Dr.Ghada Sharaf / د.غاده شرف

07/06/2025

نقطة ومن اول السطر
في المجال النفسي اغلب الأحيان كتير من الحالات بتحكي عن حاجة أو موضوع لسه بتألم منه ومش قادرة تنساه مع أنه عدى عليه سنين طويلة 😔😔😔
وبيكون الرد في الوقت دا

- انت مستني اعتذار؟ ... ولااعتراف بالخطأ؟... ولا محاوله للتصحيح؟... مستني من مين؟ من مصدر الاذى؟ مستني
قفلة افلام "الحق ينتصر على الشر" ؟

اللي اتسبب في الالم عمره ما هيكون هو نفس الشخص
المسؤول عن التعافي..

التعافي دا شغلتك انت، هما عملوا دورهم زي الفل واذوك
ومشيوا ... انت بقى مهمتك تتعافى ... ودي مهمتك انت ...
وبتاعك انت وبس..

06/06/2025

23/05/2025

مهما كنت بتحب اللي قدامك مينفعش تقوله خاف
على زعلي وقدرني ..مينفعش تطلب منه يحبك إزاي ...
أو يهتم بيك إزاي.... او إنه يحس بوجودك .. مينفعش
بعد ما تعاتبه مرة و اتنين على حاجة ضايقتك تقوله أنت
ليه بتعمل كدا ؟؟! ..
‏مينفعش تجبر حد إنه يكلمك و يهتم بيك و يصالحك لما
تزعل منه .. مينفعش تطلب إنه يخاف على زعلك أصلاً
مينفعش أجى أعاتبك إنك مبتعملش خاطر ليا فى تصرفاتك
مينفعش أعاتبك على إنى محستش منك و من طريقة أفعالك للأسف إنى غالى عندك زى ما أنت غالى عندى... مينفعش أعاتبك على إنى مش من أولوياتك و أهتماماتك الأولى و إنك فضلت عليا حاجات تانية و اشخاص تانية ..
كل حاجة من الحاجات دى للأسف العتاب فيها قلة قيمة سيبوا
كل واحد براحته و متجروش ورا حد سيبوهم مع الناس اللي مرتاحين معاهم ..
لو كان بيحبك بجد مكنش هيديك فرصة أصلًا تفكر ف كدا ..
فى حاجات فى الحياة مينفعش فيها الكلام أو العتاب أساساً ..
حاجة زى دى مينفعش ابداً تطلبها من حد و لو طلبتها ، علشان متخسرش حد حبيته وهو مقدرش دا فحافظ علي كرامتك .. وسيبك من العتاب اللي مفيش منه فايدة 🌹🌹🌹

06/04/2025

فيه ناس كتير لما بنتكلم أو نتناقش
معاها في اي موضوع بعد ما بنسمعها
بنتمنى وقتها نقولها جملة
واحدة 👇👇👇👇👇👇

17/03/2025

أسوء أنواع العلاقات هي اللي بتنتهي من غير مُبرر
أو سبب ... انك تصحی في يوم تلاقي كل حاجه
إنتهت مع حد مكلفش خاطره بأنه يوضحلك سبب
واحد يخليه يمشي!"
و لو أنت شخصيه حساسه شويه هيفضل التفكير ملازمك
ليالي طويله جدًا علي امل أنك تلاقي السبب ده ... هتلاقي
نفسك بتراجع تفاصيل آخر ايام وأسابيع ويمكن شهور
كمان قبل الرحيل هتحس بتأنيب الضمير علي أتفه الأسباب
لو اكتشفت أن دي ممكن تكون أسباب كافيه لرحيل حد وتحاول توصل للشخص ده عشان تعرف السبب بس بطريقه عجيبه
هتلاقي محاولات البعد والتجاهل بتزيد
فيزيد تأنيب الضمير ويزيد الإحساس بالذنب علي حاجات
بسيطه ويزيد الوجع والوحده والتفكير وتحاول تتعايش
وتداري في ألم ووجع بيبقي باين جدًا أنه ألم فقد ووجع
خذلان ورحيل . وفي بعض العلاقات وبعد فتره لما تلف
الأيام ممكن تتفاجئ بعودة نفس الشخص اللي مشي
بدون أسباب راجع بحنيه وتودد شديد لدرجه تخليه
يصعب عليك ...
وما بين لحظه العفو وما بين ذكريات الوجع هنا بينشئ
الصراع الداخلي ما بين عقل نضج من الوجع وقلب عاطفي ووحيد .
تفضل المعاناة والألم لحد ما في حاجه جواك تكسر التانيه
بعنف وتقبل أنك تبقي مُتعايش أما مع قلب مخذول او عقل متخاذل!
العلاقات شيء مُقدس للغايه، انتوا بتدخلوا قلوب ناس
وبتحطوا نفسكم في مكانة عالية بالنسبة للناس اللي بتقدّر كويس ... لو انت من البداية مش أد أنك تكمل في اي علاقه
او في قلب حد متعلقش حد عشان في ناس قلوبها بتتكسر
بعد كده من الوجع .💔💔💔

13/02/2025

أصعَب صراع..
عِندما يصارع أحدُنا نَفسه
عِندما يتمزق بينَ القُبول والرَفض
بين الحُب والكَرامة بينَ الـ لا والـ نعم
و بينَ القَرار والإختيار..
عِندما تتنازع خيوطَ القلب مَع منطِق العَقل و النَفسِ العَزيزة..
حتّى يُريد أحدُنا شيئاً و عَقله يمنعُه أو كَرامتُه تنهاه
عِندما تهُبّ عَليه رياحُ الإحتياج
فـ يَضرب نواِفذه جَبراً كي لا يعلوا صفيرَها
عِندَما تتمزق مَشاعره إشتياقاً ثم يُعافِر ويتصنّع اللامُبالاة
حتّى لا يبدو ضَعيفاً في عينِ أحَد ..
عِندما تشتّد لديه رَغبة قويّة بالبُكاء فـ يَضحَك كي يُدارى
دُموعاً بالخَفاء..
عِندَما يتمزّق بينَ الـ هذا والـ ذاك
بينَ القَريب والبَعيد و بينَ الذِكرى والحاضِر والآت
ويقاوِم جاهِداً عَلى حِساب قلبِه وعَقلِه وأحلامِه انّه أصعَب صراع..
أن يمشي عقلك في وادٍ و أنتَ وقلبك في وادٍ آخر..🥀

02/02/2025

نرجسي يتكلم عن نفسه 😱😱😱
بخيل معاها في كل حاجة ولما بديها فلوس بسألها على كل حاجة بتجبها بكام وليه وأقولها أتضحك عليكي و أخليها تكره اللحظة اللي أشتريتها فيها.
بخرجها بس قبل ما اخرج معاها بقولها أخلصي وأستعجل كل حاجة كأني في مهمة مجبور عليها
بتهمها دايما بالفشل بس إما تنجح فى حاجة ولو بسيطة بتريق عليها وأقولها بهزر
بنتقدها في كل تصرفاتها واقارنها بتصرفات غيرها بس إما تقولى غيرك بيعمل كذا بقولها معندكيش ذوق و كلامك يخرب بيوت
بجرحها وبستفزها وبعصبها بس أول ما ترد عليا بقولها انتى مش مؤدبة
بغير من نجاحها ... واحاول بكل الطرق احسسها أنها إنسانة فاشلة في كل حاجة
ممكن اشتري ليها هدية وانا متأكد انها مش هتعجبها وبقولها كل سنة وانتى طيبة بس فى نفس اليوم برجع من برة بنفخ زي كل يوم عادى !
بعاتبها انها مش بتدلعني لكن أنا بطلب منها الحاجة كأنها خدامة عادي
بتريق عليها ولو مضحكتش على تريقتي بقولها انتي نكد !
بتحسر على الستات اللي مدلعة نفسها انما ما تقولى عايزة وقت لنفسى أطلعلها 100 حاجة هي مقصرة فيها!
بعلمها الغضب وأطالبها بالهدوء ... برميلها الكلمة البايخة وأطالبها تختار وقت العتاب!
بكسرها واستنى منها الإبتسامة أول ما ادخل من برة بحسسها انها عبء عليا واعاتبها انها ليه مكشره!
.متجوزها لكن محسسها انها عانس معايا ... بديها احساس اني راجل البيت ومع كدا رامي عليها مسؤولية كل حاجة
بهدها واطلب منها تتحمل علشاني ... بعترف بغلطي لكن قدامها بنكر!
بفتعل المشاكل من الهوا واكون انا السبب فيها ويكون اللوم والعتاب أنها السبب في كل دا
بوصلها لمرحلة العدم واجلدها زى المجتمع لو طلبت الطلاق!!
بوعدها لكن بستسهل وجودها وامتلاكها.
عايزها تكوني ناجحة واجتماعية وانا اصلا بكره نجاحها وعزلتها وسجنتها عن الدنيا كلها
بطلب منها فى البداية تسيبنى ومتلزقليش لكن أول ما بتبعد بتلاقي سيل من التهم بالتقصير !
مبشوفهاش لكن بطالبها انها تدقق في احتياجاتي ... انا السجن اللى بحب أنها تفضل عايشة بالطريقة دي جواه 💔💔💔

17/01/2025

زي مافي ردود بتجبر الخاطر ... و تراضي النفوس ...
في ردود بتكسر الخاطر و تسبب حزن و كسرة في
النفس مالهاش حدود ، خاصة لما تكون من ناس
قريبين أوي لقلبك و ليهم قيمة كبيرة عندك.... علي
قد قيمتهم و حبك ليهم ، علي قد ما بيكون زعلك منهم..
اقل كلمة منهم بتجرح مشاعرك و توجعك ... لانك مابتكونش منتظر منهم هما بالتحديد انهم يوجعوك ... ودا بسبب عشمك فيهم ... عشان كدة بتاخد الكلام وتسكت ... تسكت خالص
من غير حتي ماتعاتبهم وتحسسهم انك زعلت ... بتسكت
عشان مش عايز تدخل معاهم ف اي جدال او نقاش من
اي نوع ،
عايز الدنيا تمشي في هدوء لانك مابقتش حمل اي وجع
ولا حمل أي نقاش .. انت متلصم بالعافية..
ارحمو قلوب بعض ... القلوب مقفولة علي وجع مايكفيش
فيه كل كلام الدنيا ... ارحمو قلوب انتم اكتر ناس
عارفين انها صبرت و قاست و اتحملت فوق طاقتها
ف والله لو دخل كل منا قلب التاني لأشفق عليه..💔💔💔

09/01/2025

في بنت اتخطبت لمدة سنتين بالظبط كان فاضل على كتب الكتاب ١٣ يوم ... فجأه بدون اي مقدمات قررت انها مش هتكمل... وقالت لأهلها مش عاوزاه ... كل اللي حواليها يسألوها عن السبب وهي مش راضية حتى توضح لحد ما ف الاخر اعترفت وقالت " مادانيش اي حاجة ف وقتها "
يطمن عليا بعد ما اخف ... بيسأل عن امتحاني الصعب اللي مرعوبة منه وحكياله عليه بعدها بإسبوع ... هدية عيد ميلادي حتى بتيجي متأخر ... كل حاجه كنت بشوفها منه كانت باردة وفاترة ومالهاش اي طعم .
نيجي لواحدة تانية متجوزة وف يوم حصل مشكلة بينها وبين جوزها وصلت المشكلة دي انهم فضلوا مخاصمين بعض اربع ايام وهما متجوزين ف محافظة تانية بعيد عن أهلها ... وف ايام خصامهم نزلت تشتري حاجات ليها من مكان جنبهم وهي كانت فاكرة انها عارفة شوارع المكان كويس نزلت واشترت ولفت كتير
وتاهت ماعرفتش هى فين بتبص حواليها مش عارفة اي محل ولا مألوف ليها اي يافطة او عنوان ... قامت واقفة ف مكان وفضلت تعيط و طلعت تليفونها واتصلت بجوزها ... رد عليها وقالت له " انا تايهة ومش عارفه انا فين ولا عارفه أعمل حاجة " وده كله طبعا بعياط
قال لها " اهدى بس انا معاكي قومي بس اسألي اي صاحب محل عندك واعرفي منه أسمه ايه عشان أعرف اجيلك ياحبيبتى ... اطمني انا معاكي ومش هسيبك ومش هقفل الخط وجايلك دلوقت حالا " وبعد لف كتيير وصل ليها وشافها وجري عليها وهي من الخوف ماكنتش مصدقة انه هو ، وبعد مااستوعبت قامت معيطة ومستخبية فيه ... عدى كام سنة على الموقف ده وهي مش نسياه بتقول انه كل ما شيطاني يوزني انكد عليه قلبي مايطاوعنيش و تيجي ف بالي صورة الوقت اللي كنت عاوزة فيه امان وكان هو اماني وحمايتي 💞💞💞
في ثقافة اسمها ثقافة الوقت المناسب👌👌👌... حاجة معينة عاوزينها ف الوقت دة لو اتأخرت لحظة واحدة عن وقت احتياجنا هيكون ملهاش قيمة كل حاجة ليها وقتها ( الإحساس - و الكلمة - و المعايدة - و الطبطبة - و الحضن - والنظرة- الخ... )
زي لما الدوا بيجى متأخر مابيبقاش ليه فايدة ولا بينفع
وزي الجدعنة اللي لو ماظهرتش ف الشدة مش بتبقى جدعنة
كل حاجة وتوقيتها .. ولو خرجت عن توقيتها المناسب ملهاش لازمة .

24/12/2024

واحد بيمد أيده على مراته ... ولما تسأله عملت كده ليه
فيقولك هي اللي استفزتني مكنتش في وعيي ومقدرتش
أمسك نفسي
الحقيقة إن مديرك بيستفزك كل يوم وأحيانا بيمرمطك لكن
انت مش بتمد أيدك عليه ولا حتى عمرك فكرت وبتفضل
دايما في وعيك
الحقيقة إن العميل اللي بيتعامل معاك بيطلع عينك وبتفضل
صابر عليه وعلى رخامته .. بس ابنك لما بيعمل حبة شقاوة
بتديله على وشه عشان "نرفزك وخرجك عن شعورك".
الموضوع مش موضوع تحكم في اعصابك ووعيك لأنك لو عايز تتحكم في نفسك هتعمل ده بدليل انك بتتحكم في نفسك
ووعيك قدام مديرك وقدام اللي ممكن يشتكيك ويخصم مرتبك وممكن كمان يكون السبب في فصلك من شغلك.
الفرق بين مديرك وبين زوجتك وبين ابنك هو الخسة والندالة في تعاملك مع طرف ضعيف مقارنة بتعاملك مع طرف أقوى منك.
لاحظوا دايما المجتمعات زي اللي احنا عايشين فيها هتلاقيها دايما بتتعامل بمبدأ انتقائي في العقاب على حسب قوة أو ضعف الطرف المدان بالتالي مش غريبة فئات زي المرأة والأطفال يواجهوا
اللي بيواجهوه بصفة مستمرة في مجتمعنا 😥😥