24/06/2024
👌👌
تصحيح بعض المفاهيم الطبيه في أمراض الباطنه عند بعض المرضى
1- الضغط والسكر مش نصاحه منك ان يبقي عندك الضغط والسكر ومش بتعالجوا ولا منتظم في علاجهم صدقني هتندم ...
( السكر بيدمر الكلي، الاعصاب والعين ، والضغط بيضيع القلب وممكن يجيلك نزيف في المخ ).
2- جلطة القلب مش اي وجع في الصدر تبقي جلطه، الجلطه ليها أعراض زي وجع نحيت الشمال والكتف والرقبه والدراع الشمال، احساس طوبه فوق صدرك مع بروده في الأطراف وعرق، وساعات وجع في فم المعده، وساعات من غير اي ألم في الناس اللي عندها سكر.
3- علاج ارتفاع الكوليسترول والدهون الثلاثيه مش رفاهيه، ده هيحميك من تصلب الشرايين والجلطات في القلب والمخ.
4- الاكل الصحي والرياضة علاج كل داء.
5- النزلة الشعبية عبارة عن كحه وبلغم وارتفاع الحرارة وضيق النفس ده التهاب في الصدر متستجدعش وتقول جسمي هيقاوم وهيخف لوحده،
لا انت هتقلب بالتهاب رئوي وهتحتاج حقن مضاد حيوى كتير.
6- إرتجاع المريء عبارة عن حرقان الصدر وريحه البق الوحشه وتآكل الأسنان ووجع فم المعده ده من كتر المسبك والمقلي في الزيت والدهون فالمعده والمرئ اتحرقوا من الاكل.
7- فيروس الكبد A بيتنقل بالأكل وفيروس B,C بالدم والادوات الغير معقمة و B أغلس من C جدا .
8- مش اي وجع في البطن نحيت اليمين تحت تبقي زايده ، ممكن حصوه ، ممكن التهاب عادي في القولون.
9- منظار المعدة اكيد هتاخد بنج وانت بتعمل منظار المعده يعني هعذبك ليه !!! بلاش السؤال بتاع هاخد بنج ولا لأ ؟!
10- التهاب المثانة والحرقان في البول عند البنات في الاساس من قلت شرب الميه بلاش تضربي مضاد من دماغك، اعملي تحليل بول ومزرعه الاول عشان الموضوع ده مهم ومتكرر وبيعمل مشاكل.
11- معظم البنات عندهم وجع في العضم وسقوط الشعر و عدم التركيز من نقص فيتامين دال ، شيكي عليه الاول قبل ما تاخدى علاج.
12- النزلات المعويه والتهابات في المعدة والأمعاء من الاكل والعك اللي بتاكلوه من الشارع وده أهم سبب طبعا.
13- المضاد الحيوي عملك إسهال معني كده إنه وحش او ان الدكتور مش فاهم، معظم المضادت بتعمل تعب المعده والجهاز الهضمي.
14- المضاد الحيوي أخده يومين فاأخف أقوم أبطلوا، دا اكبر غلط عشان البكتريا جالها مناعه بسبب الحركه دي.
15- مافيش حاجه اسمها كشف بالتليفون او قولي حاجه نجيبها من الصيدليه لحد ما نجيلك...
دكتور زميل كتب دولفين خافض للحرارة لأبو طفل في التليفون # # # الطفل جاله تشنجات ومات .. أبو الطفل أشتكي الدكتور ان الطفل مات بسبب الدولفين اللي الدكتور قاله عليه في التليفون والمكالمه مسجله عند الأب.
16- متعصبه دايما، مش طايقه الحر وبتخسي وحاسه بضربات قلبك سريعه او وزنك زايد وعضمك بيوجعك وامساك وهبوط ----> تحليل غده درقيه.
17- اي واحده عندها حد في عيلتها اتشخص ورم في الثدي، لازم تشيك علي نفسها دوريا.
18- مش كل حراره يتاخدلها مضاد حيوي، الفيروسات مش علاجها مضاد حيوى كل حاله وليها العلاج اللي يناسبها حسب الكشف والفحوصات الطبية.
19- فوق الاربعين متاخدش اسبرين، الا لو مريض قلب او جلطة .. بنشوف حالات عندها قرحة في المعدة او سيولة في الدم بسبب سوء استعمال الاسبرين.
20- جرثومة المعدة والتهاب القولون بسبب الأكل اللي من الشارع او الاكل والشرب اللي مش نضيف او مغسول كويس، فمتعدش تحش وتاكل كل حاجه وفي الاخر تشتكي من القولون انوا تاعبك، ده لأن مفيش علاج جزري للقولون اهم من المحافظة في الاكل والشرب، وعلاج الجرثومه بيتعب المعدة والقولون عادي جدا لحد ما تختفى.
دمتم سالمين بكل خير وصحة وعافيه
د.منتصر الزلفي
أخصائي الباطنة والسكر والجهاز الهضمي والكبد ومناظير المعدة والقولون ومدير وحدة المناظير بمستشفي الأقصر الدولي
د.دكتوراة الباطنة جامعة عين شمس
العنوان شارع المستشفي الدولي أمام الاسعاف مباشرة
ت... 01123115754
