21/02/2024
******* الثقب الجنيني***** ********ما له و ما عليه****
كتير سمعتي عن إبنك أو إبن اختك أو صاحبتك عمل ايكو و الدكتور قال ثقب جنيني .. بشوف في وش بعض الناس صورة ريهام سعيد و هلع مش طبيعي و ناس بتبقي عارفه ٣/٤ الحقيقه و تقول مش ده الثقب اللي بيقفل لوحده .. ( طب الحمد لله) ( الحمدلله علي كل حال طبعا)..
الثقب الجنيني من اسمه ، ثقب موجود عند كل الأجنه في بطون أمهاتهم ، ربنا خلقه لحكمه ، ان الدم (اللي جاي من الوريد البابي السفلي) المفروض هيروح لرئه الجنين (اللي هي مقفوله عشان هو نايم في الميه اللي حواليه) يغيير مساره و روح ناحيه النص الشمال من القلب ...
** هو مش ثقب حقيقي بمعني انه جزء ناقص، لكنه ضرفتين باب مفتوحين مش اكتر ..
** في ٧٠% بيقفل مع الصراخ الاول للطفل أو ما ينزل للدنيا ،
بس ده في أوروبا و الدول المتقدمه 😊😉 ، حيث الولاده القيصريه عند الحاجه فقط .. عندنا مع القيصيرات الكتير (فوق معدلها الطبيعي عالميا) ، الطفل نازل مرتاح من جرح لطيف و واسع لا اتعصر و لا شاف اللي بيشوفه المولود ولاده طبيعيه .. فبيصرخ صراخ بطئ و هادي و بالتالي ( التحول من وضع الجنين لوضع حديث الولاده بطئ و متاخر ( هنتكلم عنه لاحقا)).. الباب اللي هو الثقب ملقاش حد يرزعه جامد .. الآيه بقت معكوسه و في الأغلب الثقب الجنيني مش بيقفل و دي اللي بنشوفه في الايكو ..
*** الثقب الجنيني ما له (برئ يا بيه) :-
الولد بينهج ... معلش اصل عنده ثقب
البنت بتشرق ..معلش اصل عندها ثقب
التطعيمات مأجلة...معلش اصل عنده ثقب
جلسات الفاركولين ممنوعه ....معلش اصل عنده ثقب
دكتور الجراحه اجل عمليه الطهاره (للذكور)...معلش اصل عنده ثقب..
** الثقب الجنيني اللي بنسبة كبيره جدا جدا لا يتخطي ٤ مم برئ من كل الاتهامات دي و مش بيسبب حاجه من ده ..
*** الثقب الجنيني ما عليه ...
*بعض الأطفال مع البكاء الشديد ( بحرقه) و مع ارتفاع الضغط جوه الرئه ، تطرد الدم اللي فيها و ضغط النص اليمين من القلب يزيد و الدم الغير مؤكسد ( اللي مش نضيف بالبلدي) يتحرك خلال الثقب من اليمين للشمال، جوه القلب و يعمل زرقان للطفل ، الموضوع ده مؤقت و مش شائع و مش مخيف بفضل الله ( بس مش كل طفل بيزرق مع البكاء نقول ده ثقب جنيني ، لازم نتطمن ، ( لا اوعي😊😁)..
* بعض كبار السن اللي الثقب كمل معاهم و مش قفل لوحظ حدوث ما يسمي ( platypnea) ..احساس بقصر النفس لما يبقي نايم و يقوم يقعد بسرعه ( ليها اسباب تانيه و لازم نتطمن برده) ..
** الأهم و الأخطر و الحمد لله انها نادرة الحدوث ، برده مع كبار السن احيانا تتكون جلطه صغيره علي الثقب الجنيني ، او الثقب يكون باب تمر منه الجلطه للدورة الدموية و تعمل جلطه في المخ أو الاطراف 😪😪😪
■ كل ما زاد الثقب عن ٤ مم ، كل ما كان الجدار بين الأذنين(غرفتين القلب الصغيرين) مترهل ..زاد إحتمال تكوين الجلطه،، للوقاية يستحسن تناول ادويه مضاد للصفائح الدمويه زي اسبرين اطفال .. اذا حصل ده، الثقب الجنيني بنقفله بجراحه، و لو الشخص البالغ عنده جلطه رئويه اصلا و خايفين من الثقب بيتقفل قسطره بعد عمل ايكو بالمنظار ..
المشكلة دي لوحظت و نادرا في الكبار مش الاطفال ( بفضل الله)
●● نصيحتنا :- اي طفل لازم يعمل ايكو و لو مره في العمر للإطمئنان ..
لو اكتشفنا ثقب حتي لو جنيني ..نتابعه لحد ما يقفل ..
اول ايكو لو مفيش حاجه ملحه لعمله ، نعمله بعد ٤ شهور عشان الثقب لو ناوي يقفل ..هيكون قفل ان شاءالله..
🥰🥰يا رب كل الشفاء و السلامة لكل أطفالنا 🥰🥰
عذرا للإطاله..بس لانه الثقب الجنيني شااائع جدا ، حبينا نشرح بإستفاضه ..تحياتي
