Dr/Hesham Saeed for sick kids & nagging moms

23/09/2018

فى حالات الجفاف لو اتكتبلك أكياس محلول جفاف لتعويض الفاقد،لازم نبقى عارفين ان الحد الأقصى يوميا ٤ أكياس

22/09/2018

ظهور علامة زى دى فى طفل اتعرض لخبطة فى منطقة الرأس يعتبر علامة خطيرة تستوجب التدخل الطبى العاجل

13/09/2018

الأخ و الصديق العزيز و الجراح الماهر

12/09/2018

أقراص علاج مرض السكر فى الكبار لو طفل أخدها بالغلط خطر جدا خاصة مجموعة اسمها ال sulfonylurea بعكس مجموعات أقل خطورة زى ال metformin, الخطورة ان قرص واحد كفيل انه يسبب انخفاض شديد فى مستوى السكر فى الدم

دا يحصل فى خلال أد ايه؟

خلال ٦ ساعات و أحيانا بتظهر بعد ١٦ أو ١٨ ساعة

نفهم من كدة ايه؟

حضرتك فى الغالب هتجرى على أقرب مستشفى فى خلال ساعة مثلا هيقيسوا السكر يلاقوه طبيعى، كدة نطمن؟ لا

يعنى يتحجز و يتحط تحت الملاحظة؟

اه دا الصح، لحد ما نطمن انه قعد ٨ ساعات سكره ما بينزلش من غير أى أدوية و محاليل

طب خلاص ما يعلق محلول جلوكوز و خلاص؟

غلط، مش هيعلق الجلوكوز إلا لو سكره نزل نزول حاد، انما مش هندى احتياطى ليه؟ الدوا أصلا بيزود إفراز الإنسولين و محلول الجلوكوز هيحفزه بردو، زيادة إفراز الانسولين دى ممكن تجيب نتيجة عكسية و السكر ينزل بدل ما يطلع

طب الصح ايه؟

تدى علاج تأثيره معاكس للانسولين زى أمبولات اسمها ساندوستاتين (الطبيب فى المستشفى هيكتبهاله طبعا) و نتابع السكر فى الدم لحد ما يستقر

09/09/2018

ظهور علامات بلوغ مبكر خاصة فى الذكور (زيادة فى حجم العضو التناسلى و الخصية، ظهور شعر الإبط و العانة) قبل سن ٩ سنوات، يستدعى العرض فورا على طبيبك المعالج

05/09/2018

الموضوع يستحق

لو انت طالب في مدرسة وبتتعرض للتنمر، أو لو انت ولي أمر مش عارف تتصرف إزاي مع تعرض أولادك لحالات تنمر في المدرسة ممكن تتصل بخط نجدة الطفل لطلب المساعدة.

If you are a student facing bullying or a parent who don’t know how to deal with your bullied child, call the Child Helpline for help 16000.

12/08/2018

بنت جاية تقضى أجازة قصيرة مع الأسرة ،مقيمين فى عمان، عمرها ١١ سنة جت المستشفى فى شرم الشيخ بألم شديد جدا فى البطن و قىء مستمر بقاله ٤ أيام ، راحت مستشفى تانية قبلها بيوم خدت محاليل و اتقالها انه مجرد التهاب فى المعدة، شدة الألم كانت تقلق، مكانه كمان كان فى وسط و الجزء الأيسر للبطن مع مدة ٤ أيام و الألم فى ازدياد، فلو فرضنا انها التهاب فى الزائدة الدودية فغالبا هتبقى انفجرت و حالة البنت العامة ما بتقولش كدة، والدها دكتور صيدلى كمل عليا و قالى انها نزلة معوية من أكل غالبا بس مفيش إسهال، فى وسط الكلام بيقولى دى معملتش حمام من ٣ أيام، طب خرجت ريح؟ ما نعرفش، علطول طلبتلها آشعة عادية على البطن و تحاليل شاملة عشان نستبعد أى سبب غير جراحى و كله طلع سليم، الآشعة ظهر فيها علامات انسداد معوى

انسداد معوى فى السن دا مش شائع، قعدت مع الجراح نتناقش فى أرجح سبب للانسداد، كان أوضح سبب انها عملت عملية فتاء سرى من سبع سنين، فممكن يكون حصل التصاقات بعد العملية على المدى الطويل سدت الأمعاء، الجراح قال خلاص هنحاول نعالجها تحفظيا و نخلى قرار العملية آخر حل عشان فتح البطن تانى هيعمل التصاقات جديدة و ممكن الحالة تتكرر

مع المتابعة و إعادة الآشعة الحالة زى ما هى، كان القرار إجراء جراحة استكشاف عاجلة لتحديد و تصليح الانسداد

فى العملية الجراح ما يلاقيش أى التصاق و يفتح الجزء المسدود من الأمعاء يلاقى كمية من نسيج شبيه بخيط التريكو، طلع بكرة بسمك الأمعاء طولها متر و ربع من بطن البنت

بعد العملية نحقق مع الأهل فى اللى لقيناه، نكتشف انها عندها مشاكل نفسية نتيجة ان زمايلها فى الفصل عاملين تكتل ضدها و بيعايروها انها مصرية، البنت بتقعد وقت طويل جدا على البلاى ستيشن، عندهم غرفة المعيشة عبارة عن كنب فيه شراشيب كتير، لما بتتعصب و تتشد ساعات بتحط منها فى بقها و الإخوات و الأسرة ولا هنا ولا داريين باللى بيحصل

الدرس المستفاد، انك ما تسيبش ولادك فترات طويلة قدام أجهزة الألعاب الإلكترونية، أو لو ناوى تسيبهم ما تشتريش عفش فيه شراشيب

03/08/2018

دا لمصلحتك والله

30/07/2018

لقد تحملت الكثير من جملة " ابنى عنده سرعة ترسيب" ولازلت لا أبالى

08/07/2018

لو لقيتونى مسافر مش هتلاقوا أحسن من د هشام بردو عشان تروحوله، واحد من أعظم ٤ دكاترة أطفال اسمهم هشام فى المنصورة

19/06/2018

توقع نتيجة ماتش مصر و روسيا انهردة و صاحب التوقع الصحيح أتوقع مش هيكسب أى حاجة، انت مش فى كارفور

11/12/2017

فى ناس محتاجة إعادة كشف بعد ٣ سنين