07/05/2026
🛑🛑ونكمل مع بعض حكاية الحلمة السيليكون 👇👇
📌📌مهم تعرفي مميزات استخدامها::
1️⃣ بتخفف الألم فوراً
2️⃣بتساعد في الانتقال للرضاعة الطبيعي
3️⃣حل سريع للحلمة المسطحة
📌📌كمان مهم تعرفي عيوبها لو طولتي في استخدامها::
1️⃣مش كل اللبن بينزل للبيبي فبيفضل جعان
2️⃣ممكن يتعود عليها البيبي ويرفض الث*ي بدونها
3️⃣ممكن تقلل تحفيز الث*ي فيقلل اللبن
📌📌ازاي الاستخدام الصح❓️❓️
1️⃣لازم مقاس مظبوط:
في مقاس 16مم للحلمات الصغيرة جدا
20مم المقاس الشائع لكل الأمهات
24مم. للحلمات الكبيرة
لو كبيرة هتوجعك، لو صغيرة هتحبس اللبن.
📌📌إزاي تستخدميها صح - خطوة بخطوة👇👇
1️⃣اغسلي إيدك وعقمي الحلمة السيليكون قبل أول استخدام.
2️⃣اقلبي الحواف لبره زي ما بتقلبي الكم.
3️⃣بليها بنقطة لبن أو ماية من جوه عشان تلزق.
4️⃣حطيها على الحلمة بحيث حلمتك تدخل كلها في الجزء البارز، وبعدين افردي القاعدة على هالة الث*ي.
5️⃣اتأكدي إن في فراغ بسيط* بين طرف حلمتك وطرف السيليكون، عشان لما البيبي يشفط حلمتك تتمدد.
📌📌إزاي تبطليها بالتدريج❓️❓️
دي أهم نقطة، لأن الهدف إنك ما تفضليش عليها:
1️⃣ابدأي الرضعة بيها*، ولما اللبن ينزل والبيبي يهدى شيليها بسرعة وكملي من غيرها.
2️⃣جربي ترضعي من غيرها* والبيبي نعسان أو لسه صاحي من النوم، بيكون متعاون أكتر.
3️⃣استخدمي الشفاط دقيقة* قبل الرضاعة عشان يطلع الحلمة لو مسطحة.
4️⃣قللي عدد الرضعات بيها* كل يوم لحد ما تمنعيها خالص.
📌📌امتى توقفيها فوراً وتكلمي دكتور❓️❓️
- 1️⃣وزنه مش بيزيد كويس.
- 2️⃣عدد الحفاضات المبلولة قل عن 6 في اليوم بعد اليوم الخامس.
- 3️⃣لسه حاسة بألم حتى معاها.
- 4️⃣صدرك بيحجر واللبن بيقل.
*ملحوظة مهمة*: الحلمة السيليكون مش علاج. هي زي "عكاز" مؤقت لحد ما تحلي السبب الأساسي. والسبب الأساسي 90% من الوقت بيكون *التقام غلط*.
