What are the opening hours?

Tuesday 7pm - 9:30pm Thursday 7pm - 9:30pm Saturday 7pm - 9:30pm Sunday 6:30pm - 8:30pm

https://www.facebook.com/102329125925036/

Dr. Fady Mohammed Nabil - عيادة طب الجنين للدكتور فادي محمد نبيل

Home
Egypt
Misr el-Gedida
Dr. Fady Mohammed Nabil - عيادة طب الجنين للدكتور فادي محمد نبيل

Contact information, map and directions, contact form, opening hours, services, ratings, photos, videos and announcements from Dr. Fady Mohammed Nabil - عيادة طب الجنين للدكتور فادي محمد نبيل, Women's Health Clinic, ٣٨ ش علي أمين امتداد مصطفي النحاس متفرع من عباس العقاد مدينة نصر, Misr el-Gedida.

"استشاري ومدرس جراحات النساء والتوليد وتأخر الإنجاب والمناظير وطب الجنين بكلية الطب جامعة عين شمس

بنقدم محتوي يخص صحة المرأة الانجابية والجنين وشرح وافي للولادة الطبيعية ومراحلها والابيديورال وشق العجان وايه اللي ممكن تعمليه لتعزيز فرص الولادة الطبيعية

27/10/2025

💕 الأم دي شايلة طفلها بين ايديها بعد رحلة صبر وأمل... ونهاية بطعم المعجزة 💚💚 كل اللي فات اتنسي وبقت كل لحظة فرحة وعمر جديد 💕
👶 طفل عزيز جه بعد ٣ سنين انتظار واجهاض متكرر وعمليات كتيرة وأدوية سيولة طول فترة الحمل
فرحة عمرها ما تتوصف والتحدي الأكبر كان في الولادة الطبيعية ❤️❤️
بعد كل الأحداث دي ربنا أكرمنا بولادة ناجحة وأم وبيبي بصحة جيدة
الحكاية ابتدت أما شوفت مدام مني في الشهر الثامن وكانت جاية بتسألني عن فرصتها في الولادة الطبيعية بعد اما راحت لكذا دكتور ونصحوها بالولادة القيصرية 🧐
بدأنا ناخد التاريخ المرضي واللي بدأ من ٣ سنين مع استئصال أورام ليفية من تجويف الرحم وحدوث التصاقات واجهاضات متكررة وخلال فترة الحمل تمشي علي ادوية للسيولة مش محتاجاها طبيا لكن خوفها علي البيبي دفعها انها تكمل عليها
بعد الكشف والسونار طمنتنا انها تقدر تولد طبيعي مفيش سبب طبي للقيصرية وتقدر تاخد فرصتها ولازم تمشي كتير وتعمل تمارين الولادة
نتابع لحد الاسبوع ٣٩ ونعمل الفحص التحفيزي بشكل منتظم عشان تدخل في ولادة في الاسبوع ٤٠
نتحجز في المستشفي الساعة ٨ صباحا ونتابع تقدم الولادة وناخد الابيديورال بسبب عدم احتمال الألم بالإضافة إلي توقع عدم سرعة الولادة 😊
تولد طبيعي بدون شق عجان في خلال ١٥ ساعة من حجز المستشفي ولادة ناجحة والأم والبيبي بصحة جيدة
بعد الولادة مش قادر أوصف فرحة الأهل ووالدتها بالأخص اللي كانت معاها في كل خطوة خلال ٣ سنين كل زيارة لدكتور حتي اما كانت بتنزل تمشي كانت بتنزل تمشي معاها وتشجعها ربنا يديها الصحة ويبارك في عمرها ❤️❤️
كل لحظة وجع اتحولت لدموع فرحة بعد الولادة وكل انتظار كان يستاهل النهاية الجميلة دي ❤️❤️

👶 لكل أم لسه في الرحلة… صدقي إن ربنا شايف تعبك وهيديكي اللحظة اللي تستاهل كل الصبر ده
شكرا لتشريفك وثقتك في عيادة طب الجنين 💚💚

24/10/2025

بوست انهاردة هنشرح فيه أداة مهمة جدا بنستخدمها أثناء الولادة الطبيعية وهي جهاز الCTG
ديما بنقول جملة مهمة جدا…احنا مش بنبادل معايير السلامة للأم والبيبي ولازم الأماكن اللي نولد فيها تكون بتحقق معايير السلامة دي
ده رسم نبض جنين من جهاز الCTG اللي بيستخدم أثناء الولادة وزي ما احنا شايفين في الصورة في رسمين واحد بالأحمر والتاني بالأصفر
🔴 الأحمر ده بيمثل نبض البيبي
🟡 الأصفر بيمثل الانقباضات الرحمية
من خلال الرسم ده نقدر نحكم علي حالة البيبي وهل في إعياء للجنين ولا لا
احنا بنقارن نزول النبض مع الانقباضات الرحمية وهل نزول النبض ده مرتبط بالانقباضات الرحمية في نفس التوقيت ولا بيحصل بعدها
لو في نفس التوقيت بنسميها early decelerations ودي مسموح أننا نكمل بيها الولادة مع بعض الاحتياطات وتعديل وضع الحامل لكن لو بتحصل بعد الانقباضات بنسميها late decelerations ودي احد علامات إعياء الجنين اللي بتستدعي التدخل السريع بإجراء قيصرية عاجلة طالما الفحص مش متقدم او مش هنقدر نسرع نزول البيبي للولادة
وده كان سيناريو أحد سيداتي العزاز اللي شرفوني لأخذ فرصة الولادة الطبيعية واضطرينا للولادة القيصرية العاجلة بعد ٦ ساعات من حجز المستشفي مع عدم وجود مؤشرات للولادة
حمد الله علي سلامتك مدام سارة وسلامة البيبي وشكرا علي ثقتك في عيادة طب الجنين 💚💚

21/10/2025

وده سيلفي الولادة الطبيعية بدون ألم بدون غرزة واحدة في عيادة طب الجنين 💚💚
اكتر حاجة بتسعدني هي فرحة السيدات بعد الولادة وإحساسها بالرضا عن تجربة متابعة الحمل والولادة في عيادة طب الجنين وإزاي بنقدر ندعم اختياراتهم لآخر لحظة ❤️❤️

15/10/2025

اتصوّر بالفوردي في عيادة طب الجنين 💚💚… وفتح عنيه كأنه بيحكي حكاية عمر لسه ما بدأش 🥹💫
نظرة صغيرة، لكنها مليانة حياة، أمل، وحنين ما يتوصفش 💛

سبحان اللي صوّر فأبدع،
وخلى جوّا بطن الحامل نبضة بتنادي كل يوم: “ماما، أنا جاي” 🤍

👶

14/10/2025

الحمد لله رب العالمين علي ثقة العيانين في قرارتي الطبية…ده مش من فراغ ده تعب طول فترة الحمل وشرح للتفاصيل الصغيرة قبل الكبيرة ووعي بأحداث الولادة وامتي ندخل وامتي نستني ونصبر …ده الفرق أما تولدي مع ناس فاهمة وعارفة بتعمل ايه👌
مدام يارا نورتني في آخر الشهر السابع لمتابعة الحمل والولادة وطبعا اتكلمنا في كل التفاصيل مع تتابع الزيارات ووصلنا للشهر التاسع وبدأت تظهر تكلسات المشيمة وبدأنا نعمل الدوبلر علي الحبل السري بشكل منتظم عشان نطمن علي وصول الدم بشكل سليم للبيبي وطبعا متابعة لحركة البيبي في البيت والحقيقة الفحص كان مؤشراته مش أفضل شيء الراس عالية مفيش ليونة في عنق الرحم مجرد بس ان الرحم مفتوح ١ سم والحوض كويس
عملنا الفحص التحفيزي علي مدار أسبوع ونص بس بدون جدوي ونقرر ميعاد لدخول المستشفي وقبل الحجز يحصل انفجار لجيب المية وتنزل المستشفي للاطمئنان علي البيبي
تعمل نبض الجنين علي مدار ربع ساعة وأحد الأطباء ينصحها بعمل قيصرية عشان شاف ان حالة البيبي تستدعي القيصرية مع عدم وجود مؤشرات كويسة للفحص
أشوف مدام يارا وأقدر أطمنها إنها تقدر تاخد فرصة الولادة الطبيعية بس الولادة هتطول لان لسه مفيش ليونة في عنق الرحم والحقيقة هي كانت متفهمة جدا
بعد الحجز نبتدي أدوية لزيادة الانقباضات الرحمية مع متابعة للبيبي علي جهاز نبض الجنين والوضع للاتي
رحم مفتوح ١ سم مفيش ليونة في عنق الرحم بس الحوض ممتاز ودي أهم حاجة عشان ناخد الفرصة
متابعة لتقدم الولادة علي مدار ٢٤ ساعة نوصل اخيرا لمرحلة دخول العمليات وناخد حقنة السادل ونولد بدون شق عجان ويشرف البيبي بعد تعب وصبر ٢٤ ساعة كاملة
حمد الله على سلامتك مدام يارا وسلامة البيبي وأحب أشكر زوجك اللي أخدني بالحضن بعد الولادة وهو مش مصدق إنها الحمد لله ربنا كتبلنا نجاح الولادة الطبيعة ❤️❤️

08/10/2025

Successful VBAC

قبل ما أتكلم عن قصة مدام آية واشرح كل تفاصيلها اللي ممكن تكون ملهمة لكثير من السيدات الحوامل في كام نقطة محتاجين نركز عليها 📢
●الفيباك فرصة الحامل بتقرر تاخدها بدعم اللي حواليها الطبيب والزوج والأهل بدون الدعم ده صعب ننجح❤️❤️
●الولادة القيصرية تظل خيار قائم في حالة فشل تقدم الولادة أو إعياء الجنين وبالمناسبة هو ده سبب اختراع القيصرية نلجأ إليها في الطواريء لأننا مش بنبادل معايير السلامة للحامل والبيبي👌
●ديما بقول للسيدات الفيباك ان حتي بعد الولادة وخروج البيبي ممكن نحتاج نفتح لا قدر الله لو تبين بالفحص ان جرح القيصرية اتفتح🤦‍♂️ عشان كدة مش بنطمن غير بعد الفحص والاطمئنان علي جرح القيصرية
نرجع بقي لقصة مدام آية اللي تعتبر أصعب فيباك عدت عليا لحد دلوقتي في كاريري المهني✌️
ابتدينا متابعة من الشهر السادس واخدنا تاريخ القيصرية السابقة اللي كانت من ٥ سنين واتطمنا علي البيبي والفحص التفصيلي الفوردي واتكلمنا في كل تفاصيل الفيباك وشرحت كل حاجة تخص الإجراء ده وديما الحوامل بتوعي ودي حاجة بفخر بيها بيبقو فاهمين وواعيين ودي حاجة انا بفخر بيها😍
نكمل متابعة الحمل بانتظام ونلاقي وضع البيبي مقعدي مع تتابع الزيارات لحد الشهر التامن وأنصحها نعمل بعض التمارين اللي ممكن تساهم في لف البيبي💪
مع شوية كسل من مدام آية منعملش التمارين 😅 ونتابع لحد الاسبوع ٣٨ وتقرر تعمل التمارين والبيبي يلف في الاسبوع ٣٩ وياخد الوضع الطبيعي
طبعا عشان البيبي مقعدي فترة كبيرة ده بيمنع ان رأس البيبي تضغط علي العنق الرحم وخطوة تليين عنق الرحم اللي مفروض تحصل في الشهر التاسع محصلتش عشان كدة ديما بنبقي متوقعين في السيناريو ده ان الرأس تبقي عالية والرحم مفيش فيه أي مؤشرات للولادة
وده فعلا اللي كان ظاهر في الفحص الرحم مقفول والراس عالية ومفيش مؤشرات للولادة لكن فحص الحوض ممتاز
انصحها اننا هنعيد الفحص بعد اسبوع وخلال الاسبوع ده تعمل تمارين الولادة وتمشي كتير عشان نحاول نخلي رأس البيبي تضغط علي عنق الرحم
بعد اسبوع خلال الاسبوع ٤١ نلاقي تحسن طفيف في الليونة والرحم مفتوح ١ سم وأقدر اعمل تحفيز يدوي عشان تبدأ تحس بانقباضات ونبدأ نتحجز في المستشفي مع وجود انقباضات منتظمة
نبدأ رحلة الولادة في المستشفي والوضع كالآتي
✔️انقبضات منتظمة
✔️الحوض كويس
✔️ليونة عنق الرحم محتاجة تتحسن عشان يبقي في تغيرات في عنق الرحم ونولد
اتكلمت مع مدام اية ان الولادة هطول جدا عشان هناخد وقت في تحسين الليونة وأننا هنحتاج ابيديورال لان مش هينفع نقعد فوق ٢٤ ساعة حاسين بالألم
نتابع تقدم الولادة وطبعا مكنش بالشكل المثالي وده عشان الأسباب اللي قولتها لكن كان في تحسن باستمرار والبيبي الحمد لله كان علي جهاز نبض الجنين كويس جدا طول فترة الولادة
نوصل لفحص ٩سم ونثبت شوية بدون تحسن ومع الفحص نلاقي تموضع غير سليم لرأس البيبي occipito transverse ده اللي مانع ان الرأس تنزل الحوض
مع ثبات الفحص نطلع العمليات ونعمل manual rotation مع تنظيم الانقباضات عشان يبقي في مخاض كل دقيقتين ودي آلام المخاض النشطة
الحمد لله ربنا يوفقنا للولادة الطبيعية بدون شق عجان مجرد خدوش سطحية خارجية ونعمل فحص الرحم ونطمن علي جرح القيصرية السابقة وينور بيبي زين ٣٩٠٠ جرام
حمد الله علي سلامتك مدام آية وأحب اشكرك علي ثقتك في عيادة طب الجنين وقرارتي الطبية 💚💚 وأنا متأكد انك لو كنتي احتاجتي قيصرية خلال رحلة الولادة اد ايه هتكوني متفهمة اني اديتك الفرصة كاملة لنجاح ولادتك وطبعا حالة حضرتك ملهمة لكل السيدات اللي تحب تخوض تجربة الفيباك

03/10/2025

مدام هويدا شرفتني للمتابعة في الشهور الأخيرة للحمل عشان تولد فيباك
خلال زيارات قليلة اتكلمنا في كل تفاصيل الفيباك وكل السيناريوهات المحتملة
نوصل للأسبوع ال ٣٩ ونعمل الفحص التحفيزي والاستجابة تكون هايلة 👌
نتحجز في المستشفي ونتابع تقدم الولادة ونلاحظ تحسن الفحص جدا بعد الابيديورال اللي كان سبب في نجاح الولادة وتسهيلها
نولد بعد مرور ١٧ ساعة من حجز المستشفي بدون شق عجان
حمد الله على سلامتك مدام هويدا وشكرا علي ثقتك في عيادة طب الجنين 💚💚

26/09/2025

الأمانة والضمير والشطارة هيفضلو عنوان لعيادة طب الجنين 💚💚
كل يوم قدامنا تحديات جديدة…حالات مختلفة… بنساعد سيدات كتير تحقق هدفها في الولادة الطبيعية وده لأن عندنا التزام بدعم اختياراتك لأنك شريك أساسي في اختيار القرار الطبي ودورنا اللي مش هنتنازل هو دعم اختيارك للولادة الطبيعية وده لأننا بنعمل شغلنا بأمانة وضمير وشطارة ❤️❤️
مدام نورهان شرفتني في الشهر التاسع عشان تشوف فرصها في الولادة الطبيعية وده طبعا بعد اما اتقالها إنها لازم تولد قيصرية بسبب وجود ورم ليفي كبير في الجزء السفلي للرحم 🥹
نبدأ ناخد التاريخ المريضي ونراجع السونارات السابقة ونعمل السونار ونشوف حجم ومكان الورم بالظبط وفعلا يتضح انه موجود في الجزء السفلي للرحم وفي الحالات دي لازم نتأكد هل فعلا الورم الليفي عامل انسداد لقناة الولادة birth canal وده الحاجة الوحيدة اللي تبينه هو الفحص الإكلينيكي
نعمل الفحص ونطمن ان الورم الليفي مش عامل انسداد لقناة الولادة ونشوف مؤشرات الفحص ونقدر نعمل التحفيز اليدوي رغم ان الرأس عالية وأطمنها ان الرأس مش بتدخل الحوض غير مع آلام المخاض وإننا نقدر ناخد فرصة الولادة الطبيعية ومفيش حاليا سبب للولادة القيصرية
يحصل انفجار لجيب المية ونضطر نتحجز في المستشفي ودي طبعا من علامات الخطورة اللي لازم ناخد بالنا منها في الشهر التاسع
نبتدي الأدوية التحفيزية ونبدأ نتابع تقدم الولادة اللي مكانش بالشكل المثالي وده بسبب ان الرأس عالية مدخلتش الحوض وعدم وجود ليونة كافية في عنق الرحم 🧐
نبدأ نظبط الانقباضات الرحمية ونتابع تقدم الولادة كل ٤ ساعات وناخد الابيديورال للسيطرة علي الألم وده لأننا متوقعين طول فترة الولادة
نحدد ميعاد لتحسن الفحص نقدر ناخد قرار بعديه سواء أننا نكمل مسار الولادة الطبيعية او اللجوء للقيصرية 🥺وده بعد ١٢ ساعة من حجز المستشفي
وفعلا يحصل تحسن ملحوظ في الفحص وليونة عنق الرحم ونكمل رحلة الولادة
الطبيعية ونولد طبيعي بعد مرور ١٧ ساعة من حجز المستشفي بدون شق عجان
حمد الله علي سلامتك مدام نورهان وسلامة البيبي واكيد حالتك تعتبر أيقونة لتشجيع السيدات علي الولادة الطبيعية
شكرا علي ثقتك في عيادة طب الجنين 💚💚

22/09/2025

انهاردة هنتكلم عن تجربة مختلفة شوية😎
عندنا تاريخ مرضي سابق لولادة مبكرة في الشهر السابع بالإضافة لعملية استئصال جراحي سابق لأورام ليفية في الرحم والسؤال هنا هنتصرف ازاي🤔
البداية هنا عشان نتفادي حدوث ولادة مبكرة تاني لازم ندور علي الأسباب ونحط خطة علاج عشان نتفاداها الحمل القادم وده اللي عملناه مع مدام سهير بعد ما أخدنا تاريخ مرضي مفصل وبعد الكشف اكتشفنا قصر وضعف عنق الرحم وده بيستدعي أننا نعمل عملية ربط لعنق الرحم
طبعا عملية ربط عنق الرحم بتتعمل بعد الأسبوع ١٣ بعد اول فحص للجنين للتأكد من سلامته وعدم وجود دلالات طفل داون يعني بنطمن علي سمك الرقبة وعظمة الأنف والدوبلر علي ductus venosus
نعمل عملية الربط ونبتدي نحط خطة علاجية تتضمن بعد التعليمات والأدوية لتفادي الولادة المبكرة
طبعا نعمل السونارات المفصلة (الفوردي) ونطمن علي كل حاجة تخص البيبي👌
نوصل للشهر التامن ونحط خطة الولادة ونحط توقيت لفك عملية الربط ونبدأ هنا نتكلم عن امكانية الولادة الطبيعية بعد عملية استئصال أورام ليفية بالرحم واطمنها ان الولادة الطبيعية مشروطة بوجود مؤشرات فحص كويسة وفي الحالة دي نقدر ناخد فرصة الولادة الطبيعية💪
في بداية الشهر التاسع تبدأ تحصل انقباضات منتظمة وفي خلال ساعة واحدة نتوجه للمستشفي عشان نفاجيء بتقدم الفحص ونولد ولادة طبيعية بدون غرزة ونطمن علي الرحم بعد الولادة
حمد الله علي سلامتك وسلامة البيبي وشكرا علي ثقتك في عيادة طب الجنين 💚💚

17/09/2025

الله علي فرحة الولادة الطبيعية❤️❤️
مدام أمل شرفتني في الشهر التامن وطبعا من أول زيارة ولاحظت علامات الترقب والقلق خصوصا لما حامل تغير دكتورها في الشهر التامن 🥺
عادة الحامل بتفكر هل يا تري الدكتور داعم للولادة الطبيعية؟🤔 هل داعم لاختياراتي؟🤔 هل الدكتور ده بياخدني علي اد عقلي وبيقول هيديني فرصة الولادة الطبيعية كدة وخلاص وفي الاخر هيعملي قيصرية؟🤔 هل كل العيانين اللي بيولدو طبيعي دول سوشيال ميديا ودعايا للدكتور وفي الاخر كله بيولد قيصري وبيقولوا انهم والدين طبيعي وبدون غرزة🤣 كل دي اسئلة بتجوب في عقل الحامل لحد ما بتولد وتعيش تجربتها بنفسها وتتأكد ان كل اللي بيدخل عيادة طب الجنين بياخد رعاية فائقة وبتتأكد اد ايه انا كنت داعم لاختياراتها لحد النهاية حتي لو هتعمل قيصرية هتبقي متأكدة اني مقصرتش وانها عملت قيصرية عشان تبقي كويسة هي والبيبي ❤️❤️
نرجع بقي لتجربة مدام أمل 😌...اتكلمنا عن تفاصيل الولادة وناقشنا كل حاجة والحاجات اللي نقدر نعملها عشان نعزز فرص الولادة الطبيعية وحددنا مواعيد المتابعة عشان نوصل للأسبوع ٣٩ ونعمل فحص الرحم ونلاحظ عدم وجود تغيرات ملحوظة وأقولها إننا لازم نكثف التمارين والمشي وتقرر تمشي في يوم ٣ ساعات 😂…عشان تقولي تاني يوم ان في انقباضات منتظمة واقولها تعمل ايه في البيت لحد ما أشوفها 👌
أفحصها في العيادة بعد كدة نتوجه للمستشفي عشان ناخد الابيديورال للسيطرة علي الألم ونتابع تقدم الولادة اللي كان هايل ونولد في خلال ٦ ساعات من حجز المستشفي بدون شق عجان
حمد الله علي سلامتك مدام أمل وسلامة سيرين الجميلة ❤️❤️وشكرا على ثقتك في عيادة طب الجنين 💚💚

02/09/2025

فعلا مفيش طريق مختصر للنجاح…عشان تنجح لازم ضمير وعلم وشطارة ومثابرة وتعب
انك تدعم اختيارات الحامل وتقيم حالتها كويس وتحط خطة لولادتها وتديها فرصتها للآخر مش حاجة سهلة أبدا👌
مدام مزاهر نورتني من الشهر التامن ويمكن أنا تالت او رابع دكتور تروحله عشان عاوزة تاخد فرصة الفيباك ومن أول زيارة أخدنا التاريخ المرضي وتاريخ القيصرية السابقة وعملنا فحص السونار المفصل وسألتني عن فرصتها في الولادة الطبيعية والحمد لله رب العالمين مكنش في سبب طبي يمنعها تولد طبيعي بعد قيصري وأنها تقدر تاخد فرصتها للأخر واتكلمنا في التفاصيل بدون تخويف او ترهيب وحددنا مواعيد الزيارة وقولتلها ان أهم حاجة هو الصبر وأننا منستعجلش او نعمل تدخلات بدون داعي ووصلنا للأسبوع الأربعين وعملنا الفحص التحفيزي بشكل متتالي عشان نقص المية حول البيبي وطمنتها أني دي حاجة لا تمنع الولادة الطبيعية وهيساعدها إنها تدخل في ولادة غريزية ومع توالي الفحوصات بدأت تحس ان مفيش فايدة 😅…بس طمنتها أننا عاجلا أم اجلاً هندخل في ولادة باذن الرحمن
وفعلا الآم المخاض تحصل الساعة ٣ فجرا ونروح المستشفي ونتابع تقدم الولادة وناخد حقنة السادل ونولد بدون ألم بدون شق عجان بعد ٦ ساعات من حجز المستشفي
حمد الله على سلامتك مدام مزاهر وسلامة البيبي ومش هننسي دعم الزوج وتشجيعه ليكي في كل خطوة وشكرا علي ثقتك في قراراتي الطبية واختيارك لعيادة طب الجنين لمتابعة الحمل والولادة💚💚

31/08/2025

بوست انهاردة مختلف شوية…
الولادة القيصرية إجراء جراحي الحامل بتلجأ ليه بدواعي طبية محددة جدا بدون استسهال والبوست ده هيورينا أحد الدواعي الطبية اللي ممكن نحتاج فيها للولادة القيصرية 👇
ديما وأنا بتكلم مع السيدات الحوامل عن الولادة وأسباب القيصرية بقول ان احد أسباب القيصرية ممكن يبقي إعياء الجنين وهنا أنا بتكلم عن criteria محددة لإعياء الجنين زي الصورة اللي في البوست دي النبض بينزل لحد ٨٠ نبضة بشكل متكرر 🥹وده بيستدعي التدخل السريع لإنقاذ البيبي عن طريق الولادة القيصرية
ده كان سيناريو حالة مدام إسراء اللي نورتني في آخر الشهر التامن لمحاولة الولادة الفيباك …ديما بنقول لازم معايير السلامة تكون موجودة…متابعة دقيقة لنبض البيبي…القرار الطبي السليم…التدخل السريع الحكيم لانقاذ الجنين 👌
حمد الله على سلامتك مدام إسراء وسلامة البيبي وشكرا لاختيارك عيادة طب الجنين 💚💚

Address

٣٨ ش علي أمين امتداد مصطفي النحاس متفرع من عباس العقاد مدينة نصر
Misr El-Gedida

Opening Hours

Tuesday	7pm - 9:30pm
Thursday	7pm - 9:30pm
Saturday	7pm - 9:30pm
Sunday	6:30pm - 8:30pm

Telephone

+201111090090

Website

facebook.com

Alerts

Be the first to know and let us send you an email when Dr. Fady Mohammed Nabil - عيادة طب الجنين للدكتور فادي محمد نبيل posts news and promotions. Your email address will not be used for any other purpose, and you can unsubscribe at any time.

Shortcuts

Want your practice to be the top-listed Clinic in Misr el-Gedida?