18/04/2025
🇬🇱 Kalaallit Nunaanni ernisussiortuunermi ernisussaanermilu eqqarsaatit 💭🤍
***
Immikkoortoq siulleq.
Ippassaq iluatsitseqalunga Nuummi ernisunut immikkoortortaqarfimmi oqilisaasseqataallunga unnuk atorpara. Ilaannikkut suli takanani sulisinnaasarama, tassami ernisitsineq maqaasisarakku.
Ippassaq suliartorpunga ulapaarfioqisumut. Misissortittarfiit pingasut. Ernisarfiit pingasut. Inilu isertunut aallertarfik ataaseq. Tamarmik ulikkaaqqasut.
Nalinginnaasumik agguaqatigiisillugu ullup ataatsip ingerlanerani meeqqat 1,5-it Nuummi inunngortarput. Ullulli pingasut kingulliit, ullut tamaasa ullormut meeqqat sisamat inunngorsimallutik. Ulapaarneq ersarippoq.
Suliffissanik allattorsimaffimmi takuneqarsinnaavoq ernisussiortutut atorfiit arlallit inussaqanngitsut. Ernisussiortut taartaanissamut suliffissat qinnuteqarfigisanngilaat. Kalaallit Nunaanni akissarsiat annikippallarput, nunanut avannarlernut allanut sanilliullugu. Nuummi ernisussiortut ullut sulinngiffissatik atornagit suliinnartaqattaarnerini, illoqarfinni allani ernisarfiit matoorarneqarput, ernisussallu Nuummut erniartortussanngortinneqarput taamaalilluni ernisussiortut suli sulinerulertussanngorlutik.
Siunissami Nuummiinnaq ernisinnaalernissaq pinaveersaartissagutsigu iliuuseqartariaqarpugut. MAANNAKKUT.
Nuummi ernisussiortoqarlunilu nakorsaqarpoq naartusunik tamanik ikiuusinnaasunik, Nuummi aammalu illoqarfinni allani najugalinnik naartunerminnilu ernumanaateqarsinnaasunik ikiuisinnaasunik. Nuummi ernisarfik naammattunik isumalluutissaqanngilaq (init ernisarfiit aammalu ernisussiortut) maannamiit amerlanerusunik ernisoqartalernissaanut. Punktum.
***
Immikkoortup aappaa.
Nunatsinni Ernisussiortut Kattuffiat matusigallarnermut erngertumik qisuariaateqarpoq. Piffissap sivikitsup iluani naartusut qanoq tamatumunnga isiginninnerat allaaserineqarpoq:
Arlalissaanik ernisussat marluk, meeqqamik pisariaqartitaat Nuummukarnissamut billetsit akianit pingaarnerutippaat – taamaallaalli nammineq akissaqaramik. Allat naartusut meeqqatik sapaatit akunneri sisamaniit arfineq-marluk tikillugit qimaqqasariaqartarpaat.
Aammalu siullermeerluni ernisussaq, Nuummut erniartortitaanissaminik naammangittaalliorsimasoq. Ilumoorpoq, eqqunngissorinarpoq nunatsinni illoqarfiit annersaasa aappaanni nammineq illoqarfigisami ernisinnaannginneq.
Kisianni paasitinneqarpa nammineq timiminut aaliangiisinnaatitaasoq? Sumiluunniit erniffigerusutamini ernisinnaavoq! Illoqarfinni tamani ernisussiortoqarpoq. Taamaallaalli pilattaanermi ikiuussinnaasut Nuummiipput (aamma Ilulissani Tasiilamilu). Aaliangeraanni illoqarfimmi ernisarfittut allattorsimanngittumi ernissalluni, nalunaarsorneqartarpoq “innersuussaq malinneqanngittoq”. Ima paasillugu, arlaannik ajortoqassangaluarpat akisussaaffik kimulluunniit tunniunneqarsinnaanngilaq.
Arnaq peqqissoq, nalinginnaasumik naartusoq aammalu nalinginnaasumik ernisinnaasutut naatsorsuussaq ajornartorsiutitaqanngitsumik ernikkajunnerusarpoq. Nakorsamik ikiorneqarnissamik pisariaqanngitsumik.
Napparsimaveqarfiit tamaviaarput. Kisianni naammanngilaq. Politikkikkut iliuuseqartoqartariaqarpoq. Aammalu tamassinni NILLIAATIGINEQARTARIAQARPOQ. Tamassi maanna naartususi, naartusumik nalunngisaqartusi, erninikumik nalunngisaqartusi, erninikumik angajoqqaaqartusi, ernisussamik ilaqutaqartuususi immaqaluunniit pitsaanerulersitsinissamik kissaateqartusi.
Ataatsimoorluta sorsoqatigiitta 💪
