https://www.facebook.com/1042639962267607/

15/05/2026

🙏❤️

12/05/2026

بمناسبة الصيف و الجديري المائي معدله هيزيد ..🙏
من اعراض الجديري الحبوب المائية vesicles و ارتفاع حرارة و خمول و حكة ف الجلد و ألم
فلازم تعرفي ان احسن خافض و مسكن تستخدميه لطفلك مش البروفين ولا الكونتافيفر❌️
الأحسن البارسيتمول ✅️✅️ الي هو السيتال (cital)
لان البروفين او الكونتافيفر مع الجديري يعمل التهابات جلد عنيفة عند بعض الأطفال و خراج ..فاللتفادي نخلينا ف السيتال آمن 🙏

10/04/2026

الطهارة للولاد ...عملية جراحية لابد منها 🤍🙏
و هو عملية بسيطة و ليها اكتر من طريقة بيقوموا بيها دكاترة جراحة الأطفال 💉
الوقت المفضل للعملية هو أول أسبوع من الولادة او بعد ٤٠ يوم من الولادة..👶🧡
قبل العملية لازم الولد يعمل شوية تحاليل نتأكد ان الطفل معندوش سيولة ولا معرض لانيميا 👏❤️

●اشمعني الوقت دا ؟
اول اسبوع بيكون الطفل السليم عنده عوامل تجلط كويسة من الام 🤍🙏 بعدها بيبدأ يقل شوية و بيقدر يعوضها بعد كدا بعد ٤٠ يوم 🤍

* كل م كان العملية بدري كل ما كان احسن للطفل ... ليه ؟🤔
_ مش هيكون واعي كفاية للألم
_ مساحة سطح الجلد بتكون اقل فمش بيقطع جامد في العضو
_ سرعة الالتئام كويسة جدا الوقت دا
_ مش بيكون أتعرض لعدوى او تراكمات تحت الجلد

* الطهارة مهمة لمنع حدوث عدوى او التهاب ف المسالك البولية او التهابات متكررة 🤍🙏

10/04/2026

ادي فيتامينات ايه للرضع قبل السنة؟ 🤔
عوزة مقويات يا دكتورة؟😇
ادي حديد ؟
ادي زنك ؟
ادي فيتامين د؟

●نبدأ بالحديد :
_ لازم تعرف الام حاجة مهمة جدا و دا للطفل الطبيعي الي صحته كويسة و مش عليه اعراض وحشة زي الأنيميا و مولود بحجم طبيعي ان جسمه بيكون فيه مخزون كويس للحديد اول اربع شهور ↗️و بعدين يبدأ يقل ...↘️

□ امتى ادي الجرعة الوقائية ؟
_ غالبا بين الشهر الرابع و الشهر السابع
اشمعنى ؟ ... الرابع قولنا بيبدأ المخزون يقل ، السابع بيكون الطفل بدأ يدوس ف الاكل🍎🍳 و يستمد الحديد من الاكل كويس
فبكدا فيه فجوة ف الوقت دا ممكن نستخدم فيها الحديد ك جرعة وقائية 🙏🤍

*طيب كدا إجباري اخد الجرعة الوقائية ف الوقت دا ؟ 🫡
= لو بيرضع صناعي مش لازم لان اللبن بيكون فيه نسبة كويسة حديد 👍
لو طبيعي لبن الام بيكون قليل فيه الحديد شوية فهنا لازم ياخد الجرعة الوقائية 🤍

**************
تاني فيتامين مهم جدا للرضيع هو فيتامين د 🦴🦷☀️
هنا الفيتامين الإجباري.. من اول يوم ف حياة الطفل لحد ٣ سنين تقريبا 🤍
فيتامين د للطفل قبل السنة لازم ياخد الجرعة كل يوم ( صباحا) .. ٤٠٠ وحدة دولية ☀️❤️
فيه أنواع النقطة بيكون فيها ٢٠٠ وحدة زي (diviton) فبياخد نقطتين و فيها انواع بيكون النقطة فيها ١٠٠ وحدة زي (v drop) فبياخد اربع نقط ... فاحنا بنظبط عدد النقط ع حسب الوحدات 🤍🙏

*افضل انواع الفيتامين د الي محملة ع زيوت امتصاصها احسن من الي ع قاعدة مائية .. غير ان القاعدة المائية عمرها قصير و الفيتامين بيتكسر بسرعة فيها 💧
*و الي معاها عنصر ال K2 امتصاصها احسن و احسن 🤍
بعد السنة بنزود جرعة فيتامين د 🤍
و مننساش ان الشمس اجمل مصدر رباني لفيتامين د للرضع مفيش مانع من حين لآخر تعرضيه للشمس لمدة ربع ساعة ☀️🧡🧡

*******************

*الكالسيوم : ك عنصر مش بنديه وقائي غير للاطفال الي عندهم لين عظام او تأخير تسنين او ف التحليل فيه نقص واضح 📍

الزنك : عنصر مساعد جميل بس داعم اكتر فى أدوار النزلة او التهاب الأمعاء او الجلد 🤎

07/04/2026

حاجات لازم تاخدي بالك منها ف الشهر الأول 🤍👶
* طفلك ميزدش نومه عن ٣ ساعات عشان سكره ميقعش و يحصله جفاف لازم يقوم يرضع 👩‍🍼
* متنقليش من ث*ي ل ث*ي بسرعة عشان يقدر يوصل للبن المشبع الي موجود ف نهاية الرضاعة 🙏
* استعيني عادي بالي حواليكي و متبقيش لوحدك عشان جهازك العصبي و نتجنب هز الطفل بغرض التهدئة shack baby syndrome.. ممكن مع الهز يحصله نزيف ف المخ 😵‍💫
* لازم تشفطي لو الطفل مش لسة عارف يلتقم كويس عشان تتجنبي احتقان الصدر و الث*ي يتحفز انه يطلع لبن اكتر ✅️

* لو الطفل لسة مش عارف يرضع من الث*ي جربي ترضعيه بالسرنجة بلاش تجري ع الببرونة ع طول خاصة الشهر الاول عشان ميحصلش التباس ح**ة 👩‍🍼
* الرضاعة الليلية مهمة جدا لأن فيها هرمونات بتهدى من الطفل و بتساعده انه يهدا و ينام 🌌
* الطفل ملوش ساعة بيولوجية معينة ..و اقصي وقت ممكن ينامه هو مثلا نص او تلت ساعة 😇

06/04/2026

موضوع مهم جدا و مع الأسف ثقافته مش منتشرة اوي 🙃..
و بيكون هو بداية الكحة و الالتهابات ع الصدر و الأنف و دايرة مغلقة مش لطيفة 🙏
(غسيل الأنف خاصة لفئة الرضع ) 👶👃

_ فيه حاجة لازم تعرفها اي أم.. أن أول ٣ شهور ف عمر الطفل الطفل عنده خنفرة ربانية😅😅 يعني فيه صوت خنفرة و أحيانا عطس خفيف دا بسبب ان الطفل ف الوقت دا ممرات انفه ضيقة لسة مكبرتش فدا طبيعي 🙏

_ طيب لو ظهر عندي رشح باين قدامي و سمعه صوت خنفرة عالية... هنا دور غسيل الأنف بقى لان لو سبنا المخاط دا هينزل بشويش ع الصدر و الأعراض تزيد 🔄

_ طيب حد هيقولي ما اغسل ليه ؟ مانا اعصر مناخيره بالمنديل و خلاص ؟! 🤷‍♀️
= تمام انتي صح بس انتي كدا شيلتي الافرازات الامامية مش الخلفية ...الافرازات الخلفية هي الي بتنزل ع الصدر 🙏

_ طيب بنغسل امتى ؟ و ازاي؟ و كام مرة ؟ 🤔
=بغسل لو فعلا الافرازات كتيرة او سميكة ..
( لان لو اخف و رشح بس ع خفيف بكتفي بنقط أنف او بخاخ ماء بحر الي هي نقطتين ف كل فتحة و خلاص ✅️)

الطريقة:
بجيب الطفل و هو قاعد و ميله لقدام عشان ميشرقش و برطب كويس بنقط او بخاخ ماء بحر و استني ٥ دقايق و اعمل مساج من برا للانف كدا و بعدين ابدأ التشفيط🙏✅️👃🤍

*طيب كام مرة ؟ ع حسب برضو بس خلينا نتكلم فى مرتين او ٣ مرات ( لو الموضوع مزمن او سميك بنعمل اكتر ..دا تقييم دكتورك )

* أشكال أدوات الشفط و الغسيل كتير زي ف الصور تحت :
بس خلينا نتكلم ف الاخف للاعنف و دا ع حسب السن و ع حسب الحالة 🙏

اخفهم: الي هي فيه rubber و مدورة كدا و فيه برضو الي هي بشفط الفم ..دي حلوة اوي للاطفال الي قبل ٦ شهور لو عندهم رشح خفيف او خنفرة بسيطة 📍

متوسطهم: السرنجة ولازم يكون معاها البوز الي واخد شكل الأنف و مطاطي عشان ميجرحش الأنف بيتملي بمحلول ملح من الصيدليه و بيتعمل ع كل نحية من الأنف و يفضل يكون تحت الطفل فوطة عشان ميغرقش نفسه 💧
(بنعملها لما يكون فيه رشح كتير بس مش لزج)

اعنفهم: مش برشحها غير للحالات السميكة خالص و الأطفال الي فوق سنة كمان.. لان ترددها بيكون عالي شوية و ممكن تهيج الأغشية المخاطية للانف⚡️

* مهم جدا الغسيل بس لازم تعرفي هتغسلي كام مرة و بأيه و امتى عشان زيادته ممكن تجرح أنف طفلك 🤍🤍

* يفضل الغسيل قبل الرضاعة و النوم 🤍

05/04/2026

اول ٢٤ ساعة فى حياة الطفل بعد ولادته ... لازم نطمن ان الطفل عمل براز 🙏 و دا غالبا بيكون اسود بنسمعيه meconium
بعد كدا براز الطفل بيتغير لاصفر فاتح شوية و سايب شوية ( دا مش اسهال ) و مع عوامل تانية ممكن يتغير لونه زي ادوية او لبن صناعي او مخاط برد او اكل معين🙏
الطفل الي بيرضع طبيعي بيكون البراز بتاعه مكسر شوية عن براز الي بيرضع صناعى 🙏
المهم مش لونه لا رمادي ولا اسود ولا احمر 🙏🙏❌️❌️⚠️⚠️⚠️ (دول طوارئ.. لازم تتحرك ع المستشفى )

04/04/2026

التشجؤ او التكريع زي م بنقول مهم جدا لتفريغ غازات البطن و تخفيف المغص عن الطفل و ان ميحصلش ارتجاع بسيط للبن الي واخده 🤍

04/04/2026

موضوع شائك و اغلب الماميز بيكونوا مش فاهمينه👩‍🍼😇..
ألا و هو (طفرات النمو ) 🦴
ليه طيب اسمها مبدأيا طفرة ؟ عشان هي بتحصل فجاءة و بتختفي ف وقت قصير جدا فعشان كدا اسمها طفرة 📈

طيب بيحصل فيها ايه بالظبط ...
جسم الطفل ف وقت معين بيكبر ذهنيا و جسمانيا و سلوكيا 👶↗️↗️↗️
عشان يكبر جسم الطفل ك انسجة و بنيان و مخ محتاج طاقة و هرمونات بتطلع زي هرمون النمو ..

*الطفل بيفضل يعيط ليه ف الوقت دا و مقريف جدا دا بسبب ان فيه تغيرات ف جسمه بتحصل و محتاج طاقة و غذاء
فالام دورها هنا :
_عشان الاضطراب الي عنده تحتويه كويس جدا🫶
هو مضطرب عشان عند هرمون النمو بيشد عضمه فبيحس بألم 🙃
_ عشان الطاقة ترضع كويس جدا ..الطفل هيستجيب جدا للرضاعة 👩‍🍼👩‍🍼 هرمون النمو برضو بيقلل السكر ف الدم فبيحس بجوع ع طول 🙃

* بتيجي امتى ؟ ( احفظي الخطة دي ...٣_٦_٣_٦_٩) 😅😎
عند ٣ اسابيع
و عند ٦ اسابيع
بعدها ٣ شهور
بعدها ٦ شهور
آخرهم ٩ شهور و بعدين السنة 🙏🙏

*مدتها قد ايه طيب ؟ مدتها تقريبا من يومين ل ٣ ايام مش كتير 🤍
_ الطفرة دي هتعرفيها ان الطفل يرضع هيهدا و يسكت .. لا معاها اسهال ولا سخونة ولا اي اعراض مزعجة ..
هو الزن و القريفة ف النوم و الرضاعة المتكررة فقط ولمدة و فترات معينة 🙏🤍
و ممكن ياخد جرعة ليلية سيتال cetal ك مسكن بجرعة يحسبها الدكتور 🙏
الام لازم تصبر و تاكل و تشرب كويس عشان تعرف ترضع كويس 🤍👩‍🍼🤷‍♀️😅

03/04/2026

(دا عنده اسهال اصله بيسنن ...
دا عنده سخونة اصله بيسنن ...🦷😇)

هل فعلا الكلام دا صح ؟؟

* الكلام ف سياق معين صح بمعني ايه ؟
_لو اسهال خفيف✅️ ....
مش مائي ...مش عدد مراته كتير❌️

_لو سخونة آخرها ٣٨ او اقل ✅️...
مش أعلى من كدا ❌️

طيب هو فيه اسهال او سخونة ليه حتى لو بدرجة بسيطة؟
١_اسباب الحرارة الخفيفة هو التهاب اللثة احيانا
و أحيانا لما الطفل بيحط كل حاجة ف بوءه بيكون سبب احيانا ف عدوى خفيفة 🌡
٢_ و الاسهال الخفيف سببه لما الطفل بيريل كتير بيبلع اللعاب كتير او برضو زي م قولنا سبب انه عاوز يعض ف اي حاجة فبيكون فيه عدوى بسيطة .. 😵‍💫

( و بالمناسبة الأعراض بتظهر لحظة شق السنان مش قبل كدا ) 🙏❤️

اي اعراض غير كدا زي سخونة او خمول او ترجيع او اسهال كتير ملوش علاقة بالتسنين🙏🤷‍♀️🤍🦷

* امتى نقول انه اخر ف التسنين الطفل لو مطلعش ولا سنة قبل سنة و شهرين 🙏

* عادة بيبدأ التسنين من الشهر الرابع و مش كل الأطفال لازم تطلع ف وقت معين الأسنان..و ملوش علاقة ان كل م ازود فيتامين D ان بسرع من ظهورها 🙏🙏
فيتامين D مهم ك عامل مساعد ولكنه مش السحر الي يخليها تظهر بدري ( و هذا لا ينفى دروه ف امتصاص الكالسيوم و المناعة ولازم الطفل ياخده كل يوم ) 🤍🤍

02/04/2026

متلازمة sandifer 🤍👶 ...
دي متلازمة بتيجي لبعض الرضع الي بيعانوا من الارتجاع 🔥
الطفل تلاقيه وقت الرضاعة بيعيط و رافض الرضاعة و بيحاول يقوس رقبته و ضهره لورا عشان يخفف شعور حرقان الارتجاع 🙏🤯
فيه ناس تفتكره احيانا تشجنات... بس نفرق بينهم ازاي ؟
الوعي 🙏🙏🙏 لو الطفل واعي و عياط بس دا ارتجاع
لو فيه تغير ف الوعي و النفس بيكون تشنج ⚡️ ( و طبعا دا تقييم دكتور 🩺🤍)

لو طفلك بياخد الحركة دي وقت الرضاعة او بعدها و فيه عياط هستيري دي بنسبة كبيرة ارتجاع ...راجعي دكتورك خليه يكتبلك العلاج المناسب ليه 🤍🙏

Dr.Yara Hossam

15/05/2026

12/05/2026

10/04/2026

10/04/2026

07/04/2026

06/04/2026

05/04/2026

04/04/2026

04/04/2026

03/04/2026

02/04/2026

Address

Website

Alerts

Shortcuts