10/05/2026
متلازمة الذاكرة الكاذبة 👇
تفتكر كل الذكريات اللي في دماغك حقيقية فعلا ⁉️
في اعتقاد شائع عند أغلب الناس أن ذاكرة الإنسان بتسجل الأحداث زي الفيديو أو مسجل الصوت.. و لذلك ده بينعكس على تصرفات البشر في كل شيء في الحياة.. عندنا اثقة عمياء في الذاكرة بمعنى أصح .
اسمحلي بقى أصدمك أن الذاكرة زيها زي أي شيء ربنا خلقه عند الإنسان.. الذاكرة مش مثالية و وارد جداً تغلط.. و أحياناً أنت ممكن تحلف أنك معملتش حاجة و أنت أصلاً عملتها و العكس صحيح 🤨 و مش لازم يكون عندك اضطراب تعدد الشخصيات عشان ده يحصل.. أي إنسان ممكن يحصل معاه كده 😯
عايز تفهم.. صح 🤔
في السبعينيات كان في عالمة نفس أمريكية اسمها ( إليزابيث لوفتس ) و هي متخصصة في علم النفس المعرفي.. قررت أنها تركز على واحدة من أهم العمليات العقلية المعرفية و هي الذاكرة.. و زودت التحدي على نفسها لأنها خصصت أبحاثها كلها في إثبات أن ذاكرة الإنسان مش مستقرة و أنها بتعدل الذكريات كل فترة .
و لكن هل البشر مستعدين يعرفوا معلومة خطيرة زي دي ⁉️
في الحقيقة إليزابيث اتهاجمت من الجهات كلها حرفياً.. و المعالجين النفسيين كانوا أول ناس هاجموها لأن في الوقت ده التحليل النفسي كان لسه في ناس مؤمنة به إيمان شديد.. و اليزابيث أحياناً كانت بتتدخل في بعض القضايا عشان تثبت أن الضحايا أحياناً بيتخيلوا الأحداث و أن المجرمين ممكن يكونوا مظلومين و لذلك هي اتعرضت لهجوم اعلامي شديد و الصحافة لقبتها بأنها الشخص اللي بيقف ضد الضحايا.. و كانت كتير من المجلات العلمية مش بتوافق تنشر بحث لها بسبب أنهم شكين في مصداقيتها و أنها بتخرف و كده يعني .
طيب إزاي اليزابيث أثبتت الكلام ده ؟
⬅️ التجارب اللي عملتها رغم خطورتها كانت مثيرة للاهتمام جداً.. تعالى ناخد مثلاً واحدة من التجارب دي و هي تجربة ( الضياع في المول )..
ببساطة في التجربة جابوا حوالي 24 شخص و سألوا أهاليهم عن بعض الذكريات الحقيقية اللي حصلت لهم في الطفولة.. و بعدين أعطوا لكل شخص من ال24 دول 4 أوراق فيهم 4 قصص من ضمنهم 3 قصص حقيقية من شهادة الأهل و قصة واحدة غير حقيقية و هي أنهم ضاعوا في المول و هما أطفال .
طُلب من المشاركين قراءة القصص ال4 دول و يحاولوا يفتكروا التفاصيل الدقيقة عن الذكريات دي بما فيهم الذكرى غير الحقيقة.. في البداية أغلب المشاركين قالوا أن القصة الرابعة دي محصلتش و لكن مع بعض الابتزاز العاطفي و محاولة اقناعهم بشتى الطرق و الألاعيب النفسية اقتنع 25% منهم في النهاية بنفس التفاصيل اللي مكتوبة في الورقة بخصوص الضياع في المول.. لأ و كمان بدأوا يقولوا تفاصيل المول و كانوا لابسين إيه و مين قدر يجيبهم بعد ما ضاعوا 🥴
و طبعاً في تجربة تانية أكثر إثارة من التجربة دي و هي تجربة الأكل و الذكريات
الباحثين في التجربة دي جابوا مجموعة من الناس و قالوا لهم احنا هنحلل ذكرياتكم بخصوص الأكل اللي كنتم بتحبوه أو بتكرهوه و أنتوا أطفال صغيرين.. و كانوا بيقعدوا مع كل شخص وقت معين بما يوازي جلسة نفسية و في وسط الكلام الباحث بيقول للشخص بشكل عفوي ( طبعاً أنت قلتلي أنك جالك تسمم و أنت صغير من أكل كذا.. ) و هو مقالوش أنه جاله تسمم أصلاً و لكن دي معلومة مضللة و غير حقيقية .
الصدمة بقى هي أن عدد كبير من الناس صدقت الذكريات اللي اتزرعت في دماغهم بخصوص تسممهم من الأكل كذا و هما أطفال.. و الصدمة الأكبر هي أنهم بدأوا يبعدوا عن الأطعمة اللي اتقال لهم أنها سممتهم في الطفولة .
و تجارب اليزابيث كتير جداً ابحث عنها أكتر .
تتفق أو تختلف معاها لكنها عملت الأثاث العلمي لما يسمى النهاردة بمصطلح ( متلازمة الذكريات الزائفة ) False Memory Syndrome.. و أبحاثها أثرت بشكل كبير في علم النفس الجنائي.. بالإضافة لأنها قضت على ما يسمى بمفهوم الذكريات المكبوتة و قالت أن مش لازم تكون الذكرى اللي بتظهر فجأة هي ذكرى حقيقية كانت مختفية لكن ممكن تكون ذكرى غير حقيقية و عشان تفهم الموضوع ده اقرأ قضية Jane Doe عشان تفهم ليه اليزابيث قالت أن الذكريات المكبوتة مش حقيقية .
و بس...
لو بتستفاد من المحتوى اعمل ♥️
للحجز في الجلسات الأونلاين أو العيادة 👇
راسلنا عبر رسائل الصفحة
أو من خلال واتساب : 01063457667
