18/02/2025
استكمالاً لموضوعنا عن الدواجن ورعايتها .. خلينا نبدأ البداية الصح من أول خطوة مع الكتكوت عمر يوم🐣🐥
رعاية الطائر (سواء أبيض، بلدي، أو حتى بط) من اليوم الأول لها تأثير كبير على باقي الدورة، سواء كانت دورة تسمين أو إنتاج بياض. النجاح يبدأ من خطوات بسيطة لكنها أساسية وتضمنلك تربية ناجحة كلها إنتاجية وصحة عالية💁🏻♂️✓
لذلك عاوزك تركّز معايا على الخطوات دي اللي هتساعدك تبني أساس مظبوط👌🏻
-------------------
🛖1. المكان المناسب للتربية》
- المساحة: لازم الكتاكيت يكون ليها مساحة كافية تتحرك فيها بحرية، لأن حركتهم وانتشارهم بتعكس صحتهم. ولازم المكان يكون واسع لأن الزحمة بتسبب مشاكل صحية زي الإختناق أو انتشار الأمراض بسرعة.
- النظافة: المكان لازم يكون متطهر بالكامل قبل استقبال الكتاكيت بإستخدام مطهر آمن مخصص للدواجن (زي الفورمالين المخفف او مطهرات أيودين).
- الأرضية: استخدم فرشة مناسبة للأرضية زي نشارة الخشب أو التبن، وتأكد انها تكون جافة ونظيفة وتتغير باستمرار. الفرشة دي بتساعدهم يحسوا بالدفا وكمان بتمنع التهابات الأقدام
- التهوية: المكان لازم يكون مهوي كويس بدون تيارات هواء مباشرة.
🔆2. التدفئة ودرجة الحرارة والرطوبة》
- حرارة المكان المثالية🌡️: الأسبوع الأول درجة الحرارة تكون حوالي 33-35°م، وبعدين تقللها تدريجي كل اسبوع من 3-2 درجات تدريجياً.
- علامات الخلل في التدفئة🚨: التدفئة لو مش مظبوطة، الكتاكيت يا هتتزاحم وتخنق نفسها، او تبعد وتبرد فا خلي بالك!
طيب أعرف منين وايه هي العلامات؟🤔
» لو الكتاكيت بتتزاحم تحت مصدر الحرارة= يبقى الجو برد.
» لو بعيدة عنه وبتتنفس بسرعة= الجو حر.
وساعتها لازم تتواصل معانا بسرعة عشان نظبطها مع بعض‼️
🌾3. الأكل والشرب》
- المياه:
» وفر لهم مياه نظيفة ودافية شوية بإستمرار
» ممكن تضيف "جلوكوز" بسيط أو فيتامين C في أول يومين لتقوية المناعة وتعويض أي إجهاد حصل أثناء النقل.
- العلف:
» استخدم علف بادي عالي الجودة مخصص لعمر الكتاكيت بنسبة بروتين تتراوح بين 22-20%.
» اتأكد إن العلف جديد ومش متخزن لفترة طويلة لتجنب السموم الفطرية، ومتغيرش نوع العلف فجأة✋🏻.
» وزع العلف في أوعية واسعة وعريضة وكافية بحيث كل الكتاكيت تقدر تاكل براحتها.
🛡️4. الأدوية والتحصينات》
- التحضين بإستخدام أدوية ومكملات مناسبة يساعد على الوقاية من الأمراض وبيحسن جودة الإنتاج. استشير الطبيب البيطري لتحديد الجرعات ومواعيدها وعشان تلتزم بجدول التحصينات المناسب👨⚕.
- مراقبة الكتاكيت🧐: في حالة ملاحظة أي تجمع غير طبيعي للكتاكيت في زاوية او ظهور أعراض مرضية ( زي الكسل أو نفش الريش أو الإسهال) كلها علامات ممكن تكون بداية مرض، لذلك اعزل الطائر المصاب فوراً عشان تحمي الباقي واستشر الطبيب البيطري!
شوية نصايح إضافية ومهمة🎯:
- وفر إضاءة مستمرة (24 ساعة) في أول أسبوع عشان الكتاكيت تقدر توصل للأكل والشرب بسهولة.
- ماتغيرش نوع العلف فجأة، ولو مضطر، اعمل تغيير تدريجي على مدار 7-5 أيام مع مضاد السموم.
- اتبع جدول التحصينات المناسب للطائر وتابع الجرعات والمواعيد مع الدكتور البيطري.
--------------
نجاح دورة التربية بيبدأ مع أول خطوة صح، لذلك ال 10 أيام الأولى هي الأهم في حياة الطائر! لو عديتهم كويس هتلاقي تطور ملحوظ في صحته وفي الإنتاج كمان✅.
وفي حال ملاحظة أي مشكلة، أو محتاج مساعدة أو استفسار عن التحصينات والرعاية، أو لو محتاج جدول تحصينات كامل ومتابعة دقيقة أول بأول، كلمنا فوراً واحنا هنا معاك عشان نساعدك في أي وقت
