06/09/2024
✨იმედი ნუ მოგიშალოთ ღმერთმა!✨
------------------------------------------
ალბათ ხშირად გსმენიათ გამოთქმა, ან თავადაც არაერთხელ გითქვამთ, რომ “ბრძოლას ყოველთვის აქვს აზრი.” შესაძლოა განგიცდიათ კიდეც გამარჯვებით ან მიღწევით გამოწვეული ეიფორია და ბედნიერება.
ფსიქოლოგიაში აღნიშნულ ფენომენს იმედს ვუწოდებთ, რომელიც ფსიქიკური ჯანმრთელობისთვის ერთერთ უმნიშვნელოვანეს ფაქტორს წარმოადგენს.
იმედი ეს არის შინაგანი რწმენა, რომლის განცდის დროსაც თავის ტვინში ქიმიური რეაქციები აღიძრება - გამოთავისუფლდება ენკეფალინი და ენდორფინი, ნეიროპეპტიდები, რაც ხელს უწყობს ადამიანში სტრესის დონის შემცირებას და პროდუქტიულობის გაზრდას.
“იმედის თეორიის” მიხედვით, რომელიც ამერიკელმა ფსიქოლოგმა ჩარლზ სნაიდერმა შემოგვთავაზა (Snyder, 2002), იმედი არის აღქმული შესაძლებლობა და საკუთარი თავის მოტივირება სასურველი მიზნებისკენ სვლაში, შესაბამისად, იმედი შთაბერავს ადამიანებს ნებისყოფას, აძლევს განსაზღვრულობისა და გაძლიერების განცდას, რაც მნიშვნელოვნად ეხმარება მათ დასახული მიზნების მიღწევაში.
აგრეთვე, საინტერესოა იმედსა და ოპტიმიზმს შორის განსხვავება - ოპტიმიზმი არის ზოგადი რწმენა იმისა, რომ უფრო კარგი რაღაცები მოხდება, ვიდრე ცუდი, მაშინ როდესაც იმედი არის რწმენა, რომ თავად შეგიძლია და გაქვს უნარი შეცვალო, გააუმჯობესო და პოზიტიური გავლენა მოახდინო იმაზე, რაც შენს გარშემო ხდება.
ამრიგად, როცა კი პესიმიზმი და ნეგატიური განცდები შემოგეპარებათ, ღრმად ჩაისუნთქეთ და ამოისუნთქეთ,
და ყოველთვის იქონიეთ იმედი, რომ ბრძოლას ყოველთვის აქვს აზრი სასურველი მიზნების მისაღწევად!
✨✨✨✨✨✨✨✨✨✨✨✨✨
