معمل الخليفة للتحاليل الطبية- khalifa lab

09/08/2024

لو بتعاني من آلام ف العظام 🦴🦴و الاصابه بحصوات الكلي🫁 المتكرره تعالي اقولك ايه السبب.🧐🧐🧐
عندك سببين:🗣️🗣️🗣️🗣️🗣️
١-السبب الاول☝️ هو زياده افراز الغده الدرقيه المسئول عن التحكم ف مستوي الكالسيوم بالدم و إخراجه من البول و إطلاق الكالسيوم من العظام للدم.
٢-السبب التاني✌️ هو زياده افراز الغده الجاردرقيه يحدث امتصاص الكالسيوم من العظام 🦴و يتم ترسيبه ف الكلي🫁 مما يؤدي إلى تجاويف بالعظام و خاصه عظام اليد و الاصابع🖐️.
من أعراض وجود مشاكل بالعظام ناتجه عن الغده الجاردرقيه . وجود آلام بالعظام🦴 شديده لا تستجيب للمسكنات و سهوله التعرض للكسور.
ايه الحل بقي لو انت بتعاني من آلام العظام 🦴🦴و الاصابه بحصوات الكلي المتكرره 🫁
تطمن ع نفسك بتحليل🎉🎉🎉
TSH
PTH
Ca
#معمل الخليفه
خبره تمنحك الأمان
امام بوابه جراج مجلس المدينه، مكان عياده د. عاطف الفقي سابقا. اعلي كافيه Eika
01144686573
01018334320

11/05/2024

كنا بنعمل تحليل بول لمريضة و طلع عندها أملاح كتير فبقولها عندك أملاح كتير قالتلى و الله ما بأكل مخللات خالص ....
معظم الناس فعلا بتكون رابطة ارتفاع مستوى الأملاح بالمخللات لكن مش بالضرورة يكون دا السبب و في أسباب تانية

1- لما ماتشرب مايه كتير البول بيكون مركز جدا و بالتالى بيحصل تركيز للأملاح ، فأنت بالتالى محتاج تشرب كميات كافية من المايه عشان ميحصلش جفاف كمان
2-لو انت بتعانى من حصوات الكلي ، ارتفاع ضغط الدم و أمراض الغدة الدرقية دا بيسبب خلل في توازن المواد الكيميائية في جسمك ، فأنت محتاج تهتم بالموضوع أكتر و تعالج المسبب في وجود الأملاح..
3- لو أنت بتاكل مغذيات بتحتوى على بروتين او الكالسيوم مثلا أو أطعمة حامضية هتعملك أملاح بردوا ، فأنت محتاج تراجع نظام التغذية بتاعك و تهتم بيه..

30/04/2024

أنا بس عايزاك تفهم بكل بساطة ان السكر التراكمي دا بيقيس متوسط السكر في الدم لمدة 3 شهور !!
بس اشمعنا 3 شهور ؟ هقولك لأن السكر بيرتبط بنوع معين من الهيموجلوبين و أنت عارف ان الهيموجلوبين من مكونات كرات الدم الحمراء و عارف كمان أن عمر كرات الدم الحمراء 3 شهور بس ...و أكيد عارف بردوا إن لو الأنيميا عندك أقل من الطبيعي بكتير تحليل السكر التراكمى هيديك نتائج غلط ...؟
قولنا في الكومنتات بقا إي العلاقة و ليه هيدى نتائج غلط 🤗

29/04/2024

عمرك فكرت هل في فرق بين دور البطل و المنقذ ؟ لو لأ فتعال هحكيلك حكاية بتحصل في جسمنا مع هرمون بيلعب دور البطل و هرمون بيلعب دور المنقذ .....
لما بتحس إنك جعان بتروح علطول تأكل و بعد هضم الأكل بشكل جيد هيتحول لجزيئاته الصغيرة زى ما الكربوهيدرات هتتحول لجلوكوز (سكر) و دا يعتبر وحدة الطاقة في جسمك بس ثوانى الجلوكوز دا هيدخل الخلايا ازاى عشان يعطيها الطاقة ؟
بمساعدة هرمون الأنسولين يا صديقى ال هيقوم بدور البطل و ياخد الجلوكوز من إيدة ويدخله الخلايا و بكدا هيحافظ على مستوى السكر في دمك و يحميك من إن السكر يكون عالى في الدم طب لو الخلايا أخدت الطاقة بتاعتها،الجسم هيعمل بالباقي اي ؟ 🤔 ، هرمون الأنسولين مش ناسي و واخد باله جدا ان في سكر زيادة ف دمك لسة، هيكمل جمايله عليك وهيحول الزيادة ل جليكوجين في الكبد و الجليكوجين دا عبارة عن وحدات صغيرة من الجلوكوز ...
طب أفرض أنت جعان دلوقت و مينفعش تأكل أو صايم ، معقول جسمك هيسيبك تهبط و تفقد طاقتك كدا :(
لأ هرمون الجلوكاجون هيلعب دور المنقذ و ينقذك متقلقش ... الجلوكاجون هيروح للكبد ال متخرن فيه الجليكوجين و يحوله لجلوكوز عشان خلايا جسمك تحصل تانى على الطاقة... لحد ما مستوى سكر الدم عندك يكون مظبوط و هكذا يا سيدى ...
الأنسولين و الجلوكاجون بيقوموا بدور واحد لحمايتك من مرض السكر سواء انه يزيد في الدم أو يقل عن المستوى الطبيعي ، بيتم إفرازهم من خلايا مختلفة في البنكرياس و بيعملوا وظائف مختلفة لكن الغاية واحدة و هى الحفاظ على مستوى سكر الدم ، متنساش تقول سبحان الله ♡

.

28/04/2024

لما تكون مضايق و تقرر تأكل فلفل حار يبقا أنت كدا بتفكر صح لإنك أكيد عارف إنه بيحفز هرمون الإندروفين ال بيخليك تحس بالراحة و السعادة و كمان بيزيد من إفراز الناقل العصبي سيروتونين ال بيرتبط بالسعادة و الراحة و تحسن مزاجك كمان 😇
بس خليك عارف إن قولونك ممكن يكون ليه رأي تانى ، زى مثلا انه هيوجعك و هيحصلك انتفاخ أو الإفرازات المعوية تزيد فالألم يزيد ...أو مثلا يحصلك إسهااال 😭
فأى رأيك تأكل شويا و تعدل مزاجك و بعدين تستعد لوجع القولون؟🤔

18/04/2024

صباح الخير 🌱
لما حالة بتعمل عندنا CBC(صورة دم كاملة ) و تشوف الانيميا بتاعتها نازله أول حاجه بتيجي في بالها إن عندها نقص في الحديد...
معلش هعيد تانى إن الانيميا دي يعنى الهيموجلوبين ال هو بروتين أساسي في كرات الدم الحمراء و الحديد هو العنصر الأساسي لتكوينه ..عشان كدا بيقولوا ان لو الحديد قل يبقا الانيميا هتقل بردوا ...دا المشهور بالنسبة للناس..
لكن الحقيقي إن في أسباب عديدة غير نقص الحديد ..
ويلااا بينا نعد سوا
1-فقدان دم كتير في وقت الدورة الشهرية أو جرح أو تقيؤ دم في الحالات المصابة بدوالى المرئ
2-قلة تناول حمض الفلوليك أو فيتامين B12 و إدمان الخمور و الكحول(فقر الدم الخبيث )
3-إن جهازك المناعي يدمر خلايا الدم الحمراء (فقر الدم الإنحلالى )
4- إن نخاع العظم يكون فيه مشكلة أو الادوية المستخدمة في علاج السرطانات (فقر الدم اللاتنسجي )
5- يكون عندك مرض وراثي بتكون كرات الدم الحمراء غير مكتملة النمو (thalassemia ).
كل مرض من دا بيحتاج لتحاليل إضافية غير CBC و تقدر تستعين بطبيك عشان يشخص حالتك.
و للحصول على أفضل نتائج للتحاليل الطبية أكيد هتيجى معملنا 💖
وبمجرد ما تعرف سبب الأنيميا اى و تعالجه كل حاجه هترجع طبيعية زى الأول ..💖

15/04/2024

ومن تانى وقبل أى حاجه اهلا بمجتمع معمل الخليفة 🌱
في العصور الوسطى مرض النقرس(تراكم بلورات حمض اليوريك ) كان مرتبط بالأشخاص ال معاها فلوس كتير عشان بيأكلوا لحوم كتير و أسماك دهنية..
بس أنت لازم تعرف دلوقت إن أى شخص ممكن يصاب بالمرض دا عادى و أنا هفهمك المرض دا بيحصل إزاى و ليه بيحصل تراكم.
لما أنت بتأكل طعام بيحتوى على بروتين بمجرد ما بيوصل لجهازك الهضمي بيتحول لوحدات صغيرة وهي الأحماض الأمينية يقوم الحمض الأميني دا متحول ليورينات تيجى بقا انزيمات موجودة في الكبد و تحول اليورينات لحمض اليوريك ...ها كدا عرفت بيتكون إزاى ف جسمك من البروتين ؟
طيب أنت طبعا عارف أن البروتين مش بس موجود ف اللحوم الحمرا و البيضا و إن ممكن يكون مصدره نباتى و موجود في البقوليات زى العدس و الفاصوليا و الحمص وكمان السردين و التونه و المشروبات الغازية ...إلخ
بعد ما بيتم تصنيع حمض اليوريك بيتم تصفيته من الدم بواسطة الكلى و إخراجه عن طريق البول، فبالتالى لو أنت عندك الإنتاج كتير و قدرة تصفية الكلى للحمض ضعيفة هيبدأ يتراكم ف الدم و يقعد بقا يدورعلي مكان تانى يتراكم فيه .... و المكان ال هيرتاح فيه هو المفاصل بتاعت حضرتك فتقوم تلتهب و تورم و توجعك و تجيلنا المعمل بقا عشان نعملك تحليل Uric Acid و تنظم نمط التغذية بتاعك و تأخد دوا و تخف و تبقا زى الفل من تانى ..🌱

13/04/2024

أهلاً بمجتمع معمل الخليفة 🌱
النهاردة هنتكلم عن مرض وراثي نادر جدا وهو الهيموفيليا(الناعور) .
الهيموفيليا عبارة عن مرض وراثي بيؤثر على قدرة الجسم على تجلط الدم وبالتالى المريض بيكون عرضة للنزيف المفرط .
طيب اى ال بيخلى الجسم مش بيوقف حدوث النزيف ؟ غياب العوامل المسئولة عن حدوث الجلطة الطبيعية ، ومن هنا عايزين نعرف ان الهيموفيليا 3 أنواع فى كل نوع بيكون في غياب لعامل تجلط معين.
من ضمن الأعراض الخطيرة ال بتسببها الهيموفيليا لو حصل نزيف أو كدمة ف منطقة المفصل بيبدأ الدم ال تم إفرازه من بطانة المفصل يتجمع ف فراغ المفصل فالجسم عشان يحمى نفسه من تجمع الدم بيفرز انريمات لإذابة و امتصاص تجمعات الدم لحد كدا مفيش أى مشكلة لكن المشكلة بتكمن ف إن حتي بعد ما بيتخلص من تجمع الدم الانزيمات بتبدأ تهاجم غضروف المفصل و بالتالى تتأكل العظام ، ولو حصل نزيف داخلى في المخ بيؤدى إلى الوفاة .
المرض بيبدأ التعرف عليه من أول سنة فى الحياة و ينصح دائما أن الطفل ياخد تطعيم فيرسB لأن حياته بتكون عبارة عن نقل دم و حقن وردية .
خلينا فاكرين إن المرض دا وراثي يعنى جين بيتنقل من الأم لطفل فماذا لو قدر العلماء يعالجوا الجين دا و يمنعوا انتقاله عبر الأجيال ...
بالفعل دا من ضمن التقنيات الحديثة ف العلاج بالاضافة لاستخدام عوامل تساعد على حدوث التجلط .

12/03/2024

أنا عارفه إنك عارف إن لو الهيموجلوبين (Hgb) عندك قل يبقا أنت عندك أنيميا ؛ بس أنت تعرف يعني اي هيموجلوبين أصلا؟

لو متعرفش فأنا هقولك ؛ بص يا سيدي الهيموجلوبين عبارة عن بروتين موجود في خلايا الدم الحمرا (RBC) بيحمل الحديد في الدم و يحمل الأوكسجين لأنسجة الجسم و بيحافظ علي شكل RBC عشان تقدر تتحرك بسهولة في الأوعية الدموية و بيعمل علي اعادة ثاني أكسيد الكربون للرئة عشان الجسم يتخلص منه في عملية الزفير وبيعطي الدم لونه الاحمر ومش بس كدا دا بيحافظ علي حموضة الدم .

طيب ايه بيخلي مستوي الهيموجلوبين يتغير ؟

1. سوء التغذية ونقص فيتامينات وفقدان الدم وقرحة المعدة و أمراض الكبد وسرطان القولون و نخاع العظم كل دا بيخلي مستوى الهيموجلوبين يقل و تبدأ تظهر عليك أعراض زي شعور بالتعب و الصداع وقلة التركيز و الشعور بالبرد وخفقان القلب لأن خد بالك الهيموجلوبين قل يعني كمية الاوكسجين ال بيحملها هي كمان هتقل.

2. وعندك كمان لو حصل إضطراب في نخاع العظم هيبدأ يتنج كميات كبيرة من خلايا الدم الحمرا ( خلايا الدم الحمرا بيتم انتاجها في النخاع يعنى لو حصل خلل و الإنتاج زاد عن الطبيعي الهيموجلوبين بردوا هيزيد خليك مركز احنا قولنا إن الهيموجلوبين من مكونات خلايا الدم الحمراء يعني لو الخلايا زادت فالهيموجلوبين بردوا هيزيد و العكس ، بالاضافة للتدخين والعيش في أماكن مرتفعة .

أنت طبعا فاكر إن زيادة الهيموجلوبين مش هيسببلك أزمة بس لا يا باشا دا ممكن يسببلك جلطات ونوبات قلبية و سكتة دماغية لان زيادة عدد الخلايا يعني زيادة سمكها في الأوعية الدموية (هتسد الطريق يعنى) .

ها عرفت ان الهيموجلوبين مش أنيميا بس:")

11/03/2024

08/03/2024

في ناس لحد دلواقت رابطة وجود الزلال بالحمل .

لكن الحقيقة إن وجود الزلال في البول مش بس بيجي للحوامل .

فأنا هقولك الاول يعني إي زلال (Albumin) : ببساطة هو نوع من البروتينات ( بيكون شبه بياض البيض ) الموجودة في الدم ؛ المفروض إن بعد الفلترة ، الكلي ترجعه تانى للدم لكن ال بيحصل أنه بينزل في البول .
طب إزاي أنت تعرف إن عندك زلال ؟ لما تسيب البول شويا هيسود أو ريحته هتكون شبه البيض و ال هتلاحظه أكثر وجود الرغاوى ؛ من هنا بقا أنت لازم تعمل تحليل بول كامل بأسرع وقت لأن لو معالجتش الزلال في البداية هيقلب معاك بتورم في القدمين أو الوجه أو اليد وفي أوقات التورم بيكون في اعضاء جسمك الداخلية .

و أنصحك كمان تعمل تحليل Alb \creat Ratio لانه بيكون أدق .

خلي بالك ان رغاوي البول ممكن تكون طبيعة لو بتستخدم منظفات كتير أو حصل دفع للبول عند التبول وبردوا لو بتمارس رياضة عنيفة او يكون البول مركز في حالة الجفاف أو العينة مأخوذة صباحاً وفي صغار السن لان افراز البروتين بيزيد مساءاً بشكل طبيعي.

لكن ال مش طبيعي انك تكون مريض سكر أو ضغط أو عندك مشاكل في الكلي أو بتاخد أدوية لتضخم البروستاتا أو مشاكل أعصاب تؤثر على المثانة بالإضافة إنه عرض من أعراض تسمم الحمل.
وكمان خليك عارف أن وجود الزلال في البول ليس مرض بل دليل علي وجود مرض فأنت محتاج تتوصل مع طبيبك عشان يساعدك في التشخيص الصحيح.