09/09/2025
ده اللى حصل فى طريق عودتنا اول امس وربنا سترها بفضل الله
والله فيها حاجة حلوه ♥️
تعالوا احكيها واعرفوا اللي حصل
أنا كنت في رحلة علاجيه لسيوة واعتقد معظمكم شاف التجربة اللي وثقتها هناك السنة اللي فاتت
وألسنه دي حبيت اكررها تاني خصوصا اني كنت واخدة حد غالي عليا معايا المره دي .
المهم رحلتنا خلصت وجه آخر يوم جهزنا كل حاجة ورتبنا دنيتنا اننا نتحرك من المنتجع اللي كنا فيه على الساعه ١٠ مساءا .. بحيث نوصل عبد المنعم رياض على ١٠ او ١١ صباحا بالكتير
توكلنا على الله وخرجنا من سيوه ومش عايزه أوصف لكم الطريق ده عامل ازاي بالليل .. ظلام حالك دامس كحل .. وعشان اهرب من الملل ده ولان مفيش شبكة نت قولت اقضيها نوم
وبعد اكتر من ساعتين ع الطريق الكحل ده نزلوا ريست وانا قضيتها نوم برضو
وبعد كده كملنا الطريق وبعد فترة قصيرة لقيت عم ناصر السواق وقف في رست تاني جنب كمين
لفت نظري في الرست ده عربية ميني باص وفيها شباب مصري ومعاهم شنط سفر وكانوا بيتفتشوا
في الكمين اللي جنب الريست اللي كنا واقفين فيه
اتحركنا وبعد ١٠ دقايق وبعدها حصل اغرب وارعب موقف عدى عليا في حياتي
وبحكم قعدتي في الكرسي اللي ورا السواق مباشرة كنت شايفه المشهد كله .. لقيت عم ناصر السواق عمال يتشاهد ويردد الشهادة بشكل هيستيري
وكل مره يرددها بصوت اعلى وبوتيرة اسرع خلتني تخيلت ان الراجل الطيب ده شايف ملك الموت قدامه واحنا ها نموت كلنا دلوقتي .
كل اللي كانوا معايا اترعبوا في اللحظه دي
وهو عمال بتشاهد بالشكل ده
المهم راح لافف بينا بعيد عن الطريق الضلمة الكحل ده وركن في بنزينة
وراح نازل وهو عمال يردد الشهاده وكل اللي يسأله مالك فيك ايه ؟
يقول لهم أنا بموت
ويحلف ويردد ويقسم انه خلاص بيموت
وعايز يكلم ولاده قبل ما يموت
واحنا طبعا منهارين مش عارفين نتعامل مع الوقف
وكل اللي في أيدينا عمالين نهديه ونقول له اكيد ما نمتش كويس .. اكيد مضغوط عشان فرح بنتك اللي خلاص قرب
وهو برضو عمال بتشاهد ويحاول يتصل بولاده بس تليفونه كان وقع منه أثناء ما كنا في سيوة
نحاول ناخد الشريحة من تليفونه ونحطها في تليفون معانا .. والشريحة مش قارية اي اسم
وهنا دخل في نوبة بكاء ويقول لنا عايز اكلم ولادي قبل ما اموت
كلنا كنا واقفين عاجزين مش عارفين نعمل ايه ونروح فين
والوقت عمال يعدي ومش عارفين ايه التصرف السليم في الموقف ده خصوصا ان الرحلة كانت كلها سيدات وبنات
وهنا يظهر في المشهد الميني باص اللي كان بيتفتش اللي حكيت لكم عليه
وينزلوا منه شبابنا اللي زي الورد اللي ما سابوناش لحظه
واتفقوا ان واحد منهم يسوق بينا لحد اقرب عربية اسعاف او مستشفى
وفضل ماشي بينا والميني باص بتاعهم متابعنا وماشي ورانا طول الطريق .. لحد ما وصلنا لأقرب مستشفى وكانت في الضبعه وكان النهارد ابتدى يشقشق زي ما واضح قدامكم في الصوره
وراح عم ناصر المستشفى واكتشفوا ان ضغطه كان عالي جدا وهو ده اللي وصله للحاله زي والحمدلله اتطمنا عليه
طبعا الشهم الجدع اللي مانعرفش عنه حاجة غير انه من المنصوره
مامشيش إلا لما اتطمن علينا وعلى عم ناصر ووصلنا لمكان أمان وبعدها كمل طريقه هو و الرجالة اللي كانوا معاه لان طريقهم كان لسه طويل
مع احترامي لكل الأجناس اللي في اليشرية
هاتوا لي جنسبه يطلع منها كده
هاتولي حد ماشي على طريق سفر وشكلهم طالع عينهم ولسه منزلين العربيه كلها ومرجعيتها تاني أثناء التفتيش
ويادوب ها يرتاحوا بعد المرمطة ويكملوا طريقهم ويلاقوا ناس واقعين في مشكلة
ويتدخلوا ويساعدوا من غير ما حد يطلب منهم
وبدل كانوا ها يكملوا طريقهم ويشتروا دماغهم
اختاروا انهم يعملوا اللي اي مصري كان ها يعمله
لو كان في مكانهم وبدون تردد
لان ولادنا رجاله وشهامتهم وجدعنتهم بينضرب بيها المثل في كل مكان في العالم
وحقيقي أنا من مكاني ده بشكر ولادنا اللي ما سابوناش لحظه غير لما علينا
ومن مكاني ده حابه اقول كلمه
اننا معدنا اصيل ومهما يبان عكس كده ومهما يبان ان التراب غطاه إلا انه أصيل ووقت الشده بيبان
ونماذج أبطالنا كتير وبتوصل لحد التضحية بحياتهم عشان يتقذوا غيرهم
الموقف قد ما يبان بسيط بس فعلا علم جوايا
وحسيت قد ايه ان لو مهما حصل في اللي ها يقف جنبي حتى ولو كان الحد ده ماعرفش اسمه ولا مكانه عشان اشكره عليه
اخيرا نسيت اقول لكم ان قبل ما توصل ميدان عيد المنعم رياض ب 2 كيلو الكاوتش بتاع العربية فرفع 🤣
