26/10/2025
【我的殯儀日常】一次令我哭笑不得的查詢
從事殯儀業，我明白主家喺辦理喪事期間，會因為經驗不足同悲傷而充滿疑問。所以，我為每一家主都特設一個WhatsApp群組，方便發放回魂夜須知、物品清單等資料，更重要係可以隨時解答問題。
入行咁耐，自問咩情況都見過啲……但今次，真系第一次遇到咁特別嘅情景！（見圖）
事緣我同主家講，要為先人準備一袋陪葬衣物，亦都清楚交代咗個袋需要嘅Size。點知有一日，群組突然彈出一張相——
我一打開WhatsApp，居然見到主家自己坐咗入個袋度！
我當下真係忍唔住即刻問：「點解你哋會坐咗入去㗎？！」
哎啊！大家千祈唔好誤會，我絕對唔系笑緊佢哋。
呢家嘅主家都係年青人，佢哋正正因為唔想求其、唔想做漏任何一樣嘢俾自己嘅先人，先會用咁認真、甚至帶點搞笑嘅方法去確認個袋啱唔啱Size！呢份心意，我係感受到嘅。
見得多後生仔辦喪禮，有啲真係比較馬虎，甚至試過有主家同我講「費事執」，連陪葬衣物都唔想準備。相比之下，今次呢班年青人嘅認真同投入，真係令我印象深刻。
順帶分享一個小知識：陪葬衣物準備D咩？
· 通常系先人生前鐘意著過嘅衣物
· 包括四季嘅上衫、下裳（裙或褲）
· 必須有一條長褲（華人傳統寓意「長富」，願先人同後人都富足）
· 內衣、鞋襪
· 慣用物品：書籍、拐杖、撲克牌等
· 宗教信仰物品：佛珠、經書、念珠、聖經等
希望大家唔好覺得呢個話題忌諱，瞭解多啲，到時就可以用最妥善嘅方式送別先人。
#香港殯儀 #陪葬衣物 #殯儀小知識 #年輕主家 #傳統禮儀 #長富長褲
#道教殯儀 #殯儀寶姐
