عياده د / احمد ورده لطب الاطفال وحديثي الولاده

07/08/2018

🔔🔔** تنويه هام ** 🔔🔔

📢📢 تعلن عياده الدكتور احمد ورده عن عدم تواجد الطبيب ابتداء من الاسبوع المقبل وحتي شهر نوفمبر علي ان يقوم الطبيب باستقبال جميع رسائلكم عبر الواتس اب من خلال الرقم التالي 01024397461 📬📬

💕💕 وحرصا منا علي سلامه اطفالكم 💕💕

سيتواجد دكتور احمد رفعت أخصائي الاطفال بالعياده جميع ايام الاسبوع ماعدا الخميس والجمعه لحين عودة الدكتور احمد ورده من بعثه بالخارج.

11/02/2018

# # # #تحديث مهم # # #
اليوم تبدأ حملة تطعيم ضد شلل الأطفال لكل الأطفال من سن يوم الي خمس سنين ..
بادعو كل الآباء والأمهات لتطعيم أولادهم ..
الكلام اللي بيتردد عالفيسبوك انه لازم يفوت شهر بين جرعات شلل الأطفال مينطبقش علي جرعات الحملات ..
يعني لو طفل واخد تطعيم شلل الأطفال جرعة أساسية أو أي تطعيم آخر بالحقن من اسبوع او اتنين ياخد جرعة الحملة عادي .. ولو طفل فاضل له اقل من شهر علي جرعة أساسية من أي تطعيم تاني ياخد تطعيم الحملة والتطعيم التاني في معاده بدون تأجيل ..

باختصار جرعة تطعيم الحملة جرعة اضافية ملهاش علاقة بالتطعيمات اللي قبلها ولا اللي بعدها ..
بالصحة لأطفالكم يارب

01/12/2017

هام جدا
المواليد اللي مطعموش بي سي جي ( تطعيم الكتف) يروحوا اقرب وحده صحيه جمبهم

07/06/2017

تطعيم الدرن BCG من الالف الى الياء
فى صوره 8 نقاط هامه

#اولا المفروض الطفل بياخده ف اول أربعين يوم بعد الولاده للوقايه من السل او الدرن TB

#ثانيا التطعيم ده بيتاخد حقنه ف الكتف الشمال وبسيب علامه BCG scar

#ثالثا علشان تظهر العلامه محتاج مده ع الاقل من 3 شهور الى 6 شهور قبل كدا لا تنتظر اى شىء

#رابعا العلامه اللى بتظهر بتكون اشبه ب الخراج وعلشان كدا ممنوع تفضيها او تحط عليها اى كريمات ودا رد فعل جهاز المناعى يعنى من الاخر سيبها فى حالها

#خامسا خلى بالك عدم ظهور هذه العلامه مش معناه ان التطعيم مش فعال ... لا اطلاقا
لان اطفال كتير بيكون التطعيم فعال جدا ولكن مفيش اى علامه فلا داعى للقلق

#سادسا طيب بالنسبه للامهات اللى بتقلق والتطعيم مظهرتش اى علامه مكانه ؟
وقتها بنستنى لغايه اما يكمل الطفل سنه وبعدين بنروح لهيئه المصل واللقاح او اى مستشفى صدر وبنعمل اختبار Tuberculin test
ولو طلعت نتيجه الاختبار ايجابى يبقى مش محتاج حاجه حتى لو مفيش علامه
اما لو طلعت نتيجه الاختبار سلبى يبقى لازم نكرر التطعيم تانى

#سابعا
عايز اقولك ان التطعيم بيدى مناعه لمده 5 سنين
وعلشان كدا فيه جرعه منشطه بتنزل ف المدراس بعد 5 سنين
لو اخدها الطفل هيكون افضل ليه لكن خلى بالك بردو قبل ما ياخد الجرعه المنشطه لازم يعمل الاختبار تانى
و لو طلع نتيجه الاختبار سلبى يبقى هياخد الجرعه المنشطه
اما لو طلع ايجابى بغض النظر عن وجود علامه او مفيش يبقى مش محتاج وقتها ياخد الجرعه المنشطه

#ثامنا
فى النهايه هذا التطعيم لازم يتاخد بين طبقات الجلد نفسها Intrademal
وليس اطلاقا تحت الجلد
لانه لو اتاخد بطريقه غلط هيورم الغدد الليمفاويه المحيطه وع حسب مكان ضرب الحقنه واشهر مكان بيظهر فيه التورم هو تحط الابط
وعلشان كدا لو حصل لا قدر الله كدا يعنى معناه حصل التهاب درنى ف الغدد الليمفاويه ووقتها لازم نتوجه الى اقرب مستشفى صدر لاخذ علاج ضد الدرن كامل ولمده 6 شهور كمان
يعنى من تطعيم بسيط ادى الى خطا كبير ملهوش لزمه
لذلك لا داعى للاستعجال اثناء اخذه
ويتاخد بدقه وحرص

وشفى الله الجميع

اللهم عونك وتيسيرك
اللهم انى وكلتك امرى فانت خير وكيل

21/05/2017

كل عام وانتم بخير
ان شاءالله مواعيد رمضان يوميا من بعد صلاه العشاء ماعدا ايام الخميس والجمعه

03/05/2017

قواعد حديثي الولادة الأربعين:🚼🚼

١_رضعي طبيعي 👍👍
٢_بلاش أعشاب🚫🚫
٣_بلاش بيبي درينك❎
٤_بلاش جلوكوز🚫
٥_ڤيتامين "د" من أول يوم ٤ نقط ڤي دروب✔✔
٦_تطعيم ڤيروس بي أول ٢٤ ساعة حتى في أيام الجمع و العطلات الرسمية ..في الوحدات الصحية و أقسام النساء في المستشفيات الحكومية💡💡💡
٧_ما تربطيش حاجة على السرة❎
٨_ممنوع الحفاضة تغطي السرار❎
٩_نظفي السرار بالكحول من ٤_٧ مرات يومياً ..👍👍
١٠_رضعي طبيعي ..بس.💯
⭕⭕⭕⭕
١١_بلاش بيبي درينك..اتمنع من وزارة الصحة🚩🚩
١٢_تحليل الكعب من اليوم الثالث للسابع يومي السبت و الثلاثاء في كل الوحدات الصحية..💡💡💡
١٣_حديث الولادة إنسان و بيحتاج النظافة ..و بيستحمى عادي🏄🚿🏄
١٤_ممنوع بوس الطفل من الفم❌
١٥_بلاش بوس أحسن ..بينقل أمراض
١٦_تطعيم الدرن "حقنة الكتف" ..في أول شهر ما تتأخريش💡💡
١٧_مفيش في السبوع غربلة ..الغربلة=نزيف في المخ 🚩🚩
١٨_تكحيل الطفل بالبصل ممنوع..عينه هتضيع🚩🚩
١٩_نقط مطهرة للعين روتين في أول أسبوع👍👍
٢٠_ورق مهم و هتحتاجيه شهور : كراسة التطعيمات..منحنيات النمو تشمل الوزن و الطول و محيط الرأس☑
⭕⭕⭕⭕
٢١_ركزي مع وزن طفلك ساعة الولادة ..احفظيه، الطبيعي من ٢.٥_٣.٥ كجم يزيد في المتوسط ٧٥٠ جم أول شهر👍👍
٢٢_٦٠٪ من المواليد بيصفروا ..صفرا طبيعية حميدة ما تقلقيش🆒
٢٣_الصفرا عايزة رضاعة و متابعة أو حضانة و علاج ضوئي مش عايزة نيون و لا ڤيتامين
٢٤_المولود إنسان ..إحساسه بالجو زينا..بلاش بطاطين في أغسطس ..هيفطس🆒
٢٥_الزغطة و الخنفرة و الحزقة ظواهر طبيعية هتقل مع الوقت
٢٦_ظواهر تقلقك : الطفل رافض الرضاعة أو مش قادر يرضع ، لونه بيزرق، نفسه فيه نهجان ، مدروخ و مش بيصحى🚩🚩
٢٧_اهتمي بنفسك و صحتك عشان تقدري تهتمي بمولودك..كلي أكل صحي و متوازن ، بلاش أدوية من غير داعي، اشربي لبن ..كتير، و بلاش اكل حراق أو بيعمل انتفاخات ..😎
٢٨_حديث الولادة بينام كتير بس متقطع..نومك هيتلخبط ..بترضعي و تغيري و تدلعي و تنيمي😭😭
٢٩_حديث. الولادة بيسمع من و هو جنين ف اخر شهور الحمل..لو مفيش فزع أو خضة من الصوت العالي تقلقي 🔊🔊
٣٠_لازم طفلك يعمل براز في أول ٢٤ ساعة ..لو معملش استشيري الطبيب
⭕⭕⭕⭕
٣١_أنماط الإخراج مختلفة عند حديثي الولادة..فيه طفل بعد كل رضعة يعمل براز و طفل يعمل مرة في اليوم ..
٣٢_النوم على البطن ممنوع ..إلا بعد الرضاعة للتجشؤ و انتي صاحية 🚩🚩
٣٣_غيري الحفاض من ٣_٤ مرات يوميا و نشفي كويس. و ادهني زيت زيتون..هتحميه من التسلخات👍👍
٣٤_لو بنت اتأكدي من وجود فتحة المهبل..لو ولد حسي الخصيتين و شوفي فتحة القضيب في مكانها و لا لأ..💡💡💡💡💡
٣٥_الأب:فينك ؟! ..واحشنا و الله 😄😄
٣٦_أول ما فترة النفاس تخلص شوفي وسيلة منع حمل مناسبة ما تنسيش ..طفلك محتاج رعايتك قبل ما تعمليها تاني و صحتك هتروح🚫
٣٧_طفلك بيعيط كتير ..عليكي تخمني السبب و مع الوقت هتفهميه..
جعان _رضعيه ،، شبعان و منفوخ _كرعيه،، عنده مغص دلكيه ،، عايز حد يشيله شيليه ..ما تسيبيش طفلك يعيط عشان ما يتعودش على الشيل..هو إنسان و عايز اهتمام و الاهتمام ما بيطلبش 😄
٣٨_السخونية و الكحة في حديثي الولادة مش طبيعية و مش حميدة ..لازم دكتور و تحاليل🚩🚩 ..
٣٩_حبي طفلك ..ولد أو بنت..أسمر أو ابيض ..سليم أو مريض ..ده قطعة من روحك ما تخليش حد أبدا يصنفه❤
٤٠_مع نهاية الشهر الأول الطفل بيبدأ يبتسم لو لاعبتيه ..لو بيعيط و اتكلمتي معاه هيهدأ ..
اتعاملي معاه على إنه إنسان محتاج غذاء و حب و عناية ❤💙💚💛 وربنا يخلى 👍

د احمد ورده

30/01/2017

14/01/2017

@سرعة الترسيب (ESR) علاجها مش بنسليين طويل المفعول@

سرعة ترسيب الدم عبارة عن تحليل بيستخدم للكشف عن نشاط الإلتهابات في داخل الجسم. يعنى سرعة الترسيب ليست مرضا أو تشخيصا فى حد ذاتها ولكنها تساعد فقط فى تشخيص ومتابعة نشاط بعض الأمراض

*****أسباب ارتفاع سرعة الترسيب
لايوجد سبب واحد يؤدي إلى ارتفاع سرعة الترسيب فهناك ظروف طبيعية تسبب ارتفاع سرعة الترسيب وهناك أسباب خطيرة جدا تسبب زيادة سرعة الترسيب مثل الأورام السرطانية والذئبة الحمراء

****بعض( وليس جميع) أسباب إرتفاع سرعة الترسيب
1 الإصابة بالأنيميا وخاصة إن كانت الأنيميا شديدة
2. الإصابة بالروماتويد.
3. الإصابة بالحمى الروماتزميه
6. نزلات البرد والأنفلونزا.
7. وجود أي التهابات بالجسم.
8. حمى البحر المتوسط.
9. الأورام السرطانية.
10. زيادة نسبة الكولسترول بالدم.
11. التهاب اللوزتين.
12. تناول بعض الأدوية والعقاقير
13. قصور عمل الغدة الدرقية.
14. تضخم الغدة الدرقية.
15. الإصابة بالدرن

****السؤال المهم بقى اللى كل بيسأله............نعالج سرعة الترسيب إزاى؟؟
زى ما اتفقنا وقولنا قبل كده إن سرعة الترسيب عرض وليست مرض له علاج معين
يعنى لو سرعة الترسيب ارتفعت هنبحث عن سبب ارتفاعها ونعالج السبب ده وبالتالى سرعة الترسيب هتنزل لمعادلاتها الطبيعية

يعنى اللى عنده سرعة الترسيب مرتفعة ياخد حقنة البنسليين طويل المفعول ولا ايه؟؟
لا مش هيحتاج حقنة طويل المفعول الإ إذا كان سبب الإرتفاع ده هو الحمى الروماتزمية (ودى طبعا تشخيصها بيتطلب طبيب وفحوصات تانية مش مجرد سرعة الترسيب)

12/01/2017

نقاط مختصرة عن التبول اللاإرادي قبل ماتروحي للدكتور ومفيش علاج قبل 5 سنوات
1) يجب وضع الطفل على الحمام في أوقات محدده يوميآ وذلك بعد تناول وجبات الطعام مباشرة وقبل ذهابه إلى الفراش ولدى استيقاظه عند الصباح .
2) يجب مراقبة الأوقات التي يتبول فيها الطفل في فراشه وذلك بإيقاظه الساعة العاشرة من كل مساء ، وإذا وجد انه قد تبول يمكن إيقاظه بوقت مبكر عن العاشرة ، الساعة التاسعة أو التاسعة والنصف مثلا
3) كثيرآ ما يتبول الأطفال في فراشهم ليلآ وذلك بسبب الغيرة من مولود جديد حيث تضطر الأم إلى قضاء وقتآ طويلآ مع وليدها أو بسبب شدة التعب بعد العودة من المدرسة ، لذلك على الأمهات أن يمضين وقتآ مناسبآ مع أطفالهن وظهار الحب والحنان والرعاية والمودة وتأمين الراحة لهم بعد العودة من المدرسة.
4) يجب على الأمهات ألا يتحدثن عن مشكلة أطفالهن أمام الآخرين وكذلك يجب ألا تقارن بينهم وبين غيرهم من الأطفال بالنسبة لتلك العادة أو غيرها من العادات
5) إن تأثير التشجيع عندما يبدأ الطفل في اكتساب عادة التحكم بالتبول هو أجدى كثيرآ من التأنيب والضرب الذي يمكن أن يؤدي إلى الإصرار على عادة التبول أثناء الليل وذلك كدليل على المعارضة والاحتجاج .
6) إذا لم تجد كافة تلك الجهود المبذولة في جعل الطفل يكتسب عادة التحكم في التبول أثناء الليل وذلك إذا بلغ عمرآ اكبر خمس سنين، أو إذا عاود التبول في فراشه بعد أن توقف وذلك للأسباب التي أتينا على ذكرها كالغيرة أو مجابهة صعبة جديده عندها يجب عرض الطفل على طبيب مختص ليصف الأدوية المساعدة