09/10/2024
لو هنكتب بوست تثقيف صحي في الوقت ده يبقى لازم نتكلم عن الموضوع ده وأهميته وخطورته 🚨🚨 البوست طويل شوية لكن مهم ليك ولأولادك ولوالدينا وكل أهلنا
رغم إنه يبان موضوع بسيط وعادي وعشان كدا اتمنى يوصل لكل الناس عسى نكون سبب في راحة مريض وزيادة الوعى الصحي✅ وتقليل خطورته في أسرتنا وقريتنا ومدينتنا ومجتمعنا كله🤍
🚫هنتكلم النهاردة بإذن الله عن حقنة المفعول السحري للألفلونزا دور البرد زي م تسميه حقنة ٣×١ حقنة المضاد حيوي وامبول الفولتارين وأمبول الديكسا او الديكساميثازون يعني 🚫
في البداية 💭
يخلط البعض بين مرض الإنفلونزا ونزلات البرد الخفيفة (الزكام) مما يجعل البعض يتهاون بمرض الإنفلونزا، وهذا غير صحيح بالمرة؛ حيث إن الإنفلونزا على عكس نزلات البرد يمكن أن تسبب مضاعفات خطيرة وقد تصل في بعض الأحيان إلى الوفاة. وقد ثبت علميًّا أن الإنفلونزا الموسمية يموت بسببها ما يصل إلى 650,000 شخص سنويا ‼️
وهو ما يضفي أهمية بالغة على تطعيم الإنفلونزا👍🏻، خاصةً لحماية الأطفال الصغار أو كبار السن أو النساء الحوامل أو الأشخاص الذين لديهم أجهزة مناعية ضعيفة او أمراض مزمنة .
عشان نفهم هنتكلم مع بعض بلغة بسيطة وسلسة خالص وتوضيح إن شاء الله يكون سهل✍🏻 لازم نعرف يعني اي دور البرد ده يعني اي مرض الانفلونزا او بوصف أدق ڤيروس الانفلونزا 🤧 - اللي بدخوله الجسم بيبدأ الجسم يحاربه بكونه جسم غريب ونتاج الحرب دي بيظهر علينا ما يسمى بأعراض البرد زي الصداع🤕 والرشح🤧 والسخونية 🤒وتكسير الجسم 😩 الخ - هو كلمة ڤيروس هتفرق يعني🤔 أقولك طبعااااا
هنتكلم في بداية موضوعنا عن الفرق بين الڤيروس والبكتيريا
بيساطة خالص عشان مش تتوه مني
الڤبروس🦠 ده جسم غريب بيدخل الجسم بطرق العدوى اللي بتختلف من ڤيروس للتاني مثلا النفس او سوائل الجسم الخ
وده علاجه عن طريق جهازنا المناعي وأجسامه المضادة اللي بيكونها عشان يحارب الڤيروس💪🏻 طيب مفيش حل بدل م استنى الڤيروس اتصاب بيه وبعدين نشوف جسمنا هيقدر عليه ولا لا اها طبعا الحل بيبقى في الأمصال والتطعيمات 💉 - ودي عبارة عن حقن الڤيروس وهو ضعيف او ميت لجسم الإنسان - وده بيفكرنا بالتطعيمات اللي بنديها للأطفال عشان نتجنب انهم يدخلوا حرب مع الڤيروس وهو في أوج قوته وبالتالي جسمنا يتغلب عليه وهو ضعيف 🩼 وينتج له أجسام مضادة تفضل في الجسم عشان لو حصل واتصاب بيه تاني يبقى دواه موجود في الجسم 💡
طيب البكتيريا🧫 برضك جسم غريب بينتقل لينا بطرق إنتقاله المختلفة وده عشان نتعالج منه لازم يبقى من ضمن العلاج المضادات الحيوية💊 اللي هي مضادة اصلا للبكتيريا اي ده يعني المضادات الحيوية مش للڤيروسات😧 ؟! كدا انت فهمت
طيب نيجي بقى انت لما بيجيلك برد وتجري ع الصيدلية تجيب الخلطة السحرية دي تعالى نشوفها عبارة عن اي بعد م عرفنا أن البرد ده عدوى ڤيروسية🙄
🔴اول حاجة حقنة المضاد حيوي احنا اتفقنا إن المضاد الحيوي ده بيحارب العدوى البكتيريا يبقى اي دخله في العدوى الڤيروسية 🥴؟! وده اللي عاوزك تسأله للصيدلي اللي هيديهم لك 😏
طيب اي الخطر ياعم في اني اخد حقنة مضاد حيوي مش هتخسر !!🤔
أحب اقولك بالعكس انت هتخسر البشرية كلها والله مش أنت بس 😑
لإن في حاجة اسمها سوء إستخدام المضادات الحيوية اللي هو اي بقى ده 🤔
انك تاخد مضاد حيوي جرعة واحدة ومتكملش الكورس كامل وده بيسبب إن لو في بكتيريا في جسمك اي كان نوعها بسيطة او شديدة بتدخل في حرب مع المضاد حيوي طيب وبعدين بيحصل من الطرفين خسائر😵 ومفروض انك تمد المضاد حيوي بالجرعة التانية والتالتة ولحد م تخلص باقي الكورس من الجرعة المفروضة لا حضرتك تدي جرعة واحدة وتروح موقف تقوم البكتيريا تقدر تنتصر ع المضاد حيوي مش بس كدا دي كمان تكون اجسام مضادة للمضاد الحيوي وبالتالي انت كدا بتصنع بكتيريا تبقى مقاومة للمضاد الحيوي وملهاش علاج😈 شوفت بقى خسرتنا كتير ازاي ؟!💔
🔴ثانيا حقنة الديكسا ودي عبارة عن كورتيزون اللي بدوره بيمنع الجسم انه يحارب ڤيروس الانفلونزا 🚫وبالتالي عدم ظهور أعرض البرد علينا ونظن اننا اتعافينا خلاص وبقينا كويسين😶
بالعكس الكورتيزون ده الاستخدام اللي ع الفاضي والمليان منه له أعراض جانبية خطيرة التي تؤثر على الجسم بشكل عام المحتملة
🔻ارتفاع السكر، مقاومة الخلايا للأنسولين
🔻مرض السكري
🔻 هشاشة العظام
🔻قلق، اكتئاب،
🔻انقطاع الطمث
🔻إعتام عدسة العين، زيادة ضغط العين، و العديد من الأعراض الأخرى
🔴ثالثا حقنة الفولتارين ودي حقنة مسكنة صحيح بتسكن من تكسير الجسم والنشر في العظم بس أكيد كلنا عارفين خطورة كثرة إستخدام المسكنات على الكلى وعلى المعدة 🚨
طيب انا دلوقتي لما يجيلي دور برد أعمل اي وأخد اي 🤨
في العلاج لازم نفتكر ان ده ڤيروس وهياخد دورته في جسمي ومناعتي هي اللي هتقضي عليه 😷
يبقى علاجنا تقوية الجهاز المناعي عن طريق
⚪اخذ ڤيتامين سي عن طريق الغذأ مهم جدا وفيتامين سي في حاجات زي🔹 الجوافة🔹 والبرتقال🔹 والليمون
⚪نشرب سوايل كتيير وسوايل دافية - وياريت لو هتشرب ليمون يبقى متحطش الليمون ع الماية ع النار ✋🏻عشان ڤيتامين سي بيتكسر بالحرارة وبالتالي فايدته بتقل - ممكن ماء محلى بعسل نحل وعليه ليمون ممتاز 👌🏻
او أخذ فيتامين سي عن طريق الأدوية💊 ودي زي
🔹 كبسولات سي ريتارد🔹ڤيتاسيد سي أقراص فوارة🔹 سيڤامول أقراص فوارة برضك لكن معاها مادة الباراسيتامول ودي مادة آمنة مسكنة وخافضة للحرارة 👌🏻
طيب انت تعبان ومضايقاك أعراض البرد الرشح والعطس والحرارة وغيره😕 نرجع بقى لأدوية تخفيف أعراض الانفلونزا ركز معايا 🔔تخفيف أعراض وليس علاج المرض🔔 يعني بنخفف الأعراض لكن الڤيروس جسمي ومناعتي هما اللي هيحاربوه عن طريق الأدوية ودي اللي بيحددها الطبيب 🩺
لكن نذكر أهمهم
🔸أقراص فلورست ان
🔸أقراص بنادول كولد
🔸أقراص باور كابس
🔸أقراص كومتركس
🔸أقراص كونجستال
🔸أقراص ترايميد فلو ( لا تسبب النعاس )
❇️طيب اي حكاية مصل للأنفلونزا اللي قولناه في الاول ؟! طبعا بيقلل من نسبة الحدوث ويقلل من شدة الاعراض وده بينزل كل سنة لإن ڤيروس الأنفلونزا بيجدد ويغير من نفسه وده يفضل يتاخد في شهري ٩ و ١٠
وجرعته نبدأ نديه من عمر ٦ شهور
🔸️تحت سن٩ سنوات
▪️لو اول مره ابنك يتطعم بياخد جرعتين بينهم شهر
▪️لو اتطعم قبل كده جرعه واحده فقط
🔸️فوق ٩ سنوات
جرعه واحده فقط
☄️أتمنى تعمل متابعة و البوست يتعمله مشاركة عشان يوصل لكل اللي نعرفهم ويبقى صدقة عننا لعل وعسى حد يستفاد منه
🌸أذهب البأس رب الناس، واشف أنت الشافي، لا شفاء إلا شفاؤك شفاءً لا يغادر سقماً🤲🏻
