29/09/2024
ازاي يكون يوم طفلي لما هنمنع الكارتون والتلفزيون والموبايل والتاب والكمبيوتر والانترنت ؟
هلهيهم في ايه لحد ما اخلص اللي ورايا؟
دي افكار تساعدك :
*اختاري اللي يناسب سن و شخصية طفلك و ممكن تاخدي الفكرة تطوريها او تبسطيها حسب سنه
1-مشاركة في تنظيف أو ترتيب البيت
2-احكوا حدوتة
3-اعملوا مسرح عرايس و خليهم هما يعملولك القصة و انت اتفرجي
4-الواح ورق كبيرة عالحيطة و يرسموا بخامات مختلفة الوان خشب,فرشة و الوان مياه,الوان اصابع ,لوح سودا و يرسموا بالطباشير مش كراسة رسم و علبة الوان و اقلب :D , و ممنوع كراريس التلوين الللي فيها رسومات جاهزة مطبوعة و هو يلون لأنها من معوقات الإبداع
5-العاب مطبوعة يحلوها زي الاختلافات و المتاهة و انهم يدوروا علي حاجات في مشهد
6-تتكلموا عن قيمه معينه و تتناقشوا فيها
7_ لو عندك اطفال كبار وصغيرين، خلي الاكبر ياخد دور المسئول عن رعاية ولعب الصغيرين، طبعا وقت محدد، الطفل بيحب يكون مسئول وليه قيمة ودور في الحياه
8-بازل فيه من اول ال 4 قطع لحد ال 300 قطعة و اكتر
9-اي مكعبات مبتتجابش و نرميها للطفل و خلاص و بعدين نقول محبهاش لأ لازم نطور فيها مره نعملها عربية و نركب فيها لعبة تانية مره نعمل بيت علشان نمثل بيه حاجة تانية ,مره نعمل حيطة صغيرة علشان نداري ايدنا وراها في مسرح العرايس اتفقوا علي فكرة و سيبيه ينطلق فيها
10-تقليد اصوات كل واحد يقلد صوت حيوان او حاجة و الباقي يخمنوا
11- عروستي :دي ممكن تلعبيها مع ولادك و انت في المطبخ يقعدوا عالباب و تلعبوا اي حاجة موجودة في الشقة حد يوصفها و الباقي يخمنوا مثلا عروستي ؟ حاجة حمرا ,عروستي ؟ بتتاكل ,عروستي؟ بتتقطع عالسلطة (طماطم)
12- بدل ما نتعلم الحروف و الارقام عالورق نجيب طبق مليان رمل او ملح و الطفل يكتب بصباعه بعدين تلخبطوه و تكتبوا غيره و ممكن لوحده يقعد يرسم بنفس الطريقة
13-فصل الحاجات : مكرونة و عدس و طبقين و الطفل يفصل كل حاجة في طبق ممكن لو سنه صغير نخليه يفصل حاجات اكبر و اسهل و ممكن نطبق نفس اللعبة في فصل الالوان يعني يفصل كل الاحمر لوحده و الابيض لوحده و ممكن نلعبها في سبت الغسيل يفصل لبس ماما عن بابا عن لبسه، هي لعبه مرنة و تنفع لأي سن ^_^
14-نعمل صلصال منزلي (كوب دقيق+نص كوب ملح+معلقة زيت+الوان طعام ) و نعجنها بمايه لحد ما تظبط و نخلي الطفل يعجنها بنفسه ,ممكن تقعد لأسبوع في التلاجة في كيس
15-أي حاجة يدوية شوية خامات الطفل يطلع منها حاجة
16-سينما : تضلموا الغرفة و تعملوا فشار وكراسي وكانكم في السينما وتتفقوا علي مشهد من فيلم معين او موقف وهما يمثلوه
17-مخيم في الصالة :D مره في الاسبوع في الشهر اي كان المناسب تطلعوا مرتبة بره و تناموا كلكوا جمب بعض ده مفيد جدا للأطفال اللي لسه بتتعلم تنام لوحدها بيبقي حافز حلو ليهم اننا كل فترة هنام كلنا سوا شرطها تكون بره مش في غرفة الاب و الام علشان الطفل ميرتبطش بالغرفة و يروحلها كل يوم
18-خيمة : كرسيين و فوقهم كوفرته او اي خيمة بشكل بسيط الطفل يتعلم يعملها و يقعد فيها يلعب اللي يحبه ,بيفرحوا بيها جدا :D
19-تمثيل : حد يمثل تعبير بالوجه و التاني يقول معناه (زعلان-فرحان) ممكن حد يمثل وظيفة ...
20- لعبة المطعم نعمل في يوم منيو و حد يبقي طباخ و حد جرسون و كده او اوبن بوفيه و نتعلم من خلالها اداب الطعام بشكل مبسط
21-هيحصل ايه ؟ نطرح سؤال افتراضي و كل واحد يجاوب، زي هيحصل ايه لو السماء مطرت رز بلبن :D ؟ ممكن نبسط السؤال ,هيحصل ايه لو صحينا لقينا في البيت قطة ؟ ... طبعا لو ابنك بيترعب من القطط ده مش سؤال مناسب :D
22-سوق الخضار و الفاكهة :الأم تعمل بياعة في السوق و الأطفال يشتروا و يغسلوا و ياكلوا اللي اشتروه ^_^ و لازم تبقي متقنة الدور
23-نعمل كيك او كب كيك و نحط اطباق كريمة,فواكه ,بسكوت ..و كل واحد يزوق حته (نبعد عن عجينه السكر لأن سكرها عالي و اي سكريات كتير بتهيبر الطفل)
24-المايك معاك : نجيب ميكروفون بيتباع ب 15 جنية و نركبه في السماعات و كل واحد يبقي ليه فقرة يطلع بقي يغني ,يحكي حدوتة ...فقرتك كأم ممكن تحمل رسالة غير مباشره عن اللي تحبيه
25-كمل الحدوتة : حد يبدأ مثلا كان مره واحد ماشي و فجأة ...التاني يكمل و لو الطفل مش عارف يتخيل ممكن اسيبله النهاية بس يعني كان فيه مره ولد قلمه ضاع فخد من مصروفه و راح المكتبة .... و الطفل يكمل
26-اجتماع عائلي : مره في الاسبوع تجتمعوا و كل واحد يقول اكله ليوم في الاسبوع الجاي و تعملوا منيو الاسبوع فطار غدا عشا مكتوب و متعلق
ده مهم جداااا في تعليم الطفل النظام
و بتعلمهم الإيثار بمعني بابا مختار في يوم ملوخية و فراخ و سلطة و رز جه اليوم ده و ابنك مش بيحب الملوخية بياكل سلطة و فراخ و رز بس مش بتعمليله اكل مخصوص
و ده ينطبق علي باقي الايام لو الاب مبيحبش حاجة الطفل مختارها برضه هياكل باقي الموجود و ميتعملوش مخصوص ...
27-عكس الادوار : لمدة ساعة مثلا ابنك ياخد دور الام و انت تاخدي دوره و تعكسوا المهام انت ترتبي اوضته و هو يوضب حاجة في البيت من مهامك مثلا ,اللعبة دي بتبينلك ابنك شايفك ازاي و شرطها متنتقديهوش في اللعبة خالص لأن ممكن تلاقيه لما خد دورك بدأ يزعق و يحط ايده في وسطه فأكيد انت بتعملي كده :D
28-مكالمة : تخليه يكلم حد من قرايبكوا يسأل عليه
29-قولي ميزه : كل واحد يقول حاجة ايجابية في غيره بتبقي حلوة جدا و بتعرفي ابنك بيحب فيكي ايه
30-طبقين واحد فاضي و التاني فيه سفنجه و مياه و الطفل ياخد السفنجة يعصرها في الطبق الفاضي لحد ما ينقل كل المياة من ده لده
طبعا اكيد كلكم عندكم افكار تانيه واكتر من كده
ممكن نخلي البوست ده لافكار لعب مفيده وكلنا نستفاد من بعض
تفتكروا لو طفل عملناله كل التجارب و الالعاب دي، هيطلع زي الطفل اللي معظم وقتة مع الكرتون؟!
أكيد طبعا لا
