عيادة د/ محمد عبدالله العمري لعلاج الحميات وامراض الباطنة المتوطنة

25/02/2025

كل عام وحضراتكم بخير ؛

10/12/2024

مش مقلق باذن الله النشر للتوعية واخذ الحيطة والحذر
👈تحية طيبة :سأتحدث اليوم عن المتحور الجديد لفير.وس كور.ونا الذي بدأ في الانتشار منذ شهرسبتمبر والذي اطلق عليه متحو.ر XEC ، المتحو.ر الجديد يبدو اضعف ولكن اسرع انتشارا.....
1- أعراض متحور كور.ونا الجديد "XEC"غالبا ما تصيب الجهاز التنفسي او الهضمي وهي تشابه اعراض نزلات البرد والانفلونزا و سلالات كو.فيد السابقة مثل :

-الحمى أو رعشة الجسم.
-السعال.
- ضيق أو صعوبة التنفس.
- التهاب الحلق.
- سيلان الأنف.
- فقدان حاسة التذوق أو الشم.
- التعب.
- آلام العضلات.
- الصداع.
- الغثيان أو القيء.
- الإسهال
-طفح جلدي

*الفئات الأكثر عرضة للإصابة بالمتحور الجديد من فيرو.س كور.ونا، هي:
- كبار السن.
- أصحاب الأمراض المزمنة.
- أصحاب المناعة الضعيفة.
- الأطفال.
-الحوامل
و النصائح الهامة التي تساهم بشكل كبير في تقليل فرص الإصابة بمتحور كورونا الجديد، ومنها:
- ارتداء الكمامة، خاصةً في الأماكن المغلقة والمزدحمة، منعًا لانتقال العدوى.
- غسل اليدين جيدًا بالماء الجاري والصابون.
- عدم الاختلاط بأشخاص تظهر عليهم أي عرض مما سبق ذكرها.
- الحفاظ على التباعد الاجتماعي عند التعامل مع الآخرين.
- تنظيف أسطح المنزل بالمطهرات.
- تهوية المنزل يوميًا ودخول الشمس فيه.
و دمتم في حفظ الله
منقول.
©️ د. محمد العمري اخصائي الحميات

10/11/2024

08/10/2024

مباردة نسمة هوا من استرا زينكا بالتعاون مع صيدلية العزبي بايتاي ؛
اي مريض متابع معانا بروشته فيها بالميكورت اربع امبولات
يستطيع شراء جهاز نيبوليزر بخصم ٧٠٪ من الصيدلية نفسها من ضمن تلات انواع محترمه منهم البورتابل بالشحن للي بيسافر؛

22/09/2024

بسم الله...
البوست ده للامهات مع بدايه العام الدراسي كل عام وانتم بخير...
✅التغذيه السليمه هي الاساس للعقل السليم.. عاوزه ابنك او بنتك يكون ممتاز ف دراسته يبقي الاكل بتاعه يكون خضار وفاكهه وبروتينات مش اندومي و شيبسي وكراتيه ومعجنات...
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹
✅في بدايه كل فصل دراسي اعملي التحاليل دي
🟢CBC صوره دم
🟢Urine analysis تحليل بول
🟢Stool analysis تحليل براز
هيفرق معاكي جدا ف استيعاب الولد لو عالجتي الانيميا....
ووزنه وصحته العامه هتفرق معاكي جدا لو عالجنا اي عدوي ديدان او عدوي مجاري بوليه ممكن تضايق النوم بتاعه
🌹🌹🌹🌹🌹🌹🌹🌹🌹🌹🌹🌹🌹🌹🌹🌹
✅مفيش دوا بيعلي الذكاء ومفيش دوا بيحسن التعليم ومفيش دوا بيمنع العصبيه الزايده والشقاوه.....
لكن فيه ام فايقه لاولادها اخدوا ايه واستوعبوا ايه وهخليهم يناموا بدري ازاي
وازاي اقلل استخدامهم للاجهزه الاليكترونيه...
وفيه بيت هادي متزن بيجنب الاولاد اي مشكلات او صوت عالي او عصبيه...
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹
افضل الاطعمه علي الاطلاق هي البيض واللبن و المكسرات وقبل ما تقول غاليه عندك الفول السوداني ممتاز وكويس والقليل منه مفيد جدا... فياريت نعمل حسابه ف وجبه الطفل الصبح او ف المدرسه
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹
في النهايه... مشروع تربيه طفل متميز تعليمياََ ومجتمعياََ وقبلها دينيا يعتمد بعد توفيق ربنا ع بعض التضحيه من الطرفين... فحاولي قدر الامكان تنتبهي للطفل ف تغذيته ولبسه وتعليمه وصدقيني ف النهايه ان شاء الله ربنا مش هيضيع تعبك

04/04/2024

الدور الحالي كوكتيل فيروسات موسمية ؛
يتميز بالخمول وسرعة الانتشار والم العضلات الشديد والحراره العالية
واهم شيء الاهتمام بنظافة الانف والتحكم ف احتقان الانف عشان ماتقلبش بكحة
المضادات ليس لها دور اللهم الا لو في علامات بكتيرية واضحه زي ؛
همدان الطفل او الكبير طول الوقت وانقطاع الشهية تماما وبالفحص وجود بؤر صديدية وقتها بنوصف المضاد المناسب بالجرعة المناسبة
بلاش مضادات حيوية عشوائية ولاسيما الحقن لان في مشكلة في المواد الحافظة وقد تسبب حساسية خطيرة
السوائل الشتوية اللي ربنا كرمنا بفاكهتها واهمها الجوافة لله حكمة في ظهورها هذا الوقت لوجود كم فيتامين سي قوي بها يفيد الجهاز المناعي
فقط خوافض حراره واقلها ضررا الباراسيتامول وسوائل وراحة تامه يومين او ثلاثة خفت الاعراض كان بها مخفتش يفضل الفحص من قبل طبيب متخصص
واهم شيء المصاب يستخدم ادوات شخصية ويحاول يستخدم الاجراءات الوقائية الممكنة قدر المستطاع
والطفل المصاب او الموظف يريح من المدرسة او شغله بعذره
#د/محمد_العمري

01/04/2024

مشهور ف الاطفال والكبار المشكله دي بقه الاظافر البيضا leukonychia ؛
ودي يا تظهر في شكل نقط منفصله او متصله بالطول او العرض ؛
اشهر اسبابها ؛
الكدمات يعني ابنك او انت بتستخدم اداه او بيلعب في حاجه فخبطت كتير في ظوفره ودا اشهر سبب
الثاني ؛ وهو نقص الزنك او السيلينيوم و الكالسيوم ودي اقل شيوعا وبتدي مساحه بياض كبيرة مش مجرد نقط صغيره زي مابنشوف وعشان تظهر لازم يكون نقص الفيتامين دا شديد اوي يعني
الثالث ؛ انيميا نقص الحديد ودي مش برده منتشر كتير
الرابع ؛ الفطريات بس بتاخد مساحه كبيره جدا بالتهاب واللون مصفر شوية واحساس الاكلان
الرابع ؛ امراض الكبد والكلي السكر او الناس اللي بتاخد كيماوي ودا برضه من الشائع اوي
اكتر سبب بنشوفه وفي الاطفال كتير والمطمئن هو اول سبب ودا لا ليه علاج ولا فيه منه داعي للقلق وبيروح لوحده مع نمو الاظافر

01/04/2024

لا يفضل تخفيف الملابس حاليا
يبدأ تدريجيا من اخر شهر ابريل باذن الله

01/04/2024

مريض قصور الكلي ؛
ممنوع الصيام اطلاقا

30/03/2024

؟




التعامل مع السخونية :

1-لما تلاقي ابنك سخن قلعيه هدومه ومتغطيهوش وهو نايم حتى لو لقتيه بيرتعش وبيقول لك سقعان أوعى تغطيه طالما هو سخن مفيش مجال هنا لخرافة : غطوه ببطانية علشان يعرق!! أوعى تغطي ولد سخن... أوعى!!

2- لما تلاقي ابنك سخن قعديه في جو مفتوح مش مكتوم

3- الكمادات أهم من دوا وحقن السخونية فلما ابنك يكون سخن اعملي له كمادات كالتالي : لو الولد صاحي هاتي لعبه وأشياؤه وحطيها في بانيو مليان ميه وقعديه معاها في مية فاترة حتى لو قعد ساعتين تلاتة وحتى لو اضطريتي تشغلي الدش على دماغه كمان... سامعك يالي بتقولي طب هو كده مش هياخد برد! مش هيحصل له حاجة إن شاء الله بس متطلعيهوش على مروحة شغالة أو تكييف أو شبابيك جايبة تيار هوا جامد.... أما بأه لو الولد نايم فنجيب فوط مبلولة ميه فاترة أو كمادات الجل الجاهزة ونحطها على أماكن الكمادات المؤثرة على الرقبة من الناحيتين وتحت الباطين وبين السرة والفخدين لا مجال هنا لكمادات الجبهة تأثيرها ضعيف جدا دي كمادات الأفلام العربي بس 😄😄

4- مفيش مانع من كمادات الخل للي معندوش حساسية جلدية ... ومفيش مانع من وضع شرايح بصل على بطن الرجل كمان ولبس شراب قطن فوقها! تأثيرها رائع الكمادات دي!

5- مفيش داعي أبدا تخاطري بابنك وتوديه للدكتور وهو سخن مولع علشان الدكتور يصدقك أو علشان تدخلي من غير دور في العيادة... المخاطرة دي شفنا عواقبها كتير متمثلة في فيلم رعب محبكمش تشوفوه : التشنجات الحرارية

6- التعامل مع التشنجات في البيت قبل ما تروحوا المستشفى :
حافظوا على مصدر التنفس مفتوح يعني حطوا حاجة جامدة متتكسرش بين الأسنان... طلعوا أي أكل في فم الطفل... حطوه تحت الحنفية لحد ما تتوفر المواصلات اللي هتوديكم المستشفى... يروح المستشفى حتى لو فكت التشنجات في البيت أو الطريق علشان يكون تحت الملاحظة

7- أفضل وأكتر أدوية السخونية أمانا هي الأدوية المكونة من الباراسيتامول ... ودي تستخدم لأي مرض ما عدا بعض أمراض الكبد ... وتستخدم حصريا في الأطفال اللي أقل من 6 شهور
الجرعة :
الشرب : الباراسيتامول والبارامول كمثال جرعتها نص الوزن كل 4-6 ساعات يعني لو طفل وزنه 10 كجم يبقى جرعته 5 سم كل 4-6 ساعات
أما سيتال وتيمبورال فجرعتها ربع الوزن كل 4-6 ساعات يعني لو طفل 20 كجم يبقى جرعته 5 سم كل 4-6 ساعات
طبعا النوع التاني ده يفيد الأطفال اللي أكتر من 10 كجم لأن لو طفل وزنه 15 كجم مثلا فهنحتاج نديله من البارامول 7.5 سم ودي جرعة كبيرة مجهدة ليكي وللطفل

النقط أو القطارة : جرعتها نقطتين لكل كيلو... يعني لو طفل 5 كجم يبقى هياخد كام؟ أيوه... هياخد 10 نقط كل 4-6 ساعات

اللبوس : مفيش لبوس لوزن أقل من 8 كجم إلا لو قسمنا اللبوسة... من 8 كجم ل 15 كجم لبوسة بارامول أو سيتال كل 4-6 ساعات... فوق 15 كجم لبوسة ابيمول كل 4-6 ساعات

8- دوا البروفين.... أمان بعد 6 شهور وفيه كلام جديد إنه ينفع بعد 3 شهور وفيه كلام جديد إنه ينفع في حساسية الصدر للأمانة

الجرعة :
البروفين نص الوزن كل 6 ساعات يعني لو طفل 10 كجم هياخد 5 سم كل 6 ساعات
كونتافيفر نفس المادة الفعالة بتاعة البروفين لكن التركيز أعلى فجرعته : ربع الوزن كل 6 ساعات يعني ينفع للأطفال اللي وزنهم أزيد من 10 كجم

9- الكاتافلاي والدولفين وإخواتهم فوق سن سنة - على الراجح- لا يجب إننا نديها في حساسية الصدر خصوصا والتهابات المعدة والكلى...
الكاتافلاي جرعته ربع الوزن كل 6-8 ساعات يعني لو طفل 20 كجم يبقى جرعته 5 سم كل 6-8 ساعات

لبوس دولفين وبيبي رليف وفولتارين ليهم كذا تركيز 12.5 و 25 و 50 مجم
جرعته : 1-3 مجم لكل كجم من جسم الطفل على مدار 24 ساعة يعني لو طفل وزنه 15 كجم فأقصي جرعة ليه هتبقى 15*3=45 مجم يعني مينفعش ياخد لبوسة دولفين 25 مرتين في اليوم لأنه كده هياخد 50 مجم لكن ينفع ياخد لبوسة دولفين 12.5 كل 8 ساعات لأنه كده هياخد 12.5*3 = 37.5 مجم يعني في الأمان... احسبوها بالطريقة دي وطبقوها على ولادكم ولو محتاجين توضيح أكتر اطلبوا بس اقرأوا الكلام أكتر من مرة وافهموه كويس

نفس الكلام ينطبق على الحقن اللي فيها نفس المادة الفعالة زي فولتارين وكاتافلام واولفين وديكلاك وغيرها اللي هتلاقي معظمها تركيزه 75 مجم موجودين في أمبول 3 سم يعني المللي الواحد فيه 25 مجم فلو ابنك 20 كيلو يبقى المفروض أقصى جرعة 20*3=60 يعني ممكن ياخد من الحقنة 2 سم ولو ابنك وزنه 10 كجم يبقى أقصى جرعة ياخدها 10*3=30 يعني ياخد 1 سم من الحقنة تقريبا

عموما يا ريت مننساش إن المادة الفعالة من الأدوية دي مينفعش تستخدم تحت وزن 10 كجم بأي حال علشان بنلاقي ناس بتستخدمها تحت الوزن ده بطريقة فجة وكمان مع إنها مباحة فوق وزن 10 كجم لكن استخدامها بكثرة غير مفيد إطلاقا وضار جدا على المدى القصير والطويل

10- التسنين ميعملش سخونية فوق 38 ولا بيسبب أي مرض فيا ريت نبطل الكلام بتاع بيسنن بودانه وببطنه وبعنيه والكلام الفارغ ده!!

11- فيه طريقة كويسة في استخدام أدوية السخونية هي :
نعمل جدول حرارة وهنفترض إننا بنتعامل مع ولد وزنه 20 كجم والساعة دلوقتي 12 ظهرا فطريقة التعامل معاه كالتالي :
الساعة 12 ظهرا نديله 5 سم كاتافلاي
الساعة 3 عصرا نديله 5 سم سيتال
الساعة 6 عصرا نديله 5 سم كاتافلاي
الساعة 9 مساءا نديله 5 سم سيتال
وهكذا
كده بنديله دوا سخونية كل 3 ساعات يعني السخونية مش هتلحق ترفع وفي نفس الوقت الفرق بين الدوا وبعضه وقت كاف لأن مينفعش ناخد كاتافلاي كل 3 ساعات

اعملي الجدول بنفسك في ورقة وعلمي على اللي بتديه كل مرة علشان متنسيش ومتتلخبطيش

12- يفضل عدم استخدام مادة البروفين ومادة الكاتافلاي مع بعض

يا ريت مننساش إن التعامل مع السخونية تعامل مع عرض مش مرض يعني كل ده تعامل مع عرض مضر لحد ما نكشف ونشوف سببها إيه يعني مش معنى إن ابنك بقى كويس والسخونية راحت إنك تفوتيها! خليكي ناصحة أمال!
مش عارف إذا كنت غطيت ولا لأ موضوع السخونية وطريقة التعامل المنزلية معاها في السريع على ما نروح نكشف..