12/09/2025
“تَمام الكَمال في النَّقص"
إحنا كبشر بنتعلق بفكرة الكمال…
نفسنا في علاقة كاملة ،شغل كامل، حياة من غير أي نقص
بس لو بصينا بصدق… هنلاقي إن الدنيا كلها مبنية على النقص مش على الكمال
لأن الكمال صفة من صفات ربنا سبحانه وتعالى
هو وحده “الكامل” وكل ما سواه ناقص بطبيعته
ولو كانت حياتنا كاملة مكنّاش هنشعر بضعفنا
﴿وَيُرِيدُ ٱللَّهُ أَن يُخَفِّفَ عَنكُمْ ۚ وَخُلِقَ ٱلۡإِنسَٰنُ ضَعِيفٗا﴾
النقص هو اللي بيخلينا نلجأ لربنا مش لنفسنا ونفتكر
ونتعلم معنى الدعاء
“اللهم لا تكلني إلى نفسي طرفة عين”
النقص في حياتنا مش لعنة… ده رحمة
رحمة بتفكرنا إننا محتاجين ربنا في كل لحظة
رحمة بتخلينا نكمل بعض كبشر نرحم بعض ونتواضع
رحمة بتخلينا نعرف إن الجنة هي المكان الوحيد اللي مفيهوش نقص… المكان الوحيد اللي هنلاقي فيه الكمال
﴿لَهُم مَّا يَشَآءُونَ فِيهَا وَلَدَيْنَا مَزِيدٞ﴾
هناك بس كل شيء كامل من غير نقص ولا وجع
واعلم
حتى الابتلاءات اللي بتسيب فى حياتنا فراغ ووجع … ربنا ما أرادش يوجعنا بيها هو أراد يرفعنا ويغفر لينا ووراها أجر كبير ودرجة أعلى و فى الحقيقه هى رسائل من الخالق
فلو حاجتك ناقصة…اعرف إن ده الطبيعي
ولو قلبك موجوع عشان حاجة مش كاملة…
فكر نفسك إن “تمام الكمال في النقص”
لأن النقص بيخليك أقرب لربنا والرضا بالنقص بيجيب لك السلام اللي بتدور عليه
الرضا حالة يقين إن كل حاجة مرتبطة بحكمة ربنا حتى اللي وجعك أو أخرك أو أخده منك
اتركه فى ودائعه واطمن إن وراه حكمة
واعرف ان الكمال لله وحده… والرضا هو بابك الوحيد لطمأنينة حقيقية
اللَّهُمَّ اجعل قلوبَنا راضيةً بقدَرِك، واجعل نَقصَنا سَبيلًا لِقُربِك، وعَوضَك أجملَ مِمّا فَقَدنا
#رضا
