Gaber's kids care clinic

17/06/2023

نتشرف بحضراتكم بعنوان العياده الجديد ميدان المحطه شارع الجمهوريه برج ماجستيك الدور الثاني علوي بجوار صيدليه الصحه مع استمرار العمل بعيادات الزخرفيه وصفط الشرقيه
للحجز والاستفسار عن المواعيد يرجي الاتصال علي الرقم
٠١٠٠٧٤٠٥٦٠٣

04/07/2020

معلومه علي السريع ناس كتير بتسال عليها🤔🤔
تعطيم شلل الاطفال الجديد ليه لازمه ولا لا
هل خطر علي الطفل ولا لا
نيجي نحكي الحكايه😎😎
لازم نعرف ان هناك نوعين من تطعيم شلل الاطفال وهو سابين فاكسن وسالك فاكسين🙄🙄
سابين فاكسين ده عباره عن فيرس ضعيف لا يسبب المرض ولكن ببنديه بالفم علشان يحفز الجسم علشان يفرز اجسام مناعيه للوقايه من الفيرس ده لو لا قدر الله اتصاب بيه الطفل
وكمان بينزل من البراز بتاع الطفل وممكن يروح لطفل تاني عن طريق الاختلاط وهيديه مناعه برضوا ودي حاجه ممتازه طبعا☝️☝️
لازم نعرف برضوا ان التطعيم ده عباره عن ٣ فيروسات ضعيفه ١،٢،٣ وسموه trivalant وده اللي بنديه لولادنا من زمان 👍👍
امال ايه المشكله🤔
المشكله ان منظمه الصحه العالميه وجدت ان في بعض الاطفال اتصابوا بشلل الاطفال نتيجه التطعيم يعني الفيرس الضعيف ده نشط فجاه ووجدوا ان فيرس رقم ٢ هو اللي نشط وسبب المرض تخيل الكارثه انك تدي تطعيم يسبب مرض مدمر😥😥
لذلك اصدرت قرار ان تطعيم السابين يتشال منه فيرس رقم ٢ والقرار ده نزل ٢٠١٦ وسموه الثنائي bivalent ويحتوي علي فيرس ١،٣☝️
طيب خلصت الحكايه كده
لا طبعا فين التطعيم ضد فيرس ٢🤔
وهنا يجي دور النوع التاني من التطعيم وهو سالك فاكسين
سالك فاكسين عباره عن فيرس ميت ميت لا يسبب المرض مطلقا لانه ميت ويعطي عن طريق الحقن ويقي ضد ٣ انواع الفيروسات ١،٢،٣ بس بيقي الشخص اللي بيعطي فقط عكس السابين فاكسين
طيب مين هياخدوا يادكتور☺️
هياخدوا الاطفال اللي اخدوا bivalent سابين فاكسين علشان دول ما عندهمش وقايه من فيرس رقم ٢ وده هيقيهم
طيب مين يادكتور المواليد دول☺️
دول ياسيدي مواليد ٢.١٦ لحد ٢.١٩ من ساعت ما نزل قرار منع تطعيم السابين الثلاثي واعطاء الثنائي
طيب هو الموضوع ده في مصر بس😎
احب اقولك لا ده علي مستوي العالم كله وبص في جدول التطعيمات الاوروبيه والامريكيه والخليج وغيره☝️
الخلاصه توكل علي الله وخد احتياطتك من كحول وكمام وخلافه وطعم عيالك من الفيرس اللعين ده
دمتم في امان الله ربنا يحفظ اطفالنا جميعا
شير لو امكن ☺️
د. محمد جابر حسن أحمد
أخصائي طب الاطفال وحديثي الولاده

24/10/2019

يلا بينا 😍

قواعد الشتاء الأربعون !

١. طفوا التكيفات .

٢. اقفلوا الشبابيك وانتو نايمين وخلوا لبس الأطفال مناسب لعادة "رفس الغطاء" المتأصلة فى الطفل المصرى💂🏿.

٣. كوباية ينسون قبل النوم ،، كوباية موز باللبن -عليها ڤيتامينات اليوم - قبل النزول للمدرسه ،، علبة زبادى ،، صدقنى هى كل ما أتمنى لطفلى فى ذلك العالم المتوحش😥😥

٤. متشربش سجاير يا محترم .

٥. طفى التكيف يا مدام .

٦. ڤيتامينات اليوم :
(بدون الحاجة تحاليل)
ڤيتامين "د" ربع قطارة ڤى دروب لكل الأطفال (٧٠٠ وحدة) للأبد ، حديد -ربع قطارة هيدروفرين يومياً من ٦ شهور لسن سنتين .

٧. الصبح ،، اغسلى وشّه بمياه بارده ،، شَرَّبيه كوباية مياه فاتره ، كوفيّه عشان الهوا الساقع ، وصيه يقفل شباك الباص او العربيه ، سواقين العربيات أو المدرسين لازم يفتحوا الشبابيك اللى جنبهم نص فتحة عشان نهوى الباص أو الفصل ونجدد الهوا ، ناخد أكل وشرب زياده عشان الفيضانات 😢

متنسوش ان القاعدة " نتدفا كلنا ،، نتعدى كلنا"😱

٨. أهذا هو الشتاء الذى كرهت الصيف لأجله !😥

٩. وصايا لابنك مفهاش هزار -الغلطة بعدوىٰ- :

مناديلك في إيدك ، سنداوتشاتك فى جيبك ،، كوبايتك في شنطتك ،، اللى يقولك سلفنى حاجة من دول قطّعُه 😂

١٠. مفيش حاجة يا مس اسمها بوسو بعض يلا عشان تصالحوا بعض - انا ابنى يبقى مبلطج ع المدرسه كلها وبصحته احسن ما كل المدرسه تكون بتحبه وهوا مرمى في السرير سخن مولع وعنده برد!

١١. مفيش حاجة اسمها مدرسه وابنك سخن ، مفيش مدرسه وابنك بيكح طول الليل ، مفيش مدرسه وانتى عارفه ان الجو تلج وهوا وابنك بيتعب في الجو دا - متغامريش بصحة ابنك.

١٢. أصابك "بردٌ" أم رُميت ب"ڤيرسِ"؟؟
لا الصراحة عندى حساسية أنف😁 .

١٣. البرد ماهو الا ڤيروس -غالباً- بيقفل الأنف ويبدأ بخنفرة ويكمل برشح ،، قدامك ٤ سيناريوهات ،، ينزل على الصدر يعمل كحة ،، ينزل على المعده يخليه يرجع ،، يقفل الودان -قناة استاكيوس- يعمل التهاب اذن وسطى وحرارة ،، يقفل الجيوب الأنفية يعمل التهاب وحرارة وصداع ويبقى الرشح أصفر- أو يخف من غير ما يعمل حاجة من دول بين قوسين ابقى قابلنى 😊.

أيوا يعنى عاوز ايه ؟؟

الحق البرد ف أوله قبل ما نلبس كلنا فى الحيط.

١٤. الحساسية ما هى إلا برد متكرر .

١٥. الرشح له تنضيف ، والكحة ليها سوايل دافية وقفل التكيف ، والاذن عمرها ما تتعب والأنف نضيف ،، والجيوب الأنفية ما بتهزرش ،غالباً لازم انتى بيوتك عنيف!

١٦. ما قلنا طفو التكيفات ! ديهدى 😀

١٧. التكيفات غير انها بترزع الهوا الساقع فى الوشّ ،، بتنقل "حلاوة شمسنا وخفة دمنا والجوّ عندنا" كله من برا البيت لجوا البيت ، يعنى بالبلدى بتقعد ابنك فى الشارع بترابه بجراثيمه بحشراته بحبوب لقاحه بسلاطاته ببابا غنوجه - الا اذا كنت من تجار المخدرات وعندك تكيف بلازما كلاستر فمالكش دعوة بالكلام ده😂

١٨. حساسية يعنى طفل حساس - وحاجة بتعمل له تحسس ،، لو قدرنا نخدّر تحسّس الطفل (بأدوية الحساسية) ،، أو نبعد عن الحاجة اللى بتعمل تحسس (بنعرفها بالتحاليل ) .. يبقى بدأنا نعالج الطفل صح بإذن الله.

١٩. "٨٨٪" من حالات حساسية الصدر طلع معاها حساسية أنف واحنا مش عارفين ،، يعنى ٨٨٪ من اسباب الكحة غالباً ذاك العضو القابع فى أعلى ولا ينفك يلقى علينا بقاذوراته!

٢٠. أعطنى بخاخة كورتيزون للأنف وبخاخة صدر ، وسأقضى لك على ٩٠٪ من أسباب الكحة فى هذا العالم . 😂.

٢١. مش معقول يبقا ابنك كل تغيير فصول او "دخلة شتا" بيجيلوا زكام ، رشح ، خنفرة ، هرش أنف ، عطس ، كحة ليلية .. وتبقى مش عارفه ان دى أعراض حساسية الأنف وان علاجها بسيط جداً .... اقفل الحنفية .

٢٢. زودى قطعة ملابس بالليل .

٢٣." التتقيل" في الملابس مالوش قواعد ،، اليوم بيومه ، انهارده حر بكرة تلج بعده ولعه ،، الجو عندنا مجنون يا جماعه ،، أستاذ الجغرافيا بتاع حار جاف صيفا دفئ ممطر شتاءاً بيتحاسب دلوقتى عشان الكدب بتاعه ده 😂

٢٤. قاعدة بسيطة للتعامل مع الكحة لإخواتى الدكاترة :

اول ما تلاقى معاها رشح او زكام اعرف ان الحنفية فتحت والبلغم نزل عالصدر ،، نعالج الحنفية.
لو الكحة قلبت بنهجان ، صفير صدر (تزييق)
يبقى بدأت تقفل الشعب الهوائية وهنحتاج موسع شعب حتماً .
لو اتكرر موضوع الحنفية >> لازم تفكر ف حساسية انف .
لو اتكرر موضوع النهجان والتزييق > حساسية صدر .
لو الاتنين اتكرروا >> حساسية انف وصدر .

٢٥. البخاخات وجلسات البخار مش مخدرات .

٢٦. البخاخات (انف وصدر) أحدث علاج في العالم للحساسية ، اقل تكلفة ، أأمن فى الآثار الجانبية ، أسرع فى النتيجة - لكنكم تحبون الأنتى بيوتك 😢.

٢٧. الأنتى بيوتك مش علاج للحساسية.

٢٨. "لو الرشح أصفر والحرارة عالية (٣٩) ٣ ايام ،، أو الزكام والرشح والكحة مستمرين بلا توقف ١٠ ايام(حتى بدون حرارة) ، دى علامات التهاب الجيوب الأنفية الحادّ وهنحتاج غالباً انتى بيوتك !"
‏Nelson 2015 - الأكاديمية الأمريكية للأنف والأذن

٢٩. حالات حساسية الأنف والصدر - فائقة التحسس ،، هنحتاج تحاليل حساسية Specefic Ige للمشمومات تحت اشراف طبيب عشان نحدد ايه اللى بيتعبكم ونتجنبه - او نعالجه بالأمصال.

٣٠. قاعدة بسيطة للتعامل مع الكحة لإخواتى غير الدكاترة :

السوايل الدافية احسن مذيب للبلغم ، العسل باللمون ممتاز ،، حلة مياه مغليه واستنشاق البخار اللى طالع منها احسن مرطب للحنجرة والاحبال الصوتيه والكحة الغليظة (الخُنّاق) ،، كل اما تلحق البرد بدرى كل اما تمنع مضاعفاته ،، السجاير اكبر سبب مساعد لاستمرار كحة ابنك ،، نبطل بأه!

٣١. بعض مفاتيح الكحة المختفية :

كحة الارتجاع >> ارتجاع سوايل المعده من المرئ للصدر في الاطفال اقل من سنة وعلاجها مضادات ارتجاع مش اى دوا كحة !

كحة الخناق >> صوت غليظ كالنباح سببها التهاب حنجرة واحبال صوتية وعلاجها جلسات ادرينالين وكورتيزون مش اى دوا كحة !

كحة السعال الديكى >> نوبات كحة متتالية خلال زفير واحد بعدها شهيق طويييل Whoop وعلاجه مضاد حيوى ومهدئ سهال مش أى دوا كحة !

الكحة الليلية او بعد استيقاظ النوم >> غالباً حساسية أنف .!

الكحة والنهجان والصفير مع المجهود او اللعب او الرياضه >> غالباً حساسية صدر ..!

الكحة مع أنواع معينة من الطعام أو روائح >> حساسية طعام او روائح و logic يعنى نمنعها تماماً.

الكحة الغير مفسرة >> نتطمن على القلب ، نستبعد اى حاجة ضاغطة على الرئتين ،، الارتجاع الداخلي ،، حساسية الانف الصامته ، وبعض الامراض النادرة . ومننساش الكحة الهستيرية فى بعض الاطفال.!

٣٢. متفقديش أعصابك لو ابنك سخن .

٣٣. التعامل مع الحرارة بالترتيب :

قيسي الحرارة تحت الابط وزودى نص درجة ،
لو فوق ٣٨ خففى الهدوم و هوى الأوضه ،،
فوق ٣٨،٥ ادى سيتال -او بروفين لعمر فوق ٦ شهور وحميه بمياه فاتره فوراً ربع ساعه مغمور تماما وممنوع حاجه اسمها دولفين او كاتفلاي
فوق ٣٩ ، حموم تانى كل ساعه، وبالتأكيد اكشفى فوراً .

٣٤. مفيش حاجة اسمها غطى الواد عشان بيترعش - انتى كده بتزودي الحرارة والعرق وده بيبهدل الطفل الصح نقلعه ونحميه ، اه نحميه وهوا بيترعش عادى والمصحف😡 !

٣٥. التعامل مع ترجيع الشتا بالترتيب :

ريح المعده وبلاش نأكل بعد الترجيع ٢-٤ ساعات. لو في رشح او برد عالجه غالباً هوا السبب بينزل عالمعده فالطفل يرجع .
الترجيع مستمر؟ ابرة ترجيع عضل وكشف فوراً.
متتخمش فى الإسهال البسيط او الحمام السايل غالبا سببه افرازات الانف - العلاج فوق مش تحت!

٣٦. نصايح ذهبية للتخلص من مثيرات الكحة و الحساسية!

إخراج السجاجيد من اوض النوم ، كنس التراب ومسحه بعناية من الزوايا والاركان ، البعد عن كل ماله علاقة بالفرو والريش (دباديب ، قطط ، كلاب ، طيور)، غلى الملايات و اكياس المخدات واغطية الفراش على درجة حرارة ٧٠ كل ٣ ايام ، التخلص من الحشرات والصراصير والفئران ورمى القمامة بشكل يومى ، التخلص من الرطوبة بتتشيف السجاد وتعريضها للشمس و تنشيف المياه المتجمعه تحت الاحواض ورطوبة الجدران باصلاح المواسير ،، البعد عن التراب و الدخان واماكن حرق القش او الروايح النفاذة ، البعد عن السجاير والحشيش ،، نخف الحشيش شوية ياخوانّا 😂

٣٧. الكورتيزون مش سم ، ومش قاتل ، ومش بانجو ، ومش عفريت تترعب لما تعرف ان ابنك بياخده ،، انا اديت ابنى ال ٣ شهور كورتيزون ، وال٣ سنين كورتيزون ، بس بحساب و بعلم ،، وهوا اقوى علاج لنوبات الحساسية الشديدة ، ولكحة الخنّاق-الحنجرية- ، وأأمن علاج بخاخ وأحسنه لحساسية الانف والصدر .
احنا آسفين يا كورتى 😥

٣٨. عاوزه تزودى مناعة طفلك ؟؟؟

نام كويس ٨-١٠ ساعات ؟؟ أكل فاكهة يوميا - موز او كيوى او فراولة او بطيخ او مانجا-؟؟ لعب رياضة طويلة النفس زى السباحة ؟؟ فيتامين سي ولمون او برتقال يومياً ؟؟
ايه ؟
الفاكهة غليت ؟
بلاش بونبونى وهاتى فاكهة انتى هتتلككى 😂

٣٩. عاوزه تزودى مناعة طفلك ؟

اديتى ڤيتامين د بشكل مستمر وبجرعات كافية ؟؟
اديتى مصل الانفلونزا من ٦ شهور وانتى طالعه ؟
اديتى مصل المكورات الرئوية من شهر ونص ل ٥ سنين؟

مش معقول عملتى كل ده ومحصنتيش أطفالك كل يوم ب "أعوذ بكلمات الله التامة من كل شيطانٍ وهامّه ومن كل عينٍ لامّه" زى ما النبى ﷺ كان بيحصن الحسن والحسين !

٤٠. الأستاذ ورا ،، طفيت السجارة ؟؟ الآنسة قدام ،، قفلتى التكيف ؟؟؟ المدام هناك ،، تقّلتى الهدوم ؟؟ الحاجة اللى معانا عملتى صنية البطاطس فى الفرن و حمص الشام والشوكولاته السخنه وقعدتى مع احفادك تحت البطانيه تحكيلهم حكايات الماضى ،،،. اه يا شتا!!!
وحشتنا بجد رغم الكحة والبرد والعطس والساقعه ... فيها حاجة حلوة ❤️

الناس اللى بتقرا البوست ده ،، انتو لسه مشيرتوش 😧!
نقلا عن د. احمد الخطيب استشاري حساسيه الاطفال

27/05/2019

رمضان كريم عليكم

21/08/2018

كل عام وحضراتكم بخير عيد سعيد عليكم ربنا يتقبل منا ومنكم اعاده الله عليكم بالخير واليمن والبركات

25/07/2018

20/07/2018

https://www.facebook.com/1571392798/posts/10211716904789402/

18/07/2018

03/07/2018

*دكتوووور ،، دكتوووور ،، الحقنى يا دكتور بنتى مبتنيمنيش الليل من ساعة ما اتولدت 😢 ليل نهار "تحزق" و "تعيط" مش نافع معاها شيل ولا تيتينة ولا رضاعه ولا تقميط ولا الطبل البلدى 😩

** اهدى بس يا مدام 😤 يمكن مش بتكرعيها كويس او مش بتنيميها ٤٥ درجه بعد الرضعه مانتى عارفه كل الأطفال كده اول شهر !

* لا يا دكتور بعمل كووول ده ومش نافع دي كمان ب "تقشط" من ساعة ما اتولدت !!

** قوليلي يا ماما أخبار التسلخات إيه ؟؟

حوالين الشرج طفح أحمر يا دكتور مع انى والله مش مهملة وبغير كل حمام 😓

** طيب بصي يا حاجة ، انتى كده وارد جداً يكون عند بنتك حساسية من اللبن البقرى ،، ركزى معايا .و...

* اركز معاك ايه! ،، انا برضعها طبيعي ، حساسية ايه وبقرة إيه🐄 تف من بقك 😡

** وحدى الله ف قلبك كده يا حاجة ، واسمعي كويس ،، انتى مش بتشربي لبن ؟ مش بتاكلى اكل بزبدة وسمنة ؟ كل ده بينزل مع لبنك يوصل للبيبي فالبيبي ب"يتحسس" من اللبن اللى بتاكليه !!
جهاز المناعة ساعات (٢-٣٪ من الأطفال) بيعتبر بروتين اللبن -الواى والكازين- "عدو خارجى" وبيبدأ يهاجمه ويتحسس منه ونتايج الخناقة دى بتظهر على الجسم!!

** تقصد إيه😧😧

أقصد ان حساسية اللبن ممكن تظهر على الطفل في ٣ أجهزة ف الجسم ،، أعراض ( ارتجاع ، ترجيع ، ألم بطن ، حزق ، بكاء مستمر، أمساك، إسهال ، براز مدمم ، معرق بدم ، خيوط او مخاط في البراز ، عدم زيادة في الوزن ) أو أعراض #الجلد ،، ( إكزيما ، طفح جلدى ، ارتيكاريا (تورم hives) ،، احمرار حول الشرج وتسلخات ، وخشونة في الجلد وحمرة في الخدين ) أو أعراض ( رشح ، خنفرة، زكام ، ضيق نفس ، صفير صدر ، كحة..)!

** يا سلام !! واشمعنا بقا توقعت انى ابنى بالذات عنده 😁😁؟

لإن الجمعية الأوربية والأمريكية الشمالية لأمراض الجهاز الهضمى والكبد والتغذية اتجمعوا مع بعض وقالوا ان لو طفلك مجمع عرضين من جهازين مختلفين ( ارتجاع مثلاً من الجهاز الهضمي) و( إكزيما مثلاً من الجلد) يبقى من حقى أفكر في حساسية اللبن ، وابدأ معاكى اختبارات "الاستبعاد والتحدى "..!

** ايه اختبارات الاستهبال والتصدى دى يا دكتور😂😂

-- استهبال مين يا مدام بقولك استبعاد Elimination يعنى هنستبعد اللبن ومنتجاته تماماً من أكلك وأكل طفلك لمدة ٢-٨ أسابيع ونشوف النتيجة ،، يعنى نلاقى الأعراض اختفت والبيبي نام ، والحزق راح ، والتسلخات قلّت ، والوزن زاد 😊👍

** تمام كده خلاص عنده حساسية لبن؟

-- لأ ، كده نص التشخيص ، النص التانى ندخل اللبن تانى بنظام معين Challenge test* ،، ولو الطفل تعب تانى والأعراض رجعت ، يبقى ١٠٠٪ حساسية لبن ،، ونمنعك من اللبن لو بترضعي طبيعي بس ،، أو نبدل اللبن بلبن صويا** أو نيوكات *** لو بترضعي صناعى بس ،، ولو بترضعى Mix هنمنعك من اللبن**** وندى لابنك لبن صويا او نيوكات ،، هتاخدى ١٠٠٠ملجم كالسيوم في اليوم و ٤٠٠ وحدة ڤيتامين د عشان نعوضك من اللبن اللى منعتيه.

** طيب لو ابنى متحسنش رغم منع الألبان عنى وعنه ،، اعمل إيه ؟؟

أول حاجة نشوف حضرتك " لخبطتى في الأكل ولا ملتزمة بالمنع بحذافيره " ،، تانى حاجه نفكر في أسباب تانيه زى الحساسيات المتعدده (بيض -صويا-قمح-سمك-فراخ-مكسرات) مثلاً وممكن نمنع الأكلات دى ونشوف التحسن أو نعمل اختبارات دم IgE أو جلد لحالات معينة***** ،، ولوالعرض الأساسي هوا الترجيع مثلاً بنفكر في أسباب مختلفه خالص عن الحساسية من الأول زى الرضاعة الزايدة Over feeding والارتجاع الفسيولوچى العنيف Exaggerated physiological GERD وأسباب جراحية أو عصبية أو مشكلة في التمثيل الغذائى .

** يعنى أنا كده هحرم ابني من اللبن طول عمره😱😱😱!!

- مين قال كده يا مدام ،، احنا هنمنع اللبن عن ابنك ٦ شهور بس وبعدين ندخله تانى بشرط يكون ابنك عمره ٩ شهور على الأقل ،، يعنى لو منعتى عند عمر شهر ممكن ندخل اللبن تانى عند عمر ٩ شهور(مش٧) ،، ولو منعتى عند ٦ شهور ندخل اللبن عند سنة وهكذا ... والإدخال له طريقة معينة طبعاً ******

** يعنى انتا عاوز تفهمنى ان بمنعى منتجات الالبان من أكلى بس ابني ممكن يتحسن من غير أدوية ولا علاج 😧😧

كأَنّهُ سِحر !! ،، اه والله ،، وعاوز اقولك كمان ان كتير من الأمهات بيعانوا جدّاً مع أطفالهم أول سنة في الحزق والعياط والترجيع والتسلخات وقلة الوزن ،، ومحدش بياخد باله ان ده حساسية لبن !!
ويتقال ،، كل العيال بتزنّ كلهم بيعيطوا ، اصلك دلوعة ومش بتستحملي ،، لأ ، حضرتك مش دلوعة ،، ابنك مُتحسّس يا مدام😉

** تمام ،،انا كده فهمت ان كل العيال اللي مبيناموش ويرجعوا عندهم حساسية لبن 😊

لأ طبعاً ،، النوم ٢-٤ ساعات ويصحى يرضع وينام تانى اول شهرين مقبول طبعاً هيبدأ ينام ٨-١٢ ساعة ورا بعض من الرابع للسادس ،، اللي مش مقبول انه مينامش اليوم كله ، اللي مش مقبول الامساك المزمن والحزق المستمر ، اللي مش مقبول الترجيع وقلة الوزن ،، وعشان كده وعشان "منبالغش" في التشخيص ،، في اختبارات الاستبعاد والتحدى اللي قلنا عليها ، واللي هتأكد ١٠٠٪ حساسية اللبن.

** طيب دكتور من فضلك ابنى هيخف امتا من الحساسية 😥

من رحمة ربنا بينا ان جهاز المناعة بيتعرف على اللبن ويبدأ "يتسامح معاه" في كتير من الأطفال على سن سنة ،، و ٧٦٪ بيخفوا تماماً عند ٥ سنوات.

** طيب وحساسية اللاكتوز ؟؟

لأ ، دي مش حساسية بالمعنى الحرفى ،، ده نقص الإنزيم اللى بيكسر سكر اللبن (اللاكتوز) ،، وبالتالى السكر مش هيتكسر ،، وهيتحول في القولون لغازات تعمل انتفاخات وإسهال ومغص مستمر ،، انما مفيش طفح جلدى ،، ولا تسلخات ، والترجيع نادر جداً ،، وده ممكن يتلخبط مع حساسية اللبن ،، الفرق ان ده بيتحسن جداً بلبن خالى اللاكتوز ، ومش محتاج لبن صويا أو نيوكات.

**ربنا يكرمك يا دكتور قولّى الممنوعات بأه عشان عاوزه ابني يخف 😢

اللبن بكل أنواعه والزبادى والجبن كلها ، الكريمه والكريمر بتاع النسكافيه والكريم شانتيه والكريم كراميل وأي حاجه فيها لبن زى الرز المعمر والباشاميل ، وأى حاجة من الماركت مكتوب عليها "قد يحتوى على اللبن "، متنسيش ان الزبدة والسمنة معمولين من اللبن اكلك هيبقا بزيت يا مدام ،، ده حتى بسكوت الشاى هتلاقي فيه لبن او زبده -الا انواع قليلة - ،، كمان العيش -الفينو والابيض-معظمه بيتعمل بلبن او بيلقط لبن فالمسموح البلدى بس
كمان الحلويات معظمها داخل فيها لبن ،، ماعدا المشبك ولقمة القاضي ،، طبعاً الشوكولاتات ماعدا انواع نادرة من الدارك فيها لبن ،، والهوت دوج والسوسيس واللانشون مع انها لحمة ،، بس بتتعمل بلبن !!
والصراحة بقا هنمنع البيض واللحمة الحمراء مؤقتاً عشان نسبة الحساسية منهم عالية جداً ونبقى ندخلهم تاني لما ابنك يتحسن ..

متنسيش كمان ان السيريلاك والهيروبيبي دول أصلاً منتجات أكبر شركات ألبان ف العالم يعنى وارد جداً ان اي منتج حتى لو مش مكتوب عليه لبن يبقى "لاقط" لبن لان خط الانتاج واحد.

** تحب اروح ادفن نفسي يا دكتور بالمرة 😱😥
او اتبرع بأعضائى عشان تستريح 😡 آكل ايه طاه😭

تاكلي كل الخضروات وكل السلاطات وكل الفواكه وكل الطيور الدجاج والحمام والبط والوز وتاكلي الأرانب والأسماك وكل أكلات البحر ،، يا ستي افطرى فول وطعمية وبطاطس محمرة واتغدى رز وشوربة وفراخ واتعشي سلطة فواكه واهو تنامي خفيف خفيف ..😂
ولما ابنك يتحسن ممكن ندخل لبن جوز هند ولوز ورز ولبن صويا ليكى كمان بس خدى بالك ليتحسس منهم 👍
***********

*بعد أسبوعين *

**هاه يا ماما ايه الأخبار ؟؟

- تمام والله يا دكتور الواد اتحسن كان زى الفل لا ترجيع ولا مغص ولا عياط لغاية ما أكلت من بسكوت "قد يحتوى على آثار من اللبن "😢

** طب وكلتي ليه يا حاجه البسكوت وانتي عارفه انه "قد يحتوى"😡

- يا دكتور مانا عارفه انه قد يحتوى ...
....
..
..
..
..
.


بس الشيطان فهلوى 😁

*بيسيب العياده وبيروح يشحت عند سيدنا الحسين*

❤️❤️❤️❤️❤️❤️❤️❤️

**نقاط مهمة وقايمة "قد يحتوى"

* قراءة "محتويات" أى أكل خارجى مهم جداً لاحتوائه على اللبن بصورة مخفية ، اي حاجة مكتوب عليها "قد يحتوى على آثار من اللبن " ممنوعة ، كازين وكازينات ولاكتوز ولاكتوجلوبين وقشطة، واى بروتين ، مكسبات او نكهات تحتوى على الزبدة ، كسترد ، دانيت ، كريمة ، حلوى الكراميل ، كل ده ممنوع.

* معظم الأكلات في المطاعم الخارجية يتم دخول ممنوعات فيها .. الفول والطعمية بعضهم بيستخدموا السمنة مع الزيت لرخص الثمن ،، استيك الفراخ او اللحمة بيدهنوها زبده قبل الشوى عشان تدى طعم ومبيقولوش ،،الفراخ "البروستد" بتتحمر في بيض وبقسماط، بعض المحلات بتستخدم خلطات تحمير أو شوى فيها زبادى ، معظم"صاجات" الفرن الأفرنجى بيتعمل فيها المنين والبسكوت والنواشف بزبدة وسمنة ونفس الصاج بيتعمل فيه العيش الابيض او الفينو ،، فناخد بالنا ، والفيصل التجربة..!

* التونة : كتير جداً بتتحفظ بال"كازين(بروتين اللبن)" من غير ما يكتبوا ،، عشان كده ممكن يحصل منها تحسس.

* الحلاوة الطحينية : بيحطوا علي القوالب كمية سمنة عشان تتقلها وكمان مبيكتبوش ، ف"قد تحتوى" برضه😭

* الطحينة : مش ممنوعه بس سلطة الطحينة معظم المطاعم بتخلطها زبادى فممنوعة .

* سودو كريم وسانوسان العادى داخل في مكوناتهم اللبن وفي أطفال بيتحسسوا منهم ،، البديل زنك أوليڤ أو سانوسان الأخضر(بانثينول).

* كل الكبسولات فيها چيلاتين فممنوعة للي عندهم حساسية لحمة مع اللبن كذلك الچيلي والمربى والعصاير المعلبة .

**** الأكاديمية الأوروبية والأمريكية سمحوا للأم لو بترضع طبيعي من غير مشاكل والتعب كان بس من الصناعي انها تدى الطفل لبن نيوكات ومتمنعش هيا منتجات الألبان إلا لو البيبي لسه تعبان رغم تبديل اللبن هتضطر للأسف تمنع هيا كمان الألبان ،، أمهات كتير الثدى عندهم ب "يفلتر" اللبن وبينزل بكميات مش بتأذى البيبي بالعكس بتعود جهاز المناعة انه يتعرف على اللبن Induce tolerance وميعاملهوش ك "جسم غريب" ويخف منه

20/06/2018

التبول اللا ارادي ما بين القلق والأطمئنان
يوم جديد 🙂وانا لسه ببدا العياده لاحظت ام يبدو عليها القلق او الخجل ويجلس بجانبها طفل في العاشره من عمره
صباح الفل ياست الكل اخبارك ايه
الأم : بخير الحمد لله يادكتور محمد انا جايه لحضرتك في مشكله كبيره بخصوص ابني
الف سلامه عليه تحت امرك
ابني من حوالي سنه دائما متوتر وقلقان ومش مركز ومسواه بيقل في المدرسه
واللي زاد وغطي موضوع حمام البول بيعمل حمام علي نفسه كتير خالص بالليل تقريبا كل ليله وانا مش عارفه اعمل ايه😞😞
طيب في مشاكل تانيه
اه والده علي طول بيعنفه علي الموضوع ده وانا احيانا بضربه ومش بيجيب نتيجه برضوا
طيب ياستي بعد التعنيف والضرب الموضوع قل ولا زاد
لا يا دكتور ده زاد اكتر كأن الولد بيعاندني😰😰 انا وابوه 😰😰
طيب في حرقان في البول او سخونه او الالام متكرره بالبطن🤓
لا خالص يا دكتور
طيب بيحس بالحمام بعد ما يعمله علي نفسه ولا لا
لا خالص يا دكتور
بعد فحص الطفل طلبت من الأم تحليل بول واشعات علي بطنه وظهره
هااا يا دكتور اخبار نتيجه الأشعات ايه
كلها كويسه يامدام
كويسه 😱😱
امال الولد تعبان ليه
ببساطه انتي ووالده السبب ياست الكل😵😵
نظره تعجب من الأم وهي بتسمع كلامي 😨😨
مش فاهمه يا دكتور😨
ممكن اطلب منك شويه حاجات تعمليها😉
اتفضل
عاوز ابنك ما يخفش وياخد ثقه في نفسه وبلاش لو سمحتي تضربيه
يسلاااام يا دكتور وده هيجيب نتيجه يعني 😈
كانه سحر والله
اول ما يعمل حمام خديه في حضنك وطبطبي عليه وطمنيه وقوليله ما يهمكش
ايه ده ينعني اطيب خاطره ناقص تقولي اجيبله لعب كمان 😈😈
لو لزم الامر اعملي كده وماله🙂🙂
وياريت تسمعي النصائح اللي هقولك عليها دي

1.بلاش يشرب مايه كتير قبل النوم
2.يخفف شويه من المنبهات زي الشاي والقهوه والنيسكافيه والشيكولاته والكاكاو والبيبسي
3.يسلام لو بطل بيتفرج علي افلام رعب او اكشن كتير ويسمع موسيقي هاديه تهدي اعصابه يبقي تمام
4.وياريت كمان لو يعمل تماريين يمسك بيها البول شويه يعني ساعت لما يبقي مزنوق يحاول يمسك نفسه 10 دقائق دي هتقوي العضله اللي بتمسك البول
5.يسلام لو تدخليه الحمام قبل النوم وفي منتصف الليل او قبل الفجر

وده يا دكتور هيجيب نتيجه من غير دوا ولا برشام 😓😓
اه طبعا كانه سحر وهستناكي بعد اسبوعيين وتقليلي ايه الأخبار

بعد اسبوعين ..... لقيت الولد جي فرحان ومبسوط ها ياست الكل الأخبار ايه
يا دكتور الولد اختلف 180 درجه الولد بدا يركز بدا مستواه يتحسن بدا يحفظ كويس ومشكله البول اتحسنت الحمد لله انا مش مصدقه ان نفسيته هي اللي كانت عامله فيه كل ده
واكتر كمان يامدام بس نقول الحمد لله 🙂
بس نسيت اقولك علي نصيحه اخيره
خير يا دكتور .... انا قلتلك بلاش يتفرج علي افلام رعب واكشن كتير وضيفي عليها ماتشات المنتخب والأخبار وبرامج التوك شوه والأستاذ وائل الابراشي واسعر البنزين وانبوبه البوتجاز
هههههه.من غير ما تقول يا دكتور احنا نفسنا بطلنا نسمعهم لان تقريبا كان هيحصلي زي ابني بس بصراحه كله وافلام الاكشن والرعب انا وابوه مدمنين ليها ... معلش بقي يادكتور 🙏🙏🙂🙂
☝☝☝ناخد بالنا الحاله النفسيه للطفل ممكن تنعكس عليه باعراض جسديه ممكن يشكي منها زي الام بالبطن صداع مزمن تبول لا ارادي خفقان بالقلب والام بالصدر وغيره ...ده غير تدهور المستوي الدراسي والنمو العقلي والجسدي .. ربنا يحفظ اولادنا جميعا🤓🤓🙂🙂