30/01/2026
أنا مقدر جداً إن كلمة "ممنوع" تقيلة.. وعارف إن الموضوع مش بس "إرادة".
كتير من مرضى السكر بيلوموا نفسهم لما بيحسوا بالجوع المستمر، وبيفتكروا إن دي "ضعف إرادة" منهم.. بس الحقيقة العلمية بتقول غير كده خالص.
لازم أكون صريح معاكم وأقولكم إن التزامكم بالنظام الغذائي هو "بطولة" حقيقية،
ليه؟
لأن مريض السكر بيبقى عنده خلل في هرمون اسمه (الأميلين - Amylin).
الهرمون ده طبيعياً بيُفرز مع الأنسولين وهو المسؤول إنه يبعت إشارة للمخ يقوله "كفاية، إحنا شبعنا".
في حالة السكر، الهرمون ده بيقل أو بيحصل فيه خلل، فبيحصل "لخبطة" في إحساس الشبع والجوع، وتفضل حاسس إنك عايز تاكل حتى لو أكلت.
عشان كدة..
لما بشوف مريض قدر يتغلب على "نداء جسمه" ده، وقدر يسيطر على شهيته وينتظم.. فرحتي بيه بتبقى مضاعفة!
فرحة إني شايف "محارب" قاوم طبيعة جسمه عشان يوصل للنتيجة اللي بنشوفها سوا في التحاليل:
1️⃣ السكر التراكمي (HbA1c) نزل للمعدل الآمن (أقل من 7%)، وده معناه حماية حقيقية لشرايينك وأعصابك.
2️⃣ الوزن نزل بنسبة من 5% لـ 10% من وزن الجسم ، وده رقم سحري بيحسن جداً استجابة الجسم للعلاج.
3️⃣ وظائف الجسم (كلى وكبد) فضلت سليمة ومحمية.
واللحظة اللي بستناها وتستاهل كل تعبك ده؟
لما أقولك: "تحاليلك ممتازة.. إحنا النهاردة هنقلل الأدوية".
أنا عارف إن الطريق صعب، وإن المقاومة مش سهلة، بس صدقني النتيجة تستاهل.. وأنا معاك خطوة بخطوة عشان نوصل لبر الأمان.
#الأميلين
