Dr Rozetta kids clinic عياده دكتور روزتا رفعت للأطفال وحديثي الولاده

23/01/2024

لو البيبي رافض البيض ممكن نقدمهوله بطريقه تاني
نعمله اومليت ونضيفله جبنه قريش ومعلقة دقيق شوفان وفي طاسه فيها معلقه زيت زيتون
كده قدمناله وجبه غنيه بالبروتين مهم لعضلاته وفيتامين د وكالسيوم مهم لصحه العظام
والشوفان مصدر للالياف وسهل الهضم
وزيت الزيون مصدر للدهون الصحيه
الوجبه من بعد ال ٦شهور بعد تجربه كل نوع عشان نطمن ان مفيش حساسيه من اي حاجه

17/01/2024

📣 🔊يلا نصحح شويه معلومات غلط و شائعه جدااا للأسف ؛
*️⃣ الفينادون و إخواته مش دوا كحه.
*️⃣ الكيناكومب كريم مش للإستخدام اليومي للحفاضه.
*️⃣ الفلاجيل والله ماهو دوا للمغص
*️⃣ المضاد الحيوي مش خافض حرارة ، مش كل ما ابنك يسخن تجري وتجيبي مضاد حيوي ، ارحموا العيال.
*️⃣ الماكسيلاز مش لإتهاب الزور.
*️⃣ اللمبه النيون والكياس إياها مش علاج للصفرا.
*️⃣ اوعي تدي دولفين لبوس و بروفين مع بعض.
*️⃣ البسكوت والهوهوز مش اكل للطفل أول سنه ، ومتقوليش اصله بسكوت ساده😤

اوعي تشوفي البوست ومتعمليش لايك وفلو للصفحه 😊

10/10/2023

الماميز الحلوين اللي سالوني عن التطعيم

♦️ تطعيم الانفلونزا الفيروسية الموسمي♦️

🔵 بالنسبة للسن فبيبدأ للأطفال من سن ٦ شهور مش أقل من كده وللأطفال الاقل من ٦ شهور أمهاتهم بتاخد التطعيم وبيوصلهم عن طريق اللبن في الرضاعة الطبيعية الأجسام المضادة للفيروس

🔵 الحالات اللي ممنوع ياخدو التطعيم نادرة جدا زي :
١- الأشخاص الذين لديهم حساسية للبيض .
٢- الأطفال أقل من ستة شهور .

🔵 التطعيم عبارة عن حقنة عضل ( نصف سنتيمتر) وتؤخذ في عضلة الكتف.
💉 بالنسبة للاطفال من ٦ شهور ل ٩ سنوات لو أول مرة يتطعم هياخد جرعتين بينهم شهر وبعد كده بياخد جرعة واحدة كل سنة ، والجرعة بتكون كاملة.
💉والاكبر من ٩ سنوات جرعة واحدة كاملة حتى لو أول مرة.

أفضل توقيت لاعطاءه شهر سبتمبر لنهايه أكتوبر قبل دخول الشتا .
🔴الأعراض الجانبية للتطعيم ايه ؟؟؟؟؟
🔵قد يعاني الشخص من ألم في مكان الحقنة، ارتفاع درجة الحرارة، ألم في العضلات مع الشعور بالإجهاد ولكنها أعراض قليلة الحدوث وبسيطة.
➖➖➖➖➖➖➖➖➖➖➖➖➖➖➖➖➖➖➖➖➖

06/08/2023

مغص البطن عند الاطفال

👌- المغص اللي معاه النمو طبيعي و الوزن بيزيد بصورة طبيعية .. يبقى ان شاء الله متخافش منه
👌- المغص اللي مرتبط بموقف و ظرف معين (زي مغص كل يوم الصبح قبل المدرسة) .. يبقى ان شاء الله منخافش منه
👌- المغص اللي الطفل بينساه لما يلعب او يتفرج على التلفزيون و يرجع يفتكره لما يخلص .. يبقى ان شاء الله منخافش منه
👌- المغص اللي بيفتكره الطفل في ميعاد الوجبة .. يبقى ان شاء الله منخافش منه

** نهتم ب
⛔- المغص اللي بيصحي الطفل من النوم .. لازم كشف
⛔- المغص اللي معاه تغير في لون البول .. لازم كشف
⛔- المغص اللي معاه بهتان في لون الشفايف .. لازم كشف
⛔- المغص اللي معاه انتفاخ في البطن .. لازم كشف
⛔- المغص اللي معاه ارتفاع في درجة الحرارة .. لازم كشف
⛔- المغص اللي معاه خسسان و نقص في الوزن .. لازم كشف
⛔- المغص اللي بيستمر اكتر من ٣ ساعات متصلة .. يبقى لازم كشف

28/07/2023

بلاش نزول الاطفال في النهار🔥ولو نزلو يبقى ميتعرضوش لآشعة الشمس بشكل مباشر☀️

22/07/2023

الجو حر جدا يا مامي 😐

من فضلك تشطفيني بمياه فاترة كل يوم و تستخدمي لي كريم الزنك عشان ميحصليش حمو النيل 😍

اغسلي لي وشي و رقبتي بإستمرار عشان رقبتي متلتهبش 🤩

متحطتليش بيبي اويل خالص ولا زيت علي جسمي عشان بيفرهدني و بيزود حرارة جسمي انا محتاج اعرق زي الكبار عشان درجة حرارة جسمي تقل و عشان ميعمليش حساسية و حبوب 😋

و متحطيليش بودرة عشان البودرة بردو بتسد مسام جلدي و خصوصا عند الحفاضة 🤔

انا مش محتاج احط برفان خالص ولا عطور اطفال بس اتشطف كويس بالشامبو و انا هبقي ريحتي ريحة النونو النضيف 😍

حاولي تقعديني في درجة حرارة ٢٢ ولو مش هتعرفي يبقي لبسيني زي ما انتي لابسة، ايوة شورت و فنلة بنص كم واحدة انا كمان حران زيك بلاش تتقلي لي هدومي 😊

لو معنديش صن بلوك و هتخرجيني ممكن تشتري لي طاقية عشان تحمي راسي من الشمس و بعد ما نرجع محتاج دوش سريع عشان مفرهدش 😇

متنسيش يا مامي هدومي كلها قطن بلاش تلبسيني اي خامة تانية و بلاش وانا خارج بنطلونات جينز انا لسة نونو مش رايح مع صحابي و جسمي لسة صغنن مش هستحمل لبس الكبار اللي انتوا بتلبسوه حتي لو شياكة 😆

فهمتيني يامامي 🤭

& 👩🍼👶

22/07/2023

حملة_الـ_ولا_حاجة_من_بيبي_هاب رقم 7
رأس طفلك مبططة او مفلطحة او ابعادها مش مظبوطة كده 🙄

دى اسمها "رأس المهد" !

علشان المهد ده هو سرير الطفل ، والأطفال طول الوقت فى أول حياتهم نايمين فى المهد على ضهرهم و عضمهم لين فبتبقى راسهم مسطحة من الخلف👉

👈لو راسه بتنمو كويس يبقى ده ولا حاجة..
👈لو في ناحية مبططة اكتر من التانية، بنلاحظ بس حركة الرقبة- لو بيحركها في كل الاتجاهات- يبقى برضه ولا حاجة، بس لو بيفضل ناحية أكتر من التانية هيبقى محتاج علاج طبيعى للرقبة👉✅

الطفل مع الوقت بيتقلب فبتقل لوحدها وشعره بيتقل وبيغطى ما تبقى منها..

ببساطة لو البتاعة دى كملت مع كل الناس الشعب كله كان هيبقى براس مبططة 😅

⭕الحلول : الصبر .

👈قلقانة .. شيليه اكتر شوية 😊

👈قلقانة اكتر .. يبقى انتى ليكى الحل القادم واللي غالبا هيخليكي ترجعي تختارى تلقائى الحل الأول اللي هو الصبر و الشيل 🤷‍♂️
فى خوذة كدة سعرها ٢٠٠٠ جنيه استرلينى لعلاج الحالات دى و ساعات كتير مش بتعمل حاجة .. جيبى منها حلوة 😅😀

👈ما هي حملة الـ "ولا حاجة" ؟
هي تنويه من بيبي هاب ان فيه مئات من العلامات الطبيعية فى الأطفال بالذات فى حديثى الولادة اللى بتقلق الأهل جدا وبتبقى طبيعية ومش بتمثل خطورة على الطفل وغالبا بتكون الإجابة عليها (ولا حاجة).!

13/02/2023

🤱🤷‍♀️👇

مهم للامهات الجديدة ..

الواد بيعيط 😢😢😢

هنتكلم انهاردا ع اشهر الاسباب اللى تخلى الطفل يعيط عياط مستمر بدون توقف 😰

📌اول واشهر سبب.. طبعا الجوع وخصوصا ف الايام الاولى..العلامات اللى اشوفها ع الطفل تقول انه عياطه دا جووع هى
🚩مص فى الشفايف 👍
🚩بيحرك راسه يمين وشمال ناحيه صدر الام rooting reflex
🚩بيحط ايده فى بؤه

📌تانى سبب.. المغص
وشرحنا هيكون بالالفاظ اللى بتقولها الامهات عشان نفهم اكتر👏👏👏
مغص الاطفال عرض مشهور جدا ف الايام الاولى للطفل ..اول 3شهور
بيعتبر الطفل ممغص زى ما الامهات ما بتقول لو بيعيط اكتر م 3 ساعات يوميا لمده كام يوم ف الاسبوع 😿
المغص طبعا عرض طبيعى فى اول 3 شهور م عمر الطفل زيه زى الانتفاخ والزغطه والتفويض بسبب بداية تعود الطفل ع الجهاز الهضمى وكمان بيبلع هوا اثناء الرضاعه فبيحصل انتفاخات وغازات 😼
بس لو الاعراض زادت عن حدها لازم نعرف اى المشكله وناخد دوا يعدى حدة الموضوع دا

👈يبقى لو لقيتى يا مامى طفلك بيعيط عياط صوته اعلى م الطبيعى واشد حده ومستمر فجأة وبينتهى فجأه غالبا السبب بطنه

👈كمان لو لقينا الطفل بيحزق جامد مع العياط
بيجيب رجله ع بطنه مع احمرار وشه جامد ومع كل دا بيطلع ريح وبيستريح شويه بعد كدا غالبا بردو بطنه كدا السبب

السؤال بأه اللى بنتسأله ع طول هو المغص دا مطول يادكتوووور ؟ 😯
وهنا يأتى النور بداخل النفق المظلم 😂
الحمد لله يا ست الكل مبيطولبش
بيبدأ حدته تنزل م عند الاسبوع السادس واول الشهر التانى وبيبدأ يختفى ف 90 ٪ م الببيهات اخر التالت وال 10 ٪ الباقى بيعوز كمان شهر عشان يرتاح بس

📌تالت سبب
الطفل مبهدل نفسه وعامل حمام .. ودا سهل اننا نشوف ونغسل الطفل كويس بمياه فاتره مش وايبس 😯

📌رابع سبب
لعبنا واكلنا وشربنا وعملنا بُمب💩 وغيرنا بعد البمب 😂 يبقى ممكن يكون السبب عياط نوم زى ما الجدات مبيقولو
فالطفل فى حالة تعبه واحتياجه للنوم مبيحطش راسة ع المخده وينام كدا علطول 😢😒.. ابدا😏

لازم يعيط الاول😔 ..ففى حاله مفيش سبب م اللى فات وف عياط بنجهز ساعتها الطفل للنوم سواء بنهدى نور الغرفه وبنشيله او ينحطه ف سريره بنلاقيه تثائب ونام ع طوول😴😴😴😴

📌خامس سبب

الواد يا دكتور دارى ع الشيل😉 .. ااجى احطه ف سريرة يعيط ..كل الاطفال ف شهورهم الاول wants to be held محتاجين انهم يتشالو . كلام علمى اهوة والله
محتاجين هزهزة وانهم يشوفو وش مامتهم
الاطفال بيميزو صوت الام وبيميزو كمان ريحتهم المميزة ..فدايما بيعبرو ع احتياجهم لكدا بالعياط ..واول ما يتشال بيسكت 👈

📌سادس سبب

حران ذياده او بردان ذياده 😷😪
وخصوصا احنا ف الشتاء ولابس بطاطين الدنيا كلها ولازم يدكتور عشان ضهرة ونعرف نشيله ..مش لازم ياستى نشيله 😏😏😏..
بطانيه فوق بطانيه وجوا الشنطه دا غير التسع حتت هدوووووم ... مش خير ان شاء الله👊👊 !! حرام والله العظيم .. الطفل عشان يكون comfortable محتاج ذياده ع باباه ومامته حتة هدووم واحده مش عشره

📌سابع سبب

فى حاجه بتوجعنى 😞 لسان حال الطفل للى حواليه .. دورو ف جسم الطفل اللى بيعيط الله لا يسيئكو 😒
🚩ممكن فتله شعر لافه حوالين صباعه مانعه وصول الدم عامله الم رهيب
🚩ممكن تسلخات شديده ف منطقه الحفاض وكل ما يعمل حمام زى ما يكون بيتكوى م تحت
🚩ممكن حاجه قرصته زى نمله او حشرة
🚩ممكن اسباب كتيره بس ندور ونبص عليه مش كل عياط يبقى ملووح ولا عنده مغص

👈👈عرفنا معظم الاسباب

نشوف ازاى نهدى الطفل اللى بيعيط
طرق مش طبيه ولا دوائيه

Something to suck on
🚩اديلو حاجه يمص فيها
المص هيهدى ويظبط ضربات القلب
يهدى معدته ويهدى flailing limps او اطرافه اللى بتضرب دى اديلو سهايه او سكاته مش غلط ..طول ماهى نضيفه مش غلط

Music & rhythm
🚩شوفى بأه كلام الاجانب استغفر بيقولو غنيلو وشغليلو مزيكااا 🎠🎤🎷🎻🎼🎶
امهاتنا كانو بيغنو نام يا نونو نام وادبحلك جوز حمام 😂😂 اعملى كدا👏👏👏

Fresh air
🚩اطلعى بيه ف الهوا وهو قاطع م العياط هيهدى صدقينى وهيرتاح شويه ..دا لو مفيش سبب عضوى شديد للعياط

Warm water
🚩حمام دافى للطفل اللى بيعيط بيساعده ف الهدوء والنوم والاسترخاء

Massage
🚩ننيم الطفل على بطنه شويه وممكن نعمله مساج ع بطنه او نجيب رجله ع بطنه زى حركه التبديل دى
هتساعده لو ف مغص فى باطنه ويخرج ريح ويرتاح

😏

14/11/2022

لبن الام يقعد ٤ ساعات في درجة الغرفة (اقل من ٢٥درجة) او ٤ أيام بالثلاجة.الحليب الصناعي ساعتين في درجة الغرفة او ٢٤ ساعه بالثلاجة.
لو الطفل رضع منها تترمى.

25/10/2022

لما تدفعي مصاريف الحضانة وميروحش غير يومين ويكح ويعطس باقي الشهر 🥴

08/09/2022

#مصل #الإنفلونزا #الموسمية 2022/2023

فى ظل انتشار الموجة الخامسة من فيروس كورونا ، زادت أهمية إعطاء تطعيم الإنفلونزا نظرا لتشابه الأعراض بينهما حتى نقلل فرص الإشتباه بفيروس كورونا

لكن مهم نعرف إن مفيش تأثير مباشر من التطعيم ضد فيروس كورونا

فائدته :
يزيد مناعة الجسم ضد فيروس الإنفلونزا ( بعد أسبوعين من إعطائه ) فيقلل من حدة الاصابة بالإنفلونزا ومضاعفاتها

وقت إعطائه :
الافضل أن يعطى قبيل شهر سبتمبر حتي آخر شهر أكتوبر لكن يمكن إعطائه حتى شهر مارس حسب آخر توصيات الأكاديمية الأمريكية لطب الأطفال

مصل الإنفلونزا الموجود حاليا رباعي التكافؤ ( يتضمن 4 سلالات هى الأكثر انتشارا والأكثر تأثيرا طبقا لتوصيات منظمة الصحة العالمية لهذا الموسم )

اللقاح الرباعي في مصر له اسمين تجاريين هما
فاكسيجريب تترا Vaxigrip tetra من إنتاج شركة سانوفي

انفلوفاك تترا Influvac tetra إنتاج شركة أبوت و يعطي بداية من عمر ٦ شهور فما فوقها

جرعته :
الحقنة كاملة( نصف مل ) و تعطي بالعضل في العضلة الامامية للفخذ أو في عضلة الكتف و في بعض الظروف يمكن أن يحقن بعمق تحت الجلد

إذا كان عمر الطفل بين ٦ شهور و 9 سنوات وأول مرة يتلقي المصل فهو يحتاج جرعتين بينهما شهر

اما إذا كان قد سبق له تلقي المصل فهو يحتاج لجرعة واحدة فقط


#ينصح بإعطائه لكل طفل ( أكبر من 6 شهور ) و يعانى من تكرار النزلات الشعبية أو الالتهابات الرئوية أو عنده حساسية صدر أو حساسية أنف أو جيوب أنفية ، وكذلك لكبار السن أصحاب الأمراض المزمنة أو ضعيفى المناعة

#مسموح إعطائه للأطفال اللى عندهم مرض داون ، والحوامل والمرضعات

#ممنوع إعطائه للأطفال أقل من 6 شهور والأطفال اللى عندهم حساسية شديدة من البيض ، أو اللى بياخدوا أدوية فيها كورتيزون لفترات طويلة ( أكتر من أسبوعين ) ، أو علاج كيماوى

أو لو طفل أخده قبل كده وحصل له حساسية منه ( زيه زى أى دواء )

#قد نحتاج لتأجيل إعطاء المصل فى حالة الإرتفاع الشديد فى درجة الحرارة

إعطاء المصل ليس شهادة ضمان أن الطفل لن يصاب بمرض الإنفلونزا كما يتصور بعض الناس ، لكن على الأقل يقلل من حدته ومضاعفاته

ويعطى مصل الإنفلونزا الموسمية مع أي مصل آخر بدون اشتراط مدة زمنية محددة بينهم ، فيما عدا مصل الكورونا ينصح بالفصل بينهما مدة 14 يوم طبقا لتوجيهات وزارة الصحة.

لاجدوى من تكرار الجرعة خلال الموسم الواحد رغبة في تحسين مناعة الشخص ضد الإنفلونزا إذا كان قد تلقى جرعاته بشكل سليم

الاعراض الجانية للتطعيم :
ألم مكان الحقنة
ارتفاع طفيف في درجة الحرارة
آلام بسيطة بالجسم
احتقان بالحلق

02/09/2022

بعد اجازه طويله

رجعالكم بكره
مواعيدنا الجديده انشاء الله
سبت واتنين واربع
من الساعه ٤ل٨مساء
للحجز
٠١٢٢٤٣٣٥١٧٣

12/05/2022

😂😂

19/04/2022

بستغرب جدا لما يجيلي طفل ٣ سنين و لسه لابس البامبرز و بتبقي الام مضايقه جدا 😅و الاب صارف نص مرتبه علي البامبرز 😪😂
يبقي البوست ده مهم جدا لحضراتكم

هنتكلم عن ١٠ حاجات نقدر نعملها تساعدنا على التخلص من البامبرز بسهوله

1. اول حاجة نختار التوقيت الصح اللي الجو فيه ميكونش برد ،، احنا هنشيل بامبرز و الطفل مش هيمسك نفسه بين يوم و ليله 😂.. و في معادلة في الطب بتقول:
بلل + برد = مرض و كحة و خنفرة .. و طبعا احنا في غنى عن كده ،،🙏

2. هنلبس ملابس خفيفة ،، سهلة القلع و اللبس ،، مش يبقى الطفل لابس ١٤ طبقة و فوقيهم سالوبت بفيونكة 🤣،، هنفضل نقلع و نلبس الولد فيهم كل مرة و نبقى مستغربين ليه الولد مش بيلحق يمسك نفسه و متضايق من البوتي😂

3. افضل طريقة بتجيب نتيجة ان احنا نخلع البامبرز طول الوقت ((ما عدا وقت النوم)) ،، موضوع نقلع شوية و نلبس شوية من اكتر الاسباب اللي بتأخر الطفل في التمرين👌

4. التمرين على البوتي لازم يكون في كل وقت .. الطفل اللي بيروح حضانة .. زي ما بيتمرن في البيت لازم يكون يتمرن في الحضانة بنفس الطريقة .. مينفعش نبقى بنخلع الطفل البامبرز في البيت و بيلبسه في الحضانة🙏

5. طريقة حلوة: هنبتدي نقعد الطفل في الاول كل ربع ساعة .. و يكون معانا ورقة و قلم .. نسجل المرات اللي يعمل فيها و نبتدي نزود الوقت بين كل قعدة و التانية على حسب طبيعة الطفل لحد ما نوصل للوقت المناسب لكل طفل 💪

6. الطفل مينفعش يقعد اكتر من ١٥ دقيقة في المرة .. اللي هيقعد ١٥ دقيقة و مش هيعمل يبقى مش هيعمل .. اطول من كده تضييع لوقتك و ازعاج لطفلك🙏

7. من الغلطات اللي الامهات بتعملها انها تستخدم التلفزيون او الاي باد عشان نلهي الطفل عشان يرضى يقعد .. الطفل لازم يبقى قاعد و عارف ان قدامه مهمة محددة لازم ينفذها و يركز فيها .😰

8. الطفل في اوقات كتير بيرفض يقعد على البوتي عشان يا إما مش مرتاح من القعدة عليه او خايف منه .. لازم نختار بوتي مريح و مناسب لحجم الطفل و يكون الطفل متقبل شكله .. انا شفت طفل رافض يقعد عشان خايف من البطة اللي عليه 😂😂😂.. اول ما الاهل غيروه و جابو ((القصرية)) 😀العادية بتاعة الحاجة .. تقبل و قعد عادي👌

9. الطفل في سن التمرين على البوتي بيتعلم جدا بالتقليد .. ممكن نستخدم لعبة الطفل المفضلة كوسيلة ايضاح و نخليه هو يلبسها و يخلعها و يقعدها بنفسه .. و يديها المكافئة بتاعتها كمان🎁

10. الطفل في السن ده برضو بيحب الامتلاك جدا و بيحب اي حاجة بتاعته .. نزرع فيه ان البوتي ده بتاعه بس .. هو اللي يجيبه و هو اللي يشيله في المكان اللي يختاره .. و لو حب كمان نخليه يزينه بالاستيكرز او الطريقة اللي هو يحبها🎊

🤗🤗وطبعا مننساش المكافئة المادية و المعنوية في كل مرة ينجح فيها انه يعمل في البوتي🤗🤗
😎و نخلي بالنا من الـ ٣ ((لا))😎

🙄🙄لا عقاب - لا اهانة - لا ضرب .. ال ٣ حاجات دول بيجيبو نتيجة عكسية .🙄🙄

اهم حاجة و اخر حاجة : لازم نعرف ان التمرين على البوتي ده زيه زي التمرين على اي حاجة جديدة .. الطفل مش مولود متعلمها .. و في معظم الاحوال مش بيعند معاكم ولا يغيظكم 🙏.. انتي نفسك لما بتتعلمي حاجة جديدة عمرك ما هتتقنيها من اول مرة .. افتكري اول طبخة😂😂 .. افتكر اول سواقة 😢😂.. الصبر ثم الصبر ثم الصبر ..
متستعجلوش و متقارنوش طفلكم باي حد .. متضغطيش على طفلك 🙏...

31/03/2022

نختم بالبمبونايه بتاعه العياده 😍💖

31/03/2022

💖💖

31/03/2022

من فاعليات اليوم مستنينكم ❤️❤️