15/04/2025
لو الدكتور كتبلك TSH، T3، T4، Free T3، Free T4
يبقى هو بيدوّر على لغز اسمه: الغدة الدرقية شغالة ولا نايمة؟
تعالوا نفك اللغز خطوة خطوة:
نبدأ ب الـ TSH (Thyroid Stimulating Hormone):
ده الهرمون اللي بيطلع من الغدة النخامية (في المخ)
وظيفته يقول للغدة الدرقية: "يلا اشتغلي وطلعي هرمونات"
يعني ببساطة:
-لو TSH عالي: معناها المخ بيزنّ على الغدة تشتغل فـ غالبًا الغدة كسلانة (خمول)
- لو TSH واطي: معناها المخ شايف الغدة شغالة زياده عن اللزوم فـ غالبًا الغدة hyper activation (نشطة)
الغدة بقا عندنا بتفرز هرمونين
الـT4 (Thyroxine) والـ T3 (Triiodothyronine):
-نبدأ ب الـ T4: هو الهرمون اللي بيتفرز بنسبة كبيرة، بس مش نشط أوي
- أما بالنسبة للـ T3: هو النسخة النشطة اللي الجسم بيستخدمها فعلًا
(الجسم بيحوّل جزء من T4 إلى T3 عشان يشتغل بيه)
لكن فيه مشكلة... مش كل T3 وT4 اللي في التحليل شغالين!
- عندنا في الجسم، جزء من الهرمونات بيرتبط ببروتينات وده ملهوش تأثير مباشر
الباقي بيكون "Free" وده اللي فعلاً بيدخل الخلايا ويشتغل
- هنا يجي دور Free T3 و Free T4 (النسخة الحرة):
يعني: الـ Free T4 والـ Free T3 = الهرمونات الفعالة اللي الجسم بيستخدمها فعليًا
نربطهم ببعض إزاي؟
هقولك بس ركز وصلي عالنبي
- لو الـ TSH عالي + Free T4 واطي = خمول غدة
- لو الـ TSH واطي + Free T4 عالي = فرط نشاط غدة
- لو الـ TSH طبيعي + Free T3 أو T4 مش مظبوط = ممكن يكون Subclinical
طيب نحلل إيه؟
لو متابع حالة غدة: TSH + Free T4 كفاية في الغالب
لو فيه أعراض مش واضحة أو مش ماشية مع التحاليل: زوّد Free T3
التحاليل الكاملة (TSH + T3 + T4 + Free T3 + Free T4) بتدي صورة أوضح لما الحالة تبقى معقدة
- خد بقا الخلاصة في سرنجة:
الـ TSH = أمر من المخ
الـ Free T3 و Free T4 = اللي الجسم فعلاً بيستخدمه
التحاليل لازم تتقري مع بعض علشان نفهم الغدة عاملة إيه بالظبط
| الغدة الدرقية ساعات تِلبِس وش ملاك وهي عاملة مصايب، افتح عينيك واقرا التحاليل صح!
وبس كدة يا مؤمن ، سلام
