Dr Mohamed Yousry د.محمديسرى

19/09/2025

الصداع عند الأطفال
كلمة لا يصح أبدا إنك تعديها عادي لازم تدور على سببها

19/09/2025

كل لحظه وأولادنا بخير
المدارس بكره ❤️
لو انطلب منى نصيحة تغذوية على اللانش بوكس اكيد هنصح أنه
١- بلاش عيش فينو يبقى عيش أسمر
٢- بلاش عصير
٣- بلاش لحوم مصنعة
٤- بلاش جبن مثلثات أو رومى او فيتا من مصدر نباتى
🌹
طفلك ميخرجش للمدرسه من غير فطار لو أى شىء بسيط

د.بهاء الشيخ
استشارى طب الأطفال
استشارى التغذية العلاجية للأطفال والمراهقين

14/09/2025

يمكن ده آخر بوست هكتبه في الموضوع لإنه أخذ أكثر من حجمه بالنسبة لي..
ولإن اللي عاوز يقتنع يقتنع واللي حابب يمشي ورا اللي يريحه فكل واحد حر.
وما على إلا البلاغ.
————-

دكتور..

أنا إتحسنت على النظام الغذائي الفلاني ..

مبروك 👏

أنا استريحت على الدايت العلاني ….

ممتاز 👌

أنا لما منعت الدقيق الأبيض وقطعت السكر وزني نزل و الضغط على مفاصلي قل و القولون اتحسن و نفسيتي استريحت ..

طبيعي حضرتك مش سحر و مبروك كمل 🥳

تمااام .. بااااااس …..

إنتوا بأه دكاترة نصابين وإستغلاليين و مش بتعالجونا بالغذاء ليه؟؟
ليه كل كلامكم دوا دوا دوا ومفيش دايت لكل مرض ليه؟
ده دكتور سين وصاد وجيم مأكدلي إن

" كل مرض لااااازم لااااازم ليه الدايت بتاعه " عشان كل مرض " ليه البكتريا اللي بتنشطه "
"كل الأمراض المناعية بتتنشط بأكل معين"
" أنا هبدأ أمشي على الدايت عشان أوقف الدوا"
"إنتوا مقدمتوش أجوبة مقنعة للأمراض المناعية وأسبابها فهنلجأ للطبيعة"..
لأ لحظة بأه ..

هنا ونقف وقفة.

التحسن على الدايت/الحمية الغذائية و إن تم ملاحظته مع أشخاص معينة ؛ لكن اتعمل عليه أبحاث بالهبل .. و الواقع بيقول إن مش كل الأمراض المناعية بتتحسن بالدايت؛
و إن مفيش دايت معين ينفع يتعمم ولا يتفصل حتى على كل مريض مناعي.

وبالعكس تمامًا .. معظم الأمراض المناعية مش بتتحسن على دايت معين ودور "الأكل " المُثبت في الأمراض المناعية "غير السيلياك/حساسية القمح بالطبع" - دور الحميات الغذائية قليل جدًا و التحسن عليه فردي ولا ينضبط ولا يمكن أن يُعمم زي ما هشرح تحت.

وإن اللي بيحصل مع حضرتك ده سواءًا كان تحسن مؤقت أو دائم فهو تحسن "فردي" وحط مليون خط تحت كلمة "فردي" لأسباب هقولها تحت.

وإن مش معنى إن الطب لسه موصلش لسبب الأمراض بس بيحاول يوصل لسبب الأمراض المناعية وطور أدوية بتستهدف كتير من أسبابها بآثار جانبية بتقل كل ما البحث العلمى يتطور.؛ مش معنى ده إننا نروح لدجالين أصلًا مفيش أي "معايير" ولا "مصداقية " لكلامهم إلا الإبهار الصوتي والضوئي و زوايا التصوير والبروباجندا و الكلام اللي ظاهره "مُقنع" لكن جواه "سم في عسل" .. و بزنس بالملايين من السحت والحرام.

لازم نعرف إن الأدوية المناعية "مش" بتلغي جهاز المناعة "كله" لأ ده لكل واحد منها "هدف" و"خليه" و "مستقبلات" بتشتغل عليها و البشرية بتحاول توصل وربنا معانا. و إلا .. كان "كووول " اللي خدوا علاج مناعي "ماتوا " تاني يوم بعدوى تافهة ؛ و ده مبيحصلش.

وبناءًا عليه.. وعشان الكلام يكون واضح جدًا:

مينفعش "أخصائي" تغذية علاجية يطلق على نفسه لقب "دكتور" لم يتخرج من كلية الطب ولا حتى ينفع دكتور "عام" اتخرج من كلية الطب يوقف أو "يقلل" علاج خاص بمريض موصوف من طبيب "غدد أو مناعة متخصص" غير بالمتابعة المزدوجة.

أي "إنسان" حتى لو "طبيب" يقولك إن أصل كل الأمراض "الأكل" وتعالى أعمل لك "نظام غذائي" أخليك توقف علاج "السكر" ولا "البهاق" ولا "الروماتويد " ولا "القولون التقرحي" =

نصاب قولًا واحدًا متسمعش منه.

تعالى أقولك ليه..

لإن النظرية الجميلة اللذيذة الظريفة المبهرة بتاعة
"إن كووول الأمراض سببها الأكل ومنشأها الطعام" دي نظرية ناقصة، غير كاملة، غير مُعترف بيها في أي مدرسة محترمة في العالم كله.

أو على الأقل " لسه في طور الأبحاث" مينفعش تتعمم على الناس كلها و آخد بيها "بونت" عند الناس و أبيع لهم الهوا ف قزايز عشان سحاتيت من الدنيا.

الأمراض المناعية والمزمنة ياخوانا ليها أسباب.

الأسباب دي يا جماعة منها الإستعداد الوراثي، ومنها العوامل البيئية، منها القلق والتوتر، ومنها "بيزودها"
"بعض" أنواع الأكل.

وفي حميات غذائية "مقترحة" وحط مليوووون "خط" تحت كلمة "مُقترحة" ل "بعض" الأمراض دي.

فكون دكتور /معالج/تغذوي يسيب كل ده و يقولك تعالى ده انا عرفت سبب مرضك ، وكل اللي فات مات إحنا والمرض إخوات ويوهمك إن يلا بينا أنا جبت الديب من ديله وهنبدأ نقلل علاج غدة/وحدات إنسولين/علاج مناعي ونظبط أكلك بالتدريج إهرب منه قولًا واحدًا ده نصاب يا صديقي.

ده بيعمل عليك بزنس بالملايين و سمعة و إسم ومشاهدات و ترافيك على "حس" إنه الطبيب الألمعي اللي آتٍ بما لم تستطعه الأوائل.

ميهمنيش بأه هوا مقتنع بالعبث اللي بيقوله ده ولا موهوم - جاهل يعني. ولا عارف ونصاب.

بس فلان وعلان وترتان وأنا نفسي إستريحت على النظام/الحمية/البلا بلا بلا..

تمام وركز معايا أوي أرجوك لإن دي لعبتهم الكبرى:

١.كتير إن لم يكن معظم الأمراض متداخلة؛ بمعنى .. إن الإلتزام بحميّة غذائية ممكن يهدي فعلًا الجهاز الهضمي، وده بيهدي الحالة النفسية والمزاجية والتوتر و ده بيظبط معدلات السكر والغدة و يقلل من تنشيط الهجمات المناعية بتاعة أي مرض..

٢.الأمراض المناعية أصلًا ليها فترات "كمون Remission “ و نوبات هياج Exacerbation” وارد جدًا يكون بداية الحمية مع فترة الكمون الطبيعية.

لكن..

هل ده معناه إنه خف تمامًا من المرض و"إحنا" الدكاترة الجشعين الاستغلاليين الوحشين عاوزينكم تمشوا على دوا طول العمر عشان إحنا مش بنفكر في Root جذر الأمراض وبنفكر بسطحية؟

أبدًا…

هل ده معناه حماية من النوبات ؟

إطلاقًا.. الهجمات كده كده عشان هيا متعددة العوامل.. ممكن تهدي النوبة شوية مع منع أكل معين وتيجي تاني لو أكلت .. وممكن العكس .. مفيش قاعدة ثابته إطلاقًا..

هل ده معناه إني بقول الحميات الغذائية كلها مالهاش لازمة ؟

لأ طبعًا وهنزل لحضراتكم في التعليقات الأمراض المناعية المثبت فوايد الحميات الغذائية فيها أو نوع معين من الطعام فيها.
لكن ..

أنا ضد العبث.
ضد الهبل.
ضد الإستغلال و الهجص والضحك ع الدقون.
ضد الكلام اللي ظاهره علمي معسول وباطنه خواء و نصب.

عارفين المشكلة فين؟

المشكلة إن الناس دي لما تزنقهم يقولوا ما قلناش نوقف الأدوية قلنا نكمل مع الحمية و كلهم كاذبون.
كل فيديوهاتهم وإيماءاتهم و إيحاءاتهم وخلاصة تجاربهم وحتى السكرين شوتس اللي بينزلوها على صفحاتهم كلها تشجيع على إيقاف العلاج أو تسفيه من التشخيصات أو من وجود الأمراض أساسًا..
فتلاقيه يقولك :

السكر التراكمي ( اللي مالوش لازمة !)
أو
الضغط عرض مش مرض !
أو
الإكزيما عرض مش مرض.

فليت شعري لا أتقنوا علاج العرض ولا فهموا سبب المرض و أفسدوا في الأرض أكثر مما أصلحوا..

دي زفرة والله ..
والله شهيد على ما أقول ..
بفضل الله لا محتاج مال ولا شهرة عشان حد يقول منفسن ولا حاقد..
ومعايا شهادات من مصر وأمريكا عشان مقدر إن ناس كتير متعرفنيش.
وعيادتي موجودة في مصر ومعروفة غير معظم المدعين دول للأسف يا يكشف أون لاين من داخل أو خارج مصر عشان يعكوا براحتهم في المرضى.

دي والله صرخة حزن وألم و أسى ..
حزن على مساحة خلت من العلماء فاحتلها المدعين والجهلة و الأفاقين.

ومعذرةً إلى ربكم.

والحمد لله رب العالمين.

د.أحمد الخطيب.

12/09/2025

نقلاً عن صفحة المركز القومي للمصل و اللقاح

بمناسبة موسم تطعيم الانفلونزا

فاكسيرا قررت تجمع اكتر الاسئلة شيوعا بين الناس عن هذا التطعيم في البوست ده

تطعيم الانفلونزا جرعة واحده سنويا مين اللى محتاج جرعتين ؟
الاطفال اللى عمرهم اقل من تسع سنوات و لم يسبق لهم التطعيم بجرعتين من قبل في حياتهم (حتى و لو جرعتين على موسمين ).
او الاطفال اقل من تسع سنوات و لا تتذكر الام هل تم تطعيمهم من قبل ام لا

المناعه من الانفلونزا بتتولد امتى بعد التطعيم ؟
المناعه بتبدا بعد اسبوعين من التطعيم و تستمر لسته اشهر بعدها بتبدأ تنزل تدريجيا
و ده من الاسباب اللى بتخلينا نطعم كل سنه

انا اتطعمت انفلونزا و تعبت بعدها هو التطعيم بيجيب انفلونزا؟
التطعيم معطل استحالة يسبب المرض
و لكن فى الحاله دى ممكن يكون السبب :
- ان متلقي التطعيم كان في بدايه دور برد و ظهر الدور بعد التطعيم على طول
- او ان علشان التطعيم بيشتغل بكامل كفاءته بعد اسبوعين فمن الممكن ان يصاب المتلقى بالعدوى في تلك الاثناء
- او انه دور برد بسبب اخر خلاف الفصائل الموجوده في التطعيم ده
مع العلم ان تطعيم الانفلونزا كغيره من التطعيمات قد يسبب سخونه طفيفه او احمرار حول مكان الحقنه

هل ممكن اغير نوع تطعيم الانفلونزا في الجرعة الثانيه اذا لم يتوفر نفس النوع؟
ايوه ممكن نبدل بين الانواع

هل التطعيم مسموح بيه لمرضى التصلب المتعددMS؟
مفيش مشكلة

هل مسموح بيه لمرضى السرطان؟
مسموح

هل ينفع اديه مع المضاد الحيوى ؟
ينفع

هو انا لازم اطعم انفلونزا شهر اكتوبر بس و مينفعش بعد كده؟
لا عادى اى وقت قبل الصلاحية المكتوبه على العلبه و المناعه هتتوفر بعد اسبوعين من الحقن و تستمر سته اشهر على الاقل

لو حد جاله انفلونزا السيزون ده اطعمه برضه و لا خلاص كده؟
يتطعم

هل تنفع الانفلونزا مع الحمل ؟
ايوه و موصي بها خصوصا في السته شهور الاخر من الحمل

12/09/2025

23/08/2025

للاسف بأشوف ناس بتعاقب أطفالهم خاصة تحت الخمس سنوات ، الطفل في المرحلة دية بيعمل الأفعال وهو غير مدرك للنتائج علشان كده وجب عليك التصحيح والتربية لا العقاب .
خليك هين لين مع طفلك وقوم سلوكه علشان يطلع معاك انسان سوي وفعال

17/08/2025

حمى البحر المتوسط (٢)
ألم البطن

من أهم علامات حمى البحر المتوسط ألم البطن ومن اكثر العلامات اللي بتخلي الأهل يكشفوا على طفلهم وبتخليهم يبحثوا عن السبب .
ولكن هنا ألم البطن بيكون له شكل معين علشان مش كل طفل يشتكي من بطنه نقول حمى بحر متوسط ونمشيه على علاج
مواصفات ألم البطن في هذا المرض ألم متكرر على هيئة نوبات مدته لا تقل عن ست ساعات ولا تزيد عن ثلاثة ايام بيكون مصحوب بارتفاع في درجة حرارة الجسم فوق ٣٨ درجه هو ألم اللتهاب في الغشاء البريتوني لذالك بيكون ألم شديد يأثر على نشاط الطفل هذا الالم مفاجئ وغير مصاحب معه أي وضع جراحي هذا الالم قد يكون مصاحب له ألم شديد في المفاصل والصدر

إذا ليس كل ألم في البطن ممكن نقول عليه الم حمى البحر المتوسط ولكن لابد من توفر شروط له علشان نقدر نقول ده الم حمى البحر

#حمىـالبحرـالمتوسط
دمتم بكل خير
د. محمد يسري

15/08/2025

Using Dexamethazone in a febrile child is a very big mistake it will mask the key signs and symptoms and will delay the accurate diagnosis .

15/08/2025

حمى البحر المتوسط (1)

من أسمها حمى فشرط أساسي منها أن الطفل بيعاني من إرتفاع في درجة حرارة الجسم أعلى من ٣٨ درجه وهذه الحراره بتكون في مده لا تقل عن ٦ ساعات ولا تزيد عن ثلاثة أيام وكمان بتكون على هيئة نوبات بمعني انها بتيجي للطفل وتختفي وبعد مدة قد تكون اسبوعين او شهر او شهرين وترجع تاني بنفس الشكل
ودية أول وأهم علامه
periodic fever more than 38c , from 6 hours to 72 h

#حمىـالبحرـالمتوسط
دمتم بكل خير
د. محمد يسري