بسمة إبراهيم - رحلة يقين

29/05/2026

وبعدين ياحبيبتي؟!

27/05/2026

يارب أيامكم تمتلئ بالسكينة والفرحة والرضا والبركة 🤲🤍🌿

25/05/2026

😁❤️

25/05/2026

ما توقفيش حياتك
متستنيش شكرا ولا آسف ولا كتر خيرك
ماتضيعيش عمرك هدر
ماتسيبيش نفسك تتسحب منك حته حته وإنتي واقفه تتفرجي
ماتكسريش ظهرك عشان لو وقعتي هيدوسوا عليكي ويكملوا

افهمي بقى
محدش هيتغير
ومحدش هيقدر
ومحدش هيحس بيكي

ماتستنيش صحوتهم اللي عمرها ما هتيجي
فوقي انتي
ماتمسكيش في أوهام بتسحب عمرك

إنتي بتستنزفي نفسك على إيه؟!
على مين؟!
محدش هيشيل شيلتك
محدش هيقف مكانك
ومحدش هينقذك

فووووقي بقى!
إنتي مش مشروع تضحية
ولا بطلة في فيلم الناس هتسقفلك في آخره

والمراره بقا إن بعد كل ده كلنا هنقف قدام ربنا لوحدنا
لوحدناااااا تمامااااااا
من غير أي حد كنا بنستناه في الدنيا!

ف إنتي لسه مستنية إيه؟!
قومي… وارجعي لنفسك ... و فوووقي بقى

﴿ وَكُلُّهُمْ آتِيهِ يَوْمَ الْقِيَامَةِ فَرْدًا﴾

23/05/2026

21/05/2026

ماذا لو كنتي أنتي السيئه فعلا في رواية الجميع؟!
ماذا لو خرج كل شخص من حياتك وهو مقتنع إنك السبب؟

إنك القاسيه … الأنانيه … المقصره … المعقده…
وإن كل اللي حصل كان بسببك أنتي؟

هل ده معناه إنهم صح؟
مش دايما !

ممكن يكون مجرد رفضك للظلم بيخليكي "وحشه"
وضع الحدود بيخليكي "متكبره"
واختيارك لنفسك بعد سنوات من الاستنزاف بيخليكي "أنانيه"

الناس نادرا ما بتحكي الرواية كاملة
كل شخص بيحكي الجزء اللي يريحه…
الجزء اللي يخليه ضحية، ويخليكي مذنبه

وفي لحظة ما…
هتكتشفي إنك قضيتي عمر كامل بتحاولي تثبتي بياض قلبك لناس أصلا مش مهتمة تشوف الحقيقه

بس برضو مهم تفهمي إن في فرق كبير بين إن يُساء فهمك وبين إنك ترفضي تشوفي أخطائك

إنتي مش محتاجه تقنعي الناس إنك ملاك…
لكن مهم تراجعي نفسك بمنتهى الصدق:
هل جرحت حد؟
هل قصرت فعلا؟
هل ظلمت حد؟
ولو فعلا أخطأت… هل كان عندي شجاعة الاعتذار .. وقدرة التغيير؟

لأن أخطر شيء إن الإنسان يصدق نفسه دائما
أو يصدق الآخرين دائما

لو بتسعي للإتزان مهم إنك تعرفي إنك بشر
تُصيبي وتُخطئي..
تُظلمي أحيانا… وتَظلِمي أحيانا أخرى

لكن قيمتك ك إنسانه مش في إنك تطلعي بطله في كل الروايات…
قيمتك في صدقك مع الله ..
ومع نفسك ..
وفي محاولاتك المستمرة إن يفضل قلبك نظيف وأبيض …
كل مره

20/05/2026

بعد ما الولاد خلصوا آخر امتحان النهارده حسيت بمشاعر غريبة ومختلطة... ومكنتش عارفة أحددها بالضبط

السنة دي كانت من أصعب سنين حياتي
وبرغم كل اللي عديت بيه قبل كده، يمكن دي كانت من أثقل التحديات عليا...
لأن طول ما الوجع بيخصني بعرف أتحمله وأتعامل معاه، لكن وجع أولادنا حاجة مختلفة

من وقت مانقلنا من المدرسه من اول السنه الدراسيه دي ..
كنت زي أم
و وقعت فترة في فخ ووهم إني لازم أحمي إبني من الحزن، من الإحساس بالغربة، من افتقاده لأصدقائه ،من كل يوم كان تقيل عليه ، ومن اثر ده على صحته الجسديه

الغريب إني كنت متخيلة إن أول ما السنة تخلص هحس براحة...
لكن اللي حسيت بيه كان حزن تقيل وغريب

وأول حاجة جت في بالي كانت إيه ده؟ المفروض أكون مرتاحة!

لكن يمكن دي واحدة من الحاجات اللي الكوتشنج علمهالي وبحاول أطبقها على نفسي قبل أي حد
إن معرفة الأدوات لا تعني إننا مش هنحزن
ولا تعني إننا لازم نكون هاديين وأقوياء طول الوقت

حتى اللي بيساعد الناس ويقعد يسمع مشاعرهم
محتاج هو كمان يسمع نفسه

الفكرة مش إننا نمنع مشاعرنا أو نستعجل التخلص منها
الفكرة إننا نقعد معاها شوية...
نسألها: إنتي جاية تقوليلي إيه؟

لأننا وإحنا في وضع النجاة بنبقى مشغولين بالبقاء أكتر من الإحساس بمشاعرنا

بنفضل نجري، ونحل، ونلحق، ونطمن، ونحاول نتماسك ونكمل اليوم ...
مبيبقاش عندنا رفاهية إننا نقف ونسمع نفسنا

علشان كده أوقات الحزن مابيجيش وقت العاصفة...
بييجي بعد ما العاصفة تهدى
بعد ما الجسم يحس إنه أخيرا بطل يجري و يطمن إنه مسموح له يضعف شوية

من أكثر الأخطاء شيوعا بيننا ك مقدمين رعاية واللي بجاهد نفسي كل يوم عشان ما أنساهاش
إن إحنا بنفضل طول الوقت نحاول نفرد إيدينا بين ولادنا وبين الدنيا ونمنع عنهم أي وجع

مع إن دورنا الحقيقي مش إننا نمنع عنهم التحديات وأي احساس بالألم ...
لأن ده مستحيل

إحنا دورنا إنهم وهم بيتألموا، مايحسوش إنهم لوحدهم

لأن الوجع بالرغم من قسوته .. جزء من الرحلة
و لو تم التعامل معاه صح بيبني فيهم حاجات عمر الراحة ما كانت هتبنيها
القوة
والتعاطف
والنضج
مش بيتولدوا إلا من داخل التحديات
كل سنه دراسية وإنتوا طيبين 🥹❤️

19/05/2026

النهاردة كنا مدعوين لإيفينت
وبدأت يومي وأنا متوقعة إنه يبقى يوم لطيف ونرجع منه بطاقة حلوة وذكرى حلوة…

لكن اللي حصل كان العكس تماما

اليوم كان مرهق ومحبط، وكلنا تقريبا خرجنا حاسين إن وقتنا ضاع

وأنا وصديقة ليا بحبها جدا .. لكن ماجمعناش الحظ قبل كده في كلام عميق
وقفنا نبص لبعض بنفس الشعور ..
"هو اليوم خلص كده؟"

لكن الغريب إن في نفس اللحظة تقريبا فكرنا في نفس القرار:
"طب ليه نسيبه يخلص بالشكل ده؟"

واتفقنا نخرج نشرب قهوة ونعمل شوية شوبنج

كانت خروجة بسيطة جدا… لكن كان فيها حاجة مهمة:
كانت محاولة لإنقاذ اليوم

بدأنا نتكلم…

ثم اكتشفنا تشابهات غريبة بيننا:

في طفولتنا
في طريقة كلامنا
في ذوقنا
حتى مجال شغلنا اكتشفنا إنه واحد

وفجأة لقينا نفسنا بنتكلم عن رسالتنا، شغلنا، أحلامنا، والحاجات اللي بتخلي الإنسان يفضل يكمل رغم كل الإحباط اللي حواليه

وساعتها افتكرت حاجة أنا مؤمنة بيها جدا:
إننا أوقات بندي للحظات السيئة سلطة أكبر من حجمها الحقيقي

بنحكم على اليوم كله من موقف
وعلى المشاعر كلها من كلمه اتقالتلنا
و إن لو البداية كانت سيئه … يبقى اليوم كله اتحكم عليه بنفس النتيجه

مع إن أوقات اليوم السيئ مش بيحتاج أكتر من قرار صغير
ب إنك ما تستسلمش لإحساس اتفرض عليك

مكالمة مع شخص مريح…
خروجة سريعة…
تمشية…
أو حتى قرار إنك متسيبش إحباط لحظة واحدة يسرق باقي يومك

أنا مؤمنه إن السعادة فن
بتقدر تتقن الفن ده لما تدرب نفسك على كيفية تغيير اتجاه يومك السئ

آخر مرة أنقذت يومك بقرار صغير كانت إمتى؟!

اليوم كان جميل بيكي Mai Elwakel ❤️🌹

18/05/2026

لا أؤمن بفكرة أننا بحاجة إلى شخص يكمل نقصنا
الإنسان بحاجة إلى طموح .. إلى شغف يدفعه للحياه
بحاجه إلى شيء لا يجده إلا في نفسه

ده كان رأي دوستويفسكي ...

هل فعلا ممكن الإنسان يكتفي بنفسه ويكمل حياته من غير ما ينتظر حد يكمله؟
إيه رأيك؟

17/05/2026

قالتلي
كان خايف يحبني…
مش عشان أنا مستاهلش أتحب ..
أو يمكن كنت فاكره كدا

لحد مافهمت إنه عمره ماحبني
عشان هو طول عمره متعود إن الحب له فاتوره لازم تتدفع

كان خايف يقدملي أي حاجة.. ف أطلب أكتر
أو أتعود على ده
أو أبقى زي ناس قبلي
أو مقدرش .. وأمشي

كل ما اخد خطوة ناحيته بحب
بيحس إنه مطالب يدفع قصادها
عشان يفضل محبوب

وكان خايف يقدملي حب عشان ميحسش أنه مطالب يدفع أكتر
وكان خايف اكتر يبطل يقدملي حب
أتحول أنا كمان لنسخة من العالم اللي عرفه

العالم اللي بيقوله
إن قيمتك في اللي بتقدمه
و حبك لازم يبقى ليه مقابل
و لازم تتعب أوي عشان الناس تفضل

وقتها فهمت حاجه مؤلمه جدا…
إن بعض الناس مش محتاجين حب .. على قد ما هما محتاجين يتعلموا إنهم مش مضطرين يدفعوا تمن وجودهم

هو ماكنش بيختبرني أنا
هو كان بيختبر الفكرة نفسها

فكرة إن حد يفضل…
حتى لو هو ماقدملوش حاجه وما أثبتش حبه كل لحظه

ومن أول لحظه في علاقتنا
وأنا بحاول أطمن قلب عمره ما عرف الأمان

أثبتله إن في حاجة اسمها حب غير مشروط مليون مره بمليون طريقه
حب ما بيتسحبش مع التقصير
ولا بيختفي لما الطاقة تخلص
ولا بيتحول لعقاب لما الإنسان يضعف

بس فهمت متأخر ..
إن الإنسان لو ما اتعلمش يحب نفسه بدون شروط
هيفضل يشك في أي حب صادق يقابله

كون أن العلاقه انتهت مش هو الخسارة
لأن أنا خسرت اصلا لما فضلت أحارب طول الوقت
عشان أثبت إن قلبي نظيف .. وأثبتله أنه يستاهل يتحب

لحد ما خلتيني أدرك يابسمه
إن الحب مش محتاج إثبات
هو محتاج بس شخص مستعد يصدق "إنه يستاهل يتحب"

___________________

وده كان نموذج ل شخص عنده
"تعلق شرطي"
إتعلم من بدري إن الحب مش بييجي إلا بمقابل يضمن إستمرار العلاقة

ف بقى بيخاف يحب أو يستقبل الحب
لأنه شايف إن أي حب من غير شروط ممكن يتسحب في أي لحظة أو يتحول لعقاب

ف مهما حاولتي تقدميله حب مش هيعرف يستقبله
هتضيعي وقتك وطاقتك معاه .. ف .... ابعدي عنه ✌️

في سلسلة هنتعرف على شخصيات مينفعش نشاركهم حياتنا

16/05/2026

في مرحلة ما من حياتي…
كنت فاكرة إن التعافي معناه إني أوصل لنسخة لاتقهر

لا بتخاف
ولا بتعيط
ولا بتنهار
ولا بتحتاج حد

كنت فاكرة إن القوة النفسية الحقيقية…
هي إن الإنسان يبقى ثابت طول الوقت
مش بيتأثر ولا ممكن يتكسر

بعدها اكتشفت إن ده وهم…
وإننا أحيانا بنعيش سنين بنحاول نوصل لشيء
مش من طبيعتنا أصلاً

لأن النفس البشرية بطبيعتها غير ثابتة
هي بتمر بموجات من القوة والضعف
الطمأنينة والخوف
السكينة والتشتت

وفي علم النفس فيه مفهوم مهم جدا اسمه:
"المرونة النفسية"

اللي مش معناها أبدا إنك ما تقعيش…
لكن إنك تعرفي إزاي ترجعي للحياة بعد كل مرة تقعي فيها

ولا إنك ما تتوجعيش...
لكن إنك ما تغرقيش جوه الوجع

عشان كده…
تمام التعافي والعافية الكاملة
مش ممكنين أبدا في هذه الحياة الدنيا

فالكل مبتلى بصورة ما
والكل متألم بدرجة ما

وإنما نطلب من الله فيها من العافية ...
ما لا يعوق سيرنا
ولا يحجب مسيرنا

نطلب قلباً يعرف كيف يهدأ بعد العاصفة
وروحاً لا تفقد يقينها كلما تأخرت الإجابة
ونفساً تملك من الطاقة ما يكفي للتعامل مع الألم كجزء من الرحلة… لا كنهاية لها

أكبر علامة على التعافي
مش إنك مبقتيش تعيطي
لكن إنك بقيتي تعرفي تحتوي نفسك بعد العياط ده

ولا إنك مبقتيش تتألمي
لكن إنك مبقتيش تشوفي الألم كدليل إنك مرفوضة أو متعاقبه

العافية الحقيقية…
إن يبقى جواكي سلام داخلي كفاية
يخليكي قادرة تكملي

{وَتِلْكَ الْأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا}