PT/Arwa Wael

05/10/2024

🍊مساء الخير

انا عملت جوجل فورم للي عاوز نشتغل سوا!!

املى الفورم دي و ابعتلي و يلا نشتغل سوا🍊

اهلا بيك/ي ، املى الفورم ده بشكل دقيق علشان شغلنا يطلع مضبوط🍊

03/10/2024

ساعات الشغل بيتعطل لاسباب خارجة عن ارادتي😁🍊

23/09/2024

🍊مساء الخير او صباح الخير بما اننا الفجر

الفترة اللي فاتت اتشغلت جدا بالمذاكرة في المجال ده و اهملت تغذيتي الشخصية 😂

الفترة الجاية فيه حاجات حلوة جدا هنتكلم عنها

دلوقتي بس انا عندي حاجة مجنناني و لازم اكلم عنها

من الحاجات اللي بدور عليها بقالي سنين هي داتا بيز فيها السعرات الحرارية لكل الاكل العادي بتاع كل يوم اللي مطلعها علماء فعلا حللوا الاكل في معامل و نشروا دراسات مش اي هبد على النت و خلاص علشان اي نظام اعمله لمريض يطلع صح

عرفت بالتدوير و من مساعدة الاخ العزيز chat gpt ان فيه بلاد عاملين داتا بيز طويلة عريضة فيها كل الاكل الخاص ببلدهم

اكتشفتلك ان العاقة مصر عملت داتا بيز واحدة بس سنة ١٩٩٦ و الداتا مش موجوده على النت اصلا!!

يعني بالبلدي كل الاكل الشعبي اللي عمالين نهبده ده مش لاقياله اي مصادر لسعراته موثوق فيها

يعني بنجلادش نفسها عاملة داتا بيز كاملة و مصر العاقة مش عاملة🥹🥹🥹

لا و الاجمل ان امريكا ليها داتا بيز كبيرة جدا بتتجدد كل سنة و معمولها اصلا محرك بحث ممكن اي حد يستخدمه علشان يلاقي السعرات 🫡

ملخصه، يارب مصر تعمل اي حاجة عدلة بقى الهبد في مجال التغذية كتر جدا و انا زهجت

21/09/2024

🍊هاي

الاندومي ده اكتر من ٤٠٠ سعرة
باي

20/09/2024

🍊مفيش حاجة اسمها الكربوهيدرات وحشة او الدهون وحش و البروتين حلو و الفيتامينات حلوة

كل العناصر الغذائية اللي ربنا خلقنا جسمنا محتاجها بكميات معينة مفيش حاجة منهم وحشة او هي السبب الرئيسي في السمنة او النحافة

استهلاكنا سواء بالكثرة او الحرمان هو اللي بيسبب مشاكل

الكربوهيدرات هي الغذاء الاساسي للمخ و مصدر رئيسي للطاقة
الجهاز العصبي في جسمنا كله دهون و الدهون اساسية علشان الفيتامينات تشتغل

الحاجات الوحشة هى الحاجات الدخيلة على التغذية زي السكر الابيض و السكر المضاف و دي اللي المفروض نقللها على قد ما نقدر

20/09/2024

🍊صباح الخير

لو اي حد يعرفني يعرف اني بحب النسكافية جدا و بيبقى جزء اساسي من الصبح و تقريبا اللحظة الوحيدة اللي بحبها فى النهار كله 😂

كنت لقيت في فترة ما النسكافية بتاع انستا مج و كان تحفة و منغير دسم و منغير سكر و كنت بحطله استيفيا بس مع ذلك كان برضو سعراته كبيرة بالنسبة للحجم و سعره مش الطف حاجة

فقطعته و استثمرت في حليب خالي الدسم و بحط ٥٠ مللي منه مع معلقة قهوة و ميا و استيفيا و قهوتي بتبقى ١٧ كالوري فقط، النهاردة حبيت ادلع نفسي و عملت ايس كوفي في مج محترم، شايفين الفرق في السعرات و الحجم؟

و دايما دي قاعدة عامة كل ما الprocessing زاد كل ما كانت السعرات اكتر و الفايدة الغذائية تقل، فحاول تعمل الحاجة بدل ما تشتريها توفير للفلوس و توفير في السعرات

هل الطعم فرق؟ طبعا المنتج طعمه افضل بس من ٧٢ كالوري ل ١٧ كالوري و لو اتنططت ٣٤ كالوري فرق محترم و يستاهل🧡

20/09/2024

Why ?🍊

البروتين بافس(شبه الويندوز كده) و البسكوت مليانين كارب و حوالي ١٦ جرام سكر مضاف في البسكوت و البافس مفهوش سكر مضاف(يعتبر صحي عن اي شبسي تاني بس اغلى)

الصدور بروتين بحت مفهوش كارب تقريبا و كمان فيه فات من الجلد

بس الاتنين نفس الكالوريز !!

ليه بنعد كالوريز برضو؟

لانك الصبح بتبقى مستعجل فتروح تفطر اي حاجة من السوبر ماركت و تتفاجئ انك بتتخن، ليه؟ لان بتستهلك منتجات مليانة كالوريز و انت مش واخد بالك🤓

🍊الموقع : calorie friend

18/09/2024

🍊مساء الخير

تكملة لكلامنا عن السكر المضاف..،

انا شفت فيلم وثائقي من فترة، معمول من سنة ٢٠١٤ اسمه that sugar film لراجل استرالي قرر انه ياكل سكر مضاف بمعدل ٤٠ معلقة صغيرة في اليوم و كان سبب كبير في قطعي لمعظم السكر المضاف اللي كنت بستهلكه(بس مش كله و هقولكم ليه بعدين🤓)

اية القصة بقى؟

دايمن جامو كان راجل عادي خالص الجيرفريند بتاعته(ملناش دعوة يا مهي) صحية جدا و اول ما اتقابلوا هو كان راجل مدمن سجاير، فبطل السجاير و بقى صحي زيها و قعدوا سنين مع بعض و بقى مش بياكل سكر غير في الفواكه و بيتمرن يوميا و صحته كانت جميلة

بدأ ياخد باله اد ايه فيه منتجات في السوق بيتم تسويقها انها صحية و بتبقى مليانة سكر مضاف و اكتشف ان الاستراليين بيستهلكوا بمعدل ٤٠ معلقة صغير سكر مضاف كل يوم و بما انه خلاص هيبقى اب(ملناش دعوةةة) فقرر يعمل فيلم عن السكر و يوعي الناس بشكل عملي

فقرر يعمل تجربة، لمدة ٦٠ يوم هياكل ٤٠ معلقة سكر مضاف، و المنتجات اللي هياكلها هتبقى متسوقة انها صحية يعني مش هيشرب بيبسي و لا ياكل شوكولاتة و لا ايسكريم

كل اللي بياكله كانت عصاير و زبادي فاكهة و بارات شوفان مع الاكل الطبيعي بتاعه

عمل تحاليل و قياسات قبل التجربة و بعدها و تمارينه فضلت زي ما هي

ايه النتيجة❓

-في خلال ١٨ يوم، دايمن جاله مرض كبد دهني fatty liver disease بسبب كمية الفركتوز اللي كانت موجودة في الاكل، قبلها دهون الكبد كانت فى معدل طبيعي جدا و مكنش فيه اي مشاكل

ـدهون البطن كترت و مقاس وسطه زاد ١٠ سنتي بحالهم!! ده معناه ان اعضائه الداخلية كانت بتتخنق بكمية كبيرة من الدهون

-وزنة زاد ٨ و نص كيلو، في شهرين بس!! و سبحان الله خس ٦ منهم بمجرد ما رجع لحياته العادية و منغير تمارين حتى

-بشرته بدأ يطلع فيها التهابات و حبوب شباب

- كان بيحس طول الوقت بالكسل و الخمول و بقى يحصله تقلبات مزاجية كل يوم بعد ما ادمن السكر و بقى عنده انه لازم ياكل سكر كل يوم

الوثائقية دي بتدخل اكتر في تأثير السكر على المناطق الفقيرة من استراليا و ازاي ان السكان صحتهم في تدنى و كان حتى منهم ناس كتيرة ماتت شباب بسبب امراض السكر و اطفالهم سنانهم كانت بتتعفن بسبب ادمان الصودا(اكبر مصادر السكر المضاف)

و بس كدة لو وصلت لهنا حمد لله على السلام🫡 🍊🍊

17/09/2024

🍊مساء الخير

كنت نزلت صورة الlabel اللي تحت دي و سألتكم ايه المشكلة الكبيرة اللي فيه؟

و اجابت دكتورة منى و امي العزيزة انها كمية السكريات اللي موجودة, و ده فعلا صحيح !

بس عاوزين نفهم حاجة🗯️

السكريات اللي هنا دي added sugars يعني سكر متضاف على المنتج بعد تصنيعه لهدف التحلية و لهدف برضو انك تدمنه🤓

و السكر ده كارثة بكل المقاييس لانه ببساطة مش زي السكريات الطبيعية اللي في الفاكهة، ده سكر مستخرج من القصب او الذرة و متركز علشان يعمل اكبر نسبة تحلية في المنتجات دي

طب ايه الفرق❓

-السكريات الطبيعية بتحتوي على قيمة غذائية من الفيتامينات و المعادن و بيتم اطلاقها في الدم بشكل تدريجي فمش بتسبب ارتفاع عالي في الانسولين

-السكريات المضافة او added sugars دي في الغالب بتكون فركتوز، و بتسبب ارتفاع جامد في الانسولين و بالتالي بتحفز تخزين الدهون و بتزود الجوع علشان كده فيه مبدأ انا مقتنعة بيه انه "السكر بيجيب سكر" و عمرنا ما بنكتفي بحتة شوكولاتة واحدة، و الادهى من كل ده انه الفركتوز المصنع بيدخل على الكبد عدل و بيتخزن كtriglycrides و هو ده اللي بيعمل مقاومة الانسولين و مرض الكبد الدهني fatty liver disease و كمان بتسبب السمنة حوالين البطن android obesity بالتحديد و دي اخطر نوع من انواع السمنة لان الدهون بتبقى محاوطة الاعضاء الداخلية و بتضغطها

في الصور اللي تحت هتشوفوا عملي يعني ايه ٢٥ جرام سكر مضاف في كوباية واحدة من العصير زي ما كان مكتوب في الlabel🧪

هنتكلم اكتر عن الadded sugars البوست الجاي و هنحكي برضو عن فيلم وثائقي اسمه that sugar film اللي هنقابل فيه دايمون جاموه، راجل صحته حلوة فقرر انه يجرب ياكل ٤٠ معلقة صغيرة من السكر المضاف يوميا و يشوف صحته هيحصل فيها ايه(هحرقلكم حتة، صحته اتبهدلت)

يلا سلام الي بوست اخر🍊

- references:
(1)That sugar film 2014
(2)Obesity: evaluation and treatment 2016
(3) كتاب الباطنة اللي اخذته من حورس( شاوت اوت لحورس🎀)
(4)Obesity: The postmortem 2016
(5) خمسين فيديو عن السكر و السمنة اتفرجت عليهم على مدار السنين

16/09/2024

صباحكم فل🧡
انا اتكلمت المرة اللي فاتت عن السعرات الحرارية و قلنا ان مش كل السعرات زي بعض calories are not created equal
ده نسخة من الملصق اللي بيبقى ورا اي حاجة بنلاقيها في السوبرماركت
حد عنده فكرة ايه الريد فلاج 🚩 اللي موجود هنا؟ 🤔

15/09/2024

صباحو او مساؤو على حسب هتقرأ البوست امتي

دلوقتي انت داخل اول مرة البيج و بتسأل نفسك....
ايه هو الCICO (بتتنطق كيكو) ده؟

🍊كلنا سمعنا في وقت ما عن مصطلح "السعرات الحرارية" او الكالوري، السعرة هى وحدة قياس للحرارة و بنستخدمها كوحدة لقياس مقدار الطاقة اللي في الاكل

🍊 الCICOهو اختصار لجملة Calories In, Calories Out, يعني بالبلدي سعرات داخلة و سعرات خارجة، ده مبدأ ماشية عليه كل انظمة الدايت سواء للنحافة او للسمنة, معناه انك تحرق سعرات اكتر من اللي بتاكلها

🍊خسارة الوزن عن طريق عد الكالوريز هو نظام فعال و متجرب و مفهوش فكرة الاكل الممنوع و لا فترات اكل معينة و *لكن* محتاج ذكاء و تخطيط كويس و محتاج تكون فاهم اللي بتعمله

هديك مثال...

🍊حسام راجل عادي بياكل ٢٠٠٠ سعرة في اليوم علشان يحافظ على وزنه و عنده كل الاختيارات في الاكل الصحية و غير الصحية هل هيستهلك سعراته في الشيبسي اللي مش بيشبع و الكيس فيه ٤٠٠ سعرة؟ و لا هياكل خضار و بروتين و يقفل نفس السعرات بس بفايدة غذائية عالية و بشبع؟ فهمت قصدي لما قلت انه محتاج تخطط و تحدد هتاكل ايه؟

و متقلقش بعد كام بوست من عندي هتقتنع متاكلش الشيبسي اصلا🫡

🍊عد الكالوريز نظام محتاج ميزان مطبخ و شوية تعب و استمرارية بس النتايج مش هتخيب املك، اهم حاجة هي الاستمرارية، الاستمرارية، الاستمرارية🫡🫡

لايك و فولو و شير و تابعوني علشان فيه حاجات جامدة جاية💥