين
بمناسبة فترة الاصوام اليومين دول الصوم الكبير بدأ بالنسبة للمسيحيين وداخلين على شهر رمضان بالنسبة للمسلمين ..
وبما ان الصوم كتصرف بشري في ايمان واعتقاد اغلبنا له فوايده او ثوابه روحياً فتعالوا نستغله بالمرة لفايدة جسمنا وصحتنا النفسية والعقلية كمان ..

الصوم فعلا من افضل السلوكيات اللي ممكن يعملها الانسان في حياته وانه يختار ان يمنع نفسه بارادته عن حاجات كتير هو متعود عليها او بيحبها وينقطع عنها ويمنع التصاقه او استعباده او حتى ادمانه للحاجات دي !
ومن ضمن الحاجات دي واهمها هو الأكل ! ايوة فعلا الاكل من اكتر الحاجات اللي الانسان محتاج يقف قدامها ويشوف علاقته بيها ايه وبيتصرف ناحيته ازاي وازاي دة بينعكس عليه وعلى صحته وشكله !

الصيام كسلوك ، دراسات كتيرة اتعملت عليه ولقيت نتايجه الايجابية على امراض نفسية زي الاكتئاب والقلق ، ولقيوا كمان نتايج مبهرة في امراض زي السرطان والامراض المناعية .. دة كمان لقيوا نتايج مبشرة جدا للامراض الالتهابية المزمنة زي التهاب المفاصل او الخشونة وامراض القولون واكيد طبعا نتايجه المبهرة على انقاص الوزن ..

تعالوا الفترة الجاية دي نصوم بس بطريقة صحية فهنعمل واحد من انجح العادات الصحية وهو الصوم المتقطع كالآتي :-
١. في الاول اللي متعود ياكل اوقات كتير جرب تقلل عدد وجباتك وتحصرهم في ٣ وجبات فقط وتمنع الوجبات البينية او تضيفهم على ال٣ وجبات الرئيسية ..

٢. متستناش انك تنزل في الوزن بسرعة انجازك في الفترة الاولي هو انك ماتحسش بالجوع زي الاول

٣. هنحاول نحصر ال٣ وجبات بتوعنا في وقت قصير ، ودة مناسب للي بيصوم انقطاعي لحد القداس او لحد اذان المغرب
فهنخلي الفطار مكان الغذاء والغذاء مكان العشاء تدريجيا لحد مانخليهم وجبتين رئيسيتين كبار فيهم العناصر الغذائية كلها ..
ونخلي الوقت اللي فيه الوجبتين دول من ٦ ل ٨ ساعات ووقت الصوم من١٤ل ١٨ ساعة طوال اليوم

٤. متستعجلش على نزول الوزن وكمل وحلو احساس انك مش جعان بالرغم من قلة عدد الوجبات

٥. نحاول في كل وجبة بالتدريج نركز على الاكلات الغنية بالبروتين والدهون الصحية اكتر من النشويات والكاربوهيدرات

٦. اللي فات دة لوحده هيديك نتايج حلوة جدا، لكن لو عايز نتايج افضل وافضل ، جرب تلعب رياضة او تمرينات مقاومة في خلال وقت الصوم ؛ )

باتمني فترة صوم نقية وجميلة ومفيدة للكل على كل المستويات
كل سنة وانتو طيبين

29/01/2022

حابب اتكلم النهاردة عن مشكلة موجودة تقريبا في أغلب البيوت المصرية وعند اغلب ستات البيوت والامهات العظيمة اللي ليهم كل التقدير ..
وهي مشكلة spinal disc prolapse او الانزلاق الغضروفي على مستوي الرقبة والظهر تحديداً ..
لازم اولا نعرف ان المشكلة دي لو اتشخصنا بيها او لو حصلت فهي بتكون غالباً نتيجة لتراكمات سنين او مدة طويلة من التحميل الخاطئ بشكل مستمر على منطقة معينة في العمود الفقري، ودة السبب الاكبر والاكتر انتشاراً.
أو لسبب كدمة او حادثة او سقوط شديد أدي لاصابات كتيرة على مستوي العمود الفقري ومن ضمنها الغضروف ..
طيب خلينا اولا نفهم يعني إيه غضروف قبل مانتكلم عن مشكلاته :
الغضروف هو نسيج ربنا خالقه بخصائص معينة بحيث يكون موجود مابين التقاء عضمتين او اكثر في مفاصل الجسم المختلفة عشان يقلل الاحتكاك مابينهم ويؤدي وظايف ميكانيكية تانية منها توسيع المدي الحركي للمفصل دة ..
وفي حالة العمود الفقري فهو موجود بين كل فقرتين من العمود الفقري-ماعدا استثناءات- وليه أهمية كبيرة جدا في شكل وثبات وحركة العمود الفقري كله وتوزيع الجهاز العصبي الحركي اللي بينطلق من الحبل الشوكي ..
على عكس المتوقع ف الغضروف ومشاكله يعتبروا ضحية مش متهمين في موضوع وجود الم او تسميع او تنميل بسببهم .. لان المشكلة بتبتدي من توزيع الاحمال الغير متوازن بشكل مستمر علي منطقة معينة فالعمود الفقري فيبتدي يحصل اصابة للنسيج المهم جدا بالضغط وهو الغضروف ..
عشان كدة لما تزيد الضغوط دي يضطر:
- يخرج من مكانه بدرجات مختلفة وهو دة اللي بنسميه انزلاق غضروفي disc bulge
- او يتصاب هو نفسه ف الغلاف الخارجي ليه يتشقق ويبتدي "يتقطع" وممكن يتحرك من مكانه ودة طبعا درجة اخطر disc herniation..
- او يتصاب ويتقطع والجزء المقطوع يتحرك في القناة الشوكية disc sequestration ودي اخطر درجة ..
هنتكلم المرات الجاية عن مشاكل وطرق العلاج للانزلاق الغضروفي و ايه اللي ممكن نعمله في البيت يساعدنا لحل المشكلة دي ..
مع كل الحب والتقدير للمصابين بالانزلاق الغضروفي وخصوصا سيدات البيوت والأمهات العظماء ❤

26/12/2021

يعني إيه علاج طبيعي ؟ (1)

١.دلوقتي امراض ومشاكل الجسم المختلفة لما بتحصل بتكون نتيجة لأسباب كتيرة سواء من جوة الجسم نفسه او من براه تمام ؟! تمام .. علماء الطب بقي كتر خيرهم على مدي التاريخ وتطور الطب خلونا نعرف نتعامل معاها بالتفصيل بطرق كتيرة جدا ..
زمان مكانش فيه غير الحكيم وغالبا كانت مهنة جنب كزا صنعة تاني 😅
فكان يروحله العيان وهو يشوف بقي هيعمله إيه يديله حاجة زي اعشاب او مستخلصاتها .. يعمله بإيده حاجة او حتى يفتح جرحه او مكان المه ويحاول يتصرف فيه اوحتى يحلقله شعره 😁 دة بجد مش هزار كانت شغلانة واحدة تقريبا ..
العلم يسكت ؟ قام مديله 👊 راح اتهور و اتطور ..
والشغلانة دي بقى فيها خمسمية الف فرع وتخصص
👈خد هنا انت نسيت فرع الحلاقة 😁
بس ياسيدي ومن ساعتها وعينك ماتشوف الا النور وكل يوم تخصص منهم يكبر ويتربي في عزك و يبقي مهنة مختلفة إشي علم الدواء والمواد الكيميائية ودة بحر كبير اسمه علم الصيدلة العظيم وإشي بحر كبير فيه علوم الامراض نشأتها وتأثيرها و علاجها والتعامل معاها والتدخلات الجراحية واليدوية فيها ودة اللي بنختزله في كلمة الطب لكن جواها تفاصيل كتير وكلام كبير قوي سعادتك

المهم بقي واحدة من التدخلات الكتير قوي دي هو اننا نتدخل طبياً في حل المشكلة لكن بشرط، هانمشي ورا قوانين وطبيعة الجسم نفسه ونتعامل معاه بالطريقة المخلوق عليها انه يتغير او يتأقلم او ينمو بسببها، بدون تدخل جراحي او مواد كيميائية من برة الجسم، يعني الجسم مش هيستغرب او يقاوم او يتضر من الطريقة دي ابداً
الطريقة دي بقي هي العلاج الطبيعي، وعشان هي بتمشي مع قوانين وخلقة الجسم بدون لخبطة فهي الأكثر اماناً من كل الطرق حتى ولو مكانتش أكثر فاعلية بنفس سرعة التدخلات الدوائية او الجراحية..
وطبعا دة مش معناه انها بديلة عن باقي التدخلات الدوائية والجراحية البالغة الأهمية واللي ممكن تنقذ حياة شخص من الموت او تتعامل مع موقف طارئ او مرض مستعصي ومزمن لكن العكس تماما، لما أتعرض لأي مشكلة صحية لازم احط في اعتباري اني اتعامل مع جسمي بطريقة يقبلها مع الطرق الكتير اللي باستقبلها من المختصين ، وعشان كدة في الانظمة الطبية المتقدمة لازم قبل وبعد أي جراحة مثلا يكون فيه علاج طبيعي، عشان يعيد للجسم توازنه الفسيولوجي و يتعامل بقوانينه الطبيعية .
دمتم سالمين
1

21/12/2021

هنتكلم النهاردة عن طرق تخفيف الام عضلة الشتا او عضلات مابين لوحي الكتف ..
عرفنا المرات اللي فاتت أسباب الالام دي المختلفة وعرفنا كمان ان اهم حاجة في العلاج هي التشخيص الصح من متخصص ..
النهاردة هنقول شوية حاجات نعرف نعملها في البيت بسهولة تساعدنا في تخفيف الالام دي في حالة انها الام عضلية او مش من اسباب عضوية ..
1. احيانا كتير الالام دي بتكون بسبب اوضاع الجسم الغلط فبالتالي لازم نتعلم ازاي نقعد صح ونقف صح عشان مانتعبش اكتر لكن بصفة عامة جرب تغير وضعك لو قاعد حرك جسمك ودراعك ورقبتك في اكتر من اتجاه بشكل بطئ وثابت
2. اول حاجة تساعدنا في تخفيف تقلص العضلات عموما هو تأثير الحرارة فممكن نحط فوطة دافية او اي حاجة سخنة بس مش لدرجة انها تلسعنا او تسببلنا حرق ونثبتها زي الصورة رقم 1.
3. تمارين stretches ودي تمارين بنشد بيها اجزاء العضلة لطولها الطبيعي او طولها الممكن الوصول ليه يعني ودي بنعملها ونستني فيها من 20-30 ثانية اكتر من مرة ورا بعض
4. هنعمل تمارين زي اللي في الصور تحت لكن بعد ما نتأكد ان الالام خفت هتساعد كتير
اتمني البوستات دي تكون مفيدة وتساعد اي حد محتاجها

16/12/2021

اتكلمنا المرة اللي فاتت عن الالام اللي في المنطقة دي وقولنا انها مشهورة شوية في الشتا بسبب تغيرات وقلة الحركة وكثرة النوم الى حد ما و ايه الاسباب التانية اللي ممكن تسبب الالم دة ..
البوست دة هنحاول نتكلم عن بعض الحلول المتاحة للمشكلة دي
1. اول حاجة تتعمل لحل اي مشكلة هو تشخيصها صح ، التشخيص الصح يعتبر نص العلاج عشان كدة المفروض نروح لدكتور فاهم اسباب المشكلة كويس وطرق العلاج المناسبة لكل شخص ..
2. من ضمن الاسباب اللي ماتقالتش البوست اللي فات ، هي الضغط او الاضطراب النفسي بكل اشكاله.. لكن من اشهر الاشكال دي واللي هي حاجات بنكسل نعالجها او نتعامل معاها صح : القلق والتوتر المتكرر .. عشان كدة التعامل مع الاضطرابات دي من خلال حد متخصص برضو هيفرق معانا مش بس في الالام الجسمية اللي في المنطقة دي لكن غيرها كمان في اجهزة الجسم كله ..
لكن كعنوان لتفاصيل كتيرة نقدر نقول الاسترخاء الجسدي و النفسي و التفكير السوي الغير مبالغ فيه في حاجات مفرحة وهادية وتمارين التنفس الصحيح جزء كبير من العلاج الخاص بالسبب دة في المنطقة دي ..
3. اخر حاجة في بعض الحلول (((المؤقتة جدا ))) للمشكلة دي عن طريق وضعيات معينة يتحط فيها الجسم وتمارين معينة ممكن تتعمل بسهولة من اي شخص هنتكلم عنها بالتفصيل البوست الجاي عشان منطولش عليكم ..

13/12/2021

عضلة الشتا
من اشهر الأماكن اللي بنشتكي منها ومن الامها خصوصا في الشتاء ومع قلة الحركة وكترة النوم ..
المكان دة فيه كزا طبقة واكتر من عضلة وفي اسباب كتيرة ممكن تسبب الالام دي :
1. اسباب ليها علاقة بمشاكل عظام المنطقة دي ودة يشمل عظام لوح الكتف وفقرات الظهر والاربطة والغضاريف اللي حوالين المنطقة دي
2. اسباب نتيجة لاصابة عضلية ودي مشهورة مع اللي بيروح الچيم ويشيل اوزان اكبر من قوة تحمل العضلات في المنطقة دي او لو حد شال وزن تقيل مرة واحدة مكنش متعود عليه ممكن يصيب العضلات في صورة مزق او قطع او كدمة مباشرة
3. اي درجة من درجات الانزلاق الغضروفي في منطقة الرقبة لان دة ممكن يحط حمل زايد علي الاربطة والعضلات اللي حواليه كرد فعل من الجسم لحمايته وتحذيرك من التحميل عليه بأي شكل
4. اسباب نتيجة لتسميع او حاجة اسمها referred pain ودة الم بيكون اساسه مكان تاني لكن بنحس بيه في المنطقة دي زي مثلا لو في مشاكل علي مستوي القلب وشريان الاورطا او مشاكل الرئة والجهاز التنفسي مشاكل المعدة او جدار الامعاء ودي ساعتها لازم نرجع للطبيب المختص فورا
5. مشاكل القوام او وضع الجسم علي مستوي الظهر والقدمين وحتي الكتف مثل الأتب والتقوس او اوضاع الجسم الغير طبيعية ..
هنتابع في البوستات الجاية ازاي نتعامل معاها وايه الحلول اللي نقدر نعملها لوحدنا وتساعدنا ..

Demian Magdy physiotherapy

13/07/2022

19/05/2022

17/05/2022

03/03/2022

29/01/2022

26/12/2021

21/12/2021

16/12/2021

13/12/2021

Address

Telephone

Website

Alerts

Shortcuts

Share