04/07/2022
Seenaa Mucee Ahamad Mucee Kutaa Maayii.
=================================
Maqaan Baduu Mannaa Mataan Baduu Wayya”
Kan jadhe Mucee Ahmad Mucee malee eenyu?.
Dua Mucee Ahmad Mucee
(Kutaa Maayii)
Walda Gabrieel baanan gabaaba akka kilaasaa
Dandahe nu hin gabroomsine numaa wal kilaafa” Jatte Ituun awwaalcha Muceerratti.
Fugug Ardii gootota kumaantamaan lakka’aaman dhalchee sabaaf gumaacheedha. Gootota gabrummaa didanii lubuun darbanis hedduutu Lafa Fugug irratti biqilee, daraare, Seenaa ofii hambisanii galan. Garuu diina kumaantamoota galaafatee, diinaaf harka kennuu didee, Angoon sobuuf yaalanis kan sobamuu diduun, “Maqaan Baduu mannaa mataan baduu wayya” jechuun, Morma diinaaf laatee, hanga sakandii maayiiti waan danda’uun Nafxanyootaan falman, gootota fugug dhalchite muraasoota keessaa kan hangaffaa
Mucee Ahmad Muceeti jechuun ni danda’ama.
Hogu Walda Gabri’eel gara handhura carcar fi jiddu gala Caffee Raabaa Doorii Odaa Bultumi fi Habrootti qajeelu, Muceen gara laga gaaleeytii fi burqaa Tirtiraati qajeelee ture. Kana Kutaa darbe keessatti addeesinee jirra. Muceen Laga Gaaleeytii fi Burqaati warra Ituu qindeessaa, tumsa Afran Qalloo eegacha ture. Walda Gabri’eel immoo Galamsoo hogu dhaqu dubbiin akka yaade hin taanefi. loltooni isaa hangi tokko irraa baqate, hangi tokko irraa harca’ee, hangi tokko mamadaa’ee jira. Sanarraan Qaaluu, Waayyee fi Aroojiin halkaniif guyyaa irratti duulaa jiru. Haala saniin Galamsoo keessa turuu hin dandeenye. Kanaafuu Galamsoorraa ofduuba Baqqachuuf dirqame. Waan Gootichi Gaaleeytii fi Burqaa Tirtiraati isaaf qopheessaa jiru immoo Walda Gabri’eel irraa quba hin qabu ture yeroo kana.
“Akkanumaanu yoon danda’ee asumaaniin osoo humni Amiirootaa fi Afran Qalloo bubbulee of hincimsine Biyyoo Adareeti qajeele too’adha” jechuun, Galamsoo baqatee, gara naannoo magaalaa Hirnaa, Gaaleeytiti imale. kaambii achi godhachuuf yaalii godhe. Garuu asitti Ituu Muceen qindeessaa jiruu fi ilmaan Afran Qalloo (Obborraa fi Alaa) gamtaa guddoo uumanii jiru. Gamtaa cimtuu uumanii waan eeganiif gonkummaahuu Gaaleeytii fi Burqaa Tirtiraa bira darbuu hin dandeenye. Akkaatumma Faranjooni isa duulchissan gorsa kennaniifitti, Badii guddoo Galamsooti irra geesserraan dabalatee, burqaatis Miidhaa guddoon loltoota Walda Gabri’eel irra dhaqabaa jirti. Waan kana l tahef, kana caalaa kophaa Ona Ituu keessa sossoo’uun, wareegama lubuu isa kaffalchiissuu akka dandeessu hubate. loltoota isaa wajiin gara Awaaash*tti ofduuba baqqachuufis dirqame. Muceenis akkaatuma kanaan Gaaleeytiirraa jalqabee Otuma humna Walda Gabri’eel ari’anii, Awaash*tti galchan. San booda Muceen toora naannoo magaalaa Ciroo battala godhachuun, dhufaatii Diinaa gammoojii fi Baddaan (duubaa fi dura Ona Ituutiin) deebi’uu malu eegachuuf iddoo jiddu galaati ciroo. kanaaf ciroo battaleefate.
Torbee jalqabaa ji’a Hagayyaa ,1886 Minilikii fi Raas Daargeen Arba Guugguun Oromoota murruq godhanii, Yaayaa Alii Sireefaas injifatanii, loltoota nafxanyaa 35 000 caalu wajiin magaalaa Galamsoo too’atanii jiru. Oromoota Walda Gabri’eel tasgabbii dhorkanirratti tarkaanfii suukkaneessaa fudhachu jalqabe. Marsaa Ammaa hoggansi nafxanyaa Minilik qofaa miti, Raas Mokoneeniin qabii,Irreeysi Minilik kan hinjire hinjiru. Gaamtaan waraanaa Fitawurari Bantiidhaan hoggonamtus Awaash*tti Walda Gabri’eelif dabalamtee jirti. Oduun Minilik magaalaa Galamsoo gahu Walda Gabri’eel bira waan geesseef, Walda Gabri’eel ammas loltoota isaa wajiin Ona Carcaritti duule, amma humna rabbi yoo taate malee Muceen deebisuu hin dandeenye dannabsee fiduun, batalla Ciroo dadaake kutuun gara Galamsoo imalee Mootisaa Galamsooti qunname. Waraani Jiysaa facca’ee, humni diinaa injifatus, akkasuma Muceen amma lubuun darbuu fi booji’amuu baatus, kana booda Ona Waccaalee keessatti lola daagguu(Lola dagaa, Guirrila fighting) gaggeessuuf dirqame.
Gaafa guyyaa haggayya 15 Loltooni Minilikii fi walda Gabri’eel walitti makamanii gamtaa uumuun gara bahaa sochii jalqaban. Magaalaa gudditti baha Afriikaa Adaree biyyoo too’achuun, Minilikiif dhimma jiraachuu fi jiraachuu dhabuuti.
