Dr Abdelrahman Abdellatif

27/04/2025

لو الدكتور طلب Estradiol، AMH، Progesterone…
يبقا بيدوّر على لغز اسمه: المبيض شغال ومخزن البويضات أخباره إيه ..

تعالى نفهم كل واحد
- الـEstradiol (E2):ده أهم نوع من الإستروجين
بيتفرز من المبيض وبيعكس نشاط البويضة ونضجها
بيزيد قبل التبويض وبيقيس استجابة الجسم للهرمونات

الـProgesterone:ده (هرمون الحمل ) بيزيد بعد التبويض
- لو لقيته عالي بعد اليوم 21 من الدورة فده معناه حصل تبويض
- ولو قليل ممكن يكون فيه ضعف في التبويض

الـAMH (Anti-Müllerian Hormone):ده المؤشر الأشهر لـ "مخزون المبيض" يعني بيقولنا: فيه بويضات ولا المخزن فاضي؟
مهم جدًا في تقييم الخصوبة

طيب إزاي نربطهم ببعض؟
الـ Estradiol + Progesterone نعرف إذا فيه تبويض ولا لأ
الـAMH عشان نعرف احتمالية حدوث حمل مستقبلي
بيتحللوا مع FSH أوقات عشان الصورة تبقى أوضح
لأن الغدة النخامية هي اللي بتطلع الـ FSH عشان يحفز المبيض إنه يشتغل ويطلع بويضات

طيب إمتا بينطلب التحاليل دي ؟
متابعة التبويض أو مشاكل الدورة
تقييم الخصوبة أو قبل الحقن المجهري
وفي حالات تأخر الحمل

الخلاصة في سرنجة:

الـ Estradiol = متابعة التبويض
الـ Progesterone = حصل تبويض ولا لا
الـ AMH = مخزون البويضات

كل هرمون فيهم بيحكي حكاية عن المبيض… بس لازم نسمعهم مع بعض!

الخصوبة مش حظ… دي معادلة هرمونات محتاجة تتفك واحدة واحدة!

16/04/2025

استكمالا لشرح تحليل السيولة معانا تحليل اسمه D-Dimer ..

التحليل ده بيقيس نواتج تكسير الجلطات اللي الجسم بدأ يفتتها
يعني ببساطة:فيه جلطة حصلت فـ الجسم بدأ يحلّها فـ الـ D-dimer يعلى

- مفيد في إيه؟
الشك في جلطة في الرجل (DVT)
الشك في جلطة في الرئة (PE)
الشك في جلطة في المخ
حالات الـ DIC (تجلط منتشر داخل الأوعية)
أوقات بعد العمليات أو الكسور الكبيرة
وفي بعض حالات الكانسر
وللأسف… كورونا كانت بترفعه أوي!

- لو طلع عالي؟

مش دايمًا معناه جلطة…بس معناه إن الجسم فيه نشاط تجلط أو حلّ تجلط (يعني بيكسر في الجلطة )

-ممكن يعلى في:التهابات حادة أو عدوى أو بعد ولادة
أو عند كبار السن أو أمراض الكبد أو بعد عملية كبيرة

التحليل ده حساس جدًا، بس مش محدد!
يعني:لو طلع سلبي غالبًا مفيش جلطة
وبرضه لو طلع إيجابي مش شرط جلطة… لازم أشعة أو فحص سريري يكمل

الـ D-Dimer شبه الجرس… بيصفر لو فيه خطر، بس مش بيقولك الخطر فين!

14/04/2025

يعني ايه يحاج ملقيتش Vitamin B12 قومت خدت حبايتين Vitamin B6

Send a message to learn more

13/04/2025

كتير مننا وهو بيأكل البيض بيستغرب اوي من أشكال الصفار المختلفة، وبيكون عاوز يعرف: ليه مرة لونه غامق؟ ومرة فاتح؟ وأوقات بيبقى في لون أخضر حوالين الصفار!

بيكون عاوز يعرف كل دا بيحصل ازاي! عشان كدا انا هنا عشان أعرفك... فخليك معانا..

1. صفار لونه أخضر أو رمادي حوالين الصفار؟! ده بيحصل لما تسلق البيض وقت طويل أو على نار عالية.
طب ايه بيحصل بالظبط!!

ببساطة... البروتينات اللى في البياض (فيها الكبريت S) مع حرارة السلق بيتكوّن H₂S (غاز كبريتيد الهيدروجين) لأنه بيتفاعل مع الحديد Fe الموجود في الصفار النتيجة: كبريتيد الحديد FeS = اللون الأخضر الرمادي
H₂S + Fe → FeS (كبريتيد الحديد)
هل ده خطر؟
لأ، لأن الكمية اللي بتتكون صغيرة جدًا، ومفيش أي ضرر صحي… بس الشكل مش لطيف والطعم ممكن ميكونش ألطف حاجة !

2. صفار أصفر فاتح جدًا: ده معناه إن الدجاجة كانت بتتغذى على أعلاف بسيطة أو فقيرة بالمغذيات. آمن للأكل، بس القيمة الغذائية مش عالية قوي.

3. صفار أصفر لامع أو برتقالي: ده صفار ممتاز! ناتج عن تغذية الدجاج على نباتات غنية بالكاروتينات (زي الذرة والجزر). كل ما كان اللون أغنى، كل ما كانت المغذيات أكتر.

4. صفار غامق جدًا (برتقالي محروق): غالبًا نتيجة تغذية قوية جدًا أو وجود صبغات طبيعية في العلف. مش مضر، لكنه مش دايمًا دليل على جودة أفضل.

5. صفار فيه بقع أو باهت وضعيف: ده غالبًا بيكون بسبب إن البيضة مش طازة أو طريقة التخزين مش مظبوطة. لو فيه ريحة أو شكل غير مريح… الأفضل تتجنبها.

طيب أفضل وقت لسلق البيض علشان ما يطلعش أخضر؟

صفار طري: 6–7 دقايق صفار متوسط: 8–9 دقايق صفار ناضج تمامًا: 10–12 دقيقة أكتر من كده؟ استعد تشوف الحلقة الخضراء (FeS)!

طب الوان قشر البيض .. ساعات بنشوف بيض أبيض وساعات بني، ملناش دعوة بألوان شم النسيم الصناعية... الألوان دي الاتنين فيهم نفس القيمة الغذائية ولكن اللون بيعتمد على سلالة الدجاجة مش على الجودة خالص...

الخلاصة: لون الصفار بيقولك كتير عن تغذية الدجاجة وجودة البيضة، واللون الأخضر حوالين الصفار مش خطر… لكنه إشارة إنك سويّت البيضة أكتر من اللازم! خليك كيميائي في مطبخك، وكل بيضك وإنت فاهمه من جوه وبرّه!

11/04/2025

وانت بتسحب عينه من طفل حاول متبينش السرنجه
انا :...

11/04/2025

النهارده هنتكلم عن موضوع ممكن يقلب يومك فوق تحت،
والمصيبة إنه بييجي فجأة كده من غير سلام ولا كلام …
النهارده معانا: الحموضة – (Heartburn or Acid Reflux)

يعني إيه حموضة؟
يعني تحس بحرقة كده في صدرك ورا عظمة القص، وغالبًا بعد الأكل على طول أو لما تنام،
وأحيانًا الطعم يرجع في زورك (Reflux) وتحس بزُغطة كده ملهاش تفسير.

طب ليه بيحصل الكلام ده؟
تعالى نرّتب الأسباب كده :

1- أكل تقيل ودسم (خصوصًا قبل النوم).
2- شُرب حاجات زي القهوة – العصاير الحمضية (لمون وكده )– والكولا بأنواعها .
3- تدخين (كالعادة).
4- سترس (Yes, stress affects your gut too).
5- بعض الأدوية زي المسكنات أو مضادات الالتهاب.

طيب نعمل إيه بقى؟
خلينا نخش في الـTips:

-كل كميات صغيرة، وبلاش تنام بعد الأكل على طول.
- ارفع دماغك شوية لو هتنام (Head elevation helps).
- قلل الأكل الحراق والدسم.
- جرب تاخد مضادات الحموضة (Antacids) بعد ما ترجع للدكتور .

ولو الموضوع متكرر، لازم تروح لدكتور باطنة جهاز هضمي.

معلومة عالسريع:
مش كل وجع في الصدر = قلب!
مرات بيكون من المعدة، بس ماينفعش تطنش برضو، الأمان أهم.

وبس كده يا زعيم، خليك دايمًا على الـSafe Side! سلااام .

10/04/2025

تسمع عن هرمون الحب واللمة والحضن الدافي!
مش بس هرمون الحب، ده كمان بيقول كتير عن حالتك النفسية والجسدية! ده هرمون Oxytocin 😍

الـ Oxytocin هو هرمون بيُفرز من الهايبوثالامس، وبيتخزن ويتحرر من الغدة النخامية الخلفية.

وبيشتغل كـ هرمون وناقل عصبي (Neurotransmitter)، وده بيخليه ليه تأثير مزدوج:
جسدي × نفسي .. يعني ليه تأثير على الجسم والمخ مع بعض!

طيب ده بيطلع إمتا وليه ؟

- وقت الولادة: بيحفّز انقباضات الرحم عشان يساعد في خروج الجنين.
- وقت الرضاعة: بيساعد على خروج اللبن عن طريق الـ "milk ejection reflex".
- وقت اللمس، الحضن، القرب العاطفي: بيزيد جدًا، وده اللي بيخليه مشهور باسم "هرمون الحب".(مرحلة ما قبل الخازوق 😂)
-حتى عند تربية الحيوانات الأليفة… أو لما تبقى وسط ناس بتحبهم!

ليه مهم؟

- بيساعد على تقوية الروابط الاجتماعية والعاطفية
- ليه دور في تقليل التوتر والقلق
- بيتدرس حاليًا كعلاج مساعد لحالات زي:
*التوحد (ASD)
*الفوبيا الاجتماعية
*الاكتئاب
*ضعف التواصل العاطفي

- طب هل بيتحلل؟

آه، بس مش بسهولة.
تحليل الأوكسيتوسين ممكن يتعمل في الدم أو البول أو اللعاب، لكنه مش روتيني وبيحتاج تجهيز وتحاليل متخصصة.

- طيب ليه الهرمون ده مهم؟

- مستويات منخفضة منه ممكن ترتبط بصعوبات في الارتباط الاجتماعي أو العزلة.
- مستوياته بتتأثر بـ: التوتر، النوم، الحالة النفسية، بعض الأدوية.

ومؤخرًا بيتم دراسته كـ علاج محتمل لبعض الحالات النفسية والعصبية.

-الأوكسيتوسين مش بس هرمون رومانسي، ده مؤشر مهم للتوازن النفسي والارتباط الإنساني.

09/04/2025

الصورة دي مش فوتوشوب… الصورة دي معناها أن جسمك دخل فحالة طوارئ و بيصرّخ: "الحقوني!"
اللي شايفه مش خدعة بصرية، ولا تأثير فلتر…
دي حالة حقيقية اسمها "متلازمة رينود – Raynaud’s Syndrome"
ولما تحصل، بتحس كأن صوابعك انفصلت عن بقية جسمك!

إيه اللي بيحصل؟
في لحظة، سواء بسبب برد شديد أو توتر نفسي مفاجئ، الأوعية الدموية الصغيرة اللي بتوصل الدم لأطرافك (زي صوابع الإيدين أو الرجلين)، بتبدأ تتقلّص فجأة… وسريان الدم يقل أو حتى يتوقف.

وقتها؟

لون الصباع يقلب أبيض تمامًا… كأنه اتفصل عن الدورة الدموية.

ولو الحالة استمرت، اللون يتحوّل لـ أزرق أو بنفسجي، كأن مفيش حياة فيه!

ولما الدفا يرجع والدم يبدأ يجري تاني، تحس بـ وخز، تنميل، ولسعة كهربا خفيفة.

طيب مين ممكن يواجه الحالة دي أكتر؟

- اللي عندهم تاريخ عائلي بالحالة.

- المصابين بأمراض مناعة ذاتية (زي الذئبة، الروماتويد، تصلب الجلد).

- الستات أكتر من الرجالة.

- المدخنين، ومحبي الكافيين بكميات كبيرة.

- الناس اللي شغلهم بيتطلب تعرض طويل للبَرد أو اهتزاز مستمر (زي استخدام آلات حادة أو ميكانيكية).

هل كل الحالات بسيطة وبتعدي عادي؟ لأ… ومش دايمًا نطمن.
في ناس بتعدي عليهم الحالة كموقف عابر، وناس تانية بتكون علامة على مشكلة أعمق.

طب امتى لازم تروح للدكتور؟
- لو الحالة بتتكرر كتير جدًا، حتى من غير تعرض واضح للبرد.
- لو كل نوبة بتيجي مع ألم شديد أو تقرحات في الأطراف.
- لو بدأت تلاحظ أعراض في أماكن تانية غير الصوابع (زي الأنف أو الأذن).
- لو فيه تغير في شكل أو جلد الصابع مع الوقت.
-أو لو أصابعك بتتحول للون الأسود – وده أخطر حاجة، وبيحتاج تدخل فوري!

طب إزاي تحمي نفسك؟

- البرد عدوك الأول… ادفّي أطرافك كويس، خصوصًا في الشتاء.

- خفف التوتر… لأن العصبية والضغط ممكن يشغلوا "زرار الطوارئ" في جسمك.

- بلاش كافيين وسجاير زيادة عن اللزوم.

ولو حسيت بأي أعراض غريبة أو جديدة… استشير طبيب متخصص في الأوعية الدموية أو الروماتيزم.

وأهم حاجة؟
ماتستهونش بجسمك لما "يبعتلك إنذار"!
كل لون غريب… ليه سبب محتاج يتفهم.

07/03/2024

GUE