20/05/2025
مش فاهم إية علاقة شوية دخان السيجارة اللي بنشربها بجلطة القلب، انتم دكاترة أوفر وبتبوظوا فرحتنا، يامعقدييين...
دخان السجاير فيه آلاف من المواد الكيميائية الضارة للقلب وشرايين الجسم عموما - بما فيهم شرايين المخ والأعضاء التناسلية🙄 - المواد الكيميائية دي في منها مثلا ما يسبب سرطان الرئة، وفي منها بيسبب ارتفاع الدهون والكولسترول بالدم وفي منها بيضر جدار الشرايين ويساعد علي تراكم الدهون بها فتضيق ،وكمان بيزود نسبة التجلط بالدم...
فالمحصلة مع السنين شريان ضيق جدا ( نتيجة تراكم الدهون والكولسترول بجداره) ودم مش عارف يجري في المجري الطبيعي السلس بتاعه (نتيجة الضيق وزيادة اللذوجة بالدم) فيحصل تجمع دموي علي الضيق، يعمل جلطة تسد الشريان تماما زي الصورة وينهي هذة المأساة (السهم الأحمر وسدد الشريان التاجي وأختفائه تماما) !!!
الدم المغدي للجزء دة من عضلة القلب انقطع تماما فيعمل الم شديد بمنتصف الصدر ويسمع في الكتف الشمال ولو ماتلحقش في ساعات قليلة تضعف العضلة ويتليف جزء منها وتبقى بؤرة لضربات القلب البطينية السريعة اللي ممكن لا قدر الله تؤدي للوفاه وخصوصا في اول 48 ساعة من حدوث الجلطة!
فيلم رعب والله ياجماعة انتم وأهلكم في غنى عنه...
إن كنت من المحظوظين والجلطة تم تشخيصها وأتلحقت بالقسطرة في الساعات الأولي من حدوثها وتم إزاله الجلطة وتوسعة الشريان المصاب بدعامة دوائية بيرجع الدم يتدفق بشكل طبيعي لعضلة القلب وبتتحسن الأمور جدا زي الصورة (السهم الاخضر بعد تركيب الدعامة وظهور الشريان بالكامل مرة أخرى بفضل الله)
يعني هو التدخين بس اللي بيعمل جلطة بالقلب، ماهو ناس كتير بيجلها جلطة ومش مدخنين؟!!!
لا طبعا، الضغط المرتفع باستمرار واهمال العلاج بيعمل جلطة، مرضى السكر اللي بيهملوا العلاج والمتابعة بيعمل، الاكل الدسم الدهني والسمنة وارتفاع الكولسترول بالدم بتعمل، ضغط العمل وتوترات الحياة المستمرة بتعمل ، ولكن يبقى التدخين هو العامل الوحيد اللي بأيدك وتقدر تمنعه تماما وتخرجه برة اللعبة، ودة شيء عظيم وأثره علي صحتك جميل ومبشر بالخير ،فيما عدا ذلك انت دائما مهدد بالخطر..
_____________________________________________
دكتور / محمد محمود الشوادفى
كفر الشيخ شارع العمال متفرع من ابراهيم المغازي امام اسواق عباد الرحمن
☎️ 01064759419 / 0155 989 1942
