15/06/2022
فيه أسباب كتير بتخلي الطفل باكل أكتر من اللازم غير إنه يكون جعان فعلًا..ومن الأسباب دي:
⬅️ الملل أو الزهق:
الطفل من سن 5 سنين لحد 9 سنين بيتعلم إنه يطلع زهقه في الأكل، وعشان تتغلبي على المشكلة دي ممكن تساعديه يشغل وقت فراغه برياضة مفيدة أو أي هواية مفيدة.
⬅️ تقليد الآخرين:
اعرفي إن الطفل مراية لكل حاجة بتحصل حواليه، فهو بيقلد عادات الأكل اللي بيشوفها في البيت ومع صحابه وفي وسائل الإعلام.. خلي بالك دايمًامن اللي الطفل بيشوفه وبيتعلمه منك.
⬅️ الأكل أمام التليفزيون:
الأكل أثناء الانشغال بحاجة تانية بيخلي الوقت يعدي من غير ما يحس بيه، فممكن يقعد ياكل ساععة كاملة قدام التليفزيون بدون ما يحس بكمية الأكل.
⬅️ المنع المبالغ فيه:
قاعدة الممنوع مرغوب شغالة حتى في الأكل، فلو متعودة تمنعي عنه نوع معين من الأكل زيادة عن اللزوم ممكن ده يجيب نتيجة عكسية، ويخليه بيشتهي الأكل ده بالذات.. والأفضل لو هيتم المنع يكون المنع على كل البيت مش على الطفل بس.
وأخيرًا.. الطفل لو اتعلم واتعود على نظام تغذية سليم بدون حرمان، هيقدر يسيطر على كل العادات الخطأ، ويتجنبها مع الوقت.
شاركينا إيه العادة اللي بتلاحظي إنها مأثر على طفلك بالسلب في زيادة الوزن.❤️
