Psychologist_yasmen youssef

21/09/2025

18/09/2025

النهاردة الساعة 9 ڤيديو عن ( إزاي نقدر نتعامل مع الأعراض الجسدية المرتبطة بمشكلات نفسية) 🧠🧠

03/09/2025

17/06/2025

ليه دايمًا بنختار الناس الغلط؟
اللي بيتقل، اللي بيتجاهل، واللي يخليك تشك في نفسك..
مش لأننا بنحب الأذى ولا لأننا مش شايفين عيوبهم..
لكن احنا دايمًا بنروح للي شبه الجرح القديم اللي قلبنا اتعود عليه زمان، حتى لو كان بيوجع، لكنه بقى مريح أكتر بالنسبالنا من اي تجارب جديدة حتى لو كانت سوية...
وده بنشوفه لما حد يقدملنا حب هادي بنقلق ونحس إن فيه حاجة غلط، كأن فيه حاجة ناقصة ويمكن كمان نرفض العلاقة ونقرر منكملش لأن (This is not my type) لأن عقلنا الباطن متعود إن الحب لازم يتعبنا، لازم يكون فيه حرمان، لازم يكون فيه خوف، لازم نجري ورا حد يغلبنا...
وكل مرة بنرجع فيها لحد بيأذينا مبنكونش راجعينله هو، إحنا بنرجع للدفتر المركون المترب اللي خايفين نفتحه كمحاولة فاشلة لرمي الدفتر أو التخلص منه من غير ما نحاول نفتحه ونتألم...
ودلوقتي بعد ما فهمت بقى عليك مسئولية أكبر وتقدر تختار...
هواجه الألم بما إني كدة كدة بتألم، ولا هفضل اهرب منه طول عمري وسايبه بيجري ورايا..!

13/06/2025

"ما لا نواجهه في داخلنا، سيظهر في حياتنا كقدر"
كارل يونغ

واحدة من الجمل اللي بنشوف انعكاسها يوميًا في العيادة، أوقات بنحس إن الحياة بتعيد نفسها:
نفس المواقف، نفس ردود الفعل، نفس الألم، زي ما يكون فيه دفتر قديم ومترب ومركون عايزك تشوفه وتفتحه وتقرأه وتفهمه ...
وده بيظهر في انجذابنا لأشخاص مؤذيين ، أو تمسكنا ببيئة عمل مرهقة نفسيًا من غير مبررات أو أسباب منطقية ..
وده اللي هنناقشه في البوست الجاي♥️

11/06/2025

كلمة "عيب" واحدة من أكتر الكلمات المتوارثة في البيوت المصرية اتربينا عليها وكبرنا بيها، وغالبًا بنكررها إحنا كمان من غير ما نلاحظ لكن الحقيقة إن الكلمة دي مش بريئة زي ما باين عليها، لأنها بتمارس ضغط نفسي كبير على الطفل، وبتحبسه في سجن اسمه "نظرة الناس".
بنقول "عيب" عشان نحافظ على شكلنا قدام الناس؟ نخوف الطفل عشان ما يغلطش؟ نسيطر على سلوك الطفل بسرعة؟

يمكن بننجح فعلًا وبنحافظ على شكلنا ومش بنخلي الطفل يغلط لكن من غير ما نفهمه هو ايه العيب؟ وليه عيب؟ ‼️

واللي بيحصل هنا بكل بساطة إننا بنخلق جوة الطفل شعور بالخزي بدل ما نعلمه يفكر لأن الطفل ما بيبقاش فاهم هو عمل إيه، بس حاسس ان هو نفسه عيب مش فعله هو العيب، وده بيزرع جواه شعور بالخزي بيفضل ملازمه باقي عمره..
ولو حاولنا نتخيل الشخصية دي ممكن تكون عاملة إزاي لما تكبر..
نقدر نقول( إنسان مهزوز ، خايف طول الوقت يقول حاجة غلط او يعمل حاجة غلط، بيفضَّل يكون اعتمادي او تابع لحد عشان يقلل المسؤلية عن نفسه شوية، مبيعرفش يعبر عن مشاعره بوضوح ومبيعرفش يقول هو عايز ايه او ايه مشاكله...إلخ)

(ألبرت أليس) قال إن الطفل لما بيتعرض لنقد ولوم مستمر من غير شرح بيبدأ يكون معتقدات غلط عن نفسه زي "أنا مش محبوب" "أنا عبء" " انا مش كفاية"...

طب نعمل ايه يعني منربيش؟؟
⬅️ لا نربي طبعًا بس بدل ما نقول عيب طول الوقت ممكن نقول "اللي حصل ده ممكن يضايق الناس، واشرحله قيمة احترام الآخر..

⬅️ نعلم الطفل يسأل عن اللي مش فاهمه ونيجي على نفسنا شوية معلش ونشرحله فيما يتناسب مع سنه وعقله..

⬅️ نحاول نفصل في كلامنا بين الشخص والسلوك "انت كويس وانا بحبك بس معجبنيش السلوك اللي حصل منك عشان ......إلخ "

العيب مش دايمًا عيب، لكن تكراره من غير فهم هو العيب الحقيقي...
كل كلمة بنقولها للطفل بتبني جزء من شخصيته يا إما بيكبر بيها وتكون سلاح يقدر يواجه بيه الضغوط ، أو بيفضل طول عمره بيحاربها.

29/03/2025

امبارح فُلة ( البغبغانة بتاعتي) كانت تعبانة وعيونها حمرا ومن قلقي عليها وحبي فيها نسيت تعبي وقعدت أفرك واسأل وأدور على علاج لحد ما للأسف لقيت إن علاجها قطرة.. إذن انا محتاجة امسكها بالعافية واحطلها القطرة 🥲
المهم...
فُلة فعلا زعلت مني جدًا امبارح وعضتني كمان بس الصبح لما عيونها راقت وخفت قعدت تصفرلي وتنادي عليا عشان ألعب معاها واتصالحنا، فأعتقد فهمت إني مكنش قصدي اخوفها انا بس كنت بداويها♥️
وده فكرني ب Inner child ( الطفل الداخلي) اللي مر بصدمات ومواقف مرهقة ومؤلمة وتجارب مش حابب يعيشها ولا يفتكرها مرة تانية فقرر يقفل على نفسه القفص ولو حد قرب منه يهاجمه ويبعده ..
وده يمكن من وجهة نظري الشخصية شكل المقاومة اللي بنقابلها في العلاج النفسي .. ليه بقاوم لما انا جاي برجلي وعايز ابقى كويس ؟
عشان مش قادر ! عشان حجم الألم كبير على المواجهة! عشان لو فتحت الجروح مش هعرف اتعامل معاها! ولا عشان مش عايز اتألم أصلا !
كل حد فينا عنده أسبابه المختلفة ، لكن اعتقد هنتقابل كلنا في المقاومة وفينا اللي هينجح وفينا اللي هيفضل يحاول لحد ما ينجح وفينا اللي هيقرر يستسلم..
اتمنى من كل إنسان هيشوف البوست ده ميكونش من اللي هيستسلموا ..
أنت تستحق تكون كويس وبخير حتى ولو كان الأمر مؤلم في البداية🤍

07/01/2025

من قلب العيادة ❤️‍🩹
"دكتورة، هو أنا طبيعي؟"

السؤال ده دايماً بيخبطني.. طبيعي بالنسبة لمين؟ لظروفك؟ ولا لتوقعات الناس؟ولا للمجتمع اللي دايماً بيطلب إننا نبقى مثاليين؟
وكان ردي :
"إنت طبيعي بضعفك، طبيعي بخوفك، طبيعي بغلطاتك، الطبيعي إنك بشر، والبشر مش مثاليين."

ساعتها حسيت إنه بدأ يتنفس براحة اكتر ، كأنه طول حياته كان شايل حاجة تقيلة ، ولأول مرة يحس إن مش مطلوب منه يشيلها لوحده.

قبول الضعف والأخطاء والاختلاف عن باقي البشر هو أول خطوة للراحة 🤍

04/01/2025

واحدة من أكتر اللحظات اللي بتلمس قلبي هي لما المريض يبدأ يكتشف إنه يستحق يكون كويس..
اللحظة دي بتكون البداية الحقيقية للشفا، ساعات بنكتشف إن الحل مش في علاج معقد، لكن في كلمة طيبة، في إدراك بسيط لحقيقة إننا بشر وبنغلط..
من قلب العيادة بنتعلم كل يوم إن الإنسان أقوى مما يتخيل، وإنه مهما كانت الدنيا صعبة، جوا كل واحد فينا قدرة على المقاومة والتغيير. ♥️

03/01/2025

من أهم علامات التعلق المرضي هي إنك تحس إن سعادتك كلها متوقفة على شخص معين، وبتخاف دايمًا من فكرة إنه ممكن يبعد عنك، وبتلغي حياتك أو أولوياتك عشان تفضل قريب منه..
التعلّق الآمن هو إنك تحب وتقدّر الشخص اللي قدامك، لكن من غير ما تنسى نفسك أو تعتمد عليه في كل حاجة..

23/12/2024

من قلب العيادة ❤️‍🩹

"ليه أنا؟ ليه كل ده حصل لي؟"
سؤال بشوفه في عيون ناس كتير، ويمكن سمعته مئات المرات من عملاء كانوا فاكرين إنهم لوحدهم في المعاناة..
في العيادة دايمًا بنبدأ من هنا من الحيرة، من الألم، ومن المشاعر اللي مش دايمًا ليها اسم وبنحاول نفهم سوا..
ليه المواقف اللي عدت تركت الأثر ده؟
إيه اللي محتاج يتشاف ويتغير جواك؟
وإزاي تلاقي طريقك وسط الزحمة دي كلها؟

العلاج مش عصاية سحرية، لكنه رحلة بتاخدك لنسخة أصدق من نفسك، نسخة عارفة تتعامل مع الدنيا وأوجاعها..
وصدقني، مهما كان الجرح دايمًا فيه فرصة للشفا.
العيادة مش بس مكان بتحكي فيه، هي مساحة آمنة ليك ولأوجاعك ❤️‍🩹

12/12/2024

من قلب العيادة ❤️‍🩹
فيه سؤال مهم أوي بسأله للعملا بتوعي في أول مرة بشوفهم فيه
" متوقع إيه من العلاج؟"
وده لأن فيه بعض العملاء بيكونوا متخيلين إن الأخصائي النفسي دوره يحللي المشاكل اللي بمر بيها ويقولي اعمل ايه في القرارات اللي عطلان فيها ويختارلي القرار الصح أو الأحسن لحياتي ..
وده مفهوم خاطئ جدًا عن العلاج وعن الأخصائيين بالرغم اني للأسف الشديد شوفت إن فيه بالفعل بعض الزملاء بيقعوا في فخ أنه ياخد قرار للعميل بدلًا منه ..
الأخصائي بكل بساطة دوره يساعدك تشوف جوانب مخفية عنك، يعلمك طرق بالورقة والقلم تخليك تقدر تاخد اي قرار في حياتك من غير ما تكون معتمد عليه بشكل كبير ..
الأخصائي مش دوره يخلق شخصيات اعتمادية بل بيساعد العميل على الإستقلالية ..
الأخصائي اللي بيشتغل صح مش هيجاوبك على الأسئلة دي بشكل مباشر بس هيعلمك طرق تخليك انت اللي تقدر تجاوب عليها بأفكارك الجديدة في العلاج ( اعمل ايه ؟ / اكمل في العلاقة ولالا؟ / أطلق ولا أكمل ؟/ اسيب الشغل ولا لا ؟ ...إلخ).
انت في العلاج سيد قرارك لأن الصح والغلط نسبي وتأثيره على حياتك هو اللي هيحدد ده هيكون قرار مفيد ولا مضر ومحدش هيقدر يحدد ده غيرك أنت ♥️