21/04/2025
أنواع الملح بالترتيب من الأفضل للأقل فائدة (بس من غير ما نرمي كف الإيد في الحلة):
1-ملح البوتاسيوم (Potassium Salt)
البديل المثالي لمرضى الضغط أو اللي بيقللوا صوديوم…
فيه بوتاسيوم بدل الصوديوم، وده بيساعد على تقليل ضغط الدم.
❗مينفعش لمرضى الكلى أو اللي بياخدوا أدوية بتزود بوتاسيوم زي مدرات البول.
2-ملح الهيمالايا الوردي
طبيعي، غير مكرر، فيه شوية معادن زيادة زي البوتاسيوم والماغنيسيوم… بس ما هواش علاج سحري زي ما بيسوقوا له.
3-الملح البحري الطبيعي (Sea Salt)
أقل تكرير من الملح الأبيض، وطعمه بيكون أغنى… بس برضه صوديوم في الآخر.طبيعي وبرضه فيه معادن، بس الفرق مش ضخم عن الهيمالايا.
4-ملح كوشير (Kosher Salt)
حبته خشنة وسهل التحكم فيه، بيستخدمه الشيفات عشان مش بيذوب بسرعة، لكن مفيهوش ميزة صحية خاصة.
5-الملح المعالج باليود (Iodized Salt)
مكرر، لكن مدعم باليود… وده مهم جدا لو نظامك ناقص يود، خصوصا لمشاكل الغدة الدرقية.
6-الملح الأبيض المكرر العادي
أنظف شكلا، أفقر مضمونا… اتسحب منه كل المعادن الطبيعية، وبقى مجرد صوديوم نقي بيحوش مية ويمشي.
7-الملح الإنجليزي (Epsom Salt)
ده مش للأكل خالص!
ده مغنيسيوم سلفات، بيستخدم في الحمامات والدلكات لتخفيف العضلات،
وناس بتشربه كملين (لكن تحت إشراف طبي).
👉 ما يتاكلش زي الملح العادي.
خلاصة الكلام؟ كل الأنواع فيها نفس كمية الصوديوم تقريبا... الفرق الحقيقي في درجة التكرير والمحتوى المعدني البسيط.
المهم مش النوع... المهم "الكمية".
رش بحساب… عشان صحتك مش أكلة سريعة، دي وصفة طويلة العمر.
🚫جميع الحقوق محفوظة
