Dr.David Chest clinic

01/04/2022

رمضان كريم 😊

17/12/2021

من النهارده بداية إرسال رساله بالجرعه الثالثه للتطعيم ضد فيروس كورونا للي فات علي الجرعه التانيه ٦ شهور او اكثر وهتكون البدايه بالاطقم الطبيه وكبار السن وذوي الأمراض المزمنه ....
متعكم الله جميعا بالصحه والعافيه ..

05/12/2021

طبقا لمنظمة الصحه العالميه☝
اللقاح آمن للسيدات الحوامل والمرضعات او اللي بيخططوا للحمل مستقبلا ☝☝

18/12/2020

احمي نفسك ☝️

18/11/2020

توضيح مبسط لأهمية ارتداء الكمامه ..

13/11/2020

كلام صحيح ☝️

06/11/2020

مساء الخير،،
توضيح صغير للناس اللي بتسأل بخصوص فقدان حاستي الشم والتذوق فقط بدون ظهور اي اعراض اخري؟!!
في بداية الجائحه كان فقدان حاستي الشم والتذوق لابد أن يكون مصحوب باعراض اخري كالسخونه أو الكحه مثلا علشان نقول ان العيان ده مشتبه اصابته بالكورونا حسب تعريف منظمة الصحه العالميه لحالة الاشتباه،،،
اما حاليا ومع ازدياد الأبحاث والدراسات علي الفيروس وحسب تعريف منظمة الصحه العالميه أيضا للحاله المشتبه إصابتها بالكوفيد ١٩ يكفي فقط ان يكون هناك فقدان لحاستي الشم والتذوق علشان نقول ان العيان ده مشتبه فيه حتي بدون ظهور اعراض اخري لاسيما لو مفيش رشح أو زكام !!
إذن لو حضرتك حاليا فاقد لحاستي الشم والتذوق فقط لا تستهين بالأمر واطلب رأي الأطباء...
متعكم الله جميعا بالصحه والعافيه😊

د.ديفيد ثروت
طبيب الأمراض الصدريه

19/07/2020

لو لقينا الارقام دي في التحاليل اللي بتتعمل لحالة الاشتباه بالكورونا غالبا بيكون العيان فيه اعراض شديده وينصح بدخول المستشفي في هذه الحاله 🤚☝️

12/06/2020

مساء الخير علي حضراتكم ...
هنقول شوية ملاحظات كده بسيطه من خلال تجارب شخصيه وتعامل مع المرضي خلال آخر ١٠ ايام.....في البدايه خلينا نتفق ان الفيروس ما زال شرس جدا وفعال من ناحية انتشار العدوي،، بمعني ان الأغلبية هتتصاب لا محاله لكن علي حضرتك القيام بدورك في أخذ الاحتياطات والتعقيم ولبس الكمامه عشان تحاول بقدر الإمكان تمنع أو حتي تأجل الاصابه لحد ما يكون ظهر علاج أو الفيروس ضعف اكتر !!..بالنسبه للحالات فهي كتير جدا ومنتشره في كل مكان وعاوزك بدون مبالغه تعتبر اي حد معدي جنبك في الشارع أو المواصلات أو اي حته هو مصاب كورونا واتعامل مع هذا الأساس!!.تلاحظ ان حدة المرض والاصابه والاعراض قلت جدا عن الشهر اللي فات أو عن قبل أسبوعين من النهارده بمعني ، ٩٩% من المرضي بنشوف عندهم اعراض بسيطه وبيخفوا حتي بدون علاج وده ممكن والله أعلم يكون ناتج عن ضعف الفيروس!!.حاليا كل الحالات اللي بنشوفها لازم وحتما ولابد تعدي بمرحلة السخونه الا اذا كان العيان من كبار السن أو عنده سكر أو مرض مناعي أو من متعاطي مثبطات المناعه لكن غير كده الكل لازم يسخن في مرحله ما من المرض عكس الفتره اللي فاتت كان ممكن نشوف العيان وصل لالتهاب ريءوي مزدوج وهو مش سخن بل قد يصل العنايه المركزه من غير ما يعدي بمرحلة السخونه!!..مفيش حاجه اسمها باخد علاج ولسه سخن ، العلاج اللي بنديه في البروتوكول ده مش علاج ضد الفيروس نفسه فلازم تفهم ان الامر هياخد وقته الطبيعي لحد ما السخونه تنزل وغالبا ببستغرق ده من ٥ ل ٩ايام وبتزول الاعراض!!..حاليا اغلب المصابين بيشتكوا من اسهال ومغص بجانب الاعراض الاخري وقد تكون حرارة الجو ليها دور فده والله أعلم!!.مفيش حاجه اسمها اخد ادويه ترفعلي المناعه !!.تلاحظ زيادة عدد المسحات اللي بتطلع سلبي رغم وجود اغلب الاعراض وعليه فلازم اي حد يحس بالاعراض يبدا علاج فورا دون انتظار نتيجة المسحه وبكرر ده علاج بيساعد ان الحاله ماتتطورش للاسوا وبيحافظ علي الريءتين من أي عدوي تانيه مع خافض حراره وفيتامينات لكنه بالقطع مش علاج الفيروس نفسه !!..المسحه مهمه لانها بتحفظ حقوقك كمريض تم تسجيلك انك مصاب رسمي وبتحفظ حقوق المخالطين ليك !!..اشعة الصدر العاديه زي ما قلنا قبل كده ملهاش اي قيمه وضياع لوقت العيان ولابد من عمل اشعه مقطعيه!!
اخيرا دي مجرد ملاحظات شخصيه واجتهادات مني علها تفيد حضراتكم
دمتم بصحه وعافيه
د.ديفيد ثروت عوض
طبيب أمراض صدريه.

20/05/2020

نخلي بالنا يا جماعه من نقطه مهمه بعد اذن حضراتكم،،
لو انت حابب تطمن علي نفسك عشان حاسس بأي اعراض من فضلك لما تعمل اشعه علي صدرك يفضل تكون مقطعيه علشان العاديه غالبا بنسبه كبيره مش بتبين حاجه وحالات كتير لحد النهارده بنشوفها العيان زي الفل ومفيش ضيق تنفس وآلاشعه العاديه سليمه لكن المقطعيه للاسف بتوضح الشكل المتعارف عليه لل covid 19
انا بقول كده علشان العيان مايضيعش وقت عالفاضي ويجيب م الاخر وربنا يحافظ عالكل..
اشكركم ..
د.ديفيد ثروت عوض

18/05/2020

مساء الخير علي حضراتكم ويا رب يكون الكل بخير وصحه وعافيه وكل عام وحضراتكم بخير ،،
الرجاء من حضراتكم عدم الحضور للكشف بالعياده بدون ارتداء كمامه سواء المريض أو المرافق ويمنع منعا باتا من الدخول من لا يرتدي كمامه طبقا لمنشور وزارة الصحه والسكان للمنشآت الطبيه الخاصه أو العامه ،،
كما ارجو من حضراتكم عدم حضور أكثر من مرافق واحد فقط للحاله ولن يسمح بدخول أكثر من مرافق حرصا علي سلامة الجميع ومنع التكدس ..
متعكم الله جميعا بالصحه والعافيه والف شكر لكم ..

د.ديفيد ثروت عوض

02/04/2020

طيب نتكلم في المهم،،
بنقول ان الاخ كورونا ده في حالات كتير وصلت نسبتها تقريبا ل ٨٠% بيكون المصاب بدون اعراض وبيخف لوحده..تمام بس لييييه؟!
لان مناعة حضرتك بمنتهي البساطه اقوي منه وبتقدر تتغلب عليه طالما انت سليم صحيا ومفيش عندك اي أمراض مزمنه ولا بتتعاطي مثبطات مناعه زي مرضي الروماتويد مثلا وغيرهم ،،
ييجي واحد كده فرحان بنفسه ويقولك انا كده في السليم الحمد لله ماعنديش اي حاجه !!!.الله امال يا حبيبي ايه ريحة الدخان اللي طالعه منك دي؟!!.اه يا دكتور انا بدخن بس مش قصه يعني ده كام سيجاره كل يوم كده !!
ممممممممممممم،،
طاب تعالي بقي واسمع المفيد وانت حر ،،
مين قالك انت كده تمام وسليم وماعندكش مرض مزمن أو مناعتك كويسه🤔
هتقولي ازاي ؟
اقولك يا سيدي،،
اولا بالنسبه للامراض المزمنه عاوز اقولك ان كل مدخن عنده نوع ما من أنواع التهاب اغشية أو أنسجة الريءه المزمن حتي لو حضرتك مش حاسس بأي اعراض لكن دي الحقيقه ان عندكsome sort of chronic bronchitis أو حتي احتقان في أنسجة الريءه نتيجة النيكوتين واغلب المدخنين بيقولوا انهم بيصحوا الصبح بس يجيبوا بلغم مايل للسواد وحبة كحه كده مخشوله الصبح...عارفها ؟؟ اييييووه هي دي يا سيدي،،
عاوز اقولك كمان ان آخر كلام ان السده الريءويه حاليا بتبتدي في عمر ال ٢٥ مش زي زمان لما كنا بنقول بعد ال ٤٠ !!!
يبقي حضرتك كده شيءت ام ابيت عندك شيء مزمن في صدرك ومش هتكلم غير عن الصدر لانه مجال تخصصي وابقي اسال في باقي التخصصات عن الامراض المزمنه اللي فباقي جسمك من التدخين وانت مش حاسس !!!
طيب نيجي للمناعه،،
حضرتك النيكوتين ببساطه كده بيموت خلايا المناعه والدفاع في جسمك من اول راسك ومناخيرك لحد رجليك وكفايه تبص علي شكل سنانك عشان تعرف تأثير التدخين علي انسجة جسمك !!
وعشان كده دايما نلقي اي أدوار نزلات المفروض انها بسيطه لكنها بتكون رخمه شويه في المدخنين!!
هتقولي انت بتخوفنا ليه ؟
هقولك كل يوم تقريبا منظمة الصحه بتنزل نصيحه بالامتناع عن التدخين في الايام الصعبة دي لان المدخن أكثر عرضه للاصابه وكمان أكثر عرضه لتطور المرض سريعا في جسمه !!!
لو مش خايف علي نفسك خاف علي اهلك !!
انت بتكره وتبعد عن أشخاص علشان بس زعلوك مره، طاب يا اخي ده السيجاره الصغننه دي مش بس هتزعلك لأ دي هتقضي عليك وهتضرك انت واللي حواليك !!
خليك راجل وخد قرارك وزي ما بقول دايما الحق ارميها قبل ما ترميك وساعتها الندم مش هينفع!!
لا للتدخين ☝️🤚

ليلتكم فل وربنا يحافظ علينا جميعا

د.ديفيد ثروت عوض
طبيب أمراض صدرية...سوهاج

30/03/2020

مساء الخير 😃
امبارح اتعمل تدريب عن فيروس كورونا في وزارة الصحه بالقاهره تحت اشراف أستاذنا الكبير د.محمد عوض تاج الدين،،
في المحاضرة اتقال خبرين أو نقطتين اجمل من بعض ونتعشم انهم يتحققوا فعلا ،،
اول نقطه ان فعلا لقوا ان الاشخاص اللي اخدوا تطعيم الدرن المعروف بالBCG عندهم مناعه ضد فيروس كورونا عن الاشخاص اللي ماخدوهوش وفي استراليا حاليا حاطين ٤٠٠٠شخص تحت الدراسه في الموضوع ده والنتايج الاوليه مبشره جدا وده ممكن يفسر قوة مناعة المصريين لحد دلوقتي ضد الكورونا علي اساس ان كل الاطفال من الصغر خدت وبتاخد التطعيم..وسبحان الله كنا بنقول مصر من الدول القليله حول العالم اللي لسه فيها درن لكن طلعت نعمه برضه وحكمه الهيه 😄
تاني نقطه ...لقوا ان فيروس كورونا المستجد ده الاخ covid19 زيه تقريبا زي اغلب الفيروسات اللي بتصيب الجهاز التنفسي بتموت عند درجة حراره ٢٦ فما ازيد،، وده بيفسر قلة الحالات والوفيات في بعد الدول زي السودان مثلا مافهاش غير حالة وفاه واحده وبيدينا امل ان شاء الله ان مع دخول الصيف وارتفاع درجة الحراره الامور تتحسن !!
كل المطلوب مننا نلتزم قدر الإمكان ونقعد في البيت وان شاء الله هانت بس نعمل اللي علينا 😊

يومكم جميل

د.ديفيد ثروت عوض
طبيب أمراض صدريه..سوهاج

24/03/2020

تماشيا مع قرارات حظر التجول تم تغيير مواعيد العمل بالعياده لتكون من ١٢ظهرا حتي ٥ عصرا
وربنا يحفظنا جميعا

د.ديفيد ثروت عوض

للحجز والاستعلام..
ت..٠١٢٢٤٥١٠٨١٥

23/03/2020

مساء الخير،
نركز يا جماعه معلش،،
هو حضرتك لما تيجي تكشف وتخبي عليا الأعراض اللي عندك عشان خايف احسن اشك فيك انك مصاب بكورونا وشغال تلف وتدور عليا طاب جاي ليه؟؟
جاي تسمع من الدكتور اللي انت عاوزه ومشخص نفسك وجاهز طاب جاي ليه؟؟
جاي علشان اطمنك ان تشخيصك صح او اللي قالهولك صاحبك ولا جارك صح؟!!
من يومين بسأل عيان بيسخن ولا لأ راح فضل يضحك بهستيريه ويقولي يا دكتور لالا هاهاهاهاا انت بالك راح فين..علي اساس ان الناس قبل كورونا مكنتش بتسخن مثلا 😏 وبعدها قستله الحراره لقيتها ٣٨ !!
يا جماعه انتوا بتضحكوا علي مين؟!!
واحد اقوله بتكح يقولي اه والبلغم شديد جوي يا داكتور راحت فطت مراته قالتله يا راجل ده إنت صدرك منحور وعلطول تجول ماجدرش اطلع البلغم راح الراجل بصلها شذرا وارغي وازبد وقالها ده من اسبوع يا وليه اجعدي ساكته هتودينا فداهيه 😰😏😏 وكانه قاعد قصاد وكيل نيابه مش دكتور ههههه
هو فيه ايه؟
علي فكره عاوز اقول ان متوقع ان ٨٠% من المصريين هياخدوا كورونا والاغلب مش هيحس باكتر من اعراض نزلة برد بس شديده شويه ولو صحت الاخبار الجايه من منظمة الصحه العالميه عن ان الفيروس بيعيش في الجو ٨ساعات يبقي كلنا كده ب بربطة المعلم غالبا بنحمل الفيروس في اجسامنا واللي مجالوش هيجيله لا محاله !!
القصه ابسط من الرعب والهسهس الرهيب اللي بيوصل الناس انهم يخبوا اعراض مرضهم عن الطبيب واصلا اصلا لو حتي فرضنا اني اشتبهت فيك فطالما الاعراض لسه بسيطه هقولك اعزل نفسك في البيت اسبوعين وسوايل دافيه وبانادول وهتبقي زي الفل وده البروتوكول المتبع في أكثر من ٨٠% من حالات الاشتباه فارجوكم بلاش رعب زياده وخدوا احتياطاتكم الاحترازيه واستحموا ان شالله بالكحول بس بلاش رعب زياده وربنا يحمينا كلنا..

ليلتكم فل 😊

10/03/2020

يا ريت نركز مع بعض علشان نفهم صح ونكون علي درايه علميه سليمه،،
ده احدث تعريف للحاله المشتبه اصابتها بفيروس كورونا ،،
شرط أساسي وضروري مع ظهور الأعراض ان المريض يكون مخاااااالط ..نركز ها...مخاااالط لأماكن أو أشخاص ثبت بالفعل وجود إصابات فيهم ،،
ولم تثبت إيجابية اي حاله للفيروس في العالم كله لاي شخص لا تنطبق عليه الشروط الموجوده في التعريف ده وأهمها المخالطه لأشخاص أو أماكن ثبت وجود إصابات بها !!
يا ريت نقرا ونستوعب ده كويس منعا للخوف وربنا يحمينا كلنا 😊
د ديفيد ثروت ..طبيب أمراض صدريه

14/02/2020

يا ريت ناخد الكلام بجديه عشان الندم بعد كده مش بينفع

تسبب أمراضا كارثية
للتفاصيل http://bit.ly/2HnPi2p

12/01/2020

صورة للجهاز التنفسي لطفل صغير اختنق بسبب نصف حبه فول سوداني ، في السن الصغير اقل من ثلاث الي اربع سنوات بيكون حجم المجرى التنفسي يساوي بالضبط حبه مكسرات وبالتالي لو الطفل تناولها بالفم واخطأت الطريق للمجري التنفسي ممكن بسهوله جدا تسبب له الاختناق ولا قدر الله الوفاه ، كل الحذر من تقديم المكسرات او الفاكهه المجففه او حبات الفيشار او الكاندى او اى طعام صلب في نفس الحجم تقريبا للسن الصغير ده او حتي تركها في متناول ايديهم، نخلي بالنا من فضلكم و ربنا يحفظ أطفالنا جميعا.