19/07/2025
**تعديل السلوك مش عقاب.. ده مهارة لازم الأهالى تتعلمها **
كتير من الأهل بيقولولى:
"ابني بيعند، بنتي بترد عليا، مش عارف أتعامل!"
بس في الحقيقة، ورا كل سلوك مشكلة… ورا كل تصرّف رسالة الطفل مش قادر يوصّلها بالكلام.
الموضوع مش تحدي شخصي، ومش لازم ناخده على كرامتنا.
تعديل السلوك يعني نوجّه، نعلّم، ونحتوى، مش نهدد ونتعصّب أو نعاقب وبس .
🧠 الطفل مش هيغيّر سلوكه لوحده، لازم إحنا نكون الدليل بتاعه.
الأسلوب، النبرة، التكرار، والتوجيه والصبر… هما اللي بيعلّموا بجد.
✅جرب بدل ما تقول "عيب!" أو "اسكت!"،
تقول: "أنا شايف إنك متضايق، تحب نحاول نحلها سوا؟"
🙌🏼 لما الطفل يعمل حاجة صح، ما تفوّتهاش.
كلمة حلوة، تشجعه، أو حتى ابتسامة، بتفرّق جدًا في تعزيز السلوك الإيجابي.
🚫 وخلّي بالك… الضرب والعصبية ممكن يسكتوا الطفل،
بس عمرهم ما هيعلّموه الصح، بالعكس هيخلّوه يخبّي غلطه بعد كده.
👪 بيتك هو أول مكان الطفل بيتعلّم فيه عن نفسه وعن الحياة،
فخليه أمان، مش خوف… دعم، مش تهديد.
💡 ولو حسيت إنك مش عارف تبدأ منين، اطلب دعم.
التربية مش سهلة، بس مش لازم نعدّيها لوحدنا
