30/03/2026
سامع قلق كبير بسبب انتشار مرض السحائي اليومين دول…
وكل شوية حد يبعتلي: “يا دكتور هو الموضوع فعلاً منتشر؟!
أولًا: الحمد لله
مفيش انتشار مرعب ولا حالات زي ما الناس متخيلة
بس ده مش معناه نطنش ❌
طيب هو السحائي ده إيه أصلاً؟
ببساطة… ده التهاب بيصيب الأغشية اللي حوالين المخ
وبييجي غالبًا بسبب ميكروب
ممكن يكون بكتيريا (وده الأخطر)
أو فيروس (وده أخف شوية)
طب بينتقل إزاي؟
عن طريق الرذاذ… كحة، عطس، زحمة، اختلاط قريب
يعني الأماكن المقفولة والزحمة بتساعده ينتشر
أعراضه بقى اللي بتخدع أي حد
حرارة عالية
صداع شديد
ترجيع
خمول أو الطفل مش على طبيعته
وممكن كمان:
تيبس في الرقبة
حساسية من النور
تشنجات في الحالات الشديدة
✔️ نتابع أي حرارة مش مفهومة
✔️ مانستهونش بأي خمول أو تغير في سلوك الطفل
✔️ نكشف بدري لو في أعراض غريبة
والأهم التطعيمات هي خط الأمان الحقيقي
لا نرعب نفسنا… ولا نستهون
نفهم… ونركز… وناخد بالأسباب
علشان نحمي ولادنا
