24/11/2021
مازلنا بنتكلم عن جرثومة المعدة
======================================
كل الهوجة اللي حصلانة بخصوص جرثومة المعدة (H.pylori) من مرضي و معامل و ناس شغالين في صيدليات و أطباء سببها الأساسي و بكل وضوح هو هاجس تحولها لسرطان في المعدة! و دا من كتر ما الناس بتخش عالنت و بتسمع من صفحات غير متخصصة...
☑️ هل تعلم ان نسبة التحول للسرطان بعد الشرعليكم كلكم لا تتجاوز 0.1- 1.5% و لازم يكون مصحوب قبلها بتغير معين في جدار المعدة metaplasia و دا نادرا ما بنشوفه لما بنعمل للعيان منظار....
اذا الهاجس دا أوفر!!
⛔ طب ليه بقول الكلام دا؟ للآتي:
☑️ هل تعلم انك اذا أكلت اكل من برا غير صحي junk food هتبقي نسبتك للإصابة أكتر.
☑️ هل تعلم انك اذا اكلت اكل مفهوش ألياف و قللت من الخضار و الفاكهة.. و كترت من الموالح و السبايسي هتبقي ممكن النسبة مساوية او أكتر.
☑️ حضرتك لو تخين او عندك كرش بتبقي عرضة لأمراض لا حصر لها زي دهون الكبد (و دا هيبقي بؤرة الاهتمام مستقبلا بعد القضاء على البلهارسيا و فيروس سي) و زى الضغط والسكر و أمراض القلب و الذبحات الصدرية...
طب ليه حضرتك مش بتهتم مثلا تخس او تظبط أكلك زي اهتمامك بتحليل (غالبا مش بببقي صح) و معندكش شكوى أساسا.
☑️ حضرتك لو مدخن عارف لستة الأمراض اللي بيسببها التدخين... اهي دي اخطر ١٠٠٠٠٠ مرة من الجرثومة.
⬅️ الكلام دا بنقوله لسببين أولهم طمأنة الناس شوية و ثانيهم و دا الأهم هو زيادة توعية الناس بتغيير نمط حياتهم بخصوص الأكل والشرب و ممارسة الرياضة و فقدان الوزن لو تخين... للوقاية من حاجات أهم و أخطر ١٠٠ من جرثومة المعدة... لأن الوقاية خير من العلاج.
اتمني لحضراتكم جميعا السلامة والعافية ليكم و لصحابكم و احبابكم.. و ربنا يحفظكم من كل سوء 🌹💖.
دا بوست سابق لجرثومة المعدة للي حابب يعرف اكتر 👇👇
https://www.facebook.com/208467612937780/posts/1296363010814896/
دكتور/ رامي ممدوح الشرقاوي
استشاري الجهاز الهضمي و الكبد و المناظير
٠١١١٠٦٨٠٠٢٩
