25/10/2025
💥رحلة المريض من تشخيص انيميا الي ورم المعدة💥
👈جالي مريض في العيادة ٤٨ سنه كل مشكلته دوخه وهبوط راح المستشفي عمل تحليل صورة دم وطلع انيميا اخد جرعه محلول حديد وروح.
رجع بعدها تعب تاني فاولاده جابوه عشان اعالج الانيميا. تحليل صورة الدم ومخزون الحديد قليل واتشخص أنه انيميا نقص الحديد.
☝️كدا للاسف احنا شخصنا نص المشكله وهي نوع الانيميا. باقي النص الأهم وهو ايه سبب نقص الحديد هل دا سوء امتصاص الحديد ولا في فقد في الدم عامله نقص الحديد.
☝️بعد اخد التاريخ المرضي والفحص مكنش في حاجة مميزة غير بعض المشاكل ف المعدة العاديه وبياخدلها علاج وخلاص. وكان رأي أننا نعمل تحليل دم خفي ف البراز وطلع إيجابي.
☝️قلت لأولاده لابد من عمل منظار لمعرفه مصدر الدم الخفي. وبعد عمل المنظار تبين وجود ورم خبيث بالمعدة ربنا يعافي الجميع.
💐💐 ومن هنا لازم نوضح كام نقطه مهمه جدا:
◾هل تشخيص الانيميا بيقف عند تشخيص انيميا نقص الحديد وياخد أقراص أو محاليل حديد فقط؟ للاسف لا طبعا دا نص التشخيص السهل. ويتبقي الاهم وهو معرفه سبب نقص الحديد.
◾تحليل الدم الخفي في هذه الحالات مهم جدااا.
◾أهم مصدر لفقد الدم من غير العيان ما يعرف هو الجهاز الهضمي. و دا لانه عباره عن انبوبه طويله جدا تبدأ بالفم وتنتهي بفتحه الشرج والدم ف الغالب بيبقي مختلط ب البراز وممكن العيان مياخدش باله.
◾اورام الجهاز الهضمي خصوصا اورام المعدة والقولون ممكن يكون مفتاح تشخيص الحاله هو الانيميا فقط خصوصا لو الانيميا متكررة.
◾مش كل انيميا علاجها محاليل وأقراص حديد فقط. معرفه سبب الانيميا هو الأهم.
🌴🌴دمتم بخير🌴🌴
.....................................
دكتور/ أمير الدماطي
استشاري أمراض الباطنة والكبد والجهاز الهضمي
مدرس بكلية الطب جامعة الأزهر بالقاهرة
دكتوراه أمراض الكبد والجهاز الهضمي والحميات والمناظير
استشاري بالتأمين الصحي.
العنوان: ايتاي البارود، شارع الجمهوريه اعلي صيدلية عمادالدين.
ت: ٠١٠٦٧٤٤٨٩٥٧ ــ ٠١٥٠٣٠٣٤٣٣٠
