08/10/2025
علموا ولادكم ان الرجولة و الانوثة في الاحترام
علموهم ان الشتايم و الالفاظ مش هتزود سنهم مش هتزود من شخصيتهم و كاريزمتهم بالعكس
للاسف بقالي فترة كبيرة في احتياج اني اتكلم في الموضوع دة لانه حيوي و حساس
الشباب كلهم بقوا بيكبروا بالالفاظ و ساعتها صحابهم يحكموا عليهم انهم كبروا ويقربوا منهم لما يتحرروا من القاموس المتعارف عليه في الكلام سن المراهقه اهم سن نعلم و نلاحظ مخارج الكلام و التعبير عن نفسهم و النقاش المتداول في البيت او مع الصحاب علموهم ان الاحترام في
الكلام بيزيدهم نضج و حكمه
تحديداً كلامي عن الشباب الصغير مش اللي عدى العشرين و الثلاثين دول خلاص شقوا طريقهم و عارفين امتى و ازاي يقولوا ايه حتى الالفاظ ليها حيز ووقت وناس بيخرجوا دة معاهم
انا تحديداً بتكلم عن الشباب الصغير و المراهق اللي لسه بيكتسب من البيت طريقه الكلام و الالفاظ و اللي بيكتسب من الشارع و الصحاب
اتكلموا معاهم بدون خجل ان كلامك يدل عليك و الفاظك كل م كانت في مكانها السليم بتكبر في عين اللي قدامك
اتكلموا معاهم ان الشتايم و الالفاظ المتطورة بين الصحاب و بتمس الاهالي اللي ولا ليهم و لا عليهم بيتشتموا علشان هزار دة شئ يقلل منك ميزودهمش ابداً
شويه تعب و مجهود علشان دة حقهم علينا مش رفاهيه ابداً
