01/05/2024
⏰ لسة فيه أم ما تعرفش إن فيه جرعة تطعيم ڤيروس بي في أول ٢٤ ساعة من عمر الطفل ؟
⏰ لسة فيه أم ما تعرفش إن ڤيتامين ك حقنة بعد الولادة للطفل بيحميه من النزف و ڤيتامين د ٤٠٠ وحدة من أول يوم لعمر سنة يحمي من لين العظام ؟
⏰ لسة فيه أم ما تعرفش إن الخنفرة و الزغطة ظواهر طبيعية في الشهور الأولى ؟
⏰ لسة فيه أم ما تعرفش إن الرضاعة الطبيعية رقم واحد في أول ٤ شهور من عمر الطفل ، من غير اعشاب و لا ينسون و لا أكل و لا ميه ؟
⏰ لسة فيه أم بتعمل لولادها بيات شتوي من غير استحمام و لا خروج ..
و ما تعرفش إن قلة الاستحمام بتجيب جرب و قلة الخروج بتأثر على نفسية الطفل؟
⏰ لسة فيه أم ما تعرفش إن الصفرا مش عاوزة ڤيتامينات و لا لمبة نيون..عاوزة كشف و تحليل و متابعة أو حضانة ..
⏰ لسة فيه أم بتعرض ابنها للتلفزيون فترات طويلة و ما تعرفش إن ده بيعمل سمات توحد و فرط حركة؟
⏰ لسة فيه أم بتربط سرة المولود بحزام و ما تعرفش إن ده هيخليها تلتهب و إنها هتروح لوحدها في الغالب من غير ربطها ؟
⏰ لسة فيه أم بتكحل المولود و تغربله و ما تعرفش إن الرصاص في الكحل يضر الطفل و الغربلة تعمل نزيف في المخ ؟
⏰ لسة فيه أم قلقانه من قشرة الرأس للمواليد كل ما تشيلها بفرشاة و زيت زيتون ترجع و ما تعرفش إنها من سن ٦ شهور لسنة هتختفي تماماً ؟
⏰ لسة فيه أم بتعيط جنب طفلها لما يعيط جامد و يقطع النفس و يفقد الوعي ثواني و ما تعرفش إن دي نوبات حميدة و انفعالها الزائد بيخلي الطفل يزود فب عياطه كل مرة ؟
⏰ لسة فيه أم ما تعرفش تحمي طفلها ازاي من إنه يشرق في أكل أو ألعاب صغيرة بإنها تمنع المكسرات خصوصا الفول اسوداني و اللب و نشيل أي لعب صغيرة من قدامه و لو شرق تقلب الطفل على بطنه و تخبطه على ظهره خمس ضربات و ترجع تقلبه على ظهره و تضغط في نصف صدره خمس ضغطات
⏰ لسة فيه أم بنقلق لما تشوف بروز في ث*ي الوليد و بعض نقاط اللبن و تعصرهم و ما تعرفش إن دي ظاهرة حميدة من هرمونات الأم و التعصير ممكن يعمل خراج للطفل ؟
⏰ لسة فيه أم ما تعرفش إن نوم الرضيع متقطع جداً و بيبدأ ينتظم عند ٦ شهور و تقلق لو الطفل نايم و خملان و مش راضي يرضع ؟
⏰ لسة فيه أم ما تعرفش إنه الكالسيوم مش ڤيتامين و لا يعطى روتين إلا مع تحليل دم يثبت نقص الكالسيوم و اخد الكالسيوم بدون داعي يترسب في الكلى
⏰ لسة فيه أم ما تعرفش امتى تقلق على تطور طفلها ؟
شهر ما بيتخضش من الصوت العالي ،شهرين ما ضحكش، تسع شهور ما قعدش ، سنة و نصف ما مشيش.
⏰ لسة فيه أم ما تعرفش إن وزن طفلها بيتضاعف ٣ مرات في عمر سنة و طوله بيزيد بنسبة ٥٠٪ و مع كل زيارة للوحدة الصحية أو الطبيب لازم تقيس وزن و طول الطفل. ....
⏰ لسه فيه أم متعرفش ان علاج الحساسية الصدرية بالاستنشاق افضل من الحقن و الادوية
⏰ لسه فيه أم متعرفش إن الطفل ياكل طبيعى اثناء الحرارة و مينفعش تمنع الالبان والزبادى و السمك و اللحوم لان الطفل بيحتاج للتغذية اكثر في الوقت ده .
⏰ لسه فيه ام متعرفش ان تطعيم الروتا يعطى للأطفال عند سن شهرين واربع شهور و بيحميهم من فيروس الروتا اللى بيعمل نزلات معوية وجفاف حاد .
⏰ لسة فيه أم بتضرب ابنها عشان بيبلل سريره و هو نايم و ما تعرفش إن الضرب بيزود الموضوع؟
⏰ لسه فيه أم متعرفش ان تطعيم الانفلونزا الموسمية يعطى كل سنه في شهور 9 و 10 و 11 للوقاية من فيروس الانفلونزا و مهم جدا لأطفال الحساسية
⏰لسه فى أم قرت البوست واستفادت منه ومعملتش منشن وشير ؟ِِ؟
