29/06/2024
اكيد سمعت عن خلع ف الكتف
تعالي بقا نلخص الحوار ده سوا .
خلع الكتف ده حاجة ممكن تحصل لأي حد ايوا عشان كدا لازم تاخد بالك ، وبتحصل لما رأس عظمه العضد تخرج من مكانها في تجويف الكتف و السيناريو ده هو اللي هنتكلم عنه.
طيب انا مش عاوز يحصلي الخلع ده
يبقي لازم تعرف الأسباب بقا
خد عندك اول حاجه
1_السقوط: زي ما الوقوع على الكتف أو علي دراعك زي ما حصل مع محمد صلاح 2018 ايوه هو ده اللي كان مع راموس
2_لإصابات الرياضية: اللي ف لعب الكورة، التنس، ورفع الأثقال.
3_الحوادث: حوادث السيارات
أسبابها كتير اي حاجه بقا تعرضك ان عظمه العضد تخرج من التجويف بتاع الكتف
طيب انا اعرف ازاي ان ده خلع ف الكتف ؟
من الأعراض ي صحبي
الأعراض بقا بتبقى واضحة و بيكون معها وجع
1_ألم شديد: خصوصًا لما تحاول تحرك كتفك
2_تورم:في منطقة الكتف.
3_ عدم القدرة على الحركة: صعوبة أو استحالة اصلا انك تحرك دراعك وهيكون فيه نقص ف المدي الحركي
4_تشوه في الشكل: ممكن تشوف بروز أو انتفاخ غير طبيعي في الكتف.
طيب طب الأعراض لو ظهرت تعمل ايه ؟
خد بالك لما يحصل خلع في الكتف، لازم تتصرف بسرعة:
1. شوف اقرب دكتور ليك وروحله: الخلع محتاج علاج طبي سريع.
2. عدم محاولة تحريك الكتف: متحركش كتفك عشوائي ومتخليش حد يعمل حاجه ف كتفك غير الدكتور لان اي حد مش فاهم يقوم ضغطك ع اي عصب هتبقي مشكله زياده .
3. استخدام التلج:حط كيس تلج على الكتف عشان تقلل الألم والتورم.
4. الدعم: استخدم حمالة لتثبيت الذراع ومتحاولش تعمل اي حركة.
العلاج ايه بقا
1. إعادة الكتف لمكانه: الدكتور بيرجع الكتف لمكانه الصحيح تحت تأثير تخدير موضعي أو عام.
2. الأدوية: مسكنات للألم ومضادات للالتهاب تحت إشراف الطبيب متاخدش اي حاجه .
3. التأهيل والعلاج الطبيعي: لتقوية العضلات المحيطة بالكتف وعشان الإصابة متحصلش تاني .
4. الراحة: ابعد بقا عن اي حركات بتعمل ضغط ع كتفك .
الوقاية بقا عشان مايجلكش الخلع ده
1. تقوية عضلات الكتف: ممارسة التمارين الرياضية اللي بتقوي عضلات الكتف اللي هما rotator cuf. Muscles.
2. اهم حاجه حمايه كتفك :خصوصًا في الأنشطة الرياضية.
3. الحرص في الحركات: متعملش الحركات العنيفة أو المفاجئة اللي ممكن تسبب إصابة.
وخلي بالك الاهتمام السريع والعلاج المناسب بيساعدوا على الشفاء السريع وبيقلل فرصة تكرار الإصابة في المستقبل. دايمًا خلي بالك واحمي كتفك.
ولو عوزت اي حاجه كلمنا سلااااام
