16/11/2025
النهارده فى عيادة المركز جت ست و معاها ابنها فى العشرينات تقريباً
الست دى كانت واخدة عينة من كتلة فى الثدى و طبعت النتيجة و جاية تتكلم فالمدرس المساعد اللى كان معايا قالها بالحرف " ده ورم مش كويس" ده المصطلح اللى استخدمه و طبعاً كلنا بنبقى متوقعين شوية توتر فى اللحظات التالية بس المفاجأة بقا اللى حصل فعلاً
الست ردت على مدحت "يعنى قصدك سلطان" بالمناسبة هيا قالتها كده فعلاً مش غلطة مطبعية منى
و شاورت على ابنها اللى قال انا ترجمته و بحثت عالشات چى بى تى 😂😂
و الست فجأة تولت دفة الحديث و قالت "كله رضا المهم هنعمل ايه دلوقتى؟ و انا و مدحت بلمنا شوية كده من رد فعل الست اللى بتتكلم فى حاجة هتغير حياتها بنفس الشكل لو هتتكلم مثلاً فى هنطبخ إيه النهارده
رد فعل الست الطيبة الفرفوشة دى مش هوا الطبيعى و إنما الاستثناء و مش عاوز أقول عن كمية الضحك و الفرفشة اللى الست الطيبة دى سابتها وراها
و المدرس المساعد بيقولى ثلاثى السلبية موجب غدد قلتله سيبك انتا من الكلام ده
الست دي هتخف
مخزون الفرفشة اللى عندها ده هيا و ابنها هيفوتوها فى الحديد بإذن الله
دمتم سالمين
