https://www.facebook.com/110506511906210/

Psy. Aliaa Ali, Faqous (2025)

09/11/2025

عارفه إن أغلب اللي بنعمله بيبقى من حب وخوف عشان نحمّي، نرتب، ونريح. بس أحيانًا بنفس الحب ده بنعلّم الطفل يعتمد على غيره في كل حاجة لحد ما يكبر وما يعرفش يقرّر لنفسه.
النتيجة:
طفل بيتعوّد إن حد دايمًا يقرّر عنه.

لما يكبر مش هيثق في قراراته، هيخاف يتحمّل مسؤولية، وهيعتمد علي رضا الناس بدل ما يسمع نفسه.

علاقاته هتبقى مبنية على احتياج قوي للشريك عاطفيًا أو ماديًا أكتر من اللازم، وممكن يدخل علاقات مضرة عشان يلاقى اللي "يقرّره".
من منظور العلاج بالمخططات (Schema Therapy)

الكلام ده ممكن يولد سكيما إحساس داخلي إن الشخص عاجز من غير دعم مستمر، وده بيخليه يعيش حياة محدودة بالخوف والتبعية.

لما نحل كل أزمة بدال الطفل، ونمنعه من الاختيار أو المواجهة بنصنع شخصية بتعتمد على غيرها طول عمرها. لو عايزين أولادنا يكونوا أقوياء داخليًا — نديهم فرص يقرّروا، يفشلوا، يتعلّموا، ويحسّوا دايمًا إن حبنا ليهم مش مشروط. 🌱

06/04/2025

✨ From Zero To Hero ✨

أنا حاسس بالإحباط و إني مستفدتش من كلية آداب علم نفس اللي كنت متوقعه أنا كنت متوقع إني هدرس الإضطرابات كلها و أتخرج أعالج علي طول
- مبدأيا أنت بتدرس ف الكلية مبادئ المدارس و النظريات النفسية و علاقة علم نفس بالعلوم الآخري و علم النفس النمو وعلم النفس الفسيولوجي و النيروسيكولوجي و... عشان تتخرج وأنت عندك خليفة واسعة عن كل حاجة و تكون أرض خصبة ليك و مادة النصوص النفسية دي هتدرك أهميتها بعدين لما ينطلب منك تكتب تقرير نفسي بلغة انجليزي للدكتور المشرف عليك ف المستشفى
- فبإختصار الكلية بتخليك متخرج وأنت عندك عقلية الأخصائي و أنت بتتخرج و تختار حابب تكمل ف ايه

🎯 ماشي أنا دلوقتي متخرج من علم نفس و طلعت مش عارف اروح فين ولا أبدا منين ؟

- طب حضرتك حابب تتخص ايه ؟
= مش عارف أنتي شايفه أيه الأحسن؟
- مفيش حاجة اسمها ايه الأحسن، التخصصات دي تفضيلات شخصيه وحسب راحتك.. عشان تقرر حابب تتخصص ف ايه لازم أنت بنفسك تقرأ و تاخد فكرة عن كل مجالات علم نفس و ياحبذا لو حضرت محاضرات ف كل التخصصات
تخصصات علم نفس كتير
اكلينيكي
إدمان
إرشاد أسري
إرشاد نفسي
تخاطب و تعديل سلوك
وغيره...
ف محتاج تاخد فكره عامه كده عن كل تخصص و تختار

🎯 و لأني متحيزة شويه للاكلينيكي ف هقولك علي أهم الخطوات لو عايز تكون اخصائي نفسي اكلينيكي شاطر و تبدأ منين؟
🎯 مبدأياً حاول توسع دايرة معارفك ف المجال دا بيساعدك و بيفتحلك طرق كتير بسهولة تابع الأخصائيين و الجروبات الخاصة بالمجال عندك
عنبر 6 https://www.facebook.com/share/gCGU2h9bFmQMbxiT/?mibextid=A7sQZp
مناخوليا
https://www.facebook.com/melanchloia26?mibextid=ZbWKwL
من اكتر الجروبات اللي شيفاها ما شاء الله كويسه جدا وعليها تبادل خبرات كويس جدا
🎯 أبدا بدورات بـ كورسات مجانية و خد فكرة عن المجال الأول
صفحة اتحاد المعالجين النفسيين العرب - مصر جزاهم الله خير بتنزل ندوات/ دورات مجانية هتخليك تاخد فكرة كبيرة عن المجال و المدراس العلاجية
https://chat.whatsapp.com/G4x1EtmxD6q7eNtU99Q4m6
و دا لينك تاني لجروب ورش علم النفس لطلاب و خريجي علم النفس

🎯 نيجي للمهم بالنسبة للأماكن المعتمدة الخاصة بدورات رخصة مزاولة المهنة ف دا

لينك الصفحات اللي بتنزل دورات الرخصة
رابطة الأخصائين النفسيين
https://www.facebook.com/eparanm?mibextid=ZbWKwL
الجمعية المصرية للعلاج المعرفي السلوكي
https://www.facebook.com/eacbt.info?mibextid=ZbWKwL
مركز البحوث والدراسات النفسية بجامعة القاهرة
https://www.facebook.com/profile.php?id=100057263807590&mibextid=ZbWKwL
الجمعية المصرية للمعالجين النفسيين
https://www.facebook.com/EGY.PSY.2012?mibextid=ZbWKwL

الأمانة العامة للصحة النفسية و علاج الإدمان
https://www.facebook.com/GSMHATMOHEGYPt?mibextid=ZbWKwL
و بالمناسبة ال5 أماكن دول فقط اللي لو حابب أعمل عندهم كارنية عضويه بعمل عندهم لأنهم هما ال5 أماكن اللي معتمدة فعلياً لكن غير كده ف هو استغلال و ملهوش قيمة

🎯 بعد ال5 أماكن دول عندك مؤسسة الخدمات النفسية والثقافية و الثقافية
https://www.facebook.com/PSYCHOLOGY.EG?mibextid=ZbWKwL
مكان محترم جداً و مرخص و بشوفه يلي ف الأهمية بعد الـ 5 أماكن لأنه بيقدم ورش عمل ف العلاج النفسي من دكاترة كويسيين جداً ما شاء الله و بيعملوا ورش عمل و دورات قوية جداً و أهمهم دورة إعداد اخصائي نفسي اكلينكي

🎯 بعد كده عندك تدريب/تكليف سنتين بعد الكلية
في مستشفى من المستشفيات التابعة للأمانة العامة
https://mentalhealth.mohp.gov.eg/mental/web/ar/hospitals
دا لينك عليه كل المستشفيات التابعة للأمانة ف المحافظات

🎯 هتعرف أهمية المقاييس النفسية لما تشتغل و اللينك دا عليه مقاييس نفسية كتير هتنفعكم جداً .. كنت بدور علي حاجة زي كده من زمان فادعولي و ادعوا لأخواتي بالرحمه ♥️

https://drive.google.com/drive/mobile/folders/0B-4nDjVg-cERYm9qcTBNbXNkRU0?fbclid=IwAR1sEOpeIf2sAZF7-Ag3iDAheonZDpij5LrCflI81Pur-KO1qeD9kvgdfKs

🎯و أخيراً و الأهم أقرا كتير ف كتب العلاجات النفسية
تابع صفحة مكتبة الأنجلو المصرية - The Anglo Egyptian Bookshop هتخليك متطلع علي أحدث الكتب العلاجية
موارد نفسية
و جروب كتب في المجال النفسي ابعتلهم اسم الكتاب اللي تحتاجه أو المجال اللي عايز تقرأ فيه هيوفرولك اكتر من كتاب
دا اللينك بتاعهم واتساب و تليجرام https://chat.whatsapp.com/ExtwEizoVKCJI5tzMbHSUH
https://t.me/Elbea7

🎯 نظم وقتك و حاول تسمع كل يوم فيديو واحد بس من دول خلال يومك اعتبرهم بودكاست

د. يحيي الرخاوي
https://youtube.com/c/rakhawyhospital

د. طارق الحبيب
https://youtube.com/c/TariqAlhabibOfficial

د. محمود حمودة
https://youtube.com/channel/UCxHlzNRL4KWL9aRTVkrzwow

د. هالة السعيد صياح
https://youtube.com/channel/UC9Rc3QLEw8kez5cBph3kchg

د. محمد المهدي
https://youtube.com/channel/UC9Rc3QLEw8kez5cBph3kchg

د. احمد هارون
https://youtube.com/c/DrAhmedHaroun

د. احمد الاعور
https://youtube.com/c/ahmedelaawar

د. اسلام شاهين
https://youtube.com/channel/UCBVjWfxs1rpe73gS3OhO6mw

د. احمد ضبيع
https://youtube.com/channel/UC22aQmNbpw5HN5HetdyDg6w

محمد البنا
https://youtube.com/channel/UCsT6NPRC4XGAi39_-bWIhJA

د. يوسف مسلم
https://youtube.com/c/DrYousefMusalam

د. عبدالرحمن ذاكر الهاشمي
https://youtube.com/c/MakanyWorld

بلايليست محاضرات الأستاذ الدكتور سمير أبو المجد التي تم إلقاؤها في كورس ال DSM-5-TR حتى الآن ...
https://youtube.com/playlist?list=PLQvjS5SdmPp2km-sKP7PJ5k1x49ht41AH&si=OLK1m7Ny05o-BWYQ

المشورة:
https://youtube.com/-ww2sf9fq4q

المعهد العربي للصحة النفسية:
https://youtube.com/channel/UCTWf07tbScXFQd06Aq-NApA

الشبكة المصرية لأبحاث الصحة النفسية
https://youtube.com/c/AfternoonBreak

مهجة
https://youtube.com/c/Mohja

مسار
https://youtube.com/channel/UCA88dqLPBrnIGegmqmeBNQQ

جلسات علاج نفسي
https://youtube.com/c/SamerRudwanpsy

بالعربي
https://youtube.com/c/%D8%A8%D8%A7%D9%84%D8%B9%D8%B1%D8%A8%D9%8A%D9%85%D8%B4%D8%B1%D9%88%D8%B9%D8%A7%D9%84%D8%AA%D9%88%D8%B9%D9%8A%D8%A9%D8%A7%D9%84%D9%86%D9%81%D8%B3%D9%8A%D8%A9%D8%A8%D8%A7%D9%84%D9%84%D8%BA%D8%A9%D8%A7%D9%84%D8%B9%D8%B1%D8%A8%D9%8A%D8%A9

مستشفى المعمورة
https://youtube.com/user/maamourata

علاج نفسي
https://youtube.com/

St. Arsany courses
https://youtube.com/.arsanycourses-massarra5549

رانية ابو رابية
https://youtube.com/

طوني جورج
https://youtube.com/

مجلة
https://www.thelancet.com/

مجلة
https://journals.sagepub.com/

مجلة https://www.psychologytoday.com/intl

مجلة https://www.mentalhelp.net/

مجلة https://positivepsychology.com/

مجلة https://www.nature.com/

مجلة https://academic.oup.com/

مكتبة NLM
https://www.ncbi.nlm.nih.gov/books/
مناخوليا
https://youtube.com/-4626

🎯 تابع قنوات التليجرام برضو عليها حاجات مهمة😉
https://t.me/hendaziz099
قناه الاخصائين النفسين لعرض الحالات

قناة تيلجرام ا.خليل الرخاوي .. عليها كتب و محاضرات كويسه جدا
https://t.me/elrakhawy

🎯 فاكرني هسيبك تاخد دا كله و اسيبك من غير شغل صح! خسئت 👀😂
دا لينك
جروب وظائف أخصائي نفسي إكلينيكي و إدمان خريج آداب علم نفس https://chat.whatsapp.com/HHwXy5USayDHJ3yDcLVm2C

و جروب وظائف وتدريبات التربية الخاصة في مصر والخارج - الأصلية

🎯 نصيحة أخيرة "نفوس الناس ليها حُرمة"
فمن وجهة نظري المتواضعة جداً إنك ضروري قبل ما تبدأ تمارس العلاج النفسي ع العملاء تروح تتعالج الأول ويتم استشفائك من أي جروح أو ندبات حتي لو كانت بسيطة عشان متبدأش علاج مع حد و تلاقيه عنده حاجات ملمسه معاك ف تبقوا محتاجين حد يعالجكم انتوا الاتنين! 😅
ربنا يوفقنا و يوفقكم جميعاً.. شير للبوست و منشن لصاحبك عشان يستفاد 😉🤍

أخيراً، فضلاً دا بوست أنا تعبت ف تجمعيه متاخدهوش كوبي لكن شاركوه بينكم و بين أصحابكم و أدعوا لأخواتي بالرحمة 🤍

26/03/2025

هل الأدوية النفسية بتسبب إدمان؟
هل بتكون فعلاً مهدئات؟

في مشهد جميل حصل مع يسرا اللوزي و بنتها في لما البنت دخلت عليها لاقت أمها بتحاول تتخلص من الأدوية و وقفت الدواء فجأة فـ بنتها قالت لها فاكره لما وقفتيه حصل ايه!! أنتِ حاولتي تنـtـحري! الأم قالت لها ما الدوا هو اللي عامل فيا كداااا للأسف دا مش مجرد مشهد عادي دا حدث واقعي بيحصل لكتير من اللي بياخدوا أدوية نفسية

فـ قبل ما أقولك هل فعلاً الأدوية بتسبب إدمان ولا لأ خليني أنقلكم تجارب بعض المرضى - الملتزمين و الغير ملتزمين- بالأدوية..

-بعض المرضي اللي بيشتكوا من الأرق الشديد وكثرة التفكير في بداية الجلسات لما بياخدوا الأدوية يلاحظوا إنهم بقوا يناموا كتير جداً جداً ف بيخافوا و بيحاولوا من نفسهم يقللوا الجرعات فحين لو تتبعت معاهم معدل نومهم قبل و بعد الدواء و الجلسات هتلاقيه كان بينام الأول من ساعة ل ساعتين وبعد الأدوية بقي ينام 8 ساعات اللي هو اصلاً المعدل الطبيعي لكن هو عشان مش متعود ف مخضوض! فـ دا غلط كارثي
-بعض المرضي اللي بيلاحظوا تحسن بيقفوا الدوا فجأة و بعدها تظهر الأعراض تاني بشكل أعنف بيشتكوا من الأدوية! و دا غلط كارثي
-بعض المرضى اللي بيعانوا من أفكار مشوشة، انـtـحارية، وسواسية، اكتئابية، فصامية، أيا كان نوع اضطرابهم لما بيقفوا الدواء فجأه بينتكسوا وبيحسوا بالإحباط ودا بيأكدلهم الأفكار المغلوطة عن الأدوية النفسية إنها صح أهو!!

طيب ليه دي أفكار مغلوطة عن ؟!

لأن الأدوية النفسية بتشتغل عن طريق تعديل توازن النواقل العصبية (زي السيروتونين، الدوبامين، والنورإبينفرين)، وبتساعد المخ إنه يشتغل بشكل مستقر أكتر.

فلما الشخص بياخد الدواء لفترة، المخ بيتعود على المستوى الجديد من النواقل العصبية، وده بيخليه يعتمد على الدواء عشان يحافظ على التوازن ده.

إيه اللي بيحصل بقي مع التوقف المفاجئ؟
لما الشخص يوقف الدواء فجأة، المخ ما بيكونش قادر يوازن النواقل العصبية بنفسه بسرعة، وده ممكن يسبب أعراض انسحاب، زي:
صداع
دوخة
توتر وقلق
اكتئاب أو اضطراب في المزاج
اضطرابات نوم
أعراض جسدية زي غثيان أو رعشة

هل ده معناه إدمان؟
لأ، لأن الإدمان معناه اشتهاء قهري للدواء، مع فقدان السيطرة على استخدامه، لكن هنا الجسم بس محتاج وقت عشان يتكيف بدون الدواء.

إزاي نتجنب أعراض الانسحاب؟

التوقف عن الأدوية لازم يكون تدريجي وبإشراف الطبيب.
الطبيب بيقلل الجرعة على مدار أسابيع أو شهور حسب نوع الدواء.

كمان بعض الناس ممكن يحتاجوا أدوية مساعدة خلال فترة التوقف لتقليل الأعراض! .

التوقف المفاجئ ممكن يسبب فعلاً أعراض انسحاب لأنه بيأثر على كيمياء المخ، لكن ده مش معناه إدمان. الحل هو التدرج في التوقف عشان المخ ياخد وقته في استعادة توازنه الطبيعي. ♥️

10/03/2025

✨حملة الكشف المبكر عن اضطراب الشخصية الحدية 🧐✨

فريدة عندها تقلبات مزاجية شديدة و بتستمتع لما بتصرف فلوسها ف الـ Shopping 🛍️ و رغم إنها دايماً بتتخانق مع صاحبتها سلمى مع ذلك بتخاف تخسرها، وسلمى عشان تساعد فريدة اللي عندها تقلبات مزاجية سريعة فضلت تبحث لحد ما شافت فيديو على الـ Tik tok و قامت بعتاه لـ فريدة قالتلها بت أنتِ عندك بوردلاين -اضطراب الشخصيه الحدية- ( الإجابة عن سؤال ليه الاضطراب اسمه "حدية" أصلا، هتلاقيه ف أول كومنت).

عشان نشوف اللي عند فريدة دا اضطراب ولا عيوب ولا طبع فى شخصيتها محتاجين نعرف القصة كاملة عن أعراض اضطراب الشخصية الحدية ف تعالى معايا نعرف التفاصيل⚡

• مصابين اضطراب الشخصيه الحدية عندهم تغييرات سريعة ف الطريقة اللى بيشوفوا بيها نفسهم فمش بيبقوا قادرين يحددوا هويتهم وذاتهم بمعنى أنا اتجاهاتى ايه ف الحياة؟! ف بيبقوا منساقين ورا أراء و اتجاهات غيرهم اللي سريعاً بيكتشفوا أنه مش دا الاتجاه اللي حابينه ف بيبدأوا يشوفوا ناس تانية بـ أراء تانية جايز يلاقوا نفسهم معاهم .

• كمان بيبقي عندهم تقلبات كبيرة فالمزاج و دا مبيبقاش يوم ولا اتنين دا بيبقي نمط حياتهم .. لحظات من الفرح لساعات من الحزن الشديد و العياط

• بيكون عندهم شعور بالفراغ، لا لأ مش فراغ الوقت زي ما جه ف بالك 😂
لا بيكون عندهم فراغ داخلى مش حاسس.. مش حاسس بأي شيء غير العدم!

• لما تشوف نمط علاقاتهم تلاقيها غريبة و مش مفهومة مش مستقرة كده
عندك مثلاً فريدة كانت مرتبطة بشخص و كانت بتحكي لـ سلمى قد ايه دا أعظم إختيار ف حياتها و قد ايه هو أفضل واحد ف الدنيا.. بعدها بدون أي مقدمات لمجرد بس أنه مردش علي مسدجاتها وصفته إنه شيطان! وأنه ملوش لازمه أصلا ف حياتها وقررت تنفصل عنه!

• الغضب عندهم بيبقي شديد وعلي أبسط المواقف و ممكن يوصل إنهم يدخلوا في نوبة غضب و ميقدروش يسيطروا عليها .

• المصابين بالبوردلاين بتبقي تصرفاتهم طايشه و مندفعة وبالأخص الأفعال المؤذية إنه يهدد أو يإذي نفسه بالفعل، إنه يصرف فلوسه كلها بشكل متهور ف لحظه أو يسوق بشكل خطير، أو أنهم يأكلوا بنهم فظيع أو يمنعوا نفسهم نهائيا من الأكل لفترات!

• دايماً عندهم خوف شديد من الهجر و ف نفس الوقت حاسين بالوحدة!
هي دايماً خايفة تنفصل أو تفقد اللي بيحبوها و ممكن تخلق مشكله من العدم أو حتي تهدد أنها هتأذي نفسها لو حبيبها بعد عنها عشان تشد انتباه فاستمرار علاقته بيها، حتى لو الانفصال دا بالفعل مش حقيقي .

• في حاجات صعبة للأسف بيحس بيها مصاب البوردلاين أنه في وقت كده بيحس فجأة إنه منفصل عن الواقع أنا مين و فين! كأنه بقي بيشوف نفسه من برا و فترات بيبقي عنده ضلالات و هلاوس .

و بكده نكون عرفنا الأعراض المره الجايه هنتكلم عن الأسباب و العلاج 🤍

و لو عندك فضول تعرف هل فريدة تم تشخيصها بالبودرلاين فعلاً ولا لأ أكتب لنا فى التعليقات و قولنا حابب نتكلم عن ايه المقال الجاي إن شاء الله 🫶🏻

10/03/2025

✨ هل كلنا مصابون بإضطراب ثنائي القطب؟! ✨

في وسط التشخيصات اللي بتترمي في كل مكان على السوشيال ميديا ظهرلنا اضطراب ثنائي القطب و بقي كل اللي عنده تقلبات مزاجيه يقولوا عليه عنده اضطراب ثنائي القطب! و حالة عامة كده من العبثية 😂

خليني الأول قبل ما اقولك ايه هو اضطراب ثنائي القطب أوضحلك حاجة مهمة ألا وهي إن ربنا خلقنا أصلا بـ 5 مزاجات مختلفة..

• ١- شخص عنده المزاج العصبي: هو طبيعته عصبي من السهل يُستثار و يغضب علي أقلها حاجة

• ٢- شخص عنده المزاج الاكتئابي: هو طبيعته كده مكتئب و يحب النكد قد عينه، لا لا يا عم مبحبش أروح الأفراح إنما يروح العزا بس يبقي مبسوط وهو بيأدي واجب العزا ده

• ٣- شخص عنده المزاج النوابي: و دا الحد الفاصل خلي بالك بينه و بين ثنائي القطب اللي هنتكلم عنه كمان شويه.. المزاج دا بقي يا سيدي بيخلي الشخص بيتأرجح بين الفرح و الحزن أحياناً و بيبقي طبيعي عادي

• ٤- شخص عنده القلق الخائف: زي الأمهات مثلاً لو ابنها اتأخر نص ساعة برا تقول الود جراله حاجة و لا اتخطف و تنزل تذيع عليه فالمساجد 😂

• ٥- شخص عنده مزاج حاد : و حاد هنا لا تعني إنه اكتئاب شديد ولكن تُعني نشاط شديد و غالباً بيكون شخص مدمن عمل و مدمن نجاح و طموحاته عاليه جداً و أغلبهم من كتر نشاطهم بيجيلهم القلب و بيموتوا بدري عشان متحسش برضو أنه حاجة حلوة -أنا خايفه عليك يا صديقي من الإيجابية الزيادة بس- 😂

طبعاً المزاجات دي لو مقدرناش نتحكم فيها و بدأت تعطل حياتنا ف ضروري ندور علي مساعدة

🎯 نيجي بقى لموضوع انهارده.. ايه هو اضطراب ثنائي القطب و ايه الفرق بينه و بين اضطرابات المزاج؟!

اضطراب ثنائي القطب دا زي " لعبة الملاهي " شويه فوق أوي و قادر تملي الدنيا ضحك و جري و تنطيط - ودا نوبة الهوس- ، و شويه تحت خالص ملكش طاقة لأي حاجة و فاقد الأمل و الرغبة في عمل أي حاجة بتحبها -و دا الاكتئاب-

⚡ثنائي القطب ليه نوعين

• ثنائي القطب النوع الأول : و ده بيكون فترات الهوس فيه واضحة جداً و حادة تلاقيه بيصرف فلوسه كلها ف كل حتة و بيسوق عربيته بأقصي سرعة أو راح لأبعد نقط ف الجنس و الإدمان

• ثنائي القطب النوع الثاني: و دا الهوس عنده اخف شويه و لكن بيأثر برضو علي حياته

اضطرابات المزاح بقي يا سيدي في منها
١ـ اكتئاب شديد : فاقد الأمل ف الحياة و حزن شديد و عياط و مش قادر ينبسط بأي شيء دا غير فقدان الثقة و تغير الشهية للأكل و غيرها

٢- الاكتئاب المستمر أو عسر المزاج : الشخص بيبقي دايماً مزاجه منخفض و علي طول حاسس بكآبة و قليل لما حاجة بتبسطه

الفرق ما بينهم إن اضطرابات المزاج مفيهاش لعبة الملاهي هي بتكون مستمرة بدون تقلبات واضحه

🎯 طيب و دا علاجه ايه ؟!
اضطراب ثنائي القطب الحل الأفضل فيه هو العلاجي الدوائي و مثبتات المزاج بجانب الجلسات النفسية
أما اضطرابات المزاج بتساعد فيها برضو الأدوية المضادة للاكتئاب و العلاج النفسي المعرفي السلوكي

في النهاية سواء كنت بتعاني من اضطراب ثنائي القطب أو اضطرابات المزاج ف جميل إنك تسمع و تقرأ عنه لكن خطوات العلاج ف لازم تاخدها مع الشخص المختص اللي يقدر يساعدك فعلاً مش من تجارب شخصية هتضرك اكتر ما هتنفعك
و القرار قرارك 🫶🏻

10/03/2025

✨ ما لا تعرفه عن الوسواس القهري✨

عارفهُ عارفهُ مش دا بتاع الترتيب و النظافة الزيادة، ياريتني أنا عندي الوسواس ده 😂

هو، معاك حق دا جزء ولكن الوسواس القهري أكتر من مجرد وسواس نظافة!

فجهز نفسك عشان هاخدك في رحلة استكشافية ليوم في حياة مريض الوسواس القهري. 🚀

طبيعي يجي على بالنا على مدار اليوم أفكار غريبة منطقية أو غير منطقية ويمكن دا بنمر بيه كلنا. لكن اللي مش طبيعي إن الأفكار دي تتحول لوساوس و الوساوس دي تجبرك على سلوكيات قهرية لازم تعملها و إلا مش هترتاح!

فـ تعالى أقولك دا بيحصل ازاي مع مرضى الـوسواس القهري 🫣

و اللي بينقسموا لـمرضى عندهم وساوس، و أفكار بس، بمعني بيجي على دماغهم فكرة ملحة جداً كل شوية بتكرر مهما حاول توقيفها أو حتى يتخيل مثلاً إنه بيأذي نفسه أو بيأذي غيره و يتخيل فعلاً مشهد الأذى ده و المشهد مبيرضاش يروح عن باله أبداً "عشان تتخيل معايا انزل شوف أول تعليق عن قصة الراجل اللي كان بيشوف إنه بيأذي بنته أذي صعب و ايه حصل لما معرفش يسيطر علي أفكاره"

و مرضي تانيين بيبقي عندهم اندفاع و إحساس رهيب أنه عايز يشتم أو يسيئ بصوت عالي بألفاظ خارجة لـ ربنا أو الانبياء -استغفر الله- و على الرغم الشديد بإنه عارف حرمانية الفكرة دي و يمكن دا اللي بيصعب عليه الموضوع اكتر وبيخليه يحس بالذنب الشديد و بيخليه يحبس نفسه ف البيت خوفاً إن يندفع بالافكار دي قدام حد.. و غيرها و غيرها من الأفكار و دول كمان هسيبلكم حكاية عنهم فالتعليقات 🫣

و مرضى تانيين بيقي عندهم أفعال قهرية فقط زي أنهم لازم و هما ماشيين يعدوا العربيات، الشجر، العمارات أو إنهم يفضلوا بالساعات ف الحمام بيتوضوا كذا مره و لو معملوش كده بيحسوا بالضيق و الانزعاج الشديد .

مرضى غيرهم بيبقي عندهم الأفكار الوسواسية و الأفعال القهرية الاتنين سوا و دا الأصعب و الأشد بالنسبة لمرضى الـ OCD و دا أغلب اللي بنشوفه إن مثلاً المصاب بوسواس النظافة بيكون عنده أفكار بتطارده دايماً إنه لو لمس أي حاجة أيده هتتلوث بالميكروبات و هيعرض نفسه و أهله للأذى فيحس أنه لازم يقوم يغسل أيده عشان يرتاح من الأفكار دي و لو حاول يقاومها بيحس إن دماغه خلاص هتنفجر من التفكير .

على فكرة المرضى بيكونوا علي علم و وعي إن الأفكار دي غير منطقية زي مثلاً إن مش منطقي إن حد من أهله أو من الشارع يموت لو معدش الشجر وهو ماشي!
بس حقيقي هو مش قادر يقاوم الفكرة .

طيب لو أنا أو حد من أهلي مصاب بالـ OCD أتصرف ازاي ؟!
أول حاجة ضروري إننا نلجأ لطبيب نفسي لأن من أهم علاجات الوسواس القهري هي الأدوية المضادة للاكتئاب و جلسات العلاج المعرفي السلوكي و كمان العلاج بالتعرض و منع الاستجابة و دول لازم حد متخصص جدا اللي يقوم بيهم مع المريض .

حاجة كمان أبطل أقول للشخص جمل من نوعية " بطل وسوسة، بطل اللي بتعمله ده، دا مش منطقي" عشان حقيقي هو نفسه يبطل ولكن مش عارفه ف صدق مشاعره ة حسسه إنك عارف الفرق " أنا عارف إن دا مش أنت، دا الوسواس القهري اللي بتعاني منه"
و حاول تشجعه علي التعافي لأن رحلته فيه بتكون طويلة و محتاجة دعم مستمر 🤍

أنا كمان هستني دعمك و رأيك ف التعليقات 🤭

10/03/2025

✨️ سحر ممارسة الإمتنان ✨️

في وسط كل ضغوطات الحياة و التحديات و الصعوبات اللي بنواجها بننسي نشوف الحلو اللي فيها، حتي الأيام اللي بتمر علينا و نقول دا أسوء يوم لو ركزنا على الإيجابي اللي فيها هنلاقي حاجات حلوه ساعدتنا نعديها حتي لو بسيطة ..

الكاتبة/ لويز هاي في كتابها الإمتنان أسلوب حياة قالت " لقد لاحظت أن الدنيا تهوي الإمتنان، فكلما زاد شعور المرء بالإمتنان زاد الخير الذي حصل عليه و ليس المقصود بالخير هنا الأشياء المادية فحسب بل يشمل أيضا كل الأشخاص و الأماكن و التجارب التي تعطي طعماً للحياة "

قبل ما أقولك ازاي نمارس الإمتنان تعالي أقولك علي فوايده عشان تتحمس أكتر.. 🤩

● تحسن الحالة النفسية : الإمتنان بيساعد علي التركيز علي الإيجابي و اللي بدوره بيقلل الشعور بالتوتر و الاكتئاب و بيزود الشعور بالرضا و السعادة

● زيادة التفاؤل و الطاقة الإيجابية : لما تبدأ تشوف نص الكوباية المليان ده هيدّيك طاقة أعلي تواجه التحديات

● تقوية العلاقات الاجتماعية: أنا ممتن .. شكراً .. أنا مقدر مجهودك عشاني ، إمتنانك لغيرك و تقديرك لمجهودهم هيحسسهم بقيمتهم عندك و دا هيزود قوة العلاقة بينكم أكتر .

● تحسين الصحة الجسدية: الإمتنان بيقلل من التوتر و القلق و بالتبعية دا بيقلل الصداع و ألم العضلات و بيزود من صحة جسمك

● تعزيز النوم : تخيل معايا شخص قبل النوم بيجلد ذاته و شخص تاني بيذكر نفسه بالحاجات الإيجابية اللي حصلت خلال اليوم .. مين هينام أسرع و أفضل؟

● زيادة الثقة بالنفس: إمتنانك لنفسك و إنجازاتك اللي حققتها و ذوقك ف إختياراتك عموماً.. إمتنانك حتي للجماد مرايتك، أوضتك، شباك بيتكم اللي بيدخلك شمس كل دا بيعزز الشعور بالرضا و الثقة بالنفس

● مواجهة التحديات بشكل أفضل: الإمتنان بيحسسك بالأمل و مهما كانت الظروف صعبة إلا إنك بتشوف الجزء الحلو اللي فيها

اتحمست؟! تعال بقي أقولك تمارس الإمتنان ازاي.. 🤗💐

1- عن طريق الكتابة : ف نهاية يومك أكتب 3 حاجات ممتن ليها، ف البداية ممكن الموضوع يبقي صعب شوية إلا إني اراهنك بعد فترة من ممارسة الإمتنان محدش هيقدر يوقفك عن كتابة أشياء كتير جداً 😂🤍

2- التعبير المباشر عن الإمتنان: عبر للي بتحبهم عن مدي إمتنانك ليهم سواء بالقول أو رسالة دا هيعزز علاقات باللي بتحبهم أكتر

3- تأمل الحلو اللي فحياتك: خصص وقت ف يومك حتي لو أول ما تصحى تقوم تشكر ربنا علي صحتك و عافيتك و سترك و بيتك و النعم اللي محوطاك دا هيقوي إحساسك بالرضا و السعادة أكتر 🤍

4- تخيل الفقد: يعني ايه!!
تخيل نعمة البصر، الشم، السمع، اللمس مبقتش موجوده هتحس بقيمتها جداً ، تخيل نعمة وجود أهلك و إنك لاقدر الله فقدت حد فيهم هتقدر وجودهم أكتر تخيل .... تخيل.... تخيل النعم كلها و طبعاً ( وَإِنْ تَعُدُّوا نِعْمَةَ اللَّهِ لا تُحْصُوهَا )

الإمتنان مش مجرد عادة الإمتنان أسلوب حياة بنكتشف من خلالها إن الحياة بتمنحنا نعم كتير تستحق إننا نوقف و نشكر ربنا عليها 🤍

جايز تشوفها عادة بسيطة مش هتفرق معاك لكن جرب تمارس عادة الإمتنان خلال الأسبوع ده و نلتقي المره الجاية ف مقال الخميس تقولي رأيك عنها 😉

10/03/2025

✨️منازل مزدحمة بالعواطف✨️

كتير مننا بيحب يحتفظ بتذاكر المترو و القطارات 🏷🎟 و أوراق الشكولاته الفارغة و الورود كنوع من الذكري .. و مامتي و مامتك تلاقيها بتحب تحتفظ بحاجات غريبة كده زي العلب و الأكياس الفاضية لوقت عوزة و بالتبعية بيكون سلوك مكتسب لا نهائي لبناتها و احفادها البنات لما يتجوزوا يلموا العلب الفاضية حتي لو فرشهم جديد و عندهم علب بهارات غالية😂

كل دا طبيعي لكن لما نقول وسواس الاكتناز القهري فأحنا قدام اضطراب فعلي! و تعالى أقولك أعراضه..⚠️

● أصحاب اضطراب الاكتناز بيكون عندهم صعوبة في التخلص من الأشياء سواء مهمة أو غير مهمة .

● بيحتفظوا و بيكدسوا البيت بحاجات كتيرة بشكل مفرط جداً لدرجة مبيكونوش قادرين يتحركوا في البيت كويس و كأنهم ماشين بين ممرات!

● بيحصلهم قلق شديد لو فكروا يتخلصوا من حاجة موجوده لدرجة لو المريض جتله فكرة التخلص من ورقة مثلاً ف يفضل ماسكه ف ايده طول اليوم لحد ما يهدأ!

●طول الوقت عندهم احساس بالحاجة الملحة بالاحتفاظ بالأشياء فتلاقيه كل ما يطلع برا البيت راجع بكوم ورق و علب و حاجات ملهاش لازمه!

● و علي الرغم من ذلك إلا إنهم بيحسوا بالإحراج الشديد قدام الناس و العيلة و أصحابهم بسبب كمية الحاجات اللي مش قادرين يتخلصوا منها دي! و دا اللي بيخليهم يصابوا بالاكتئاب .

♦️ ايه السبب بقي فالإصابة باضطراب الاكتناز ده و ازاي بيحصل هقولك عليه دلوقتي..

1- أسباب عاطفية بتبدأ مثلاً بإنهم يحتفظوا بعلب الهدايا و أكياس الشكولاته و التذاكر لأنها بتمثله ذكريات سعيدة و تجارب جميلة، بعدها بيحصل صعوبة ف التخلص من أي شيء منها .

2- الندم و الخوف من بكره.. رمي علبة وبعدها بشويه أكتشف إنه عايزها فبقي عنده تخوف من التخلص من أي شيء بعد كده ليحتاجه فيما بعد..

3- راحة نفسية.. كونه محتفظ بحاجات كتير فـ دا بيحسسه إنه فأمان أو بلغتنا كده " مأمن نفسه 😂" .

4- وراثة.. اه متستغربش حتي وسواس الاكتناز بيتورث .

5- وجود اضطرابات عقلية أخرى .

طبعاً مستني العلاج؟ صح 👀😂
أنسب علاج لإضطراب وسواس الاكتناز هو اللجوء للمتخصص نفسي يساعدك عن طريق العلاج المعرفي السلوكي ( الـ CBT ) .

و لكن عشان أنت follower شاطر و جميل علي بيدج Eros Therapy فـ نحب نساعدك 🫶🏻

✨ أولاً : ارسم هدف واقعي خلال اليوم للتخلص من رف مبتستخدمهوش بقالك أكتر من 6 شهور و تخلص منه

✨️ ثانياً : صنف الحاجات ل3 تصنيفات
* مهمة و تُستخدم بانتظام
* يمكن التبرع بها
* غير ضرورية و تالفة

فكرة التبرع بالحاجات الغير مهمة بالنسبالك هتقلل عندك الزعل علي فقدانها و إنك غيرك هستخدمها كويس

استخدم قاعدة " واحد يدخل و واحد يخرج" كأنك ف ملعب 😂⚽ هتشتري حاجة جديدة مفيدة يبقي تخلص من حاجة مش مفيدة عندك .

متنساش كمان إننا هنا في Eros Therapy بنقدم خدمة العلاج النفسي من خلال أمهر الأخصائيين و هنكون دايماً سعداء باستقبالك ✨

10/03/2025

✨ بين الحرارة والبرودة تكمن أسرار المزاج المتقلب ✨
في نمط من أنماط الأشخاص في العلاقات يشبه حنفية السخن و البارد فالشتا اللي بتاخد وقت جامد عشان تفهمها و تجيبها ف اتجاه مقارب للوسط كده علي ماية فاتره عشان تقدر تستخدمها، الأشخاص دول مره تلاقيهم مزاجهم رايق جداً و مره مزاجهم صعب جداً لدرجة يصعب عليك فهمهم امبارح كان بيقولي إنه أفضل شخص عرفه و انهاردا يقولي مش عايز أعرفك طب ازاي!!

هذا يا أصدقاء ما يُسمي بـ " اضطراب المزاج غير المحدد " إن الشخص يُصاب بأعراض متعلقة بالمزاج زي ( الهوس أو الإكتئاب ) لكنها لا تتطابق تماماً مع المعايير التشخيص لأي اضطراب مزاجي محدد زي الاكتئاب الحاد أو ثنائي القطب مثلاً ..

بمعني أبسط : هو وصف للحالات الللي بيظهر عندها مشاكل ف المزاج لكن " غير واضحة المعالم " عشان تدخل تحت مسمي مرض نفسي معين .

شكله ايه طيب اضطراب المزاج غير المحدد ده ؟

🌓 شخص علي طول عنده لخبطة في المشاعر مره عنده اكتئاب ومره مبسوط بزيادة لكن معندوش باقي الأعراض الخاصة باضطراب ثنائي القطب اللي تخلينا نقول إنه عنده الاضطراب ده.

🌗 شخص عنده مشاكل في المزاج لكن مش بدرجة شديدة أو مستمرة كفاية إننا نقول إنه اكتئاب مثلاً .

🌗 أو موقف مؤقت أو استثنائي زي ردة فعل مؤقتة بعد صدمة نفسية.

طيب و ايه أعراضه؟!

١- تغيرات غير متوقعه أو متكررة في المزاج
٢- صعوبة في الاستقرار العاطفي
٣- مشاعر اكتئاب أو فرح شديد بدون سبب واضح .
٤- أعراض تؤثر على الحياة اليومية لكنها ليست مطابقة مع اضطراب معروف.
٥- فترات فرح مفرط أو نشاط زايد
٦- تغيير ف النوم

التقييم النفسي في الحالة دي و اللجوء لمختص نفسي بيكون الحل الأمثل لمساعدة الأشخاص المصابة باضطراب المزاج غير المحدد لمساعدة المصاب بيه بتحسين مهارات إدارة التوتر و نمط حياته ككل باستخدام فنيات العلاج المعرفي السلوكي CBT و العلاج الجدل السلوكي DBT

طيب أنا كشخص ف حياتي شخص مصاب باضطراب المزاج غير المحدد اتعامل معاه ازاي؟

علماء الاجتماع و استشارين التربية قالوا إن أفضل حل هو بعد فهمي لطبيعة شخصيته المزاجية خصوصاً لو المصاب دا قريب ليا ( أخت، أخ، زوج أو زوجة) ف هنا أتعلم " فن المسافات " أعرف أمتي ابقي قريب جداً منه ( في حالات المزاج العالي المرتفع ) لأن بيكون في مزاج سلسل و رايق! و أمتي ابعد ( في حالات المزاج المنخفض الاكتئابي ) لأنه مشاعره بتكون عالية و مندفع ف كلامه و تصرفاته

فن المسافات مهم للشخص نفسه المصاب
إنه لما يحس نفسه في مزاج منخفض يحاول يعمل نشاطات فردية زي انه يرسم، يلون، يصلي، يقرأ قرآن، يتفرج علي حاجة تضحكه و ترفع مزاجه

ولما يحس بالمزاج عالي يعمل نشاطات جماعية زي انه يخرج مع صحابه، يعبر عن مشاعره، يتجمع مع عيلته و هكذا 💕

لايك و شير يمكن تكون سبب في فهم شخص لنفسه و لغيره و قولنا تحب نتكلم عن ايه تاني ✨

10/03/2025

تعالى نلعب فزورة نفسية و نخبط في جدارن التشخيصات الفارقة 🫣

فصام بس مش فصام 👀

أعراضه
- اضطراب في التفكير ( أفكار مشوشة و مش منطقية )
- ضلالات و أوهام( اعتقاد المريض إن في حد عايز يإذيه أو بيراقبه أو بيضطهده )
- اضطرابات إدراك ( هلاوس سمعية و بصرية إنه يسمعه أو يشوف حاجات محدش بيشوفها غيره )
- سلوك غير منطقي( بيتصرف تصرفات غريبة و مش مناسبة للموقف زي انه يضحك ف عزا أو يعيط ف فرح! )
- تدهور الوظائف اليومية ( مش قادر يحافظ علي روتين نومه و حياته و مسؤولياته و بينسحب من العلاقات الاجتماعية )
- مشاكل في السيطرة علي الانفعالات ( نوبة غضب شديدة أو عياط كتير غير مبرر )

س / سؤال ؟
ما تشخيصك عزيزي الأخصائي لهذا المريض ؟
ج / ...
لا تعالى أقولك كام حاجة الأول قبل ما تقول فصام 🫣😂

علماء النفس في رحلة بحثهم في عالم الأمراض وجدوا مرض نادر جداً أعراضه تشبه أعراض الفصام بالظبط اسمه " مرض ويلسون Wilson's disease " المرض ده بيصيب واحد من كل 30,000 فرد!
دا عبارة عن تراكم للنحاس في الجسم بشكل مفرط خاصة فالكبد ويتراكم النحاس أيضاً في الدماغ، وخصوصًا في مناطق معينة زي العقد القاعدية والقشرة الدماغية فـ بيأثر بشكل كبير علي الوظايف العقلية و النفسية فبالتالي بينتج عنه نفس أعراض الفصام

✨️ أسبابه بترجع لـ ✨️
إن الشخص المحظوظ ف العالم اللي حصله المرض ده دون عن الـ 30,000 غيره 😂 حصله طفرات في جين ATP7B و دا عمل ف جسمه عطل إنه يتخلص من النحاس الزايد منه عن طريق
إخراجه مع العصارة الصفراوية.

ليه بقي نادر و بيصيب واحد من ضمن 30,000 لأن المرض دا بينتقل عن طريق الأهل في حالة جود الجين دا عند الأب و الأم بيه سوا ف بيظهر المرض دا عند الطفل نفسه .

الأعراض االي ممكن تظهر كمان غير الأعراض الذهانية اللي ذكرنها

أعراض جمسية :
- مشاكل و تليف فالكبد
- إرهاق و تعب مستمر
- اصفرار الجلد و العين
- فقر الدم

أعراض عصبية
- رعشة ف الأيد
- صعوبة ف الكلام و البلع
- تسيب ف العضلات و مشاكل ف الحركة

مشاكل نفسية :
- اكتئاب
- عصبية و زعل من غير سبب
- تصرفات غريبة و مش محسبوبة
- تغيرات في المزاج واضحة

✨️ أشهر العلامات الواضحة فيه ✨️
وجود حلقات لونها بني أو أخضر خفيف حوالين قرنية العين بسبب تراكم النحاس

علاجــــــه 💊
علاجة مشترك بين الطبيب و الأخصائي

العلاج الدوائي أفضل تدخل لإزالة النحاس من الجسم و بالتبعية بتتحسن الأعراض النفسية بالتدريج من خلال المتابعة مع أخصائي نفسي لذلك هو مش فصام لأن الفصام مرض مزمن لكن دا بيروح مع العلاج

لو حابب نتكلم أكتر عن التشخيصات الفارقة و خصوصاً مع الفصام وعلاقته بالغدد و الأورام اكتبلنا ف التعليقات، و متنساش تقولنا رأيك ك العادة 😍

10/03/2025

✨️ جروح مخفية خلف ابتسامة ملكية ✨️

اضطرابات الأكل ( الجزء الثالت ) 🎬
في وسط عالم بيجري ورا المثالية، بقى عندنا تساؤلات غريبة… إزاي يوتيوبرز صينيين نحاف بياكلوا كميات مهولة من الأكل ومفيش حاجة بتتغير في شكلهم؟ إزاي أميرة زي ديانا، رمز الجمال والرقي، كانت بتعاني من اضطراب أكل مؤلم في الخفاء؟ الحقيقة إن علاقتنا بالأكل مش مجرد جوع وشبع، لكنها أحيانًا بتبقى ساحة حرب نفسية.

نهم الأكل وفيديوهات الأكل الكتير: إدمان ولا استعراض؟ 🌯🌮🥪🥙🍔🍕

لو بتتفرج على يوتيوب، أكيد شفت فيديوهات لناس بتاكل كميات ضخمة جدًا من الأكل بطريقة غريبة! ممكن تبقى فاكر إنهم محظوظين، بس الحقيقة إن المشهد ده ممكن يكون ليه تأثير سلبي على ناس عندها استعداد لاضطرابات الأكل.

نهم الأكل (Binge Eating Disorder - BED) هو لما الشخص ياكل كميات كبيرة جدًا في وقت قصير، من غير ما يقدر يوقف، وبعدها يحس بذنب وضغط نفسي رهيب. وده بيختلف عن الأكل بزيادة في يوم عادي، لأن الموضوع بيبقى خارج عن السيطرة تمامًا ومرتبط بالمشاعر أكتر من الجوع نفسه.

طب اليوتيوبرز دول عندهم نهم أكل؟ مش بالضرورة! بعضهم بيستخدموا خدع تصوير، وبعضهم ممكن يكون عنده طرق غير صحية للتخلص من الأكل بعد التصوير، وده للأسف بيطبع فكرة الإفراط في الأكل كحاجة عادية، رغم إنها ممكن تكون بوابة لاضطراب خطير عند بعض الناس.

جروح مخفية خلف ابتسامة ملكية 👸🏼

الأميرة ديانا كانت أيقونة في كل حاجة، لكن اللي الناس ما كانتش تعرفه إنها كانت بتصارع اضطراب أكل اسمه "الشره المرضي العصبي" (Bulimia Nervosa).
كانت تاكل كميات كبيرة جدًا، وبعدها تجبر نفسها على التقيؤ عشان ما تزيدش في الوزن. السبب؟ الضغط النفسي، شعورها بعدم الأمان، ومحاولتها تلاقي أي طريقة تتحكم بيها في حياتها وسط الضغوط اللي كانت بتواجهها. ديانا وصفت المرض ده إنه كان وسيلة للهروب، لكنها كانت بتدخل في دايرة ذنب ومعاناة كل مرة.

ليه بيحصل اضطراب نهم الأكل؟
الموضوع مش بس "واحد عايز يخس" أو "حد بيحب الأكل"، ده نتيجة مزيج معقد من الأسباب:
🔹 الضغط النفسي: زي تعليق بسيط ممكن يخلي شخص يفقد الثقة في نفسه! زي اللي حصل مع الأميرة ديانا لما كانت ف نزهة مع خطييبها وقالها بهزار لا بس أنتِ تخنانه شويه انهارده 😂، وقتها حست بالنقص و عدم الكفاية و دا دفعها للاكتئاب، والأكل بشراهة كتعويض للمشاعر.
🔹 السوشيال ميديا: معايير الجمال الوهمية بتضغط على الناس بشكل غير مباشر.
🔹 العوامل الجينية: بعض الأشخاص عندهم استعداد وراثي لاضطرابات الأكل.
🔹 الاضطرابات النفسية: زي الاكتئاب والقلق، اللي بيخلوا الأكل وسيلة للهروب.

طيب إزاي اضطراب الأكل بيأثر على النفسية؟ 🫡
الشعور بالذنب والخزي: بعد نوبة النهم، المريض بيحس إنه ضعيف، وده بيزود الضغط النفسي ويخليه يرجع للأكل تاني و كأنها حلقة مغلقة!

العزلة الاجتماعية: ممكن المريض يرفض يخرج أو ياكل مع حد عشان مش عايز حد يحكم عليه وعلي شكله.

فقدان السيطرة: الإحساس إن الأكل هو اللي بيتحكم فيك، مش العكس، بيكون مؤلم جدًا نفسيًا.

إزاي نتعامل مع اضطرابات الأكل؟
العلاج المعرفي السلوكي (CBT): وده بيساعد الشخص يفهم أفكاره السلبية ويغير سلوكه تجاه الأكل.
و دا بيتم تقديمه في Eros Therapy علي يد أمهر الأخصائيين النفسيين

الدعم النفسي والاجتماعي: إن الشخص يلاقي حد يسمعه ويفهمه بدون حكم بيكون خطوة مهمة في التعافي.

إعادة بناء علاقة صحية مع الأكل: عن طريق تقبل الجسم، وفهم مشاعر الجوع والشبع بدون ضغط نفسي.

افتكروا دايماً إن علاقتنا بالأكل انعكاس لحالتنا النفسية
سواء كنت بتتفرج على يوتيوبر بياكل كميات خرافية، أو بتتأمل في قصة أميرة كان شكلها مثالي لكنها كانت بتصارع اضطراب أكل في الخفاء، لازم نفتكر إن علاقتنا بالأكل مش بس بيولوجية، لكنها نفسية جدًا! فهم العلاقة دي هو الخطوة الأولى عشان نتعامل مع نفسنا ومع الأكل بطريقة صحية ومتزنة.

انهارده اتكلمنا عن الفرق بين اضطراب نهم الأكل Binge Eating Disorder زي اليوتيوبرز و اضطراب الشره العصبي Bulimia Nervosa زي الأميرة ديانا ارجعوا للجزء الأول و التاني من سلسلة اضطرابات الأكل عشان تعرفوا ف الجزء الرابع هنتكلم عن ايه 🫣🔥

و قولولي فـ الكومنات رأيكم فالمقال و لو تعرفوا حد بيعاني من اضطرابات الأكل اعملوا له منشن وقولوا له أنت مش لوحدك 💕

Psy. Aliaa Ali

09/11/2025

06/04/2025

26/03/2025

10/03/2025

10/03/2025

10/03/2025

10/03/2025

10/03/2025

10/03/2025

10/03/2025

10/03/2025

Address

Website

Alerts

Shortcuts

Share

Category