26/11/2023
صلاحية انواع الادوية المختلفة في التلاجة بعد الفتح👇👇
لكل ام عامله صيدليه جوا التلاجة بتاعتها 🥹😁 تعالي هقولك حاجات مهمة يا ام مشمش 🧑⚕️😃
شايفه العلاج اللي ركناه بالشهور ده ؟!.. إرمي يا حجة السموم اللي في تلاجتك ده واشتري جديد 🥹
ليه كده يا دكتور دا مكتوب مدة الصلاحية 5 سنوات 😳😳😳
🚨الصلاحية يا حاجه طالما العبوة لم تفتح تظل كما هو مكتوب عليها.
🙏🙏خلي بالك الصلاحية اللي هنقولها تحت 👇 مع كل نوع ده بشرط ان تاريخ انتهاء الصلاحية اللي مكتوب على العلبة ميكونش انتهى او هينتهي قبل ما نكمل المدة اللي مكتوبة.
🚨لكن لو العبوة اتفتحت الصلاحية تتغير و تبدأي تعدي من اول يوم استعمال للدواء (بقلم فلومستر واكتبي تاريخ الفتح)
لأن اختلاط الدواء بالهواء وتعرضه للضوء أحيانا في بعض الانواع يسبب تفاعلات وتخمر وفساد للمادة الفعالة👌
⬅️ جميع ادوية الشراب للمضادات الحيويه .. طبعا الحفظ بالثلاجة هو الافضل..
صلاحيتها بعد ما تتحلل من اسبوع خارج الثلاجه لاسبوعين جوه التلاجه .. حسب المادة الفعالة
🎯ملاحظه مادة اموكسسلين/كلافيلونيت(زي نيوكلاڤ و اوجمنتين و كيورام.. الخ) .. لازم تفضل جوة الثلاجه.
🧑⚕️الوحيد اللي يتحط برة الثلاجة .. الكلاسيد.
⬅️الحبوب والكبسولات اللي تأتي في زجاج او علب بلاستيك وفيها حبوب
تكون صالحة ل ٦ شهور من مدة الفتح
📌لكن الحبوب التي تأتي كل قرص مغلف لوحده لا تفسد👌 بشرط تحفظها في حرارة اقل من ٢٥ درجة.
⬅️ الحبوب الفوارة اللي تأتي في علب صالحة مدة شهر واحد بعد فتح العلبة 🙏
⬅️ادوية الشراب مثل ادوية الكحة او شراب الاطفال
صالحة لمده شهر "الأحوط" ل ٣ شهور " في أقوال أخرى" بعد الفتح
🙏 وان كانت في الثلاجة وفي علبتها و بنفضيها صح مش يسرنجة ملوثة حطيناها في فم طفل مريض .. ممكن ٦ شهور 🧑🏻🔬 بس ده لا أنصح به.
📌ولوظهر فى اى رائحه غريبه او تغير لونه أو ظهرت فيه turbidity (اى تعكر )نوقف استخدام الدواء.
⬅️ القطرات غالبيتها يفسد بعد شهر
📌على الاقل شهر وارميها.
🧑🏻🔬معظم قطرات العين لازم تتحفظ في الثلاجة.
⬅️ الأدوية المعلقة ومكتوب عليها معلق من ٢ إلى 4 أسابيع.
⬅️ محاليل العدسات تفسد بعد فتحها بثلاثة شهور.
⬅️المراهم الجلدية من شهر ل ٣ شهور ومراهم العين شهر فقط... المرهم بيستحمل شوية عن الكريم .
🧑🏻🔬يحفظ أيضا في مكان بارد.
⬅️ الحقن من نوع البنسلين زي 🔹الامبسلين (يونكتام -بوناسين-سالبن)
مبتتقسمش ومينفعش تقسم الحقنة كدة الجرعة التانية زي المايه.
🔹أما باقي الأنواع كلها تقريبا تحتاج لوضعها بالثلاجة وتكون صالحة تقريبا يوم ل يومين .. حسب المادة الفعالة.
📌فيال الأنسولين ( شهر إلى شهر ونصف أو عند تغير لون محلول الدواء ) .. خرطوشة الانسولين في الاقلام بتتغير كل 28 يوم.
💉سن قلم الانسولين .. يفضل يتغير كل ٣ ايام ويفضل ميتحطش في الثلاجة.
⬅️ الحديد و الفيتامينات المحتوية على الحديد يغمق لونها للبني الغامق في أول أسبوع و تظل صالحة من ٣ الى ٤ أسابيع ومثلها فيدروب شهر.
🧑🏻🔬ملحوظة مهمة ... كل الڤيتامينات اللي لها قطارة بمختلف مسمياتها يفضل تغطيها بعد سحب الجرعة بالغطا كويس مش بالقطارة الا لو الغطا و القطارة قطعه واحدة .. كمان بننبه ان القطارة لازم تتغسل كويس جدا قبل وبعد كل جرعه.
⏪أدوية جلسات البخار :
🔹فاركولين قطرات .. اخرها شهر
🔹اتروفنت امبول .. يومين بعد الفتح.
🔹بالمكورت و بوديكسان .. ١٢ ساعه ويفسد وكمان بيفسد بالضوء لازم يفضل جوة كيس سلوفان لو مش معاكي الكيس اللي جاية فيه.
⏪البخاخات (الانف و الصدر).. مع تاريخ الصلاحية ولو تتغير كل 3 شهور افضل.
⏪جهاز ايروشامبر المستخدم للبخاخات .. يتغير لما يتلف الصمام او كل سنه.
⏪المحاليل .. الزجاجات الكبيرة مينفعش تتعلق تاني بعد ما تتفتح تجنبا للعدوى.
⏪محلول الملح المستخدم للاستنشاق عن طريق جهاز النبيولايزر .. هاتي العبوات الصغيرة 25 ملي .. العبوة الكبيرة ممكن تتلوث.
🧑🏻🔬أكياس الفوار و الحموضة و البكتريا النافعة ... ممكن نقسم البودرة بس ونعين الباقي بعد احكام الغلق لمدة ٢٤ ساعه فقط في حرارة مناسبة.
لكن يفضل نستخدم الكيس كامل ونجيب تركيز مناسب.
لكن اوعى تحل الكيس في مايه وترجع تقسم المياه كدة ملوش لازمه وهتدي لطفلك حاجة ملهاش مفعول في الجرعه اللي تبقت ... يعني مثلا كيس داونوبرازول او نكسيم .. اقسم البودرة من الاول زي ما تحسبها بقى .. متحلش الكيس مثلا في ١٠ سم وتدي جزء وتقول هعين الباقي ادي منه الجرعه الجاية بعد ما اتحل .. لا مينفعش.
🤱🏻اللبن الطبيعي"لبن الأم" :
EBM , Expressed breast milk
آخره بعد تعصيره أو تشفيطه .. ٤ ساعات زيه زي الرضعه الصناعي.
لكن لو حطتيه بالثلاجه يطول صلاحيته
يحفظ بالثلاجة .. ٤ أيام
بالفريزر .. ٤ شهور
🍼اللبن الصناعي :
العلبة من الفتح آخرها شهر بالظبط.
تخزينه زي لبن الأم خارج و داخل الثلاجة.
بس خدي بالك الرضعة: تتعمل على اد الطفل .. متعمليش بزيادة عشان مترميش اللي فاض من طفلك .
🌺دكتور /أحمد رمضان السيد🌺
مدرس طب الأطفال وحديثي الولادة (م) بكلية الطب
منيا القمح .. الشرقية.
شيييير
