22/12/2020
الشخير
النهارده حنتكلم عن مشكلة المشاكل بالنسبه لناس كتير وخصوصا المتزوجين حديثا وهى الشخير اللى احيانا قوة صوته بتوصل الى 90 ديسيبيل ( وحدة قياس شدة الصوت ) وده بيعادل الصوت اللى بيصدر من موتور مكنسة كهربائية او شنيور متوسط ... (شفتوا المعاناة بتوصل لايه)
الشخير هو الصوت المزعج المصاحب للتنفس اثناء النوم عند مرور الهواء خلال البلعوم ...وخصوصا مع فقدان عضلات البلعوم وسقف الحلق لتماسكها وانقباضها الطبيعى مما يتسبب فى اهتزازات شديدة لهذة الانسجة الرخوة اثناء مرور الهواء
ويساعد على ارتفاع الشخير وجود انسداد فى الانف لاى سبب مثل حساسية الانف او تضخم القرنيات او انحراف الحاجز الانفى او وجود انسداد جزئى بالحلق ناتج عن تضخم اللوزتين او طول اللهاه.
وتعتبر السمنه من العوامل الاساسيه وخصوصا اذا تراكمت الدهون فى منطقة الرقبه لدرجة ان احيانا الطبيب بيخمن ان المريض اللى داخل عليه فى العياده حيشتكى من الشخير بمجرد ما يدخل وقبل ما يقول السلام عليكم من شكل الرقبه والجسم مع العلم ان نسبة الشخير عند الرجال اعلى منها عند النساء بحوالى 40 %
المشكله بقي مش فى الصوت المزعج وبس . لا المشكلة انه لو تطورت الحاله بيحصل نوع من توقف النفس اثناء النوم وهنا الخطورة
الخطورة هنا على القلب مباشرة لانه العضو الذى لا يأخذ اى اجازة من العمل طوال حياة الانسان والفترة الوحيده اللى بيرتاح فيها هى اثناء النوم , بتقل عدد ضرباته ويبتدى ياخد راحته , لكن مع وجود الشخير بتوصل للمخ كمية اكسيجين اقل فيبتدى المخ يدى اوامره للقلب انه يزود من ضرباته لضخ كمية اكسجين اكتر فتلاقى اللى بيشخر قلبه بيدق بسرعه زى ما يكون طالع سلم ,
وتلاقيه بيصحى من النوم تعبان جدا زى ما يكون عامل مجهود مضاعف وكأنه ما نامش ولا ربع ساعه
وبالتالى مع استمرار الشخير لفتره طويله بتقل كفاءة عضلة القلب
وكده بيبقى الشخير مؤشر قوى لضرورة الاسراع فى العرض على الطبيب لتحديد السبب والعلاج
أخصائى الأنف والاذن والحنجرة
