05/07/2025
لو ابنك او بنتك بيطلعوا أسنان يبقا لازم تقري الكلمتين دول كويس👇👇
التسنين فترة صعبة على الأم و الطفل 🥴 ده دليل كامل للتسنين و علاماته، ترتيب الأسنان و إزاى تساعدى طفلك👇
💟 يعنى إيه تسنين؟ 🤷♀️
✅ دى مرحلة طلوع السنة....الفترة اللى السنة فيها بتشق طريقها جوه عضم الفك و بعدين اللثة...لغاية ما تظهر
✅ بعض الامهات فاكرين ان اعراض التسنين بتظهر لما السنة تقرب تطلع و يبقى اولها ظاهر.....لأ الحقيقة دى اخر مرحلة خالص....🙈
✅ اغلب الألم و الأعراض بيحصل قبل ما السنة يظهر لك مكانها اصلا
💟 إمتى يبدأ التسنين؟
✅ اغلب الأطفال بتطلع اول سنة ما بين سن ٦ شهور و سنة
✅ قبل ال ٦ شهور، فيه اطفال كتير حتبتدى اعراض التسنين، انما قليلين اللى حيظهر عندهم اسنان قبل ال ٦ شهور
✅ و طبيعى جدا لو الاسنان اتأخرت شوية....المهم تظهر قبل الطفل ما يتم سنة 👌
✅ مش كل الأطفال زى بعض....حتى الاخوات بيختلفوا....و فيه أطفال بتحبى و تمشى فى الاول و اسنانها تتأخر شوية
💟 بتستمر قد ايه اعراض التسنين؟
✅ فيه اطفال ٣ او ٤ ايام و بيتحسنوا و يرتاحوا
✅ فيه اطفال بتقعد اسبوع و اتنين....و الله يكون فى عوننا 🙈
💟 هل فيه ترتيب معين لظهور الاسنان؟
✅ أغلب الأطفال بتطلع السنتين اللى تحت الأول و بعدين اللى فوق و بعدين يكملوا الاسنان.....بعدين الأنياب....بعدين ااضروس
✅ بس كل طفل و له طبيعه....و عادى جدا الترتيب يتغير
✅ و فيه أطفال بتنتظر مدة...و مرة واحده تلاقيهم طلعوا أكتر من سنة
💟 إيه أعراض التسنين؟
✅ قريفة.....مزاج البيبى مش حلو....بيعيط كتير.....عاوز حضنك....و طبعا ما بينامش 😥
بيضرب ومبيلعبش وبيعض 😁
✅ رياله كتير....او لُعاب كتير....
✅ بيعض كل حاجه قدامه...بياكل صوابعه......ممكن حتى فى وسط الرضاعه تلاقيه بطل رضاعة و مص صوابعه من الوجع
✅ البراز ممكم يبقى طرى شوية....طبيآ مفيش ارتباط وثيق بين الإسهال و التسنين....بس اغلب الأمهات بتلاحظ إن البراز بيكون طرى أكتر و مراته نسبيا اكتر وممكن يكون مدي علي لون أخضر..
✅ سخونية.....التسنين يرفع الحراره حاجه بسيطة....لو حراراة عالية جدا فوق ال ٣٩ تبقى مش تسنين خدى بالك.. قيسي الحراره بالترمومتر دائما..
✅ طبعا الطفل أكلته بتبقى أقل من العادى، بس هتلاقى عاوز يرضع أكتر..
✅ هتلاقيه بيشد فى ودانه و فى وشه كتير .
✅ ممكن تلاقيه بيدعك عينيه اكتر، أو عينيه بتدمع .
✅ ممكن اللثة تبقى حمرا او وارمة...و ممكن خد البيبى يورم....بتشوفيها أكتر مع الضروس...
💟 تعملي إيه يساعد إبنك فى الفترة دى؟🤷♀️😥
1️⃣ فيتامين د (أوريدال) مهم جداً للطفل، ده اللى هايساعده الأسنان تنمو بسهوله.....
- حاولى تعرضى البيبى للشمس نص ساعة على الاقل يوميا، الصبح بدرى او بعد العصر....ده حيزود فيتامين د
2️⃣ منتجات الألبان هاتمد الطفل بالكالسيوم و تساعده....بس طبعا فى العمر المناسب....و حعمل بوست مخصوص للأكل
- صفار البيض كمان غنى جدا بفيتامين د و مهم اوى الفترة دى....لو الطفل رافضه، جربى تحطيه على الزبادى....بنتى الكبيره كانت بتاكله لما بخبيه فى وسط البطاطا
3️⃣ الطفل مش محتاج ياخد كالسيوم.....لو سمحتى بلاش تدى كالسيوم إلا لو دكتور عمل تحليل أو كتبه.....الكااسيوم بدون داعى ممكن يعمل مشاكل للطفل....اقلها حصوى فى الكلى!!!
4️⃣ الأم طالما بترضع محتاجه تاخد فيتامين د و كالسيوم....نسبة نقص فيتامين د فى الأمهات منتشرة جدااااا...و غلط على صحتك انتى و البيبى....و دوروا في الصور اللي علي الجروب علي روشتة لفيتامينات الام مع الرضاعة
5️⃣ هاتى عضاضة للبيبى....و سقعيها فى التلاجة قبل ما تديهاله...
6️⃣ لو طفل أكبر شوية سقعيله خيار او جزر.....بس بلاش قبل ما يبقى مستعد...
لانه بعد الشر ممكن يكسر قطعة صغيرة و تقف فى الحلق!!!!
7️⃣ إغسلى إيدك كويس جدا، و إدعكى اللثة بصباعك، أو خليه يعض على إيدك شوية....
- و دايما امسحى الريالة بقطنة مبلولة...علشان ما يطلعش حبوب حوالين الفم....
8️⃣ فيه أطفال مش بتحب العضاضات خالص، جربى تديله تيتينه يعضعض فيها....او لعبه مناسبة....أو فرشة أسنان بتاعة أطفال .... بتبقى سهله فى إيدهم و بيدخلوها بسهوله فى اللثة
9️⃣ لو الطفل تبعان أوى ... مكن تديله سيتال ( باراسيتامول)....بس مش دايما....خليه لليلة صعبة مثلا....و ماتستخدميش بروفين أو كتافلام
إلا بعد استشارة الطبيب فقط.
🔟 بالنسبة ل جيل التسنين، مشكلته إن فيه مخدر موضعى..و مؤخراً فيه تحذيرات من استخدامه....لان المخدر الموضعى بيمتص فى الدم و بيعمل أعراض جانبيه خطيرة.
هى فترة صعبة، بس مؤقته، معلش أجلى اللى وراكى فى البيت الفترة دى و خلى الطفل أولوية عندك ....معلش فترة مؤقتة
و حاولى ترضعى البيبى كتير علشان تعوضى قلة الأكل...
ربنا معاكم ويقويكم علي حملكم ❤️
