معمل CBC LAB

20/06/2025

حاله النهارده طفل عمره 10 أيام مامته جايباه للإطمئنان عشان إصفر شويه بعد الولادة وطلع عنده نزيف علي المخ بسبب الاهل !

الصفرا اللي بتبدأ من بعد أول يوم دي إحنا بنسميها صفرا فسيولوجية ، بتبقي غالبا نتيجة إن البيبي مرضعش كويس أو كمية اللبن عند الأم قليلة .
بدأنا نفحص الطفل الفحص الروتيني بتاعنا ، الطفل مستوى الوعي عنده منخفض والرضاعه بتاعته سيئه جدا ومش مستجيب معانا للتنبيه والمؤشرات الحيويه بتاعته كلها نازله سواء تشبع الدم بالاكسجين أو النبض و ضغطه ودرجة حرارته قليله مع شحوب بالوجه وبرودة بالاطراف ملحوظة جدا ؛ يعني الموضوع بيدي إحتمال حاجه أكبر من الصفرا او الولد دخل في صدمه بسبب ميكروب بالدم مثلا لكن مبدئيا خلينا نحافظ علي حياته لحد ما يتم التشخيص الدقيق
بدأنا سريعا ندي أدويه الصدمة مع الأكسجين وأدوية معينه بتمنع هبوط الدوره الدموية ،الطفل إلى حد ما بدأ يفوق معانا وبدأنا رحلة البحث عن التشخيص وبعدها العلاج ، في الحالات اللي زي كده بنفكر في أسباب زي نقص في الصفائح الدموية أو نزيف داخلي او انيميا تكسيريه أو ارتفاع سيولة الدم نتيجة نقص عوامل التجلط في الدم وده بيكون غالبا في البيبيهات ناقصي النمو أو ممكن لأسباب وراثية ..

فحصنا الولد تاني وسألنا الأهل هل حصل نزيف من أي مكان أو الولد رجع دم مثلا او فيه تغيير في لون البول أو البراز ، والأهل اجابوا بالنفي ..
طلبت من الممرضة لما تغيرله البامبرز توريني الحمام بتاعه وللأسف زي ما توقعنا كان فيه دم كتير ف البراز ..
سحبنا للبيبي صوره دم و تحاليل كامله طلعت الانيميا وصلت نسبة الهيموجلوبين ل 6 مع ميكروب بالدم ..
بسرعة طلبنا للولد دم وبلازما عشان نصلح الأنيميا والميكروب اللي في دمه وبدأنا نفكر في السيناريو المحتمل الأسوأ (نزيف في المخ )

طلبنا اشعه مقطعيه على المخ وقبل ما الاهل يروحوا يعملوها الطفل بدأ يتشنج مع الأسف وده ييأكد بنسبة كبيرة احتمالية النزيف ودي فعلا كانت نتيجة الاشعه المقطعيه لما طلعت، بس بفضل ربنا إن النزيف مكانش واخد مساحه كبيره في المخ و بدانا نسأل نفسنا إيه اللي يخلي طفل في العمر دا يجي بنزيف في المخ اكيد موقعش من السطح مثلا ! ولو كان وقع من إيد أهله كانوا هيعرفونا وكانوا يجوا بيه جري في وقتها !!
المهم دلوقتي إن التشخيص تم تأكيده shaken baby syndrome أو" متلازمه الطفل المهزوز " نتيجه الغربله او الهشتكه العنيفه في عمر أيام دي المهم بدأنا نتحرك سريعا في اتجاهين أولا التعامل مع النزيف بحيث يبدأ حجمه يقل ، و ف نفس الوقت نصلح السيولة العاليه ف الدم عشان ميحصلش نزيف أكتر والطفل يمو.ت مننا فجأه .

بدأنا ندي للطفل محلول اسمه مانيتول وده بيستخدم للتعامل مع بعض حالات النزيف بالمخ وبيقلل حجمه ، في نفس الوقت اللي كنا بندي الدم والبلازما والمضادات الحيويه والمحاليل وعلاجات التشنجات وبنتابع العلامات الحيويه كل ساعة ..
بلغنا استشاري المخ والأعصاب وطلب نكمل على نفس البروتوكول اللي ماشيين عليه مع وضعه تحت الملاحظة المستمرة ..

الولد بعد 5 ايام معانا بدأ يستقر ، والتشنجات وقفت والانيما والسيولة اتصلحوا والعلامات الحيوية اتظبطت وبدأ الرضاعة والتنفس الطبيعي طلبنا اشعه مقطعيه جديده وبفضل الله مفيهاش حاجه ، وبعدها بيومين الأهل جم عشان يستلموه من الحضان
كان أول سؤال سألناه للأهل لما جم : انتوا عملتوله سبوع ؟
وبكل سرور وانشراح قالوا ايوه طبعا عملنا سبوع، ده أول طفل لينا ولازم نفرح بيه ..
وطبعا حطيتوه في الغربال وغربلتوه ؟
وبانشكاح أكبر من الاولاني : طبعا غربلناه عشان يطلع قلبه جامد !!

طيب يا جماعة اللي انتوا عملتوه ده أقذر حاجه ممكن تتعمل للبيبي اللي لسه مولود وده كان السبب إن الولد يحصل عنده تكسير في كرات الدم الحمرا والصفايح واحتمالات كبيره للنزيف ، من اخطرها نزيف المخ لأن البيبي بتبقى الأوعية الدموية للمخ عنده بتبقى هشه جدا وعرضه للتمزق والنزف بسهولة جدا ..وكان ممكن الولد ده يعيش باعاقه بدنيه أو ذهنية أو الاتنين مع بعض طول عمره بسبب الحركة دي ..
الشاهد من القصه : رجاء حار من الأهل بلاش تغربلوا ولادكم وهما هيطلعوا إن شاء الله قلبهم جامد وحلوين وطعمين من غير غربله

16/06/2025

المريض لما دخل المعمل جابلنا عينه براز باللون الاسود black stool color وعمال يقول لنا ده بيحصل كتير معاه ، لحد ما سأل chatgpt هو ايه اسباب اللون الاسود للبراز !

قال له نزيف بيحصل ف الجهاز الهضمي أو ممكن يبقي قرحه موجوده وفي اخطر الحالات يبقي كانسر ! المهم انك متسبش نفسك ولازم تروح للدكتور

هو اخد الكلام وطبقه وجالنا المعمل يقولنا ع التحاليل الي احنا المفروض نعملها له بناءا ع نصيحه chatgpt !

احنا عملنا فحص البراز الكامل stool test طلع طبيعي مفيش اي حاجه فيه غير اللون الاسود !

عملنا بعد كدا تحليل f***l occult blood in stool بطريقه immunological عشان هو كان مستعجل ومش عايز يطبق الشروط ، والتحليل طلع سلبي !

طاب اقترح عليا انزل لدكتور تخصص ايه اكشف عنده ، طاب مش يمكن انت شغلك غلط ! ، طاب ما نعيد التحليل ف معمل من الي فروعه ف كل حته انا مش مستريح لشغلك !

هو خلاص اقتنع أنه ينزل للطبيب ، بدل ما يغير المعمل ، وبعد كدا قالي هنزل للدكتور فعلا بس لازم اطلع ع المستشفي دلوقتي اخد محلول الحديد اصل نسيت جرعته امبارح !

محلول حديد ! ، انت بتاخد محلول حديد ؟

: اه من شهر ي دكتور هو والبرشام بتاعه ، اصل الانيميا عندي في النازل

طاب وانت وانت داخل بالبراز الاسود بتاعك مقولتش ليه انك بتاخد حديد ؟

: هيفيدك بايه ي دكتور ، انت بتسال في الي ملكش فيه الصراحه.

لمعرفه المزيد عن ألوان الاستول وباقي فحص الاستول الكامل وبيتم ازاي في المعمل تقدر تحجز كورس البارا اونلاين ليبدأ يوم 11 من شهر 7 لمده 6 اسابيع

16/06/2025

..من كام شهر حد من زمايلي كلمني انه والده عنده سكر بس بعد ما استيقظ من نومه سلوكه غريب جدا بيزعق فيهم وبيشتم وبيخبط في البيت ودا خلافة طبعه المعتاد انه رجل هادئ طيب دمث الخلق..اول كلمة قولتهاله قيس سكره حالا..ماكملش دقيقة وقاس قالي سكره 50..دا هبوط سكر شديد ولازم نتصرف قبل ماندخل في غيبوبة هبوط بسرعة معلقة سكر في نص كوب ماء بعد ربع ساعة قيس لو سكر وصل ل 70 مجم او اكثر (3.9 ملي مول) بنعمل تثبيت للسكر لمنع الهبوط الارتدادي بنشويات معقدة زي زبادي او لبن او فاكهة او خبز او بسكويت دي قاعدة ال15..الحمد لله كلمني بعدها والده فاق وماكانش مستوعب اللي هو عمله خالص واعتذر للجميع..احد ملامح هبوط السكر هو تغير الحالة المزاجية وتغير طبيعة الشخص عن المعتاد..الهبوط الشديد هو اللي بيحتاج فيه الشخص مساعدة شخص اخر لمساعدته في رفع سكره سواء بتقديم الطعام والشراب او حقن الجلوكاجون او تركيب جلوكوز في المستشفي بدون تحديد رقم محدد زي زمان وبنحاول بسرعة نتصرف قبل مايدخل المريض في تشنجات بسبب نقص سكر او اضطراب وعي وغيبوبة هبوط سكر وفي حالة فقدان الوعي او اضطرابه ممنوع تناول سوائل بالفم بندهن اللثة الداخلية بالعسل الابيض او بعجينة من السكر المخلوط بحبيبات الماء لحين الوصول للطوارى او بنحقن جلوكاجون عضل او وريد او تحت الجلد حالة توفره. .معلومات بسيطة بس ممكن في يوم تنقذ بها شخص عزيز عليك.

Dr Amr omar

09/05/2025

سور المستشفي دا سور عجيب ..
سور بيفصل بين عالمين ..

عالم جوا عايش بين الألم والمعاناه ..صرخات المرض ..حوادث وفقد ودموع ... وكله بيتمني ولو جزء من نعمة العافية والصحة

وعالم برا غافل ..عايش في الوهم ...ساخط ع حاله وظروفه وهو في نعيم لو يعلم بس قيمته

ربنا يشفي مرضانا
ويرزقنا شكر نعمه
اللهم أدم علينا الستر والعافية

-منقول

#رسايل

08/04/2025

عايز اعمل تحليل لقياس الدهون

: ماشي ي حج صوم ونعمل lipid profile

انا مش عايز تقيسلي كوليسترول ودهون ثلاثيه انا عايز الهرمون الي بيقيس لي الدهون

هرمون ايه ي حج الي بيقيسلك الدهون هو التحليل اسمه lipid profile

: شكلك مش دكتور ومش فاهم

شكرا ي حج وبعدين انت مش محتاج هرمون انت لو بصيت في المرايه هتعرف نسبه الدهون لوحدك !
...............
فعلا في هرمون لقياس مستوي الدهون عندك وهو هرمون leptin hormone

وده لان الهرمون بيتم إفرازه عندك من adipose tissue (النسيج الدهني) فأنت تخيل كل لما النسيج الدهني عندك يزيد بيحصل ايه في الهرمون !

هرمون leptin بيتم إفرازه وبيشتغل بشكل أساسي في المخ وله كذا دور في المخ ، بس من أهم وظائفه أنه يخليك تبطل اكل وتحس بالشبع عشان وزنك ميزيدش ، ده فعلا بجد هو الي بيتحكم في أكلك.

اصل المخ بالنسبه له adipose tissue ده مخزن الطاقه علي المدي الطويل ، يعني الجسم مش بيتعامل مع الدهون بتاعتك ووزنك الزائد أن ده وزن زائد وهيأثر علي شكلك ، هو بيكون شايف أن دي طاقه متخزنه للزمن ، وقت ما تدخل في صيام طويل او انقطاع عن الأكل يبدأ يعتمد علي المخزن ده ، والي بيتحكم هنا هرمون leptin ، المفروض البني ادم الطبيعي له كميه اكل معينه بيأكلها وأول ما leptin يدي اشاره للمخ أن خلاص كدا احتياج الإنسان من الاكل انتهي اديله احساس بالشبع ( انت توقف اكل) (طبعا مفيش حد مننا بيستجيب للاحساس ده وبيكمل اكل والنتيجه وزن زايد)

ولذلك مستوي leptin hormone في الدم بيتناسب طرديا مع كميه ونسبه adipose tissue الي عندك (طبعا أنا وأنت وكلنا كميه الدهون عندنا مش واحده )

طاب ما أنا بعمل وزن inbody وبيطلع لي فيه total fat mass بتقولي أن الدهون عندي كتير فمحتاج أخس ، ايه الفرق بقا

: نظريا مفيش فرق مستوي leptin وقيمه total fat mass ماشيين في نفس الاتجاه انك عندك دهون كتير يعني وزنك زايد

ولكن انت بقا لما تعمل تحليل leptin hormone ويطلع عالي عشان عندك دهون عاليه أو اعلي من الطبيعي ، وباين عليك الوزن الزايد ده مش مجرد هرمون زاد وخلاص دي كدا بيسموها leptin resistance هنا الجسم مش بيستجيب لمستوي الهرمون الطبيعي فينتج إصابتك بالسمنه والوزن الزائد شبه كدا حاله insulin resistance الي بردو الجسم مش بيستجيب للأنسولين فينتج مرض السكري

هتعرف أن عندك leptin resistance من حاجتين لو انت وزنك زايد وباين عليك فعلا وفي نفس اللحظه معندكش سيطره علي الاكل يعني بتجوع رغم انك لسا واكل فدي كدا leptin resistance ( لانه هو الهرمون الي متحكم في الشبع ) وكمان leptin resistance بتقلل معدل الايض basal metabolic rate ( ودي جمله بتطلع منك انا وزن زائد بأكل كتير مش عارف اسيطر علي الاكل الدكتور قالي معدل الحرق عندي قليل ومفيش حل )

ما تعمل تحليل leptin hormone طيب ما جايز هو عالي في الدم وعندك فيه resistance ويبقي ده سبب كل مشاكلك !

علي الجانب التاني ، في ناس عندها انخفاض في مستوي leptin يعني بالنسبه للجسم مفيش دهون متخزنه والجسم يعتبر كدا معندوش طاقه للمدي الطويل فيهيأ نفسه لحاله starvation ، بس الناس دي في الغالب بيكون انخفاض مستوي الهرمون عندها سببه جيني (وعلاجهم بيكون leptin replacement therapy ، بديل الهرمون عشان يبقي وزنهم في الطبيعي مش مجرد زود أكل هتزيد وزن )

عموما هرمون leptin مش مجرد دليل أن عندك وزن زائد ، الدراسات والابحاث أكدت أن الهرمون ده لو فيه مستوي غير طبيعي فهو هيكون عامل مشترك لحدوث امراض في المخ والجهاز العصبى neurodegenerative disease وهيكون عامل مشترك لحدوث autoimmune disease وكمان fatty liver و كمان زياده فرصه التعرض للعدوي وكمان زيادة فرصه الاكتئاب.

يعني انت ممكن يبقي عندك مرض متعلق بالمخ أو مرض مناعي أو كبد دهني ومحدش جه في باله أن يدور علي مستوي leptin hormone ويرجعه طبيعي تاني ، جايز مشكلتك المرضيه مضاعفاتها تقل أو ينتهي المرض نفسه !

07/04/2025

كان كفيفًا ثم ابتلي بسرطان بالشرج فاستئصل وعاش بتحويلة للبراز بجانب البطن ثم أتانا بورمٍ في البنكرياس بعد عدة سنوات من الورم الأول، لم أقابل مثل تلك الحالة قط ولا قابلها أحدٌ من أساتذتي أعني " ورم الشرج بعده ورم البنكرياس " خلال سنوات مهنته
رجل يعمل مؤذنًا بالمسجد المجاور وقد ساعده على ذلك حسن صوته ولابد، كان المرافق له ابنه لأنّه كان في عنبر الرجال فمنع ذلك أن تكون زوجته مرافقة له، حاولت أن أوفر له حجرة خاصة لتكون زوجته المرافقة بحكم أني كنت أكبر الأطباء المقيمين وقتها لكن لم يتيسر ذلك لانشغال كافة الغرف..

اكتشفت أثناء المرور المفاجئ على القسم الداخلي فجرًا أن الممرضات سمحن لزوجته بالبقاء معهن إشفاقًا عليه وعليها، تغاضيت عن ذلك لأنه وافق رغبتي الأولى وهو حل وسط لا بأس به، كانت الزوجة تترك حجرة الممرضات التي تختبئ بها وتخرج بين الحين والآخر لتغير لزوجها كيس البراز وتنظفه وتساعده على الدخول للحمام وتطعمه وتصبّره، هذا والمستشفى عندنا لا يسمح لأحد بأن يخدم المريض سوى العاملين بالمستشفى، بمعنى أن العاملات والعمال كانوا مسؤولين تمام المسؤولية عن نظافة ومساعدة هذا المريض، وموضوع المرافقين ممنوع كليا إلا من جهة إنسانية كمريض طاعن في السن أو كفيف أو طفل ولا يتحمل المرافق أية مسؤولية عن المريض، لكن الزوجة رفضت وكانت تحرص ألا يخدم زوجها أحدٌ سواها!

كان الزوج حسن الصوت كأنّ الابتلاء امتد في جسده بقدر ما امتد الحسن في صوته، وكنت أصعد ليلًا لأسمع منه بعض التلاوات والتواشيح نلتف حوله مع بقية الزملاء والمرضى، انصرفت زوجته في يومٍ لتساعد أبناءها في شأن دراسي لعله الامتحانات أو ما شابه على أن تعود ليلًا، أثناء المرورعليه طلب أن يسالني سؤالًا فهمت من طريقته أنه لا يريد أن يسمعه ابنه،
صرفتُ الابن فإذا بالمريض يطلب ألا أسمح لزوجته بالبقاء في المستشفى، فتعجبت، دي ممكن يحصل لها حاجة لو منعتها!! فبكى الرجل بكاء طفلٍ عاجز وهو يردد "الديْن تِقل قوى وأنا مش هعيش عشان أسده "
رحمك الله! فما أجمل وفائها وحيائك !

Hossam_Hamed

05/04/2025

شاب ثلاثيني بيشتكي من نوبات اسهال بقالها اسبوع جرب لها كل علاجات الاسهال.

الاسهال بيحصل خمس مرات يومياً ، جاي مع زوجته اللي بتشتكي أنه بيهلوس بكلام مش مفهوم يومياً مساءاً بقاله ٣ أيام.

بالفحص الضغط منخفض ٨٠/٦٠ بدون ارتفاع بالحرارة ، لا يوجد غمقان بالجلد أو الفم مما يستثنى الأديسون قليلاً.

بالفحص القلب سليم و الصدر سليم لكن ساعة فحص القلب (و انا بفحص القدم ) لقيت تاتّو .. حضرتك التاتّو دا عملته امتي ؟
من سنتين .

إحنا هنطلب فحوصات كتير هيكون منها الفيروسات الكبدية و الايدز ، أنا عارف إن حضرتك رجل متزوج و محترم لكن الايدز ممكن يحصل بعد التاتّو بسنين ك AIDS defining illness .

و هيكون من الفحوصات رنين علي الدماغ لأن الايدز ممكن يجي ب CNS lymphoma أو brain toxoplasmosis أو HIV encephalitis.

للأسف تحليل ال HIV جه ايجابي و تم التحويل علي مستشفيات الحميات لصرف العلاج المناسب.

دكتور احمد محفوظ استشاري الأمراض الباطنة.

04/04/2025

من 10 سنين بنت إتحجزت معانا عشان تعمل عملية قلب مفتوح لإستبدال أحد صمامات القلب وقتها كانت مخطوبة
وخطيبها كان بيجي معاهم
خطيبها كان كثير السؤال عن تفاصيل الجراحة وخصوصا في ما يتعلق بتأثيرها على الجواز و الخلفة وكنت بجاوبه بقدر الإمكان بشكل واضح وبمنتهي الأمانه، لأنه بعد تغيير الصمام بأخر معدنى بيبقي الحمل حرج وبيحتاج متابعة لصيقة مشتركه بينا وبين أطباء النسا لأنك بتدخل في معادله الحفاظ على الأم والصمام والجنين في نفس الوقت بما تحتوية من تضبيط جرعات أدوية السيولة وإحتماليه حدوث نزيف أو إستخدام نوع آخر عند إقتراب الولادة وتفاصيل طبية أخرى كثيرة عشان كده بيفضل إستخدام صمام نسيجي أو تأجيل الجراحة بقدر الامكان لغاية لما يتم إنجاب طفل أو اثنين لكن احيانا الظروف مش بتسمح بكده ،

المهم البنت ربنا أكرمنا وأكرمها وتمت العملية كأحسن مايكون وتعافت بعد الجراحة سريعاً وخرجت من المستشفى كمان ولكن بدأت ألاحظ عند حضورها للمتابعه إنها بتذبل كده واحده واحده وذلك رغم إن علامتها الحيوية ممتازة وجميع فحوصاتها بعد الجراحة جيده جدا،ولكني لاحظت تزامناً مع الذبول ده ظهور حاله واضحه من الضجر والملل علي وش خطيبها ،

مع تكرار مستمر لعبارات من نوعية "دى مبقتش قادرة تاخد نفسها" أو " مبقتش تمشي مفروده زى الأول" أو "بتنهج مع أي مجهود" والحقيقة إنها كانت بتسمع كلامه ده وتنفذه بالحرف الواحد رغم انها عضويا كويسه جداً لكن كلامه أفقدها تماماً الثقه في نفسها وفي آخر مره متابعة خلال أول ثلاث شهور بعد الجراحه قالي قدامها "بيتهيألي يا دكتور دى عمرها ما تستحمل الحمل " وقتها عرفت إن العلاقه دى سامه جداً وهاتخلّص علي البنت ودعيت من كل قلبي إنها متكملش

وتمر السنين وأنسي الموضوع ده خالص لغايه الإسبوع اللي فات الاقي شابة زى القمر داخله عليا العيادة و معاها 3 أطفال عفاريت صغيرين إتنين في إيديها وواحد شايله راجل كده مهذب إفتكرتها فوراً وفرحت جداً إني شوفتها وفرحت أكتر إن الراجل اللى شايل الطفل مكانش الشاب اللي شوفته من عشر سنين، لكنه كان واحد تاني عرفت منها إنها اتجوزته وسافرت بره فترة طويلة ولما رجعت قالت لازم تعدى تسلم عليا،
الحقيقة وأنا بسلم عليهم كنت حاسس بنوع من أنواع الإمتنان للراجل العظيم ده اللي قدر يغير حياتها تماما لدرجة إني لوهله مصدقتش ان دى البنت الذابلة اللى آخر مره من عشر سنين كانت تشبه بقايا بنى آدم ، وعرفت قطعا ان أسوأ ما يمكن أن تفعله بانسان هو أن تفقده الثقة في نفسه 👌👌

.

03/04/2025

"Nocturnal hypoglycemia "
لو مريض السكر بيشوف كوابيس كتير، ده ممكن يكون بسبب نقص السكر بالليل. الجسم بيحاول يعوضه بإفراز هرمونات زي الأدرينالين، وده بيخلي الشخص يصحى مفزوع، عرقان، قلبه بيدق بسرعة، أو حاسس بجوع شديد وصداع. لو ده بيحصل كتير، الأفضل يقيس السكر قبل النوم وياكل حاجة خفيفة، ولو استمر يراجع الدكتور عشان يظبط العلاج.

03/04/2025

03/04/2025

إستدعيت فى المستشفى لألقي نظرة على طفل صغير لم يتجاوز الرابعة عشرة من عمره ، دخل فى يومه الثاني من ارتفاع مستمر لدرجة الحرارة مع ألم بالبطن

كانت الشكوى الرئيسية للطفل التى أتت به إلى المستشفى ألما عابرا بالأذن ، لم يشك منه من قبل ، لكن ألم البطن بدأ حديثا ، بدأت فحص الطفل الذي لم يحسن أن يعطي أية معلومات قد تكشف عن علة أو سبب ، كان بمرافقته أخوه الأكبر ذو السبعة عشر عاما الذي كان هو المرافق الوحيد له

أنت تتعامل مع طفلين حرفيا ، لا يحسن أيهما قولا ولا يكاد يبين .. غير أنهما بديا كصديقين مقربين يحمل أحدهما هم الآخر ، وقد صدق حدسي فيما بعد ، كانت الآلام فى بطن الطفل مبرحة تشي بعلة خطيرة ، فى الغالب يصاب الأطفال بانفجار الزائدة الدودية بشكل أسرع من الكبار ، البطن تبدو كصخرة صماء من شدة الألم ، هذا يستوجب استكشافا جراحيا للبطن
لا تدري كيف تخبر طفلين لا مرافق لهما بخبر كهذا ، بات عليهما أن يعلما أن ألم الأذن البسيط تطور إلى استكشاف جراحي مع نسبة من الخطورة ليست هينة ، واحدة من شروط الحصول على إقرار طبي جراحي أن يكون المريض ومرافقوه على قدر من الوعي يمكنهم من موازنة الأضرار والمنافع المتوقعة من الجراحة ومن ثم الموافقة ، لكن بدا لى الطفلان غير قادرين على اتخاذ هذا القرار الذي لا بد أن يتم تنفيذه في الصباح الباكر

كانت الساعة الثانية عشرة بعد منتصف الليل ، وتم أخذ القرار الجراحي بالاستكشاف فى الصباح الباكر بعد أن اكتملت الفحوصات والتحاليل اللازمة ، غير أن شيئا ما دفعني نحو محاولة عمل أشعة مقطعية على البطن ، ليس هناك مسوغ لهذا ، البطن فى أشد درجات الألم والتحجر ، كرات الدم البيضاء مرتفعة بدرجة كبيرة ، التشخيص التهاب بريتوني يستوجب استكشافا جراحيا ، ما فائدة الأشعة المقطعية إذن ؟ لا أعرف ، ظل هذا الدافع يدفعني حتى منعني عن النوم بعد منتصف الليل ، نزلت من غرفتي بسكن المستشفى ، وأيقظت الفنيين المنوط بهم عمل الأشعة واستدعيت الطفل يقودني حدس لا أعرف سببه
أعرف جيدا أن الطفل في حالة ألم ، وأن الألم شديد ، وأنه قد خلد إلى النوم ، لكني أعرف كذلك أن موعد الجراحة فى الثامنة من صباح الغد ، وأن الساعة الآن تشير إلى الواحدة بعد منتصف الليل .. هذا هو الموعد الأخير لإجراء الفحص المقطعي قبل الجراحة

نزل الولد برفقة أخيه وقد عاوده الألم بعد أن حاول استراق النوم قبل جراحة الغد ، استلقى على جهاز المقطعية وبدأ الفحص ، بعد عشرة دقائق ربما حصلت على نسخة مطبوعة من الأشعة المقطعية لأنظر فيها وأفاجأ بمشهد لم أر مثله من قبل !!
لقد كانت البطن بأكملها عبارة عن ورم سرطاني كبير التهم كل أجزاء البطن خلف الغشاء البريتوني ، كان الورم يحيط بالشريان الاورطي والوريد الأجوف السفلي وشرايين وأوردة الكلى ، كأن ثعبانا ضخما ابتلع كل مكونات بطنه !!
بات الولدان ليلتهما دون أن يعلما شيئا ، وفي الصباح عرضت أفلام الأشعة على هيئة الجراحة ليتم إلغاء عملية الاستكشاف وأخذ واحد من أسوأ قرارات الجراحة التي نتخذها فى مثل هذه الحالات ، كان القرار
let the patient die in peace , not in pieces !!
دع الطفل يموت بسلام ، لا ترسله إلى الموت مقطعا !!

أكثر قرار أكرهه فى الطب ، حين ترى الورم قد انتشر ونفدت حيلك كطبيب وبات الاستسلام للقدر هو الخيار الوحيد ، تم تحويل الطفل إلى مستشفى سرطان الأطفال بعد أن تم أخذ عينة بإبرة جراحية موجهة بالاشعة وتحليلها لتكشف عن نوع شديد الفتك من سرطانات الغدد اللمفاوية ، أخذ الأخ أخاه وانصرفا انقطعت أخبارهما خمسة أيام ثم عاد الأخ الأكبر يطلب نسخة من الأشعة المقطعية ، تعجبت من أنه قطع كل هذه المسافة من محافظة إلى أخرى للحصول على نسخة من الأشعة المقطعية ، كان بإمكانهم إجراء واحدة أخرى هناك ، لكنه أخبرني أن أخاه بات ينازع الموت ، وأنه يخضع الآن للتنفس الصناعي وأن تحريكه من أجل اجراء اشعة مقطعية أخرى هو استعجال للموت الذي بات محتوما !!
تتأمل كم الألم والأسى والدروس فى هذه المأساة فتصيبك الدهشة ، قبس من رحمة الله بالطفل ليخفف عنه بعض ألمه بحدس عاودني بعد منتصف الليل لأتبعه دون سبب مقنع فيغير كل شئ رأسا على عقب ، أخ أكبر يحمل رفيقه ويدور به فى مأساة تشيب لها الرؤوس ثم يفقده شيئا فشيئا فلا أراه إلا دامع العين غير أنه كالجبل لا ينهار ولا يستسلم

علمت بعد أيام أن الطفل أسلم روحه إلى بارئها ، يقطع رثائك وأساك لأجله مريض آخر يحمل أضعاف مأساته يشغل نفس سريره ، فيكون خيارك الوحيد كطبيب فى مهنة تضعك وجها إلى وجه مع أشد حالات البؤس أن تتسلى عن مأساة بمأساة أخرى تنسيك أختها !!