خواطر خلطبيطة- Esraa Nashaat

21/07/2025

20/07/2025

انتوا ليه خالطين بين الصبر على الابتلاء وايذاء النفس
ليه لازم تصبرى وتأذى نفسك !!
مهى نفسك دى كمان هتتحاسبى عليها.

📌الله عزوجل جعل الصبر من عزم الأمور
يعنى من الأشياء اللى تحتاج لعزيمة وقوة
فلو متقدريش عليها واختارتى سلامك النفسى
سيُجازيكى الله أيضا لمراعاتك لنفسك .

📌ومراعاتك لنفسك هيندرح تحتها مراعاتك لكل من هو محتاج لرعايتك.

📝يبقى ليه بتصممى تحاربى فى مكان
ومع ناس انتى لاعارفه تصبرى عليهم
ولاعارفة تاخدى جزاء مراعاتك لنفسك
وكمان مضيعة حقوق اللى هتتحاسبى عليهم؟؟؟؟
وتقولى صابرة ؟! فين الصبر بقى ؟!!!

19/07/2025

يُسعدنى ويُشرفنى أكون من الناس اللى بتتكلم
عن التربية الصحيحة فى الدين
قبل متكون فى أى منهج تانى
واللى نتايجها المتميزة والممتعة أنا شيفاها الحمد لله
اللهم بارك فى ولادى قبل ميكون مع أمهات أعرفها
الناس بتوع التربيه وأنا منهم ( ربنا يديمها نعمة)
كلامنا مش موجه لحضرتك خالص
كلامنا موجه للأم اللى عايزة تكون فعلا أم بكل ما تحمله الكلمة من معنى.
الأم اللى بتتقى ربنا فى رعيتها وبتبحث وتدور علشان تكون قد مسؤلية السؤال أمام الله عزوجل .
( الأمهات اللى عايزة تربى فعلا هتفهم معناها).

فمتقلقيش كلامنا مش ليكى
استمرى زى ماانتى 🤫

اوعى تكونى فكرانى هقنعك بالتربية وكدهون ...اوعى👀
#صراحة

19/07/2025

عليكم السلام ورحمه الله وبركاته
البوست كان عن التغيير عموما وان الناس مش عايزة تبذل مجهود .
التغيير فى كل جوانب الحياة
ومن ضمن الجوانب وأهمها الجانب الروحى
( علاقتنا بالله عزوجل) .
👈علاقتى بالله بتحدد باقى حياتى؟ طبعا
👈علاقتى بالله بتحسن حياتى؟ طبعا
ولكن
👈 الاكتئاب سببه البعد عن ربنا؟ لأ
👈المرض النفسى علاجه انى أقرب من ربنا فقط ؟ لأ
المرض النفسى زيه زى أى مرض عضوى مع اختلاف أنه أشد من العضوى .
طب ازاى زيه زى أى مرض عضوى ؟
👈يعنى لما سنانى توجعنى هدعى ربنا وأصلى ولا أروح لدكتور ؟؟!
هدعى ربنا+ هكون شخص بيصلى أصلا علشان دعائى يقبل + هروح لدكتور الأسنان.
قال الله تعالى (( وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ)).

📌يعنى أقرب من ربنا ثم أعمل اللى عليا وأسعى زى مهو مطلوب منى .
#صراحة

17/07/2025

عليكم السلام ورحمة الله وبركاته
محتاجين نحلل كل نقطة لوحدها لتوضيح الصورة

👈تتواصل معاك وقت متحتاج حاجة فقط؟
دا معناه إن العلاقة فيها اعتماد من طرف واحد، مش متبادل.

👈بعد ما الطلب يوصلها تختفي أو ترد قليل؟
دا ممكن نسميه إستغلال عاطفي أو مادي، ودي علامة خطر.

📌حضرتك محتاج تسأل نفسك :
👈هل بتحبها لأنها بتبادلك نفس الحب؟
ولا بتحبها لأنك اتعلقت بيها رغم إنها مش بتديلك نفس الاهتمام ؟
👈هل انت مستعد تبدأ حياتك مع شخص مش بيكلمك إلا وقت ميحتاج حاجة ؟

لازم تكون صريح جدا مع نفسك وانت بتجاوب ( حتى لو فى زعل هيتكون جواك ) وتكون اجابتك بأدلة منطقية مش أحساس فقط
يعنى أقول لنفسى كده
هى حاسة بنفس المشاعر لأن بيحصل كذا وكذا وكذا
أو العكس .

📌طيب تعمل إيه ؟
المواجهه من أقصر الطرق للتعبير عن اللى جوانا
هتسألها عن اللى بيدور فى دماغك بس قبلها هتكون مكون قناعات منطقية من اللى حاصل علشان تقدر تفرق بين الكلام الصادق منها أو غيره.
ومن بعدها هتحدد إذا كانت مناسبة ام لأ.

📌توضيح مهم البيوت لاتُبنى على الحب فقط
خصوصا لما يكون حب قلبى كده
لو عقلك اشتغل ودرست الأمور صح
غالبا ممكن يخالف قلبك
ووقتها هتاخد فترة علشان تنسى المشاعر دى
أو هتاخد خطوة مع انسانه تانية وهتظلمها ..
وده خير إثبات أن الزواج وطلبه زى ما أمرنا الله عز وجل بيكون فى البيوت وان الأهل كمان بيفكروا معاكم
ووقتها اللى بيشتغل العقل قبل ميورطنا القلب ومنعرفش نتحرك.
#صراحة

16/07/2025

* فاكرة انتى تخبيطك فى المواعين وانتى بتغسليها علشان زوجك ضايقك!؟!
طب أخدتى بالك انتى من ( برطمتك) فى سرك لما زوجك قالك حاجة تعصبك؟!
فاكرة زعيقك فى بنتك لما صاحبتك زعلتك؟!

أهو هو ده نفس تصرف ابنك لما دخل ورزع الباب لما رفضتى حاجه ليه
وهى برضو نفس ( دبدبته ) فى الأرض لما عاقبتيه.

ـ لأ طبعا ..ازاى تقارنينى بيه أنا كبيرة وهو مفروض ميعملش كده .

* صح عندك حق ..مينفعش أقارنك بيه لأنك هتطلعى خسرانة فى المقارنة دى

ـ ؟!!! 🙄🤔

* أصلك انتى الشخص الكبير العاقل المسؤل والفاهم
ورغم كده
معرفتيش تتحكمى فى غضبك وعبرتى عنه غلط
أو شوفتى أنه حقك تطلعى غضبك كده
ما بالك بقى بطفل متعلمش يعمل ايه؟!!

📌الغضب مش ( عدم تربية)
الغضب شعور بنعبر بيه عن إحساسنا بالضيق..
سلوكنا ورد فعلنا المؤذى بسبب مشاعر الغضب هو ده اللى مش صحيح .

ـ يعنى أعمل ايه؟

* علمى ابنك ازاى يعبر عن غضبه ..
👈أعلمه ازاى يقول أنا مضايق وحزين من غير ميسبب أذى للى حواليه .
👈أعلمه ينفس عن غضبه بالتدريب على كذا طريقه ( الاستغفار/ النفس/ الحركة/ الوضوء/ وغيره) لحد ميهدى.
👈ثم بعد ميهدى نتناقش فى اللى حصل ونحط حلول .
👈أعلمه يكتب ويطلع انفعالاته على الورق.

📌هنا عملت ايه؟
( ربيت زوج بيعرف يحل مشاكل بيته وولاده من غير صوت عالى أو مد ايد
وزوجه وأم بتقدر تقول انها غضبانه أسهل متكسر البيت )
شايفة الفرق؟!

#هتفرق.
#التربية.

10/07/2025

📩اللي بيحصل طبيعي جدًا بعد المرور بتجارب صعبة أو خيبات كبيرة.
بيبقى العقل الباطن عامل زي جهاز إنذار كده يفضل يقولك:
( خلي بالك، مش عايزين نتأذي تاني.)
وبدل ما يشجعك تتحركى
بيوقفك...
بيخليكى دايما فى منطقه الأمان .

🌿 محتاجة تبدأى خطوات صغيرة جدا حتى وانتى خايفه
متستنيش من نفسك مجهود كبير إنما خطوة بسيطه تكفى....خطوة لأى حاجة .

🌿 تسجلى كل حاجه اتعلمتيها قبل فترة التوهان وأثناءه
( ده هيقول لعقلك انك بتتعلمى مش بتقعى بس)

🌿 تمرين كل يوم ( ليه أنا خايفه ؟ وايه ممكن يحصل اسوأ؟).

وكل ما ترجعي لنفس النقطة، فكرى ان ده مش فشل… دي محاولة جديدة
وده في حد ذاته شجاعة....إنما مفضلش مكانى
وافتكرى ان كل خطوة جديدة هي مخاطرة فى حد ذاتها ولكن كمان إنجازاتنا بعد كده
بتخلينا نقدر قيمة المخاطرة ونكمل 💜
#صراحة.